മഴയ്ക്ക് ശമനമുണ്ടായതോടെ കോഴിക്കോട് ജില്ലയിലെ ദുരിതാശ്വാസക്യാമ്പുകളിൽ നിന്നും ആളുകൾ വീടുകളിലേക്ക് മടങ്ങാൻ തുടങ്ങി. ജില്ലയിലെ വിവിധ താലൂക്കുകളിലായി അഞ്ച് ക്യാമ്പുകളാണ് പ്രവർത്തിക്കുന്നത്. 19 കുടുംബങ്ങളിൽ നിന്നായി 47 പേരാണ് ക്യാമ്പുകളിൽ താമസിക്കുന്നത്. 

കോഴിക്കോട് താലൂക്കിൽ രണ്ടു വില്ലേജുകളിലെ രണ്ടു ക്യാമ്പുകളിലായി 19 പേരുണ്ട്.  മാവൂർ ജിഎംയുപി സ്‌കൂളിൽ ആറ് കുടുംബത്തിലെ 13 പേരും കടലുണ്ടി വില്ലേജിൽ വട്ടപ്പറമ്പ ജിഎൽപി സ്‌കൂളിൽ ഒരു കുടുംബത്തിലെ ആറ് പേരുമാണ് ക്യാമ്പിൽ താമസിക്കുന്നത്.

നാഷണൽ ട്രസ്റ്റ് എൽഎൽസി, കോഴിക്കോട് ജില്ലാ സമിതിയും ഡി ലൈൻ സ്‌കൂൾ ഓഫ് ഡിസൈനും സംയുക്തമായി   സ്വാതന്ത്ര്യ ദിനാചരണത്തിന്റെ ഭാഗമായി   22 കാരറ്റ്  ഗോൾഡ് മെഡലിനായുള്ള  രണ്ടാമത് ഓൾ കേരള ഓൺലൈൻ ചിത്ര രചനാ മത്സരം സംഘടിപ്പിക്കുന്നു. ഒരു ഓൺലൈൻ സംവിധാനത്തിൽ ആദ്യമായാണ് ഓൾ കേരള തലത്തിൽ  ചിത്രരചന മൽസരം നടത്തുന്നത്. രണ്ടു കാറ്റഗറികളിലായാണ് മത്സരം നടത്തുന്നത്. നാഷണൽ ട്രസ്റ്റ് ആക്ടിന്റെ പരിധിയിൽ വരുന്ന ബുദ്ധിപരമായ വെല്ലുവിളി നേരിടുന്ന ഓട്ടിസം, സെറിബ്രൽ പാൾസി, മെന്റൽ റിട്ടാർഡേഷൻ, മൾട്ടിപ്പിൾ ഡിസെബിലിറ്റിയുള്ള വിദ്യാർത്ഥികളാണ് ആദ്യ കാറ്റഗറിയിൽ.

കോവിഡ് 19 മായി ബന്ധപ്പെട്ട് ആശ്വാസ പ്രവര്‍ത്തനങ്ങളുടെ ഭാഗമായി സര്‍ക്കാര്‍ വിതരണം ചെയ്യാന്‍ തീരുമാനിച്ച ഭക്ഷ്യ വിഭവ കിറ്റ് എ.എ.വൈ കാര്‍ഡുടമകള്‍ക്ക് ഇന്ന് (ആഗസ്റ്റ് 13) മുതല്‍ വിതരണം ചെയ്യുമെന്ന് ജില്ലാ സപ്ലൈ ഓഫീസര്‍ അറിയിച്ചു. ജൂലൈയിൽ റേഷന്‍ കൈപ്പറ്റിയ റേഷന്‍ കടയില്‍ നിന്നും കിറ്റ് കൈപ്പറ്റാം.

കേരള ഷോപ്‌സ് ആന്‍ഡ് കൊമേഴ്‌സ്യല്‍ എസ്റ്റാബ്ലിഷ്‌മെന്റ്‌സ് വര്‍ക്കേഴ്‌സ് വെല്‍ഫെയര്‍ ഫണ്ട് ബോര്‍ഡിലെ അംഗങ്ങളുടെ മക്കള്‍ക്ക് സ്കോളർഷിപ്പിന് അപേക്ഷിക്കാം.  2020-2021 അദ്ധ്യയന വര്‍ഷത്തില്‍ പ്ലസ്സ് വണ്‍ മുതല്‍ പോസ്റ്റ് ഗ്രാജുവേറ്റ് കോഴ്‌സുകള്‍ വരെയും, പ്രൊഫഷണല്‍ കോഴ്‌സുകള്‍ ഉള്‍പ്പെടെയുള്ള വിവിധ കോഴ്‌സുകൾക്കുമാണ് അപേക്ഷ ക്ഷണിച്ചത്. അപേക്ഷാ ഫോറം ഓഫീസില്‍ നിന്ന് നേരിട്ടും peedika.kerala.gov.in എന്ന  വെബ് സൈറ്റില്‍ നിന്നും ലഭിക്കും.  അപേക്ഷ സ്വീകരിക്കുന്ന അവസാന തീയ്യതി സെപ്തംബര്‍ 30. കൂടുതല്‍ വിവരങ്ങള്‍ക്ക് : 0495 2372434. 

കോവിഡ് 19-ന്റെ  പശ്ചാത്തലത്തില്‍  മാറ്റിവെച്ചിരുന്ന അപ്രന്റീസ് ക്ലര്‍ക്കുമാരുടെ ഇന്റര്‍വ്യൂ ആഗസ്റ്റ്  21 ന്  രാവിലെ 10 മണിക്ക് കോഴിക്കോട്  ജില്ലാ  പട്ടികജാതി  വികസന ഓഫീസില്‍ നടത്തുമെന്ന് ജില്ലാ പട്ടികജാതി വികസന ഓഫീസര്‍ അറിയിച്ചു. 

കേരള കെട്ടിടനിര്‍മ്മാണ തൊഴിലാളി ക്ഷേമ ബോഡില്‍ നിന്നും മെംബര്‍ പെന്‍ഷന്‍, കുടുംബപെന്‍ഷന്‍, അവശതാ പെന്‍ഷന്‍ വാങ്ങിക്കൊണ്ടിരിക്കുന്ന ഗുണഭോക്താക്കളില്‍ ഇനിയും ബയോമെട്രിക് മസ്റ്ററിംഗ് പൂര്‍ത്തീകരിക്കാത്തവര്‍ക്ക് അക്ഷയ കേന്ദ്രങ്ങളില്‍ നിന്നും മസ്റ്ററിംഗ് നടത്താവാനുളള സമയം ആഗസ്റ്റ് 16 വരെ ദീര്‍ഘിപ്പിച്ചതായി ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. ഫോണ്‍ : 0495 2365553. 

വടകര താലൂക്കിലെ മുഴുവന്‍ കോഴി ഇറച്ചി വ്യാപാരികളും ഒരുകിലോ കോഴി ഇറച്ചിക്ക്  150 രൂപയില്‍  കൂടുതല്‍ ഈടാക്കാന്‍ പാടില്ലെന്ന് വടകര താലൂക്ക് സപ്ലൈ ഓഫീസര്‍ അറിയിച്ചു.  വ്യാപാരികള്‍ നിര്‍ബന്ധമായും പൊല്യൂഷൻ കൺട്രോള്‍ സര്‍ട്ടിഫിക്കറ്റ് നേടിയിരിക്കണം. ജീവനക്കാര്‍ മാസ്‌ക് ധരിക്കണം. ഹെല്‍ത്ത് കാര്‍ഡ് ഉള്ളവരുമായിരിക്കണം. വില എഴുതിവെച്ചു മാത്രമേ കച്ചവടം നടത്താന്‍ പാടുള്ളുവെന്നും സപ്ലൈ ഓഫീസർ അറിയിച്ചു. 

ഗതാഗത മന്ത്രി എ.കെ ശശീന്ദ്രന്‍ പതാക ഉയര്‍ത്തും

ഈ വര്‍ഷത്തെ സ്വാതന്ത്ര്യ ദിനാഘോഷ പരിപാടി വെസ്റ്റ്ഹില്‍ ക്യാപ്റ്റന്‍ വിക്രം മൈതാനത്ത് രാവിലെ ഒന്‍പത് മണിക്ക് നടക്കും. ചടങ്ങില്‍ ഗതാഗത വകുപ്പ് മന്ത്രി എ.കെ ശശീന്ദ്രന്‍ മുഖ്യാതിഥിയാകും. ജില്ലാ കലക്ടര്‍, ജില്ലാ പോലിസ് മേധാവി എന്നിവര്‍ സന്നിഹിതരാകും. കോവിഡ്, ഗ്രീന്‍ പ്രോട്ടോക്കോള്‍ പാലിച്ചാണ് ആഘോഷം സംഘടിപ്പിക്കുന്നത്. ജില്ലാതലത്തില്‍ രാവിലെ ഒന്‍പത് മണിക്ക് മന്ത്രി ദേശീയ പതാക ഉയര്‍ത്തും. പങ്കെടുക്കുന്നവരുടെ എണ്ണം 100 ആയി പരിമിതപ്പെടുത്തിയിട്ടുണ്ട്.