ഇരവിപേരൂര്‍ ഗ്രാമപഞ്ചായത്തിലെ വാര്‍ഡ് 4, 15 കലഞ്ഞൂര്‍ ഗ്രാമപഞ്ചായത്തിലെ വാര്‍ഡ് 16, പന്തളം നഗരസഭയിലെ വാര്‍ഡ് 20, 21, കലഞ്ഞൂര്‍ ഗ്രാമപഞ്ചായത്തിലെ വാര്‍ഡ് 15 ല്‍ ഉള്‍പ്പെട്ടിട്ടുള്ള കലഞ്ഞൂര്‍ ജംഗ്ഷന്‍ പ്രദേശം, കലഞ്ഞൂര്‍ ഗ്രാമപഞ്ചായത്തിലെ വാര്‍ഡ് 17 ല്‍ ഉള്‍പ്പെട്ടിട്ടുള്ള മണലുവിള, പോസ്റ്റ് ഓഫീസ് ജംഗ്ഷന്‍ പ്രദേശം എന്നീ സ്ഥലങ്ങളില്‍ 2020 ആഗസ്റ്റ് 13 മുതല്‍ ഏഴു ദിവസത്തേക്ക് കണ്ടെയ്ന്‍മെന്റ് സോണ്‍ നിയന്ത്രണം.

പത്തനംതിട്ട ജില്ലയില്‍ ദുരിതാശ്വാസ ക്യാമ്പുകളില്‍ കഴിഞ്ഞവരില്‍ കൂടുതല്‍ പേര്‍ വീടുകളിലേക്കു മടങ്ങി. നിലവില്‍ അഞ്ചു താലൂക്കുകളിലെ 71 ദുരിതാശ്വാസ ക്യാമ്പുകളില്‍ കഴിയുന്നതു 1255 കുടുംബങ്ങളിലെ 4121 പേരാണ്. ഇതില്‍ 1686 പുരുഷന്‍മാരും 1776 സ്ത്രീകളും 659 കുട്ടികളും ഉള്‍പ്പെടുന്നു. 

ക്യാമ്പുകളില്‍ കഴിയുന്നവരില്‍ 60 വയസിനു മുകളിലുള്ള 247 പേരും ഉള്‍പ്പെടും. കോന്നി താലൂക്കിലെ ക്യാമ്പുകളില്‍ നിന്നും മഴ കുറഞ്ഞതോടെ എല്ലാവരും വീടുകളിലേക്കു മടങ്ങി.

കോവിഡ് 19 വ്യാപനം തടയുന്നതിനുള്ള വിവിധ നടപടിക്രമങ്ങളുടെ നടത്തിപ്പിലും, പ്രോട്ടോകോള്‍ നിബന്ധനകള്‍ പാലിക്കപ്പെടുന്നത് ഉറപ്പാക്കുന്നതിലും ഇടപെടുന്നുണ്ടെന്ന് ജില്ലാപോലീസ് മേധാവി കെ.ജി. സൈമണ്‍ പറഞ്ഞു.  രോഗബാധിതരുടെയും സമ്പര്‍ക്കത്തിലുള്ളവരുടെയും വിവരശേഖരണം ഉള്‍പ്പെടെയുള്ള നടപടികള്‍ ചെയ്തു വരുന്നു. ഭൗതികമായും ഇലക്ട്രോണിക് രീതികളിലൂടെയും ജനമൈത്രി പോലീസിനെ ഉപയോഗപ്പെടുത്തി ഈ നടപടി ചെയ്യുന്നുണ്ട്. 

 സ്വാതന്ത്ര്യദിന പരേഡ് കോവിഡ് പ്രോട്ടോകോള്‍ പൂര്‍ണമായും  പാലിച്ച് നടത്തുമെന്ന് ജില്ലാപോലീസ് മേധാവി കെ.ജി. സൈമണ്‍ പറഞ്ഞു. പോലീസിന്റെ ഡി എച്ച് ക്യു, ലോക്കല്‍, വനിതാ പോലീസ് എന്നീ വിഭാഗങ്ങളില്‍ നിന്നും ഓരോ പ്ലാറ്റൂണുകളും, ഫോറസ്റ്റ്, എക്‌സൈസ് എന്നീ വകുപ്പുകളുടെ ഓരോ പ്ലാറ്റൂണുകളും പരേഡില്‍ പങ്കെടുക്കും. ആഘോഷ പരിപാടികള്‍ പരിമിതപ്പെടുത്തിയിട്ടുണ്ട്.  പൊതുജനങ്ങള്‍, വിദ്യാര്‍ഥികള്‍, മുതിര്‍ന്ന പൗരന്മാര്‍ എന്നിവരെ ഒഴിവാക്കിയിട്ടുണ്ട്. ക്ഷണിതാക്കളുടെ എണ്ണം 100 ആയി നിജപ്പെടുത്തി. 

   കോവിഡ് 19 പ്രതിരോധ പ്രവര്‍ത്തനത്തിന്റെ ഭാഗമായി കൊടുമണ്‍ പഞ്ചായത്തില്‍ നൂറ് കിടക്കകളോടെ ആരംഭിച്ച സി.എഫ്.എല്‍.ടി.സി ചിറ്റയം ഗോപകുമാര്‍ എംഎല്‍എ ഉദ്ഘാടനം ചെയ്തു. ഐക്കാട് ഐ.ടി.സിയിലാണ് സെന്റര്‍ തയാറായിട്ടുള്ളത്. ഗ്രാമപഞ്ചായത്ത് പ്രസിഡന്റ്് കുഞ്ഞന്നാമ്മ കുഞ്ഞ്, വൈസ് പ്രസിഡന്റ് എം ആര്‍ എസ്  ഉണ്ണിത്താന്‍, തഹസീല്‍ദാര്‍ ബീന.എസ്.ഹനീഫ്, പഞ്ചായത്ത് ഡെപ്യൂട്ടി ഡയറക്ടര്‍ ഷാജി ബോണ്‍സലെ, അസി. ഡയറക്ടര്‍ രാജേഷ് കുമാര്‍, ഗ്രാമ പഞ്ചായത്ത് അംഗങ്ങളായ എന്‍.കെ. ഉദയകുമാര്‍, ലളിത രവീന്ദ്രന്‍, ശാരദ, ഡോ. ഹാരീഷ്, ഡോ. ദീപ്തി ലാല്‍, പഞ്ചായത്ത് സെക്രട്ടറി ബിന്ദു എന്നിവര്‍ സംസാരിച്ചു.

പത്തനംതിട്ട ജില്ലാ സ്റ്റേഡിയത്തില്‍ ഓഗസ്റ്റ് 15ന് കോവിഡ് മാനദണ്ഡങ്ങള്‍ പാലിച്ച് നടത്തുന്ന ഭാരതത്തിന്റെ 74-ാമത് സ്വാതന്ത്ര്യ ദിനാഘോഷ ചടങ്ങില്‍ മുഖ്യാതിഥിയായി മത്സ്യബന്ധന, തുറമുഖ എന്‍ജിനീയറിംഗ്, കശുവണ്ടി വ്യവസായ വകുപ്പ് മന്ത്രി ജെ. മേഴ്‌സിക്കുട്ടിയമ്മ പങ്കെടുക്കും. മന്ത്രി ജെ. മേഴ്‌സിക്കുട്ടിയമ്മ ദേശീയ പതാക ഉയര്‍ത്തി പരേഡ് പരിശോധിച്ച് സല്യൂട്ട് സ്വീകരിക്കും. കോവിഡ് മാനദണ്ഡങ്ങള്‍ പാലിച്ച് ചടങ്ങുകള്‍ പരിമിതപ്പെടുത്തിയിട്ടുണ്ട്.

പ്രളയ മുന്നൊരുക്കത്തിന്റെ ഭാഗമായി പത്തനംതിട്ട ജില്ലയിലെത്തിയ മത്സ്യത്തൊഴിലാളികളുടെ അവസാന ബാച്ച് വള്ളങ്ങളും കൊല്ലത്തേക്കു മടങ്ങി. തിരുവല്ലയില്‍ നിന്നുള്ള നാലു വള്ളങ്ങളും ഇരുപതോളം മത്സ്യത്തൊഴിലാളികളുമാണ് അവസാനമായി നാട്ടിലേക്കു തിരികെപോയത്. 

കൊല്ലം നീണ്ടകരയില്‍ നിന്നെത്തിയ മത്സ്യതൊഴിലാളികളാണ് ഇവര്‍. വെള്ളപ്പൊക്ക ഭീഷണി നേരിട്ടിരുന്ന തിരുവല്ലയുടെ പടിഞ്ഞാറന്‍ പ്രദേശങ്ങളായ നിരണം, കടപ്ര, നെടുമ്പ്രം പഞ്ചായത്തുകളിലാണു നാലു വള്ളങ്ങളും നിലയുറപ്പിച്ചിരുന്നത്. വള്ളങ്ങള്‍ നിലയുറപ്പിച്ച ഇടങ്ങളില്‍തന്നെ ഇവര്‍ക്കുവേണ്ട താമസസൗകര്യങ്ങളും ഭക്ഷണവും അധികൃതര്‍ ലഭ്യമാക്കിയിരുന്നു. 

കാലവര്‍ഷത്തില്‍ ബുധനാഴ്ചവരെയുള്ള (ആഗസ്റ്റ് 12) അഞ്ച് ദിവസങ്ങളില്‍ ജില്ലയില്‍ 16.879 കോടി രൂപയുടെ കൃഷിനാശം സംഭവിച്ചതായി കൃഷി വകുപ്പിന്റെ പ്രാഥമിക കണക്ക്. ജില്ലയില്‍ 6826 കര്‍ഷകരുടെ 452.94 ഹെക്ടര്‍ സ്ഥലത്തെ കൃഷി വിളകള്‍ക്കാണു നാശം ഉണ്ടായിരിക്കുന്നത് എന്നാണ് പ്രാഥമിക കണക്ക്. 

ഏറ്റവും കൂടുതല്‍ എണ്ണം നാശനഷ്ടം ഉണ്ടായിരിക്കുന്നതു വാഴ കര്‍ഷകര്‍ക്കാണ്. 115.67 ഹെക്ടര്‍ സ്ഥലത്തെ 1809 കര്‍ഷകരുടെ 1,74,988 കുലച്ചവാഴകള്‍ കാലവര്‍ഷത്തില്‍ നശിച്ചു. 81.12 ഹെക്ടര്‍ സ്ഥലത്തെ 1567 കര്‍ഷകരുടെ 1,04,221 കുലയ്ക്കാത്ത വാഴകളും കാലവര്‍ഷത്തില്‍ നശിച്ചു.