എം.പി ലാഡ്‌സ് പദ്ധതിയില്‍ ഉള്‍പ്പെടുത്തി നിര്‍ദ്ദേശിച്ച പ്രവൃത്തികളുടെ പുരോഗതി വിലയിരുത്തുന്നതിനായി അവലോകന യോഗം ജൂലൈ 15, 16 തീയതികളില്‍ വൈകുന്നേരം 3.30ന് കലക്ടറേറ്റ് സമ്മേളന ഹാളില്‍ ചേരും. 

പട്ടികജാതി വിഭാഗക്കാര്‍ക്ക് കേരള സ്റ്റേറ്റ് റൂട്രോണിക്സിന്റെ  പ്രീ പ്രൈമറി ടീച്ചേഴ്സ് ട്രെയിനിങ് കോഴ്സിലേക്ക്  സൗജന്യമായി പഠിക്കുന്നതിന് അപേക്ഷ ക്ഷണിച്ചു.  കോഴ്സുകള്‍ക്ക് സൗജന്യ പരിശീലനം ലഭിക്കുന്നതിനായി യോഗ്യത, ജാതി, വരുമാന സര്‍ട്ടിഫിക്കറ്റുകള്‍, ഫോട്ടോ, തിരിച്ചറിയല്‍ രേഖ എന്നിവ സഹിതം അംഗീകൃത പരിശീലന കേന്ദ്രമായ ട്രസ്റ്റ് കംപ്യുട്ടേഴ്സ്, രാജാജി അക്കാദമി, കുന്നുമ്മല്‍ (എ യു പി സ്‌കൂളിന് സമീപം ), മലപ്പുറം എന്ന വിലാസത്തില്‍ അപേക്ഷകള്‍  ജൂലൈ 18 നകം ലഭിക്കണം. ഫോണ്‍ : 0483 2737177, 9847247066.

    തിരൂര്‍ താലൂക്ക് ശ്രീ. താനാളൂര്‍ നരസിംഹമൂര്‍ത്തി ക്ഷേത്രത്തില്‍ പാരമ്പര്യേതര ട്രസ്റ്റിമാരുടെ ഒഴിവിലേക്ക് ട്രസ്റ്റികളായി നിയമിക്കപ്പെടുന്നതിന് ഹിന്ദുമത ധര്‍മ്മസ്ഥാപന നിയമ പ്രകാരം അര്‍ഹരായ തദ്ദേശ വാസികളില്‍ നിന്നും അപേക്ഷ ക്ഷണിച്ചു.  അപേക്ഷ ജൂലൈ 24ന് വൈകുന്നേരം അഞ്ചിനകം തിരൂര്‍ മിനി സിവില്‍ സ്റ്റേഷനിലെ മലബാര്‍ ദേവസ്വം ബോര്‍ഡ് മലപ്പുറം അസിസ്റ്റന്റ് കമ്മീഷണറുടെ ഓഫീസില്‍ ലഭിക്കണം.

    ആരാധനാലയങ്ങള്‍ക്ക് ഭക്ഷ്യസുരക്ഷാ രജിസ്‌ട്രേഷന്‍ നടപ്പാക്കുന്നതിന് ബി.എച്ച്.ഒ.ജി സംവിധാനം ഏര്‍പ്പെടുത്തിയിട്ടുള്ളതിനാല്‍ മലബാര്‍  ദേവസ്വം ബോര്‍ഡ് മലപ്പുറം ഡിവിഷനു കീഴിലുള്ള എല്ലാ ക്ഷേത്രങ്ങളിലെ ഭരണാധികാരികളും അക്ഷയ കേന്ദ്രവുമായി ബന്ധപ്പെട്ട് രജിസ്‌ട്രേഷന്‍ എടുക്കണമെന്ന്  മലബാര്‍ ദേവസ്വം ബോര്‍ഡ് മലപ്പുറം അസിസ്റ്റന്റ് കമ്മീഷണര്‍ അറിയിച്ചു.

    മനുഷ്യാവകാശ കമ്മീഷന്‍ അംഗം കെ. മോഹന്‍കുമാര്‍ ജൂലൈ 25ന്  തിരൂര്‍ റസ്റ്റ് ഹൗസില്‍ ക്യാമ്പ് സിറ്റിങ് നടത്തും.

    നിലമ്പൂര്‍ ഇന്ദിരാഗാന്ധി മെമ്മോറിയല്‍ മോഡല്‍ റസിഡന്റല്‍ ഹയര്‍ സെക്കന്‍ഡറി സ്‌കൂളില്‍ വിവിധ വിഷയങ്ങളില്‍ അധ്യാപകരെ ദിവസ വേതനാടിസ്ഥാനത്തില്‍ നിയമിക്കുന്നു.  എച്ച്.എസ്.ടി ജീവശാസ്ത്രം, ഫിസിക്കല്‍ സയന്‍സ്, ഇംഗ്ലീഷ്, സോഷ്യല്‍ സയന്‍സ്, എല്‍.പി.എസ്.എ എന്നീ വിഭാഗങ്ങളില്‍ ഓരോ ഒഴിവിലേക്കാണ് നിയമനം.  താത്പര്യമുള്ളവര്‍ കൂടിക്കാഴ്ചക്കായി അസ്സല്‍ രേഖകള്‍ സഹിതം ജൂലൈ എട്ടിന് രാവിലെ 10ന് സ്‌കൂളില്‍ ഹാജരാകണം. ഫോണ്‍ 04931 224194, 220194.

       
      പെരിന്തല്‍മണ്ണ ഗവ. പോളിടെക്‌നിക് കോളേജില്‍ കാര്‍പ്പെന്ററി, ഡീസല്‍മെക്കാനിക്ക് എന്നീ വിഭാഗങ്ങളില്‍ ഒന്നു വീതം ട്രേഡ്‌സ്മാന്‍ ഒഴിവുണ്ട്.   കാര്‍പ്പെന്ററി ട്രേഡസ്മാന് കാര്‍പ്പെന്ററി ട്രേഡില്‍ ഐ.ടി.ഐ യും, ഡീസല്‍ മെക്കാനിക്ക് ട്രേഡ്‌സ്മാന് ബന്ധപ്പെട്ട ട്രേഡില്‍ ഐ.ടി.ഐ. യും ഓട്ടോമൊബൈല്‍ ഫീല്‍ഡിലുളള പ്രവര്‍ത്തന പരിചയവും അഭികാമ്യം.  താത്പര്യമുളള ഉദ്യോഗാര്‍ത്ഥികള്‍  ജൂലൈ 5 ന് രാവിലെ 10ന് അസല്‍ സര്‍ട്ടിഫിക്കറ്റുകളും പകര്‍പ്പും  സഹിതം   കൂടിക്കാഴ്ചയ്ക്ക് ഹാജരാകണം.