അസംഘടിത തൊഴിലാളി സാമൂഹ്യസുരക്ഷാ ബോര്‍ഡില്‍നിന്നും ക്ഷേമനിധി അംഗങ്ങള്‍ക്ക് ലഭിക്കുന്ന  കോവിഡ് 19 ധനസഹായമായ 1000 രൂപയ്ക്കുള്ള അപേക്ഷ ഇതുവരെ സമര്‍പ്പിക്കാത്ത അംഗങ്ങള്‍  http://boardswelfareassistance.lc.kerala.gov.in എന്ന വെബ്‌സൈറ്റ് മുഖേന  അപേക്ഷ നല്‍കണം. അപേക്ഷ സമര്‍പ്പിക്കേണ്ട അവസാന തീയതി ജൂണ്‍ 30.

ഇതര സംസ്ഥാനങ്ങളില്‍നിന്ന് ന്യൂഡല്‍ഹി-തിരുവനന്തപുരം സ്‌പെഷല്‍ ട്രെയിനില്‍ വെള്ളിയാഴ്ച (ജൂണ്‍ 26) പത്തനംതിട്ട സ്വദേശികളായ രണ്ടു പേരും നിസാമുദ്ദീന്‍ - എറണാകുളം സ്‌പെഷല്‍ ട്രെയിനില്‍ പത്തുപേരും എത്തി. ഇവരില്‍ അഞ്ചു പേര്‍ വീടുകളിലെത്തി നിരീക്ഷണത്തിലും ഏഴു പേര്‍ ഇന്‍സ്റ്റിറ്റിയൂഷണല്‍ ക്വാറന്റൈനിലും പ്രവേശിച്ചു.        

ഫെഡറല്‍ ബാങ്ക് ജീവനക്കാരായ സുഹൃത്തുക്കള്‍ തങ്ങളുടെ ശമ്പളത്തിന്റെ ഒരു ഭാഗം വിനിയോഗിച്ച് നിര്‍ധന വിദ്യാര്‍ഥികള്‍ക്ക് ഓണ്‍ലൈന്‍ പഠന സഹായത്തിനായി രണ്ട് ടിവി വാങ്ങി ജില്ലാ ഭരണകൂടത്തിന് കൈമാറി. ആറന്മുള സ്വദേശി കൃഷ്ണജിത്ത്, പന്തളം സ്വദേശി ദീപു ജോണ്‍സണ്‍, കോഴഞ്ചേരി സ്വദേശിനി അഞ്ജന എന്നിവര്‍ ചേര്‍ന്നാണ് 32 ഇഞ്ചിന്റെ രണ്ട് എല്‍ഇഡി ടിവികള്‍ വാങ്ങി നല്‍കിയത്.  ജില്ലാ കളക്ടര്‍ പി.ബി. നൂഹ് ടിവികള്‍ ഏറ്റുവാങ്ങി. ജില്ലാ ഫയര്‍ ഓഫീസര്‍ വി. വിനോദ് കുമാര്‍,  കൃഷ്ണജിത്ത്, ദീപു ജോണ്‍സണ്‍ എന്നിവര്‍ പങ്കെടുത്തു.
 

ഞായറാഴ്ചകളിൽ ഏർപ്പെടുത്തിയിരുന്ന സമ്പൂർണ്ണ ലോക്ക്ഡൗൺ ഇനിയൊരു ഉത്തരവ് ഉണ്ടാകുന്നതുവരെ പ്രാബല്യത്തിലുണ്ടായിരിക്കില്ലെന്ന് സർക്കാർ അറിയിച്ചു. എന്നാൽ രാത്രി ഒൻപതു മുതൽ വെളുപ്പിന് അഞ്ചുവരെയുള്ള രാത്രി കർഫ്യൂ ഞായറാഴ്ച ഉൾപ്പെടെ എല്ലാ ദിവസവും തുടരുമെന്നും ദുരന്ത നിവാരണ വകുപ്പ് പുറത്തിറക്കിയ ഉത്തരവിൽ പറയുന്നു.
പി.എൻ.എക്സ്. 2311/2020

കോവിഡ് പ്രതിരോധ പ്രവർത്തനങ്ങളിൽ ഉറവിട നിർണ്ണയത്തിൽ നിർണ്ണായക പങ്ക് വഹിക്കുന്ന 'ബ്രേക്ക് ദി ചെയിൻ ഡയറി' തയ്യാറാക്കി വിതരണം ചെയ്യാൻ വി.എച്ച്.എസ്.ഇ നാഷണൽ സർവീസ് സ്‌കീം വിദ്യാർഥികൾ തയ്യാറെടുക്കുന്നു.
സംസ്ഥാനത്തെ മുന്നൂറിൽപരം പഞ്ചായത്തുകളിലെ ഓട്ടോ-ടാക്‌സി ഡ്രൈവർമാർക്കും കടകൾക്കുമാണ് ആദ്യഘട്ടത്തിൽ വിദ്യാർഥികൾ 'ബ്രേക്ക് ദി ചെയിൻ ഡയറി' തയ്യാറാക്കി നൽകുന്നത്.

സുഭിക്ഷ കേരളം പദ്ധതിയുടെ ഭാഗമായി ഏഴംകുളം ഗ്രാമപഞ്ചായത്തിലെ പറക്കോട് തെക്ക് മണ്ണീറ ഏലായില്‍ നെല്‍ക്കൃഷിക്ക് തുടക്കമായി. മെഷീന്‍ ഉപയോഗിച്ച് ഞാറു നട്ട് ചിറ്റയം ഗോപകുമാര്‍ എം.എല്‍.എ ഉദ്ഘാടനം നിര്‍വഹിച്ചു. ഒരു ഹെക്ടര്‍  പാടശേഖത്തില്‍ പഞ്ചായത്തിലെ കാര്‍ഷിക കര്‍മ്മസമിതി അംഗങ്ങളാണു നെല്‍ക്കൃഷി ചെയ്യുന്നത്.

പന്തളം ബ്ലോക്ക് പഞ്ചായത്തിന്റെ നേതൃത്വത്തില്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് 10 ലക്ഷം രൂപ കൈമാറി. സംഭാവന കൈമാറിയതിന്റെ സര്‍ട്ടിഫിക്കറ്റ് പന്തളം ബ്ലോക്ക് പഞ്ചായത്ത് പ്രസിഡന്റ് രേഖാ അനില്‍ ജില്ലാ കളക്ടര്‍ പി.ബി. നൂഹിന് കൈമാറി. കളക്ടറേറ്റില്‍ നടന്ന ചടങ്ങില്‍ പന്തളം ബ്ലോക്ക് പഞ്ചായത്ത് വൈസ് പ്രസിഡന്റ് പി.ബി സതീഷ് കുമാര്‍, ബി.ഡി.ഒ അനു മാത്യു ജോര്‍ജ് എന്നിവര്‍ സന്നിഹിതരായിരുന്നു.

കോവിഡ് 19 പ്രതിരോധ പ്രവര്‍ത്തനങ്ങളുടെ ഭാഗമായി കോട്ടയം സോഷ്യല്‍ സര്‍വീസ് സൊസൈറ്റിയുടെ നേതൃത്വത്തില്‍ മെഡിക്കല്‍ ഉപകരണം കൈമാറി. 4,35,512 രൂപയുടെ എച്ച്-80 എം സീരീസ് ഹൈ ഫ്ളോ ഹ്യുമിഡിഫയര്‍ യൂണിറ്റാണ് ആന്റോ ആന്റണി എം.പിയുടെ സാന്നിധ്യത്തില്‍ സോഷ്യല്‍ സര്‍വീസ് സൊസൈറ്റി എക്സിക്യൂട്ടീവ് ഡയക്ടര്‍ ഫാ.സുനില്‍ പെരുമാനൂര്‍ ജില്ലാ കളക്ടര്‍ പി.ബി നൂഹിന് കൈമാറിയത്. 

കൊഗ്നിസെന്റ് ഫൗണ്ടേഷന്‍, സിബിഎം ഇന്ത്യാ ട്രസ്റ്റ് എന്നിവയുടേയും സഹകരണത്തോടെയാണു മെഡിക്കല്‍ ഉപകരണം കൈമാറിയത്. സോഷ്യല്‍ സര്‍വീസ് സൊസൈറ്റി പ്രൊജക്ട് ഓഫീസര്‍ ഷൈലാ തോമസ് സന്നിഹിതമായിരുന്നു.