ബ്രേക്ക് ദ ചെയ്ന്‍ ക്യാമ്പെയിന്‍ ജില്ലയില്‍ ഗ്രാമങ്ങളിലേക്ക് വ്യാപിപ്പിക്കുന്നു. യുവജനങ്ങളും ബഹുജന സംഘടനകളുമാണ് ക്യാമ്പയിന്‍ ഏറ്റെടുത്തത്. ആരോഗ്യ വകപ്പു തയ്യാറാക്കിയ ബോധവത്കരണ സന്ദേശങ്ങള്‍ ഉപയോഗിച്ചു തുടങ്ങിയ ബ്രേക് ദ ചെയിന്‍ കിയോസ്‌കുളില്‍ പൊതുജന പങ്കാളിത്തം വര്‍ധിച്ചു.

ജില്ലയില്‍ ഗൃഹനിരീക്ഷണത്തില്‍ 666 പേരും ആശുപത്രിയില്‍ ഏഴു പേരും ഉണ്ട്. 349 സാമ്പിളുകള്‍ ദേശീയ വൈറോളജി ഇന്‍സ്റ്റിറ്റ്യൂട്ടിലേക്ക് അയച്ചതില്‍ 81 എണ്ണത്തിന്റെ ഫലം കൂടി വരാനുണ്ട്. 268 പേരുടെ റിസല്‍റ്റ് വന്നതില്‍ എല്ലാം നെഗറ്റീവ് ആണ്. സ്ഥിതിഗതികള്‍ നിലവില്‍ നിയന്ത്രണ വിധേയമാണെന്നും വ്യാപനം തടയുന്നതിന്  മനുഷ്യ വിഭവശേഷി പൂര്‍ണമായും ഉപയോഗിക്കുമെന്നും ജില്ലാ മെഡിക്കല്‍ ഓഫീസര്‍ ഡോ വി വി ഷേര്‍ലി വ്യക്തമാക്കി.
കോവിഡ് 19 മായി ബന്ധപ്പെട്ട വിവരങ്ങള്‍ കൈമാറുന്നതിനും സംശയങ്ങള്‍ക്കും 8589015556, 0474-2797609, 1077, 7306750040(വാട്‌സ് ആപ് മാത്രം), 1056(ദിശ) എന്നീ നമ്പരുകളില്‍ ബന്ധപ്പെടാം.
 

പ്രതിദിനം 25000 കോട്ടണ്‍ മാസ്‌കുകള്‍ നിര്‍മിച്ച് ജില്ലയിലെ 58 കുടുംബശ്രീ യൂണിറ്റുകള്‍ കൊറോണ പ്രതിരോധ  പ്രവര്‍ത്തനത്തില്‍ ശ്രദ്ധേയരാകുന്നു. നെടുമ്പന, പുനലൂര്‍ അപ്പാരല്‍ യൂണിറ്റുകളില്‍ മാത്രം പ്രതിദിനം 15000 മാസ്‌കുകളാണ് നിര്‍മിക്കുന്നത്. എല്ലാ ബ്ലോക്കുകളിലേയും കുടുംബശ്രീ മൈക്രോ സംരംഭ യൂണിറ്റുകളുടെയും നേതൃത്വത്തില്‍ 202 സ്ത്രീകളാണ് രാപകല്‍ ഭേദമന്യേ പ്രവര്‍ത്തിക്കുന്നത്.

കോവിഡ് 19 പ്രതിരോധ പ്രവർത്തനങ്ങളുടെ ഭാഗമായി ബാങ്കുകൾ വിദേശത്തു നിന്നു വന്ന ഉപഭോക്താക്കൾക്കായി വീട്ടുപടിക്കൽ സേവനം ഏർപ്പെടുത്തുന്നു. വിദേശത്ത് നിന്ന് വരുന്ന പൗരന്മാർക്ക് നിലവിലെ സാഹചര്യത്തിൽ 14 ദിവസം വീടുകളിൽ നിരീക്ഷണത്തിൽ കഴിയുന്നതിന് നിർദ്ദേശിച്ചിട്ടുളള സാഹചര്യത്തിൽ അവർക്ക് ബാങ്കിന്റെ സേവനം അവരുടെ വീട്ടുപടിക്കൽ എത്തിച്ചു നൽകുവാൻ സന്നദ്ധമാണെന്ന് ജില്ലയിലെ ബാങ്ക് അധികൃതർ അറിയിച്ചു.

കോവിഡ് 19 രോഗപ്രതിരോധത്തിന്റെ ഭാഗമായി റീജ്യണൽ ട്രാൻസ്‌പോർട്ട് ഓഫീസിൽ നിയന്ത്രണങ്ങൾ ഏർപ്പെടുത്തിയതായി തൃശൂർ ആർടിഒ അറിയിച്ചു.
അന്വേഷണങ്ങൾ ഫോണിലൂടെ മാത്രം(0487 2360262).
തിരക്ക് നിയന്ത്രിക്കുവാൻ ഒരാളുടെ പക്കൽ നിന്നും ഒരു അപേക്ഷ മാത്രം സ്വീകരിക്കുകയുളളൂ.
കൗണ്ടർ സമയത്ത് പത്തിൽ കൂടുതൽ ആളുകൾ ഒരേ സമയം ഓഫീസിനകത്ത് പ്രവേശിക്കുന്നത് നിയന്ത്രിക്കും.
ഉച്ചയ്ക്ക് ശേഷം അത്യാവശ്യ കാര്യങ്ങൾക്കെല്ലാതെ ഓഫീസിലേക്ക് ആരും വരേണ്ടതില്ല.
തീർപ്പു കൽപ്പിച്ച അപേക്ഷകൾ നേരിട്ട് ആർക്കും നൽകുന്നതല്ല.
മാർച്ച് 31 വരെ ഫാസ്റ്റ് ട്രാക്ക് കൗണ്ടർ ഉണ്ടായിരിക്കുന്നതല്ല.

കോവിഡ് 19 രോഗപ്രതിരോധത്തോടനുബന്ധിച്ച് വയർമാൻ അപ്പ്രെന്റിസ് രജിസ്ട്രേഷൻ കാലാവധി മാർച്ച് 15 വരെ നീട്ടിവെച്ചു. അപേക്ഷകർക്ക് ഇ-മെയിൽ മുഖാന്തിരം അപേക്ഷ സമർപ്പിക്കുകയും ഓൺലൈനായി ഫീസ് അടയ്ക്കുകയും ചെയ്യാം എന്നും ജില്ലാ ഇലക്ട്രിക്കൽ ഇൻസ്‌പെക്ടർ അറിയിച്ചു.