പന്നിയാര്‍ പദ്ധതിയില്‍ വൈദ്യുതി ഉത്പാദനത്തിനായി ആനയിറങ്കല്‍ ഡാമിലെ 11 ക്യുമെക്‌സ് വെള്ളം മാര്‍ച്ച് 23ന് രാവിലെ 11 മുതല്‍ തുറന്നുവിടും.പന്നിയാര്‍ പുഴയുടെ ഇരുകരകളിലുമുള്ള പൂപ്പാറ, രാജകുമാരി, രാജാക്കാട് നിവാസികള്‍ അതീവജാഗ്രത പുലര്‍ത്തണമെന്ന് ജില്ലാകലക്ടര്‍ അറിയിച്ചു.

ഇടുക്കി ജില്ലയിലുണ്ടാകുന്ന ചെറു ഭൂചലനങ്ങളുടെ വെളിച്ചത്തില്‍ ഇവ സംബന്ധിച്ച് അടിയന്തര പഠനം നടത്താനും പുതിയ സീസ്‌മോ മീറ്ററുകള്‍ മൂന്ന് സ്ഥലങ്ങളില്‍ സ്ഥാപിക്കുന്നതിനുമായി നാഷണല്‍ സെന്റര്‍ ഫോര്‍ സീസ്‌മോളജി (ഡല്‍ഹി) യില്‍ നിന്നുള്ള ശാസ്ത്രജ്ഞര്‍ ജില്ലയിലെത്തി. ഈ മാസം 25 വരെ ജില്ലയില്‍ സന്ദര്‍ശനം നടത്തും. നാഷണല്‍ സെന്റര്‍ ഫോര്‍ സീസ്‌മോളജിയില്‍ നിന്നുള്ള രണ്ട് ശാസ്ത്രജ്ഞരും സംസ്ഥാന ദുരന്ത നിവാരണ അതോറിറ്റിയില്‍ നിന്നുള്ള ഒരു ശാസ്ത്രജ്ഞനുമാണ് സംഘത്തിലുള്ളത്. 

കൊവിഡ് 19നെതിരായ പ്രതിരോധ പ്രവര്‍ത്തനങ്ങള്‍ കൂടുതല്‍ ഊര്‍ജ്ജിതമാക്കുന്നതിന്റെ ഭാഗമായി അടിമാലി ജനമൈത്രി പോലീസിന്റെ നേതൃത്വത്തില്‍ അടിമാലി ടൗണിലെ ജൂബിലി ഓട്ടോസ്റ്റാന്‍ഡ് അണുവിമുക്തമാക്കി. സംസ്ഥാന സര്‍ക്കാര്‍ നിര്‍ദ്ദേശത്തെ തുടര്‍ന്നായിരുന്നു പോലീസിന്റെ ഇടപെടല്‍. വരും ദിവസങ്ങളില്‍ കൊവിഡ് 19നെതിരായി കൂടുതല്‍ ജാഗ്രതപാലിക്കുകയെന്ന ആശയം പൊതുജനങ്ങളിലേക്കെത്തിക്കാന്‍ ലക്ഷ്യമിട്ടായിരുന്നു ഓട്ടോസ്റ്റാന്‍ഡിലെ പ്രതിരോധ പ്രവര്‍ത്തനങ്ങള്‍.

തൊടുപുഴ വയോമിത്രത്തിന്റെ ആഭിമുഖ്യത്തില്‍ തൊടുപുഴ നഗരസഭാ പ്രവേശന കവാടത്തില്‍ കോവിഡ് 19 പ്രതിരോധത്തിന്റെ ഭാഗമായി 'ബ്രേക്ക് ദ ചെയ്ന്‍' സംഘടിപ്പിച്ചു. ക്യാമ്പയിന്‍ തൊടുപുഴ നഗരസഭ  ചെയര്‍പേഴ്‌സണ്‍ സിസിലി  ജോസ് ഉദ്ഘാടനം ചെയ്തു.  വയോമിത്രം മെഡിക്കല്‍ ഓഫീസര്‍ ഡോ. ടോം സിബി, മുന്‍ നഗരസഭ ചെയര്‍മാന്‍ എ.എം. ഷാഹുല്‍ ഹമീദ്, വാര്‍ഡ് കൗണ്‍സിലര്‍മാര്‍, കേരള സാമൂഹ്യ സുരക്ഷാ മിഷന്‍, വയോമിത്രം സ്റ്റാഫംഗങ്ങള്‍ എന്നിവര്‍ പങ്കെടുത്തു. ഇതുവഴിയെത്തുന്നവര്‍ക്ക് ഹാന്‍ഡ് സാനിറ്റൈസര്‍ കൊണ്ട് കൈകള്‍ ശുചിയാക്കുന്നത് ഉള്‍പ്പെടെയുള്ള സൗകര്യം ഏര്‍പ്പെടുത്തിയിട്ടുണ്ട്.

ജില്ലയില്‍ തൊഴിലുറപ്പ് പദ്ധതി മേഖലയില്‍ പുലര്‍ത്തേണ്ട മുന്‍കരുതലുകളെക്കുറിച്ച് ജില്ലാ പ്രോഗ്രാം കോ-ഓര്‍ഡിനേറ്ററായ ജില്ലാകലക്ടര്‍ ജാഗ്രതാനിര്‍ദ്ദേശം പുറപ്പെടുവിച്ചു. തൊഴില്‍ തുടങ്ങുന്നതിന് മുമ്പും ശേഷവും ഇടവേളകളിലും കൈകള്‍ സോപ്പും വെള്ളവും ഉപയോഗിച്ചു കഴുകണം. വീട്ടിലെത്തിയാലും ഇത് ആവര്‍ത്തിക്കണം. സോപ്പും വെള്ളവും പ്രവൃത്തി ഇടങ്ങളില്‍ ലഭ്യമാക്കണം. ഏതുതരം പ്രവൃത്തി ആയാലും വൃത്തിയുള്ള കയ്യുറകള്‍ നിര്‍ബന്ധമായും ഉപയോഗിക്കണം. മാസ്‌കും ധരിക്കണം. തൊഴിലാളികള്‍ പരസ്പരം കുറഞ്ഞത് ഒരു മീറ്റര്‍ അകലം പാലിക്കണം. പ്രവൃത്തി സ്ഥലത്ത് കൂട്ടം കൂടുന്നത് ഒഴിവാക്കണം.

കോറൊണ വൈറസ് വ്യാപനം തടയുന്നതിനുളള ബോധവല്‍ക്കരണത്തിന്റെ ഭാഗമായി ജില്ലാ ടി.ബി സെന്ററിന്റെയും തൊടുപുഴ ജില്ലാ ആശുപത്രിയുടെയും സംയുക്ത ആഭിമുഖ്യത്തില്‍ മര്‍ച്ചന്റ് അസോസിയേഷന്റെ സഹകരണത്തോടെ മുന്‍സിപ്പല്‍ ബസ്റ്റാന്റ് പരിസരത്ത് പൊതുജനങ്ങള്‍ക്കായ് സൗജന്യ തൂവാല വിതരണം നടത്തി. കൊറോണ, ക്ഷയം തുടങ്ങിയ വായുജന്യരോഗങ്ങള്‍ പകരുന്നത് തടയുന്നതിനുവേണ്ടി തൂവാല ഉപയോഗിച്ച് മുഖാവരണം തീര്‍ത്ത് സ്വയം പ്രതിരോധം തീര്‍ക്കുക എന്നതാണ് തൂവാല വിതരണത്തിലൂടെ ലക്ഷ്യമിടുന്നത്.

കോവിഡ് 19 ജാഗ്രതാ നിര്‍ദേശത്തിന്റെ ഭാഗമായി മലപ്പുറം ആര്‍.ടി.ഓഫീസില്‍ നടത്താനിരുന്ന ഡ്രൈവിങ് ടെസ്റ്റ്, ലേണേഴ്‌സ് ടെസ്റ്റ്, വാഹന പരിശോധന, കൂടാതെ അപേക്ഷയിന്‍മേലുള്ള എല്ലാ കൂടിക്കാഴ്ചകളും ഇനിയൊരറിയിപ്പ് ഉണ്‍ാകുന്നതുവരെ നിര്‍ത്തിവച്ചതായി ആര്‍.ടി. ഒ അറിയിച്ചു.  ബി.എസ് 4 വിഭാഗത്തില്‍പ്പെടുന്ന വാഹനങ്ങളുടെ രജിസ്‌ട്രേഷന്‍ മാര്‍ച്ച് 31 നകം നടത്തണം. ഓണ്‍ലൈനായി ഫീസടച്ച അപേക്ഷകള്‍ മാത്രമേ സ്വീകരിക്കുകയുള്ളൂ. അന്വേഷണങ്ങള്‍ക്കായി ടെലഫോണില്‍ മാത്രം ബന്ധപ്പെടണമെന്നും ആര്‍.ടി. ഒ അറിയിച്ചു. ഫോണ്‍:0483 -2734924.
 

കോവിഡ് 19 പ്രതിരോധത്തിന്റെ ഭാഗമായി സ്വകാര്യ ആശുപത്രി ജീവനക്കാര്‍ക്ക് ഇന്ന് (മാര്‍ച്ച് 20) ഉച്ച തിരിഞ്ഞ് 2.30ന് ആരോഗ്യ വകുപ്പ് പ്രത്യേക പരിശീലനം നല്‍കും. കൂടുതല്‍ പേര്‍ ഒരുമിച്ചിരിക്കുന്നത് ഒഴിവാക്കാന്‍ വീഡിയോ കോണ്‍ഫറന്‍സ് വഴിയാണ് പരിശീലനമെന്ന് ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു. 
ബാങ്ക് ജീവനക്കാര്‍ക്കായും പ്രത്യേക ബോധവത്ക്കരണ പരിപാടി ആരോഗ്യ വകുപ്പ് സംഘടിപ്പിച്ചു. വീഡിയോ കോണ്‍ഫറന്‍സ് വഴി കോവിഡ് 19 ജാഗ്രത നിര്‍ദേശങ്ങളും ആരോഗ്യ ബോധവത്ക്കരണവുമാണ് നടന്നത്.  
 

കോവിഡ് 19 വ്യാപനം തടയുന്നതിന്റെ ഭാഗമായി വീടുകളില്‍ നിരീക്ഷണത്തില്‍ കഴിയുന്നവര്‍ അക്ഷയ കേന്ദ്രങ്ങള്‍ സന്ദര്‍ശിച്ചാല്‍ കര്‍ശന നടപടി സ്വീകരിക്കുമെന്ന് ജില്ലാ കലക്ടര്‍ ജാഫര്‍ മലിക്. ജില്ലയില്‍ അക്ഷയ കേന്ദ്രങ്ങള്‍ മുഖേന ബയോമെട്രിക് സംവിധാനം ഉപയോഗിച്ച് നല്‍കുന്ന ആധാര്‍ ഉള്‍പ്പെടെയുള്ള സേവനങ്ങള്‍ മാര്‍ച്ച് 16 മുതല്‍ തല്‍ക്കാലികമായി നിര്‍ത്തിവെച്ചിട്ടുള്ളതാണ്. എന്നാല്‍ വൈറസ് ബാധിത രാജ്യങ്ങളില്‍ നിന്നെത്തുന്നവര്‍ വീടുകളില്‍ സ്വയം നിരീക്ഷണം ഉറപ്പാക്കാതെ ഇപ്പോഴും അക്ഷയകേന്ദ്രങ്ങളില്‍ എത്തുന്നതായി ശ്രദ്ധയില്‍പ്പെട്ടിട്ടുണ്‍്.