ഞാറ്റുവേല ചന്തയുടെ ജില്ലാതല ഉദ്ഘാടനം പൊതു വിദ്യാഭ്യാസ വകുപ്പ് മന്ത്രി പ്രൊഫ. സി. രവീന്ദ്രനാഥ് നിർവ്വഹിച്ചു. കൊടകര ബ്ലോക്ക് പഞ്ചായത്ത് ഹാളിൽ നടന്ന ചടങ്ങിൽ ബ്ലോക്ക് പഞ്ചായത്ത് പ്രസിഡന്റ് കലാപ്രിയ സുരേഷ് അധ്യക്ഷത വഹിച്ചു. ഞാറ്റുവേല ചന്തയുടെ ഭാഗമായി വിവിധയിനം പച്ചക്കറി, ഫലവൃക്ഷ തൈകളുടെ വിൽപ്പനയും പ്രദർശനവും സംഘടിപ്പിച്ചു. ജില്ലാ പഞ്ചായത്തംഗങ്ങളായ കെ.ജെ.ഡിക്സൻ, അഡ്വ.ജയന്തി സുരേന്ദ്രൻ, പഞ്ചായത്ത് പ്രസിഡന്റുമാരായ അമ്പിളി ശിവരാജൻ, ജയശ്രീ കൊച്ചുഗോവിന്ദൻ, ആത്മ പ്രൊജക്ട് ഡയറക്ടർ പി.ശ്രീലത തുടങ്ങിയവർ പങ്കെടുത്തു.

കോവിഡ് രോഗികളുടെ എണ്ണം വർദ്ധിച്ചതിനെ തുടർന്ന് ഒ പി വിഭാഗത്തിലെ തിരക്ക് കുറയ്ക്കുന്നതിനും സാമൂഹിക അകലം പാലിക്കുന്നതിനും ക്രമീകരണം ഏർപ്പെടുത്തി. നിലവിലെ മെഡിസിൻ, പൾമണോളോജി, പീഡിയാട്രിക്‌സ്, സൈക്യാട്രി എന്നീ വിഭാഗങ്ങളുടെ ഒ പി സേവനങ്ങൾ നെഞ്ച് രോഗാശുപത്രിക്ക് പിന്നിലുളള ചൈൽഡ് ഹെൽത്ത് ഇൻസ്റ്റിറ്റ്യൂട്ടിലേക്കും സൈക്യാട്രി ഒ പി സേവനം ജെറിയാട്രിക് കെയർ സെന്ററിലേക്കും മാറ്റും. ജൂൺ 24 ബുധനാഴ്ച മുതൽ പുതിയ ക്രമീകരണം നിലവിൽ വരും. ഒ പി ടിക്കറ്റ്, രക്തപരിശോധന, ഇസിജി, ഫാർമസി മുതാലയ സേവനങ്ങൾ ഇവിടെ ലഭിക്കും. ഇവിടെയ്ക്കുളള രോഗികൾ നേരിട്ട് പുതിയ ഒ.പിയിലേക്ക് എത്തണമെന്ന് പ്രിൻസിപ്പാൾ അറിയിച്ചു.

കോവിഡ് 19 പ്രതിരോധത്തിന്റെ ഭാഗമായി ധനസഹായം ലഭ്യമാകാത്ത തയ്യൽ തൊഴിലാളികൾക്ക് അപേക്ഷിക്കാം. തയ്യൽ തൊഴിലാളി ക്ഷേമനിധി ബോർഡിലെ തൊഴിലാളികൾക്ക് സർക്കാർ പ്രഖ്യാപിച്ച 1000 രൂപ ധനസഹായത്തിന് ഇനിയും അപേക്ഷ സമർപ്പിച്ചിട്ടില്ലാത്തവർക്കാണ് അവസരം. www.tailorwelfare .in എന്ന വെബ് സൈറ്റ് വഴി അപേക്ഷ സമർപ്പിക്കാം. ഓൺലൈനായി അപേക്ഷ സമർപ്പിച്ച് നാളിതുവരെ ധനസഹായം ലഭ്യമാകാത്ത തൊഴിലാളികൾ ആധാർ കാർഡിന്റെ പകർപ്പ്, ബാങ്ക് അക്കൗണ്ടിന്റെ പകർപ്പ്, ക്ഷേമനിധി ഐ ഡി കാർഡ് പകർപ്പ് എന്നിവ അയ്ക്കണം. വിലാസം - ജില്ലാ എക്സിക്യൂട്ടീവ് ഓഫീസർ തയ്യൽ തൊഴിലാളി ക്ഷേമനിധി ബോർഡ്, അയ്യന്തോൾ, തൃശൂർ 680003. ഫോൺ 0487 2364443.

തൃശൂർ കോർപ്പറേഷനിൽ ജൂൺ 15 ന് നടന്ന യോഗത്തിൽ പങ്കെടുത്ത 18 പേർ വീടുകളിൽ ക്വാറന്റീനിൽ കഴിയണമെന്ന് മെഡിക്കൽ ബോർഡ് യോഗം നിർദ്ദേശിച്ചു. ഈ യോഗത്തിൽ പങ്കെടുത്ത ആരോഗ്യവിഭാഗം ജീവനക്കാരിക്ക് 21 ന് കോവിഡ് സ്ഥിരീകരിച്ചതിനെ തുടർന്നാണ് മെഡിക്കൽ ബോർഡ് നിർദ്ദേശം പുറപ്പെടുവിച്ചത്. പ്രാഥമിക സമ്പർക്കപട്ടികയിൽ ഉൾപ്പെടുന്ന രോഗലക്ഷണങ്ങൾ ഇല്ലാത്തവർ 14 ദിവസം ക്വാറന്റീനിൽ കഴിയണം. ഇക്കാലയളവിൽ രോഗലക്ഷണങ്ങൾ കണ്ടാൽ ആ വിവരം ദിശയിൽ റിപ്പോർട്ട് ചെയ്യണം. ഹൈറിസ്‌ക്ക് വിഭാഗത്തിൽപ്പെടുന്ന 6 പേർ 14 ദിവസത്തേക്ക് ക്വാറന്റീനിലും തുടർന്നുളള 14 ദിവസം നിരീക്ഷണത്തിൽ കഴിയുകയും വേണമെന്ന് മെഡിക്കൽ ബോർഡ് നിർദ്ദേശിച്ചു.

സുഭിക്ഷ കേരളം പദ്ധതിയുടെ ഭാഗമായി പരിയാരം ഗ്രാമപഞ്ചായത്തില്‍ മുത്താറി കൃഷിക്ക് തുടക്കമായി. കൃഷിഭവന്‍, കെ വി ചന്ദ്രന്‍ സ്മാരക കലാസമിതി എന്നിവയുടെ സഹകരണത്തോടെ പനങ്ങാട്ടൂരെ ഒന്നര ഏക്കര്‍ സ്ഥലത്താണ് കൃഷി. വിത്തിടല്‍ പരിയാരം ഗ്രാമപഞ്ചായത്ത് പ്രസിഡണ്ട് എ രാജേഷ് ഉദ്ഘാടനം ചെയ്തു.

സർക്കാർ/എയ്ഡഡ് ആർട്‌സ് ആന്റ് സയൻസ് കോളേജുകളിലേക്കുള്ള ഗസ്റ്റ് അദ്ധ്യാപകരുടെ രജിസ്‌ട്രേഷൻ ഓൺലൈനായി കോളേജ് വിദ്യാഭ്യാസ വകുപ്പിന്റെ വെബ്‌സൈറ്റിലൂടെ നടത്താം. ഇതിനായി www.collegiateedu.kerala.gov.in എന്ന വെബ്‌സൈറ്റ് സന്ദർശിക്കുക.
പി.എൻ.എക്സ്. 2241/2020

* ചികിത്സയിലുള്ളത് 1540 പേർ
* നാല് പുതിയ ഹോട്ട് സ്‌പോട്ടുകൾ