·    എല്ലാ അപേക്ഷകളിലും മാനുഷികവശം കാണണം
·    അനാവശ്യമായി ഫയല്‍ വൈകിച്ചാല്‍ നടപടി

വാഴക്കുളം:  കില - സി.എച്ച്.ആർ.ഡി.യുടെ നേതൃത്വത്തിൽ മഹാത്മ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതി - ''പുതിയ ഇടപെടൽ പ്രവർത്തനങ്ങളും സംയോജന സാധ്യതകളും എന്ന വിഷയത്തിൽ വാഴക്കുളം ബ്ലോക്ക് പഞ്ചായത്ത് ഹാളിൽ 2 ,3 തീയതികളിലായി ദ്വിദിന പരിശീലനം സംഘടിപ്പിക്കുന്നു. ബ്ലോക്കിന് കീഴിലെ ആറു പഞ്ചായത്തുകളിലെയും എല്ലാ ജനപ്രതിനിധികളും പരിശീലന പരിപാടിയിൽ പങ്കെടുക്കണമെന്ന് വാഴക്കുളം ബ്ലോക്ക് പഞ്ചായത്ത് ബി പി ഒ അറിയിച്ചു.

പെരുമ്പാവൂർ: അധ്യാപികയായിരുന്ന മേരി പോളിന്റെ സ്മരണാർത്ഥം കുറുപ്പംപടി ജില്ലാ വിദ്യാഭ്യാസ പരിശീലന കേന്ദ്രത്തിൽ (ഡയറ്റ് ) പണി പൂർത്തിയാക്കിയ ലൈബ്രറിയും വായനശാലയും മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. ശാസ്ത്രജ്ഞന്മാരുൾപ്പെടെയുള്ള മഹാന്മാരെല്ലാം തന്നെ പുസ്തകപ്രേമികളായിരുന്നുവെന്നും  കുട്ടികളിൽ നവമാധ്യമങ്ങളുണ്ടാക്കുന്ന സ്വാധീനത്തിൽ രക്ഷിതാക്കൾ ഇടപെടണമെന്നും മുഖ്യമന്ത്രി പറഞ്ഞു. മേരി പോളിന്റെ മകനും ഐഎഎസ് ഉദ്യോഗസ്ഥനുമായിരുന്ന ഡി ബാബു പോൾ മരണം വരെ വിദ്യാർത്ഥിയായിരുന്നുവെന്നും പിണറായി വിജയൻ ഓർമിപ്പിച്ചു.

അഖിലേന്ത്യാ ഖാദി ഗ്രാമ വ്യവസായ കമ്മീഷന്റെയും ഖാദി ഗ്രാമ വ്യവസായ ബോർഡിന്റെയും ജില്ലാ വ്യവസായ കേന്ദ്രത്തിന്റെയും സംയുക്താഭിമുഖ്യത്തിൽ നടപ്പാക്കുന്ന പ്രധാനമന്ത്രി തൊഴിൽദായക പദ്ധതിപ്രകാരം 2019-20 സാമ്പത്തികവർഷത്തേക്ക് ഗ്രാമീണ മേഖലയിലെ പുതിയ സംരംഭങ്ങൾ ആരംഭിക്കുന്നതിന് സംരംഭകർക്ക് 35 ശതമാനം വരെ സബ്‌സീഡി ലഭിക്കും. e-portal ഓൺലൈൻ വഴി അപേക്ഷിക്കണം. ഓൺലൈൻ അപേക്ഷയുടെ ഹാർഡ് കോപ്പി തൃശൂർ ജില്ലാ ഖാദി വ്യവസായ ഓഫീസിൽ നൽകണം. ഫോൺ : 0487-2338699.
 

അഷ്ടമിച്ചിറ സർവീസ് സഹകരണ ബാങ്കിന്റെ ആഭിമുഖ്യത്തിൽ ഓണത്തിന് വിഷരഹിത പച്ചക്കറി എന്ന ലക്ഷ്യവുമായി പച്ചക്കറി വിത്തും ജൈവവള വിതരണവും നടന്നു. വിതരണോദ്ഘാടനം അഡ്വ. വി ആർ സുനിൽ കുമാർ എംഎൽഎ നിർവഹിച്ചു. ഡയറക്ടർ ബോർഡ് അംഗം വി. എം. ചന്ദ്രബോസ് അധ്യക്ഷത വഹിച്ചു. ഏഴിനം പച്ചക്കറി വിത്തുകൾ സൗജന്യമായി വിതരണം ചെയ്തു. മാള പഞ്ചായത്ത് പ്രസിഡന്റ് പി കെ സുകുമാരൻ, സഹകരണ ബാങ്ക് പ്രസിഡന്റ് പി കെ വിജയൻ, ഡയറക്ടർ ബോർഡ് അംഗം ടി കെ ശിവജി തുടങ്ങിയവർ പങ്കെടുത്തു.
 

കേരള ലോകായുക്തയുടെ സിറ്റിങ് ജൂലൈ എട്ട്, ഒൻപത്, പത്ത് തീയതികളിൽ തൃശൂർ ഗവ. ഗസ്റ്റ് ഹൗസ് കോൺഫറൻസ് ഹാളിൽ നടക്കും. പ്രസ്തുത ദിവസങ്ങളിൽ നിശ്ചിത ഫോറത്തിലുളള പുതിയ പരാതി സ്വീകരിക്കുമെന്ന് രജിസ്ട്രാർ അറിയിച്ചു.

കേരള ലീഗൽ സർവീസസ് അതോറിറ്റിയുടെ ആഭിമുഖ്യത്തിൽ നാഷണൽ ലോക് അദാലത്ത് ജൂലൈ 13 ന് രാവിലെ 10 മുതൽ അയ്യന്തോൾ സിവിൽ സ്റ്റേഷന്റെ സമീപമുളള കോടതി സമുച്ചയത്തിൽ സംഘടിപ്പിക്കുന്നു. എല്ലാ പരാതികളും തർക്കങ്ങളും അയ്യന്തോൾ സിവിൽ സ്റ്റേഷനിൽ പ്രവർത്തിക്കുന്ന താലൂക്ക് ലീഗൽ സർവീസസ് കമ്മിറ്റി ഓഫീസിൽ ജൂലൈ അഞ്ചിനകം നൽകണം. ഈ അവസരം പരമാവധി പ്രയോജനപ്പെടുത്തണമെന്ന് ജില്ലാ ലീഗൽ സർവീസ് അതോറിറ്റി സെക്രട്ടറി അറിയിച്ചു. ഫോൺ : 0487-2363770.