കൊറോണയുമായി ബന്ധപ്പെട്ട് കടങ്ങോട് ഗ്രാമപഞ്ചായത്തിലെ എട്ട്, ഒൻപത്, പത്ത് വാർഡുകളിൽ ജാഗ്രതാ യോഗങ്ങൾ ചേർന്നു. സർക്കാരിന്റെയും, ആരോഗ്യ വകുപ്പിന്റെയും ജാഗ്രതാ നിർദ്ദേശങ്ങൾ ഗ്രാമങ്ങളിൽ എത്തിക്കുന്നതിനും നിരീക്ഷണത്തിൽ കഴിയുന്ന പ്രവാസി സുഹൃത്തുക്കളുടെ ഭവനങ്ങൾ സന്ദർശിക്കുന്നതിനും യോഗം തീരുമാനിച്ചു. ഗ്രാമ പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജലീൽ ആദൂർ അധ്യക്ഷത വഹിച്ചു. ഗ്രാമ പഞ്ചായത്ത് മെമ്പർ ദീപ രാമചന്ദ്രൻ, ജൂനിയർ ഹെൽത്ത് ഇൻസ്പെക്ടർ ശശികുമാർ, ഹെൽത്ത് നഴ്സ് ധന്യ, തുടങ്ങിയവർ സംസാരിച്ചു. ആശാവർക്കർമാർ, അങ്കണവാടി ടീച്ചർമാർ, കുടുംബശ്രീ സിഡിഎസ് അംഗങ്ങൾ തുടങ്ങിയവർ സംബന്ധിച്ചു.

ജനമൈത്രി പോലീസുമായി സഹകരിച്ച് വലപ്പാട് സാമൂഹികാരോഗ്യ കേന്ദ്രത്തിലെ ഉദ്യോഗസ്ഥർ ഹോം ക്വാറന്റയിനിൽ കഴിയുന്നവരുടെ വീടുകൾ സന്ദർശിച്ചു. ഭക്ഷ്യസാധനങ്ങളുടെ ലഭ്യത, ഹോം ക്വാറന്റയിനി ലിരിക്കുന്നവരുടെ ആരോഗ്യസ്ഥിതി എന്നിവ വിലയിരുത്താനായിരുന്നു സന്ദർശനം. ഹെൽത്ത് ഇൻസ്പെക്ടർ വി.എസ്.രമേഷ്, ജൂനിയർ ഹെൽത്ത് ഇൻസ്പെക്ടർമാരായ എ.ഐ.മുഹമ്മദ് മുജീബ്, സി.പി.നിഷൻ, ജെ.പി.എച്ച്.എൻമാരായ ഷക്കീല, സനീഷ, ആതിര ജനമൈത്രി പോലീസിലെ സിവിൽ ഓഫീസർമാരായ കുട്ടൻ, ലെനിൻ, രാജേഷ് എന്നിവർ നേതൃത്വം നൽകി. ആവശ്യമുള്ള വീടുകളിൽ ഭക്ഷ്യവസ്തുക്കൾ എത്തിച്ചു.

കോവിഡ് 19 വൈറസ് വ്യാപനം തടയുന്നതിന്റെ ഭാഗമായി സർക്കാർ ഓഫീസുകളിൽ സന്ദർശക നിയന്ത്രണം പാലിക്കണമെന്ന് ജില്ലാ കളക്ടർ എസ് ഷാനവാസ് അറിയിച്ചു. ജീവനക്കാർക്ക് ആരോഗ്യസുരക്ഷാ ക്രമീകരണങ്ങൾ ഒരുക്കുന്നതിന്റെ ഭാഗമായി ഹാൻഡ് വാഷ് / സാനിറ്റൈസർ ലഭ്യത ഉറപ്പുവരുത്തണം. ജീവനക്കാരും പൊതുജനങ്ങളും പതിവായി സ്പർശിക്കാൻ ഇടയുള്ള സ്ഥലങ്ങൾ കൃത്യമായ ഇടവേളകളിൽ അണുവിമുക്തമാക്കണം. അത്യാവശ്യമല്ലാത്ത ഔദ്യോഗിക യാത്രകളും അടിയന്തരമല്ലാത്ത യോഗങ്ങളും ഒഴിവാക്കേണ്ടതാണെന്നും ജില്ലാ കളക്ടർ അറിയിച്ചു.

കോവിഡ് 19 പ്രതിരോധ പ്രവർത്തനത്തിലും ബോധവൽക്കരണത്തിലും സുപ്രധാന പങ്ക് വഹിച്ച് ഒല്ലൂരിലെ പോലീസ് സേന. ബോധവൽക്കരണം ദിനം പ്രതി ഓരോ വീടുകളിലും നേരിട്ട് ചെന്നാണ് ഇവർ നടത്തുന്നത്. ഒല്ലൂർ പോലീസ് സ്റ്റേഷൻ പരിധിയിൽ 234 പേരാണ് വീടുകളിൽ നിരീക്ഷണത്തിൽ കഴിയുന്നത്. ഒല്ലൂരിൽ 147, നടത്തറ 29, വെട്ടുകാട് 46, ഒല്ലൂക്കര 12, എന്നിങ്ങനെയാണ് ഇതുവരെയുള്ള കണക്ക്. ഈ പ്രദേശത്തുനിന്നും മൂന്നു പേർ മെഡിക്കൽ കോളേജ് ആശുപത്രിയിൽ ഐസൊലേഷനിലാണ്. ആരോഗ്യവകുപ്പ് ഉദ്യോഗസ്ഥരും ജനമൈത്രി പോലീസും സംയുക്തമായാണ് ഈ പരിധിയിൽ ആവശ്യമായ ബോധവൽക്കരണം നടത്തി വരുന്നത്.