കോവിഡ് 19 വ്യാപനവുമായി ബന്ധപ്പെട്ട് ജില്ലയില്‍ 609 പേര്‍ നിരീക്ഷണത്തില്‍. ഇതില്‍ 13 പേര്‍ ആശുപത്രികളിലും 596 പേര്‍ വീടുകളിലുമാണ് നിരീക്ഷണത്തിലുള്ളത്. പുതുതായി നാല് പേരെയാണ് ആശുപത്രി നിരീക്ഷണത്തിലാക്കിയത്.  24 പേരുടെ സാമ്പിളുകള്‍ കൂടി പരിശോധനയ്ക്കയച്ചിട്ടുണ്ട്. ഇതില്‍ 32 പേരുടെ ഫലം വന്നു. ഇനി 37 പേരുടെ പരിശോധനാ ഫലം വരാനുണ്ട്. കഴിഞ്ഞ ദിവസം  കൊറേണ സ്ഥിരീകരിച്ച ആളുമായി സമ്പര്‍ക്കത്തിലേര്‍പ്പെട്ട 69 പേരെ തിരിച്ചറിഞ്ഞ്  നിരീക്ഷണത്തിലാക്കി.

വീടുകളില്‍ നിരീക്ഷണത്തില്‍ കഴിയുന്നവര്‍ നിരീക്ഷണ

കാലയളവില്‍ പുറത്തിറങ്ങിയാല്‍ കര്‍ശന നടപടി

വീടുകളിലെത്തി തപാല്‍ വിതരണം ചെയ്യുന്നവരും ഓണ്‍ലൈന്‍ വഴി ബുക്ക് ചെയ്യുന്ന ഉല്‍പന്നങ്ങളും ഭക്ഷ്യവസ്തുക്കളും മറ്റും  വീട്ടു പടിക്കല്‍ വിതരണം ചെയ്യുന്നവരും കൊറോണ ബാധിക്കാതിരിക്കാനും മറ്റുള്ളവരിലേക്ക് പകരാതിരിക്കാനും ആവശ്യമായ മുന്‍കരുതലടുക്കണം. സ്ഥാപന മേധാവികളും ഉടമസ്ഥരും ഇവര്‍ക്കാവശ്യമായ സാനിറ്റൈസര്‍, മാസ്‌ക് എന്നിവ ലഭ്യമാക്കണം. ഏതെങ്കിലും തരത്തിലുള്ള അസുഖമുള്ളവര്‍ രോഗം ഭേദമാകുന്നത് വരെ ജോലിയില്‍ നിന്ന് വിട്ടു നില്‍ക്കണം. ഇത്തരം ജോലികളിലേര്‍പ്പെട്ട അസുഖ ബാധിതര്‍ക്ക്  ആ വശ്യമായ ലീവ് അനുവദിക്കണമെന്നും ജില്ലാ കളക്ടര്‍ ഡോ  ഡി സജിത് ബാബു അറിയിച്ചു

പുതിയതായി ജില്ലയില്‍ കൊറോണ സ്ഥിരീകരിച്ച ആളുടെ സമ്പര്‍ക്ക പട്ടിക തയ്യാറാക്കല്‍ ശ്രമകരമാണെന്നും ഇതിന് പൊതുജനങ്ങളുടെ സഹായവും സഹകരണവും ആവശ്യമാണെന്ന് ജില്ലാ കളക്ടര്‍ ഡോ.ഡി.സജിത് ബാബു.  ഇന്നലെ (മാര്‍ച്ച് 19) കൊറോണ സ്ഥിരീകരിച്ച വ്യക്തി ഒരുപാട് സ്ഥലങ്ങള്‍ സന്ദര്‍ശിച്ചിട്ടുണ്ടെന്നും കുറെ ആളുകളുമായി ഇടപെഴുകിയിട്ടുണ്ടെന്നുമാണ് അറിയാന്‍ കഴിഞ്ഞത്. ഈ സാഹചര്യത്തില്‍ ഈ വ്യക്തിയുടെ സമ്പര്‍ക്കപട്ടിക പൂര്‍ത്തിയാക്കാന്‍ പൊതുജനങ്ങളുടെ സഹകരണവും ആവശ്യമാണെന്ന് കളക്ടര്‍ പറഞ്ഞു.

ദുബായിലെ  നയിഫ്  മേഖലയില്‍ നിന്നുള്ളവരിലാണ് അധികവും രോഗബാധ സ്ഥിരീകരിച്ചിട്ടുള്ളത്.  കാസര്‍കോടും കുറെ ആളുകള്‍ നയിഫില്‍ നിന്നുമെത്തിയിട്ടുണ്ട്. ഈ സാഹചര്യത്തില്‍  ഫെബ്രുവരി 20 നു ശേഷം നയിഫില്‍ നിന്നുമെത്തിയിട്ടുള്ളവര്‍ അടിയന്തിരമായി അടുത്തുള്ള പ്രാഥമികാരോഗ്യ കേന്ദ്രങ്ങളില്‍ റിപ്പോര്‍ട്ട് ചെയ്യണം. ഫെബ്രുവരി 20 ന് ശേഷം ഉംറ കഴിഞ്ഞെത്തിയവരും  അടിയന്തിരമായി പി.എച്ച്.സി കളില്‍ റിപ്പോര്‍ട്ട് ചെയ്യണമെന്ന് ജില്ലാ കളക്ടര്‍ ഡോ. ഡി. സജിത് ബാബു അറിയിച്ചു.

* അർധരാത്രിമുതൽ പ്രാബല്യം
കാസർകോട്ട് വെള്ളിയാഴ്ച ആറുപേർക്ക് കോവിഡ്19 രോഗബാധ സ്ഥിരീകരിച്ച സാഹചര്യത്തിൽ സ്വീകരിക്കേണ്ട കർശനനിയന്ത്രണങ്ങളുമായി ചീഫ് സെക്രട്ടറിയുടെ ഉത്തരവ് പുറത്തിറങ്ങി. നിർദേശങ്ങൾ ലംഘിക്കുന്നവർക്കെതിരെ 1897 ലെ പകർച്ചവ്യാധി നിയന്ത്രണ ആക്ടിലെ സെക്ഷൻ 2(1) പ്രകാരം ശക്തമായ നടപടികൾക്ക് ജില്ലാ മജിസ്ട്രേറ്റ് കൂടിയായ കാസർകോട് കളക്ടർക്കും ജില്ലാ പോലീസ് മേധാവിക്കും അധികാരം നൽകിയിട്ടുണ്ട്.

*കാസർകോട്ട് പ്രത്യേക ജാഗ്രതാ നിർദേശം
സംസ്ഥാനത്ത് പുതുതായി 12 പേർക്ക് കൂടി കോവിഡ്19 സ്ഥിരീകരിച്ചതായി മുഖ്യമന്ത്രി പിണറായി വിജയൻ അറിയിച്ചു. കാസർകോട്ട് ആറുപേർക്കും എറണാകുളത്ത് അഞ്ചുപേർക്കും പാലക്കാട്ട് ഒരാൾക്കുമാണ് വെള്ളിയാഴ്ച രോഗബാധ സ്ഥിരീകരിച്ചത്. നിലവിൽ രോഗം ബാധിച്ച് സംസ്ഥാനത്ത് ചികിത്സയിലുള്ളത് 37 പേരാണ്.

സംസ്ഥാനത്തെ സഹകരണ യൂണിയൻ 2020 വർഷത്തെ ജൂനിയർ ഡിപ്ലോമ കോഴ്‌സിന് കായിക താരങ്ങൾക്കായി സംവരണം ചെയ്ത സീറ്റുകളിൽ പ്രവേശനത്തിന് സംസ്ഥാന സ്‌പോർട്‌സ് കൗൺസിൽ അപേക്ഷ ക്ഷണിച്ചു. ഫോറത്തിൽ സംസ്ഥാന സഹകരണ യൂണിയൻ സെക്രട്ടറിക്ക് സമർപ്പിക്കുന്ന അപേക്ഷയുടെ ഫോട്ടോസ്റ്റാറ്റ് കോപ്പി, യോഗ്യത സർട്ടിഫിക്കറ്റുകളുടേയും, സ്‌പോർട്‌സിൽ പ്രാവീണ്യം തെളിയിയ്ക്കുന്ന സർട്ടിഫിക്കറ്റുകളുടേയും, സാക്ഷ്യപ്പെടുത്തിയ ഫോട്ടോസ്റ്റാറ്റ് സഹിതം സെക്രട്ടറി, കേരള സ്റ്റേറ്റ് സ്‌പോർട്‌സ് കൗൺസിൽ തിരുവനന്തപുരം 1 എന്ന വിലാസത്തിൽ മാർച്ച് 31 ന് മുൻപ് അപേക്ഷ സമർപ്പിക്കണം.

ബി.എസ്. 4 വാഹനങ്ങളുടെ രജിസ്‌ട്രേഷൻ മാർച്ച് 31ഓടുകൂടി പൂർത്തിയാക്കേണ്ടതിനാൽ നേരിട്ടുളള പരിശോധന കൂടാതെ എല്ലാ സ്വകാര്യ വാഹനങ്ങൾക്കും താത്കാലിക രജിസ്‌ട്രേഷൻ എടുക്കുന്ന ദിവസം തന്നെ സ്ഥിരം രജിസ്‌ട്രേഷനും നൽകണമെന്ന് ആർ.ടി.ഒ/ജോയിന്റ് ആർ.ടി.ഒ മാർക്കും ട്രാൻസ്‌പോർട്ട് കമ്മീഷണർ നിർദ്ദേശം നൽകി. ഇങ്ങനെ രജിസ്‌ട്രേഷൻ ലഭിച്ച വാഹനങ്ങൾ പരിശോധനയ്ക്ക് ഹാജരാക്കേണ്ടതില്ല. ട്രാൻസ്‌പോർട്ട് വാഹനങ്ങളിൽ ചില സാഹചര്യങ്ങളിൽ മാറ്റങ്ങൾ വരുത്തിയതായി ശ്രദ്ധയിൽപ്പെട്ടാൽ ഇത്തരം വാഹനങ്ങൾ സ്ഥിരം രജിസ്‌ട്രേഷനുശേഷം നോട്ടീസ് നൽകി ഉടമസ്ഥരുടെ സൗകര്യാർത്ഥം പരിശോധനയ്ക്ക് ഹാജരാക്കിയാൽ മതി.

സംസ്ഥാന മഹിള സമഖ്യ സൊസൈറ്റി മുഖേന പാലക്കാട് ജില്ലയിൽ പ്രവർത്തിക്കുന്ന സ്ത്രീകളുടെയും കുട്ടികളുടെയും ഹോമിൽ സോഷ്യൽ വർക്കർ, സൈക്കോളജിസ്റ്റ് (പാർട്ട് ടൈം), കെയർടേക്കർ തസ്തികകളിൽ അപേക്ഷ ക്ഷണിച്ചു. വെള്ളപേപ്പറിൽ തയ്യാറാക്കിയ അപേക്ഷയോടൊപ്പം വിദ്യാഭ്യാസ യോഗ്യത, പ്രായം, പ്രവൃത്തി പരിചയം തെളിയിക്കുന്ന സർട്ടിഫിക്കറ്റുകളുടെ സ്വയം സാക്ഷ്യപ്പെടുത്തിയ പകർപ്പ് സഹിതം മാർച്ച് 30ന് വൈകുന്നേരം അഞ്ച് മണിക്ക് മുൻപ് ലഭിക്കത്തക്കവിധത്തിൽ സ്റ്റേറ്റ് പ്രോജക്ട് ഡയറക്ടർ, കേരള മഹിള സമഖ്യ സൊസൈറ്റി, റ്റി.സി.20/1652, കല്പന, കുഞ്ചാലുംമൂട്, കരമന പി.ഒ., തിരുവനന്തപുരം എന്ന വിലാസത്തിൽ അയയ്ക്കണം. പ്രായപരിധി 23-45 വയസ്.

സംസ്ഥാനത്ത് കോവിഡ് 19 വൈറസ് രോഗവ്യാപനം തടയുന്നതിനും രോഗം വരാതെ പ്രതിരോധിക്കുന്നതിനുമായി ട്രഷറികളിൽ നടത്തുന്ന പെൻഷൻകാരുടെ ലൈഫ് മസ്റ്ററിങ് മെയ് 31വരെ നിർത്തി. മെയ് 31വരെ ലൈഫ് മസ്റ്ററിങ് ഡ്യൂ ആകുന്ന പെൻഷൻകാർ ജൂൺ 30ന് മുൻപ് ലൈഫ് മസ്റ്ററിങ് നടത്തിയാൽ മതി. ഇവരുടെ പെൻഷൻ ലൈഫ് മസ്റ്ററിങ് ചെയ്തിട്ടില്ല എന്ന കാരണത്താൽ തടയില്ല.
കൂടാതെ ട്രഷറികളിലെ ഹെൽപ് ഡെസ്‌കുകളിൽ നേരിട്ടെത്തി സേവനം സ്വീകരിക്കുന്നതിനുള്ള സംവിധാനം തൽക്കാലത്തേക്ക് നിറുത്തിവച്ചു. ആവശ്യക്കാർക്ക് ഫോണിൽ വിളിച്ചും ഹെൽപ് ഡസ്‌കിലേക്ക് ഇമെയിൽ അയച്ചും ഹെൽപ് ഡസ്‌കിന്റെ സേവനം ഉപയോഗിക്കാം. കൂടുതൽ വിവരങ്ങൾക്ക് ടോൾ ഫ്രീ നമ്പർ 1800-4255176.