കോവിഡ് 19 പ്രതിരോധ പ്രവർത്തനങ്ങളുടെ ഭാഗമായി അടിസ്ഥാന ജനവിഭാഗങ്ങൾ താമസിക്കുന്ന പ്രദേശങ്ങളിൽ പ്രതിരോധ പ്രവർത്തനങ്ങൾ നടത്തുവാൻ പട്ടികജാതി പ്രമോട്ടർമാർക്ക് ജില്ലാ പട്ടികജാതി ഓഫീസ് നിർദ്ദേശം നൽകി. ഇതിന്റെ ഭാഗമായി ചേർപ്പ് ബ്ലോക്ക് പഞ്ചായത്ത് പാലക്കൽ ഡിവിഷനിൽപ്പെട്ട ആനക്കല്ല് ദീപം നഗർ, പാലക്കൽ കപ്പക്കാട് പ്രദേശം എന്നിവിടങ്ങളിൽ പ്രതിരോധ പ്രവർത്തനത്തിന്റെ ഭാഗമായി ചെയ്യേണ്ട കാര്യങ്ങൾ അടങ്ങിയ ലഘുലേഖ വിതരണം ചെയ്തു.
ഇടയ്ക്കിടെ കൈകൾ കഴുകി വൃത്തിയാക്കുന്നതിന്റെ ആവശ്യകതയും സാനിറ്റൈസർ ഉപയോഗവും രോഗ ലക്ഷണങ്ങളുള്ളവർ മാസ്‌ക് ഉപയോഗിക്കേണ്ടതിന്റെ ആവശ്യകതയും വിവരിച്ചു നൽകി.

കോവിഡ് 19പ്രതിരോധ പ്രവർത്തനങ്ങളുടെ ഭാഗമായി ഒല്ലൂർ വൈലോപ്പിള്ളി ശ്രീധര മേനോൻ മെമ്മോറിയൽ ഗവൺമെന്റ് വൊക്കേഷനൽ സ്‌കൂളിലെ വിദ്യാർത്ഥികൾ പേപ്പർ സോപ്പ് നിർമ്മിച്ച് താരങ്ങളായി.
ഡെറ്റോൾ സോപ്പ് ട്രെയിസിങ് പേപ്പറിൽ പതിപ്പിച്ച്, ട്രേസിങ് പേപ്പർ തീരെ ചെറിയ കഷണങ്ങളാക്കി മാറ്റിയാണ് പേപ്പർ സോപ്പ് നിർമ്മാണം. പത്ത് കഷണങ്ങളാക്കിയാണ് ഒരു ട്രേസിങ് പേപ്പറിനെ മുറിക്കുന്നത്. ഇങ്ങനെ മുറിച്ചു കഷണങ്ങളാക്കിയ ട്രേസിംഗ് പേപ്പറുകൾ സ്റ്റേപ്പിൾ ചെയ്ത് ഉറപ്പിച്ച് കൂടെ കൊണ്ടു നടക്കാം. ഏതു സമയത്തു വേണമെങ്കിലും ഓരോ കഷണങ്ങൾ ഉപയോഗിക്കാം. ഒരു തവണ ഉപയോഗിച്ച് കഴിഞ്ഞാൽ പേപ്പർ അലിഞ്ഞുപോകും.

തൃശൂർ കോർപ്പറേഷൻ കോവിഡ് 19ന്റെ ഭാഗമായി നടത്തിയ പ്രതിരോധ പ്രവർത്തനങ്ങൾ ചർച്ച ചെയ്യാൻ പ്രത്യേക യോഗം ചേർന്നു. കോവിഡ് 19നെതിരെ എടുക്കേണ്ട ജാഗ്രതയെക്കുറിച്ചും വാർഡ് തലത്തിൽ നടപ്പിലാക്കേണ്ട പ്രവർത്തനങ്ങളെക്കുറിച്ചും യോഗം ചർച്ച ചെയ്തു.

തളിക്കുളം ഗവ. ഹൈസ്‌കൂൾ പൂർവ്വ വിദ്യാർഥി സംഘടനയായ ലൈഫ് 91 തളിക്കുളം കുടുംബാരോഗ്യ കേന്ദ്രത്തിലേയ്ക്ക് ഉപകരണങ്ങൾ സംഭാവന ചെയ്തു.
സർക്കാർ പദ്ധതിയായ 'ബ്രേക്ക് ദി ചെയിന്റെ ഭാഗമായി തളിക്കുളം പ്രൈമറി ഹെൽത്ത് സെന്ററിൽ വരുന്ന രോഗികളുടെയും ജീവനക്കാരുടെയും ആരോഗ്യ സുരക്ഷയെ മുൻ നിർത്തി ഹാൻഡ് വാഷിംഗ് കിയോസ്‌ക് സ്ഥാപിച്ചു. സ്പർശനം കൂടാതെ ശരീരോഷ്മാവ് അളക്കാനുള്ള ഇൻഫ്രാറെഡ് തെർമോ മീറ്ററും, ഗ്ലൗസുകളും, മാസ്‌ക്കുകളും തളിക്കുളം കുടുംബാരോഗ്യ കേന്ദ്രത്തിലേയ്ക്ക് കൈമാറി.

എറിയാട് പഞ്ചായത്ത് പരിധിയിലെ സർക്കാർ ഓഫീസുകളിലേയ്ക്ക് ഹാന്റ് സാനിറ്റൈസർ നിർമ്മിച്ചു നൽകുന്നു. അഴീക്കോട് ഗ്രാമീണ വായനശാല സംസ്‌കൃതി വനിതാവേദി പ്രവർത്തകർ പരിശീലനത്തിന്റെ ഭാഗമായി നിർമ്മിച്ച സാനിറ്റൈസറുകളാണ് വിതരണം ചെയ്യുക. ബ്രേക്ക് ദി ചെയിൻ കാമ്പൈനിന്റെ ഭാഗമായാണ് നിർമ്മാണ പരിശീലനം നൽകിയത്. ഹാന്റ് സാനിറ്റൈസറിന് ദൗർലഭ്യമുള്ളതിനാൽ സാധാരണ ജനങ്ങൾക്ക് ഇത് ലഭ്യമാക്കാനാണ് ഹാന്റ് സാനിറ്റൈസർ വീട്ടിലുണ്ടാകാൻ പരിശീലനം നൽകിയത്. എറിയാട് പഞ്ചായത്ത് അംഗവും വനിതാ വേദി കൺവീനറുമായ ജ്യോതി സുനിൽ പരിശീലനത്തിന് നേതൃത്വം നൽകി. നിമ്മി, കവിത, ശാലിനി, ഷഫ്ന, ഉഷ തുടങ്ങിയവർ പങ്കെടുത്തു.

കോവിഡ് 19 വൈറസ് വ്യാപനം തടയുന്നതിന് പൊയ്യ ഗ്രാമപഞ്ചായത്ത് ഏറ്റെടുത്തിരിക്കുന്ന 'ആരോഗ്യസുരക്ഷ-2020' പരിപാടിയുടെ ഭാഗമായി പൊതു ഇടങ്ങളിൽ കൈകഴുകുന്നതിന് സംവിധാനം ഒരുക്കി. പൂപ്പത്തിയിലെ വ്യാപാരി വ്യവസായി ഏകോപന സമിതിയുടെ സഹകരണത്തോടെയാണ് പൊതു ഇടങ്ങളിൽ ജനങ്ങൾക്ക് ഹാൻഡ് വാഷ് ഉപയോഗിച്ച് കൈകൾ കഴുകുന്നതിനുള്ള സൗകര്യമൊരുക്കിയത്. 12 ഇടങ്ങളിലാണ് സംവിധാനമൊരുക്കിയിരിക്കുന്നത്.

കോവിഡ് 19 പ്രതിരോധപ്രവർത്തനങ്ങളുടെ ഭാഗമായി പൊതുജനാരോഗ്യമേഖലയിലെ പ്രസക്തമായ വിവരങ്ങൾ ശേഖരിക്കാൻ ഐടി മിഷൻ നടപടി തുടങ്ങി. കോവിഡ് 19 മായി ബന്ധപ്പെട്ട് യാത്രക്കാരെയും പൊതുജനങ്ങളെയും നിരീക്ഷണത്തിന് വിധേയമാക്കുന്നതുൾപ്പെടെ ഒട്ടേറെ വിവരങ്ങൾ ക്രോഡീകരിക്കേണ്ടതിനുളളതിനാൽ അവ ഡിജിറ്റലായി രേഖപ്പെടുത്താനാണ് പരിപാടി. ഐടി മിഷൻ ജില്ലാ പ്രോഗ്രാം മാനേജർമാരുടെ നേതൃത്വത്തിൽ പൊതുജനാരോഗ്യ മേഖലയിലുമായി ബന്ധപ്പെട്ട മറ്റ് പ്രസക്ത വിവരങ്ങളും അക്ഷയകേന്ദ്രങ്ങൾ വഴി ശേഖരിക്കും.