ഒഡെപെക്ക് മുഖേന ഒമാനിലെ പ്രമുഖ ആശുപത്രിയിലേക്ക് നഴ്‌സുമാരെ നിയമിക്കുന്നു. മൂന്ന് വർഷത്തിൽ കുറയാത്ത പ്രവൃത്തിപരിചയമുളള ഉദ്യോഗാർത്ഥികൾ ബയോഡാറ്റ recruit@odepc.in  എന്ന മെയിലിലേക്ക് 30 നകം അയയ്ക്കണം. വിശദവിവരങ്ങൾക്ക് www.odepc.kerala.gov.in  സന്ദർശിക്കുക. ഫോൺ: 0471-2329440/41/42/43.
പി.എൻ.എക്സ്. 2265/2020

2020-21 അധ്യയന വർഷത്തെ സംസ്ഥാന ഹയർ സെക്കന്ററി സ്‌കൂൾ അദ്ധ്യാപകരെ നിയമിക്കാനുളള സെലക്ഷൻ കമ്മിറ്റിയിൽ അംഗമാകാൻ അപേക്ഷിക്കാം. സർക്കാർ വകുപ്പിലെ ഡെപ്യൂട്ടി സെക്രട്ടറി/ഡെപ്യൂട്ടി കളക്ടർ റാങ്കിൽ കുറയാത്ത ഉദ്യോഗസ്ഥർ അവരുടെ പേര് വിവരം പെൻ നമ്പർ സഹിതം 27ന് വൈകുന്നേരം നാല് മണിക്ക് മമ്പ് നൽകണം. ജില്ലാ കളക്ടർ മുഖേന പേരുവിവരങ്ങൾ നൽകുന്ന ഉദ്യോഗസ്ഥർ വീണ്ടും അപേക്ഷ നൽകേണ്ടതില്ല. ഡയറക്ടർ ജനറൽ ഓഫ് എഡ്യുക്കേഷന്റെ ഓഫീസ്, ഹയർ സെക്കൻഡറി വിഭാഗം, ഹൗസിംഗ് ബോർഡ് ബിൽഡിംഗ്, ശാന്തിനഗർ, തിരുവനന്തപുരം-01 എന്ന വിലാസത്തിലാണ് അപേക്ഷ നൽകേണ്ടത്.

നെന്മാറ ബ്ലോക്ക് പഞ്ചായത്ത് 2018-19,  2019- 20 സാമ്പത്തിക വര്‍ഷങ്ങളിലായി 8,50,000 രൂപ വകയിരുത്തി പൂര്‍ത്തീകരിച്ച നെന്മാറ സീനിയര്‍ വെറ്ററിനറി ആശുപത്രിയിലെ എയര്‍കണ്ടീഷന്‍ ചെയ്ത ഹൈടെക് ഓപ്പറേഷന്‍ തിയേറ്റര്‍ ഉദ്ഘാടനം കെ. ബാബു എം.എല്‍.എ നിര്‍വഹിച്ചു. നെന്മാറ ബ്ലോക്ക് പഞ്ചായത്ത് പ്രസിഡന്റ് പി. വി. രാമകൃഷ്ണന്‍ അധ്യക്ഷനായി.

കോവിഡ് - 19 പ്രതിര്‍ോധ പ്രവര്‍ത്തനങ്ങള്‍ക്കായി ദേശീയ ആരോഗ്യ ദൗത്യത്തിന്റെ കീഴില്‍ ജില്ലയില്‍ വിവിധ തസ്തികകളില്‍ താത്ക്കാലിക നിയമനം നടത്തുന്നു.

മോളിക്കുലര്‍ ലാബ് ടെക്നീഷ്യന്‍ ഒഴിവിലേക്ക് എം.എസ്.സി. ബയോ ടെക്നോളജി/എം.എസ്.സി. ഉളളവര്‍ക്ക് അപേക്ഷിക്കാം മൈക്രോബയോളജി കൂടാതെ മോളിക്കുലാര്‍ ലാബ്/പി.സി.ആര്‍ പ്രവൃത്തി പരിചയം ഉണ്ടാവണം. ഒരു ഒഴിവാണുള്ളത്.

ജില്ലയില്‍ ഒഴിവുളള ജൂനിയര്‍ പബ്ലിക് ഹെല്‍ത്ത് നഴ്സ് ഗ്രേഡ് - 2 തസ്തികയില്‍ താത്ക്കാലിക നിയമനം നടത്തുന്നു.  എ.എന്‍.എം (കേരള നഴ്സസ് & മിഡ്വൈഫ്സ് കൗണ്‍സില്‍ രജിസ്ട്രേഷന്‍) കോഴ്സ് കഴിഞ്ഞവര്‍ക്കാണ് അവസരം. താത്പര്യമുളളവര്‍ ബന്ധപ്പെട്ട രേഖകളുടെ അസ്സലും, പകര്‍പ്പും സഹിതം ജില്ലാ മെഡിക്കല്‍ ഓഫീസറുടെ (ആരോഗ്യം) കാര്യാലയത്തില്‍ ജൂണ്‍ 29 ന് രാവിലെ 10.30 ന് എത്തണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു.

ജില്ലയില്‍ ഒഴിവ് വരുന്ന പ്രൈമറി പ്രധാനാധ്യാപക തസ്തികയിലേക്ക് സ്ഥാനകയറ്റം നല്‍കുന്നതിനായി യോഗ്യരായ പ്രൈമറി അധ്യാപകരില്‍ നിന്നും ലഭിച്ച സര്‍വ്വീസ് കാര്‍ഡുകള്‍ പരിശോധിച്ച് തയ്യാറാക്കിയ പ്രൊവിഷണല്‍ സീനിയോറിറ്റി ലിസ്റ്റ് www.ddepalakkad.wordpress.com ല്‍ പ്രസിദ്ധീകരിച്ചതായി ജില്ലാ വിദ്യാഭ്യാസ ഉപഡയറക്ടര്‍ അറിയിച്ചു. പട്ടിക സംബന്ധിച്ച പരാതികള്‍/അപാകതകള്‍ ജൂലൈ രണ്ടിനകം പാലക്കാട് വിദ്യാഭ്യാസ ഉപഡയറക്ടറുടെ കാര്യാലയത്തില്‍ രേഖാമൂലം സമര്‍പ്പിക്കേണ്ടതാണ്. ഫോണ്‍ : 0491-2505469.

സാമൂഹ്യ നീതി വകുപ്പ് മുഖാന്തിരം നടപ്പാക്കുന്ന പ്രൊബേഷന്‍ ആന്റ് ആഫ്റ്റര്‍ കെയര്‍ പദ്ധതിപ്രകാരം മുന്‍ കുറ്റവാളികള്‍, പ്രൊബേഷണര്‍, എക്‌സ് പ്യൂപ്പിള്‍, കുറ്റവാളികളുടെ ആശ്രിതര്‍ എന്നിവര്‍ക്കുളള സ്വയം തൊഴില്‍ ധനസഹായം, അതിക്രമത്തിനിരയായവരുടെ മക്കള്‍ക്കുളള വിദ്യാഭ്യാസ ധനസഹായം എന്നിവയ്ക്കായി അപേക്ഷിക്കാന്‍ അവസരം. താത്പര്യമുളളവര്‍ ആവശ്യമായ രേഖകള്‍ സഹിതം അപേക്ഷ ജൂലൈ 15 നകം ജില്ലാ പ്രൊബേഷന്‍ ഓഫീസില്‍ നല്‍കണമെന്ന് ജില്ലാ പ്രൊബേഷന്‍ ഓഫീസര്‍ അറിയിച്ചു. പദ്ധതി സംബന്ധിച്ച കൂടുതല്‍ വിവരങ്ങള്‍ 9446689508 ല്‍ ലഭിക്കും.

 
ദുബായ്, ബഹറിന്‍, മസ്‌കറ്റ്, ഷാര്‍ജ, റാസല്‍ഖൈമ, ഒമാന്‍, കുവൈറ്റ് എന്നിവിടങ്ങളില്‍ നിന്നും നെടുമ്പാശ്ശേരി, കരിപ്പൂര്‍ അന്താരാഷ്ട്ര വിമാനത്താവളങ്ങളിലായി  ഇന്നലെ (ജൂണ്‍ 23) ജില്ലയിലെത്തിയത് 65 പാലക്കാട് സ്വദേശികള്‍. ഇവരില്‍ 25 പേര്‍ ഇന്‍സ്റ്റിറ്റിയൂഷനല്‍ ക്വാറന്റൈനില്‍ പ്രവേശിച്ചു. 39 പേര്‍ വീടുകളില്‍ നിരീക്ഷണത്തിലാണ്. രോഗലക്ഷണങ്ങള്‍ കണ്ടതിനെ തുടര്‍ന്ന് ഒരാളെ കളമശ്ശേരി മെഡിക്കല്‍ കോളേജില്‍ പ്രവേശിപ്പിച്ചിട്ടുണ്ട്.