കുത്താമ്പുള്ളി പ്രാഥമികാരോഗ്യ കേന്ദ്രവും തിരുവില്വാമല ഗ്രാമപഞ്ചായത്തും പ്രൈവറ്റ് ബസ് ഓണേഴ്സ് ഓർഗനൈസേഷനും മോട്ടോർ വാഹന വകുപ്പും സംയുക്തമായി തിരുവില്വാമല പ്രൈവറ്റ് ബസ് സ്റ്റാൻഡിൽ ബോധവൽക്കരണ പരിപാടി നടത്തി. കോവിഡ് 19 വ്യാപനം തടയുന്നതിന്റെ ഭാഗമായാണ് ബോധവൽക്കരണം നടത്തിയത്. ബസ് ജീവനക്കാരും ബസ് യാത്രക്കാരും പാലിക്കേണ്ട മുൻകരുതലുകൾ ഹെൽത്ത് ഇൻസ്പെക്ടർ അനു ഫയസ് വിശദീകരിച്ചു. നിർദ്ദേശങ്ങൾ അടങ്ങിയ സ്റ്റിക്കർ ബസിൽ പതിച്ചു. മോട്ടോർ വെഹിക്കിൾ ഇൻസ്പെക്ടർമാരായ അരുൺ സുധീഷ്, പ്രൈവറ്റ് ബസ് ഓണേഴ്സ് ഓർഗനൈസേഷൻ ഭാരവാഹികളായ രാജീവ,് സുനിൽ, റഹ്മാൻ എന്നിവരും സംസാരിച്ചു.

കോവിഡ് 19 രോഗവ്യാപന സാഹചര്യത്തിൽ അങ്കണവാടികൾക്കും വിദ്യാഭ്യാസ സ്ഥാപനങ്ങൾക്കും മാർച്ച് 31 വരെ സർക്കാർ അവധി നൽകി. കുട്ടികൾ അങ്കണവാടികളിൽ എത്തിയില്ലെങ്കിലും അവർക്ക് വേണ്ട പോഷകാഹാരങ്ങളും ഭക്ഷണ പദാർഥങ്ങളും വീടുകളിൽ എത്തിക്കണമെന്ന നിർദ്ദേശത്തെതുടർന്ന് വനിത ശിശു വികസന വകുപ്പിന്റെ നേതൃത്വത്തിലാണ് അങ്കണവാടിയിലെ കുട്ടികൾക്കുള്ള ഭക്ഷണം അവരുടെ വീടുകളിലേക്ക് എത്തിച്ചു നൽകിത്തുടങ്ങിയത്.അങ്കണവാടി ടീച്ചർമാരും ഹെൽപ്പർമാരും ഏറെ ആവേശത്തോടെയാണ് ഇത് നിർവ്വഹിച്ചുവരുന്നത്.

കോവിഡ്-19 സംബന്ധിച്ച് ഓരോ നിമിഷവും ജാഗ്രത പാലിച്ചിലെങ്കിൽ കാര്യങ്ങൾ പിടിവിട്ടു പോകുമെന്ന് മുഖ്യമന്ത്രി പിണറായി വിജയൻ പറഞ്ഞു. തദ്ദേശസ്വയംഭരണ സ്ഥാപന ജനപ്രതിനിധികളുമായി നടത്തിയ വീഡിയോ കോൺഫറൻസിൽ സംസാരിക്കുകയായിരുന്നു അദ്ദേഹം.
കോവിഡ്-19 വ്യാപനം അസാധാരണമായ ആരോഗ്യസുരക്ഷാ ഭീഷണിയാണ് ലോകത്താകെ ഉയർത്തിയിരിക്കുന്നത്. നമ്മുടെ രാജ്യവും സംസ്ഥാനവും അതിൽ നിന്ന് മുക്തമല്ല. കേരളത്തിൽ ബുധനാഴ്ച വരെ 27 പേർക്കാണ് രോഗബാധ സ്ഥിരീകരിച്ചത്. അതിൽ മൂന്നു പേർ രോഗത്തിൽ നിന്ന് മുക്തരായി. കാൽ ലക്ഷത്തിലേറെ പേർ നിരീക്ഷണത്തിലാണ്. ഇതിൽ ബഹുഭൂരിപക്ഷവും വീടുകളിലാണ് നിരീക്ഷണത്തിലുള്ളത്. മുഖ്യമന്ത്രി പറഞ്ഞു.

കോവിഡ് 19 പ്രതിരോധത്തിന്റെ ഭാഗമായി ജില്ലയിൽ 3366 പേരാണ് നിരീക്ഷണത്തിൽ ഉളളത്. വീടുകളിൽ 3336 പേരും ആശുപത്രികളിൽ 30 പേരും നിരീക്ഷണത്തിലുണ്ട്. വ്യാഴാഴ്ച (മാർച്ച് 19) നാലു പേരെ ആശുപത്രിയിൽ പ്രവേശിപ്പിച്ചപ്പോൾ ഏഴു പേരെ ഡിസ്ചാർജ്ജ് ചെയ്തു. 20 സാമ്പിളുകൾ കൂടി പരിശോധനയ്ക്ക് അയച്ചു. 356 സാമ്പിളുകളാണ് ഇതു വരെ പരിശോധനയ്ക്ക് അയച്ചത്. ഇതിൽ 316 എണ്ണത്തിന്റെ ഫലം വന്നു. 40 പേരുടെ പരിശോധന ഫലം ഇനിയും കിട്ടാനുണ്ട്. ഒടുവിൽ ലഭിച്ച 36 പരിശോധന ഫലവും നെഗറ്റീവാണ്.

പൊതുജനസേവന രംഗത്തെ നൂതന ആശയാവിഷ്‌ക്കാരത്തിനുള്ള (ഇന്നവേഷൻസ്) മുഖ്യമന്ത്രിയുടെ 2018ലെ അവാർഡുകൾക്കുള്ള അപേക്ഷ സമർപ്പിക്കുന്നതിനുള്ള തിയതി ഏപ്രിൽ 30 വരെ നീട്ടി.  സർക്കാർ വകുപ്പുകൾ, തദ്ദേശ സ്വയംഭരണ സ്ഥാപനങ്ങൾ, സാമൂഹ്യവികസന/ സ്വയംസഹായ/ അയൽപക്കസംഘങ്ങൾ, പൊതുമേഖലാസ്ഥാപനങ്ങൾ/ സർക്കാർ നിയന്ത്രണത്തിലുള്ള സ്വയംഭരണ സ്ഥാപനങ്ങൾ, സർക്കാരിതര സ്ഥാപനങ്ങൾ എന്നിവയിൽ 2018ൽ നടപ്പാക്കിയ നൂതന ആശയാവിഷ്‌കാരത്തിനാണ് അവാർഡ്.  പബ്ലിക് സർവീസ് ഡെലിവറി, പേഴ്സണൽ മാനേജ്മെന്റ്, പ്രൊസീഡ്വറൽ ഇന്റർവെൻഷൻസ്, ഡെവലപ്മെന്റൽ ഇന്റർവെൻഷൻസ് എന്നീ നാലു വിഭാഗങ്ങൾക്കാണ് അവാർഡ്.

കേരളത്തിൽ കോവിഡ് 19 സ്ഥിരീകരിച്ച സാഹചര്യത്തിൽ കേരള മെഡിക്കൽ സർവീസസ് കോർപ്പറേഷന്റെ ആസ്ഥാനത്ത് വിവിധ വിഭാഗങ്ങളിൽ ഡാറ്റാ എൻട്രി ഓപ്പറേറ്റർമാരെ തിരഞ്ഞെടുക്കുന്നതിന് 27ന് നടത്താനിരുന്ന ഇന്റർവ്യൂ മാറ്റിവച്ചതായി എം.ഡി അറിയിച്ചു.
പി.എൻ.എക്സ്.1133/2020

പരമ്പരാഗത മത്സ്യബന്ധനയാനങ്ങൾക്ക് മണ്ണെണ്ണ പെർമിറ്റ് നൽകുന്നതിനായി ഫിഷറീസ്, സിവിൽ സപ്ലൈസ് വകുപ്പുകളിലെയും മത്സ്യഫെഡിലെയും ഉദ്യോഗസ്ഥരുടെ നേതൃത്വത്തിൽ ഏപ്രിൽ 19ന് നടത്താനിരുന്ന ഏകദിന മണ്ണെണ്ണ പെർമിറ്റ് വെരിഫിക്കേഷൻ മെയ് മാസത്തേക്ക് മാറ്റി.  പുതുക്കിയ തിയതി പിന്നീട് അറിയിക്കും.  പെർമിറ്റ് വെരിഫിക്കേഷന് ലൈസൻസ് നിർബന്ധമാക്കിയിട്ടുള്ളതിനാൽ ലൈസൻസ് പുതുക്കുന്ന നടപടിക്രമം ഏപ്രിൽ 30 വരെ നിയന്ത്രിത രീതിയിൽ തുടരുമെന്നും ഫിഷറീസ് ഡയറക്ടർ അറിയിച്ചു.
പി.എൻ.എക്സ്.1132/2020

മുഖ്യമന്ത്രി പിണറായി വിജയനും പ്രതിപക്ഷനേതാവ് രമേശ് ചെന്നിത്തലയും കേരളത്തിലെ പഞ്ചായത്ത്, നഗരസഭ അംഗങ്ങളുമായി നടത്തിയ തത്സമയ ഓൺലൈൻ വെബ്കാസ്റ്റിംഗ് പരിപാടിക്ക് സാങ്കേതിക സഹായം ഒരുക്കിയത് സംസ്ഥാന സർക്കാർ സ്ഥാപനങ്ങളായ സിഡിറ്റും കൈറ്റും.  സിഡിറ്റ് ഏർപ്പെടുത്തിയ വെബ് സ്ട്രീമിങ് സൈറ്റായ  live.cdit.org വഴിയാണ് സന്ദേശം തത്സമയം വെബ്കാസ്റ്റ് ചെയ്തത്.  കൈറ്റിന്റെ ടി.വി ചാനലായ വിക്ടേഴ്സിലും പരിപാടി തത്സമയം സംപ്രേഷണം ചെയ്തിരുന്നു.