കൊച്ചി: പട്ടികജാതി വിഭാഗത്തില്‍പ്പെട്ട അംഗീകൃത പെട്രോളിയം ഡീലര്‍മാര്‍ക്ക് അവരുടെ നിലവിലെ പെട്രോള്‍/ഡീസല്‍ വില്‍പ്പനശാലകള്‍ പ്രവര്‍ത്തനനിരതമാക്കുന്നതിനും വിപുലീകരിക്കുന്നതിനുമായി പ്രവര്‍ത്തനമൂലധന വായ്പ നല്‍കും. സംസ്ഥാന പട്ടികജാതി/പട്ടികവര്‍ഗ വികസന കോര്‍പറേഷന്‍ ഇതിനായുള്ള അപേക്ഷ ക്ഷണിച്ചു.

ഡെപ്യൂട്ടി കലക്ടര്‍ (എല്‍.ആര്‍) കലക്ടറേറ്റില്‍ മാര്‍ച്ച് 9ന് വിചാരണയ്ക്കു വച്ച കണ്ണൂര്‍ താലൂക്കിലെ എല്ലാ ദേവസ്വം പട്ടയ കേസുകളും മാര്‍ച്ച് 26ന് 11 മണിയിലേക്ക് മാറ്റി.
 

    തോട്ടപ്പുഴശേരി ഗ്രാമപഞ്ചായത്ത്, കൃഷിഭവന്‍, വെളളങ്ങൂര്‍ പാടശേഖരസമിതി എന്നിവയുടെ സംയുക്താഭിമുഖ്യത്തില്‍ വെള്ളങ്ങൂര്‍  പാടശേഖരത്തിലെ 14 ഹെക്ടര്‍ സ്ഥലത്തെ നെല്‍കൃഷിയുടെ വിളവെടുപ്പ് ഉത്സവം നടത്തി. ഗ്രാമപഞ്ചായത്ത് പ്രസിഡന്‍റ് എല്‍സി ക്രിസ്റ്റഫര്‍ ഉദ്ഘാടനം  ചെയ്തു. തോട്ടപ്പുഴശേരിയെ തരിശുരഹിത പഞ്ചായത്താക്കി മാറ്റുകയും അതോടൊപ്പം തോട്ടപ്പുഴശേരി ബ്രാന്‍റ് അരി അടുത്ത വര്‍ഷം മാര്‍ക്കറ്റില്‍ ലഭ്യമാക്കുകയുമാണ് പഞ്ചായത്തിന്‍റെ ലക്ഷ്യമെന്ന് പ്രസിഡന്‍റ് പറഞ്ഞു.

 ജില്ലാ പഞ്ചായത്ത്  ജില്ലാ സാക്ഷരതാ മിഷന്‍ മുഖേന നടപ്പിലാക്കുന്ന ആദിവാസി സമഗ്ര ആദിവാസി വിദ്യാഭ്യാസ പരിപാടിയുടെ ഭാഗമായി നടക്കുന്ന ക്ലാസുകള്‍  സജീവമായി. 124 കോളനികളിലായി 1312 പേര്‍ പഠനക്ലാസുകളിലെത്തി.  ഏറ്റവുമധികം ആളുകള്‍ പഠിക്കുന്നത് പേരാവൂര്‍ ബ്ലോക്കിലാണ്. അവിടെ 398 പേര്‍ പഠന ക്ലാസുകളിലെത്തി പഠനം നടത്തുന്നു. തളിപ്പറമ്പ് ബ്ലോക്കില്‍ 380 പേരും കൂത്തുപറമ്പില്‍ 145 പേരും പയ്യന്നൂര്‍ ബ്ലോക്കില്‍ 134 പേരും ഇരിട്ടി ബ്ലോക്കില്‍ 106 പേരും പഠനം നടത്തുന്നു. കൂടാതെ പാനൂര്‍ ബ്ലോക്കിലും ഇരിട്ടി നഗരസഭയിലും ക്ലാസുകള്‍ നടക്കുന്നു. ആദ്യഘട്ടത്തില്‍ സാക്ഷരതാ ക്ലാസുകളാണ് സംഘടിപ്പിക്കുന്നത്.

കണ്ണൂര്‍ റുഡ്സെറ്റ് ഇന്‍സ്റ്റിറ്റ്യൂട്ട് മൊബൈല്‍ ഫോണ്‍ സര്‍വീസിങ്  സൗജന്യ പരിശീലനം സംഘടിപ്പിക്കുന്നു.  ഏപ്രില്‍ ആദ്യവാരം  ആരംഭിക്കുന്ന ഒരു മാസത്തെ പരിശീലന  പരിപാടിയില്‍ ഭക്ഷണവും സൗജന്യ താമസ സൗകര്യവും ലഭിക്കും.  സംരംഭകത്വ കഴിവുകള്‍, പ്രൊജക്റ്റ് റിപ്പോര്‍ട്ട് തയ്യാറാക്കല്‍, എന്റര്‍പ്രൈസ് മാനേജ്‌മെന്റ്, ബാങ്ക് വായ്പാ മാര്‍ഗനിര്‍ദേശങ്ങള്‍, തുടങ്ങിയ വിഷയങ്ങളും  പരിശീലന പരിപാടിയില്‍ ഉള്‍പ്പെടുത്തിയിരിക്കുന്നു.

ജില്ലാ പഞ്ചായത്തിന് കീഴിലെ ജില്ലാ ഹോമിയോ ആശുപത്രിയില്‍ പ്രവര്‍ത്തിക്കുന്ന ജനനി പദ്ധതിയുടെ ഭാഗമായി സാര്‍വദേശീയ മഹിളാദിനത്തില്‍ 'പുത്തന്‍ പുലരി' വന്ധ്യതാ ചികില്‍സാ ക്യാമ്പ് നടത്തി. കണ്ണൂര്‍ ജവഹര്‍ ലൈബ്രറി ഹാളില്‍ ജില്ലാ പഞ്ചായത്ത് പ്രസിഡന്റ് കെ.വി സുമേഷ് ഉദ്ഘാടനം ചെയ്തു. വൈസ് പ്രസിഡന്റ് പി.പി ദിവ്യ അധ്യക്ഷത വഹിച്ചു. പൊതുമരാമത്ത് സ്ഥിരം സമിതി ചെയര്‍പേഴ്‌സന്‍ കെ. ശോഭ, ഡോ. എ.ടി സുരേഷ്, ജനനി പ്രൊജക്ട് കണ്‍വീനര്‍ ഡോ. എസ്. ശ്രീവിദ്യ എന്നിവര്‍ സംസാരിച്ചു. ക്യാമ്പില്‍ ഡോക്ടര്‍മാരായ എസ്. ശ്രീവിദ്യ, അമുദ, ലേഖ, മനോജ് കുമാര്‍ ടി.ജി, രശ്മി, സംഗീത, സിന്ധു, സീന, ജിബില്‍, ഗീത എന്നിവര്‍ പരിശോധന നടത്തി.

സംസ്ഥാനത്തെ ഏറ്റവും വലിയ താലൂക്കായ തളിപ്പറമ്പും കണ്ണൂര്‍ താലൂക്കും വിഭജിച്ച് രൂപവത്കരിക്കുന്ന പയ്യന്നൂര്‍ താലൂക്കിന്റെ ഉദ്ഘാടനം മാര്‍ച്ച് 10ന് ഉച്ച 2.30ന് പയ്യന്നൂരില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. പയ്യന്നൂര്‍ ബോയ്‌സ് ഹൈസ്‌കൂള്‍ സ്‌റ്റേഡിയത്തില്‍ നടക്കുന്ന ചടങ്ങില്‍ റവന്യു വകുപ്പ് മന്ത്രി ഇ. ചന്ദ്രശേഖരന്‍ അധ്യക്ഷത വഹിക്കും.

  കിര്‍ടാഡ്‌സ് (കേരള ഇന്‍സ്റ്റിറ്റ്യൂട്ട് ഫോര്‍ റിസര്‍ച്ച് ട്രെയിനിംഗ് ആന്റ് ഡവലപ്‌മെന്റ് സ്റ്റഡീസ് ഓഫ് ഷെഡ്യൂള്‍ഡ് കാസ്റ്റ്‌സ് ആന്റ്  ഷെഡ്യൂള്‍ഡ് ട്രൈബ്‌സ്) വകുപ്പിന്‍ കീഴില്‍ വയനാട് ജില്ലയില്‍ ആരംഭിക്കുന്ന ഗോത്രഭാഷാ പഠന കേന്ദ്രത്തില്‍ റിസര്‍ച്ച് അസിസ്റ്റന്റിന്റെ താല്‍ക്കാലിക ഒഴിവുണ്ട്. പ്രതിമാസ ഹോണറേറിയം 17000 രൂപയും അംഗീകാരത്തിന് വിധേയമായി 2500 രൂപ യാത്രാബത്തയും.