കോട്ടയം: പെരുവ ഗവ.ഐ.ടി.ഐ യില്‍ ഡ്രാഫ്റ്റ്‌സ്മാന്‍ സിവില്‍,കമ്പ്യൂട്ടര്‍ ഓപ്പറേറ്റര്‍ ആന്‍ഡ് പ്രോഗ്രാമിംഗ്  അസിസ്റ്റന്റ് ട്രേഡുകളില്‍ പ്രവേശനത്തിന് എസ്.എസ്.എല്‍.സി പാസായവരില്‍ നിന്നും അപേക്ഷ ക്ഷണിച്ചു.https://itiadmissions.kerala.gov.in    വെബ്‌സൈറ്റ് വഴി ഓണ്‍ലൈന്‍ അപേക്ഷ സമര്‍പ്പിക്കണം.അവസാനതീയതി ജൂണ്‍ 29. അപേക്ഷ സമര്‍പ്പിച്ച ശേഷം ഏതെങ്കിലും ഐ.ടി.ഐ യില്‍   ജൂലൈ ആറുവരെ  നടക്കുന്ന  വെരിഫിക്കേഷന് ഹാജരാകേണ്ടതാണ്.വിശദവിവരങ്ങള്‍ക്ക് ഫോണ്‍: 04829-292678,8592055889

കോട്ടയം :കുഴിമറ്റം ഗവ.എല്‍.പി  സ്‌കൂളില്‍ ദിവസവേതനാടിസ്ഥാനത്തില്‍ അധ്യാപകനിയമനം നടത്തുന്നതിനായി അഭിമുഖം നടത്തുന്നു.  താല്‍പര്യമുള്ളവര്‍ യോഗ്യത തെളിയിക്കുന്ന അസല്‍ പ്രമാണങ്ങളുമായി ജൂണ്‍ 20 ന് ഉച്ചകഴിഞ്ഞു 2.30ന് സ്‌കൂള്‍ ഓഫീസില്‍ നടക്കുന്ന അഭിമുഖത്തിന് എത്തേണ്ടതാണ്.ഫോണ്‍ 0481-2332653

കോട്ടയം: പൊതുവിദ്യാഭ്യാസവകുപ്പിന് കീഴിലുള്ള സ്റ്റേറ്റ് റിസോഴ്സ് സെന്ററിന്റെ എസ്.ആർ.സി. കമ്മ്യൂണിറ്റി കോളജിലെ ജൂലൈ സെഷനിൽ ആരംഭിക്കുന്ന ഡിപ്ലോമ ഇൻ എയർലൈൻ ആൻഡ് എയർപോർട്ട് മാനേജ്മെന്റ് പ്രോഗ്രാമിലേക്ക് ജൂൺ 30 വരെ അപേക്ഷിക്കാം. പ്ലസ്ടു അഥവാ തത്തുല്യമാണു യോഗ്യത. അപേക്ഷഫോമും പ്രോസ്പെക്ടസും തിരുവനന്തപുരം നന്ദാവനത്തെ എസ് .ആർ.സി ഓഫീസിൽനിന്നും ലഭിക്കും., ഫോൺ: 9846033001

കോട്ടയം: സംസ്ഥാനത്ത് ഏറ്റവും മികച്ച ലിറ്റിൽ കൈറ്റ്സ് യൂണിറ്റുകൾക്കുള്ള 2023- 24 ലെ പുരസ്‌കാരങ്ങൾ പ്രഖ്യാപിച്ചു. ജില്ലാതലത്തിൽ മാന്നാനം സെന്റ് എഫ്രേംസ് എച്ച്എസ്എസ് ഒന്നാം സ്ഥാനവും വാകക്കാട് അൽഫോൻസ എച്ച്.എസ്. രണ്ടാം സ്ഥാനവും നെടുംകുന്നം സെന്റ് തെരേസാസ് എച്ച്എസ് മൂന്നാംസ്ഥാനവും നേടി. ജൂലൈ ആറിന് നിയമസഭാ മന്ദിരത്തിനുള്ളിലെ ശങ്കരനാരായണൻ തമ്പി ഹാളിൽ മുഖ്യമന്ത്രി പിണറായി വിജയൻ പുരസ്‌കാരങ്ങൾ നൽകും. ജില്ലാ തലത്തിൽ ഒന്നും രണ്ടും മൂന്നും സ്ഥാനത്തിനർഹരായ സ്‌കൂളുകൾക്ക് യഥാക്രമം 30,000/-, 25,000/-, 15,000/രൂപയും പ്രശസ്തി പത്രവുമാണ് പുരസ്‌കാരമായി നൽകുന്നത്.

കോട്ടയം: കേരള കർഷകതൊഴിലാളി ക്ഷേമനിധി ബോർഡിൽ പുതിയ അംഗങ്ങളെ ചേർക്കുന്നതിനും നിലവിലുള്ള അംഗങ്ങളുടെ അംശദായം സ്വീകരിക്കുന്നതിനും ഗ്രാമപഞ്ചായത്ത് ഓഫീസുകളിൽ സിറ്റിങ് നടത്തുന്നു. ജൂലൈ നാല്, 20 തിയതികളിൽ ചിറക്കടവ് , ആറിന് കാഞ്ഞിരപ്പള്ളി , എട്ടിന് മുണ്ടക്കയം, 11 , 15 തീയതികളിൽ എരുമേലി, 18ന് മണിമല, 23ന് എലിക്കുളം, 25ന് പാറത്തോട്, ആർപ്പൂക്കര 27ന് വാഴൂർ എന്നീ ഗ്രാമപഞ്ചായത്ത് ഓഫീസുകളിൽ വച്ചാണ് സിറ്റിംഗ്. അംശദായം അടക്കാൻ വരുന്നവർ ആധാർ, ബാങ്ക് പാസ്സ്ബുക്ക് എന്നിവ കരുതണം. പുതിയ അംഗത്വം ആവശ്യമുള്ളവർ ജില്ലാ ഓഫിസുമായി ബന്ധപ്പെട്ട് ആവശ്യമായ രേഖകൾ കൊണ്ടുവരണം. ഫോൺ 0481 - 2585604.

കോട്ടയം: ജില്ലാ സ്പോർട്സ് കൗൺസിൽ 200-23 വർഷത്തെ വാർഷിക പൊതുയോഗം ജൂൺ 22 ന് രാവിലെ 11 ന് നാഗമ്പടം ഇൻഡോർ സ്റ്റേഡിയം കോൺഫറൻസ് ഹാളിൽ വെച്ചുനടക്കുമെന്ന് സെക്രട്ടറി അറിയിച്ചു.

കോട്ടയം: വിൽപനനികുതി കുടിശിക ഈടാക്കുന്നതിനായി വെച്ചൂർ വില്ലേജിൽ സർവേ നം. 313/2 ൽ തണ്ടപ്പേർ നമ്പർ നം 17777ൽപ്പെട്ട 0.90 ആർ വസ്തുവും വെച്ചൂർ വില്ലേജിൽ സർവേ നം. 313/2 ൽ തണ്ടപ്പേർ നമ്പർ നം. 17778 ൽപ്പെട്ട 0.90 ആർ വസ്തുവും അതിലിരിപ്പു ചമയങ്ങളും ജൂലൈ 17 ന് രാവിലെ 11 ന് വെച്ചൂർ വില്ലേജ് ഓഫീസിൽ പരസ്യമായി ലേലം ചെയ്യുമെന്ന് വൈക്കം തഹസീൽദാർ അറിയിച്ചു.

ആലപ്പുഴ: ജില്ലയില്‍ പക്ഷിപ്പനി റിപ്പോര്‍ട്ട് ചെയ്യുന്ന സാഹചര്യത്തില്‍ കൂടുതല്‍ ജാഗ്രതയും കരുതലും ആവശ്യമെന്ന് ജില്ല മെഡിക്കല്‍ ഓഫീസര്‍ അറിയിച്ചു. പക്ഷികളില്‍ നിന്ന് പക്ഷികളിലേക്ക് പകരുന്ന വൈറസ് രോഗമാണ് പക്ഷിപ്പനി. ഇത് പക്ഷികളില്‍ നിന്ന് മനുഷ്യരിലേക്ക് പകരാന്‍ ഇടയുണ്ടെങ്കിലും സാധ്യത കുറവാണ്. എന്നാല്‍ മനുഷ്യരില്‍ രോഗബാധയുണ്ടായാല്‍ രോഗം ബാധിച്ച പകുതിയിലേറെ പേര്‍ക്കും രോഗം ഗുരുതരമാകാന്‍ സാധ്യതയുള്ളതിനാല്‍ ഇതിനെതിരെ കൃത്യമായ ജാഗ്രത പുലര്‍ത്തണമെന്ന് ആരോഗ്യവകുപ്പ് അറിയിച്ചു.

കോട്ടയം : ജില്ലയിൽ എൻ.എച്ച്.എം(ആരോഗ്യകേരളം) ഓഫീസിലെ ജീവനക്കാർക്ക് തിരിച്ചറിയൽ കാർഡ് അച്ചടിച്ചു വിതരണം ചെയ്യുന്നതിന് ക്വട്ടേഷൻ ക്ഷണിച്ചു. ക്വട്ടേഷനുകൾ ജില്ലാ പ്രോഗ്രാം മാനേജർ, ആരോഗ്യകേരളം,ജില്ലാ ടിബി സെന്റർ, ജില്ലാ ആശുപത്രി, കോട്ടയം എന്ന വിലാസത്തിൽ ജൂലൈ ഒന്നിന് വൈകിട്ട് നാലുമണിക്കകം സമർപ്പിക്കണം. അന്നേ ദിവസം വൈകിട്ട് 4.30 ന് തുറക്കും.

കോട്ടയം: ഈ വർഷത്തെ വായനാപക്ഷാചാരണത്തിന്റെ ജില്ലാ തല ഉദ്ഘാടനം ബുധനാഴ്ച(ജൂൺ 19) രാവിലെ 10 മണിക്ക് വാഴൂർ ഗവൺമെന്റ് ഹൈസ്‌കൂളിൽ നടക്കും. ജില്ലാ പഞ്ചായത്ത് പ്രസിഡന്റ് കെ.വി. ബിന്ദു പക്ഷാചരണം ഉദ്ഘാടനം ചെയ്യും.

ഗ്രന്ഥശാലാ പ്രസ്ഥാനത്തിന്റെ നേതാക്കളായ പി.എൻ. പണിക്കരുടെ ചരമദിനമായ ജൂൺ 19ന് ആരംഭിച്ച് ഐ.വി. ദാസിന്റെ ജന്മദിനമായ ജൂലൈ ഏഴിന് അവസാനിക്കുന്ന രീതിയിലാണ് ഈ വർഷത്തെ വായനാപക്ഷാചരണം സംഘടിപ്പിക്കുന്നത്. ജില്ലാ ലൈബ്രറി കൗൺസിലിന്റെയും ജില്ലാ ഭരണകൂടത്തിന്റെയും ഇൻഫർമേഷൻ പബ്ലിക് റിലേഷൻസ് വകുപ്പിന്റെയും വിവിധ സംഘടനകളുടെയും ആഭിമുഖ്യത്തിലാണ് വായനാപക്ഷാചരണം സംഘടിപ്പിക്കുന്നത്.