ജില്ലയിൽ മത്സ്യബന്ധനയാനങ്ങളിൽ പണിയെടുക്കുന്ന സ്രാങ്കുമാർക്കായി ഫിഷറീസ് വകുപ്പ് പരിശീലന പരിപാടി സംഘടിപ്പിക്കുന്നു. എട്ടാം ക്ലാസ് വരെയെങ്കിലും പഠിച്ചിട്ടുള്ള 21നും 55 വയസിനും ഇടയിൽ പ്രായമുള്ള മത്സ്യത്തൊഴിലാളികൾക്ക് അപേക്ഷിക്കാം. രജിസ്റ്റർ ചെയ്ത മത്സ്യബന്ധന യാനങ്ങളിൽ സ്രാങ്ക് / എഞ്ചിൻ ഡ്രൈവർ ആയി രണ്ട് വർഷത്തേയോ അല്ലെങ്കിൽ ഡെക്ക് ഹാൻഡ് ആയി അഞ്ച് വർഷത്തേയോ പ്രവർത്തി പരിചയം ഉള്ളവർക്കും അപേക്ഷിക്കാം. താത്പര്യമുള്ളവർ ജൂൺ 30 വൈകിട്ട് അഞ്ചിന് മുൻപായി വെള്ളപേപ്പറിൽ തയാറാക്കിയ അപേക്ഷ, അതത് മത്സ്യഭവനുകളിൽ സമർപ്പിക്കണമെന്ന് ഫിഷറീസ് ഡെപ്യൂട്ടി ഡയറക്ടർ അറിയിച്ചു. കൂടുതൽ വിവരങ്ങൾക്ക്  0471 2450773

തിരുവനന്തപുരം ജില്ലയിലെ വിവിധ ബ്ലോക്ക് കേന്ദ്രങ്ങളിൽ ബ്രെയിൽ സാക്ഷരതാ ക്ലാസുകൾ എടുക്കുന്നതിന് ഇൻസ്ട്രക്ടർമാരെ നിയമിക്കുന്നു. ബ്രെയിൽ ലിപിയിൽ പരിജ്ഞാനമുള്ള പത്താം ക്ലാസ് യോഗ്യതയുള്ളവർക്ക് ഇൻസ്ട്രക്ടർ നിയമനത്തിനുള്ള അഭിമുഖത്തിൽ പങ്കെടുക്കാം. ജൂൺ 25 രാവിലെ 10.30ന് ജില്ലാ പഞ്ചായത്ത് ഓഫീസിലാണ് അഭിമുഖം.  നിശ്ചിത യോഗ്യതയുള്ളവർ അസൽ സർട്ടിഫിക്കറ്റും പകർപ്പും ബയോഡാറ്റയും സഹിതം അഭിമുഖത്തിന് ഹാജരാകണമെന്ന് സാക്ഷരതാമിഷൻ ജില്ലാ കോ-ഓർഡിനേറ്റർ അറിയിച്ചു. പ്രതിമാസ ഹോണറേറിയം 4,000 രൂപ. നാല് മാസത്തേക്കാണ് നിയമനം.

തിരുവനന്തപുരം സർക്കാർ ആയൂർവേദ കോളേജിൽ, വിളർച്ച (രക്തകുറവ്) മൂലമുള്ള കിതപ്പ്, അമിതമായ നെഞ്ചിടിപ്പ്, ക്ഷീണം, ഉത്സാഹക്കുറവ് തുടങ്ങിയ ലക്ഷണങ്ങൾക്ക് ഗവേഷണ അടിസ്ഥാനത്തിൽ ചികിത്സ ലഭ്യമാണ്. ( ഹീമോഗ്ലോബിൻ പുരുഷന്മാരിൽ 12 ന് താഴെയും , സ്ത്രീകളിൽ 11 ന് താഴെയും ). 15 മുതൽ 50 വയസു വരെയുള്ള രോഗികൾക്കാണ് സൗജന്യ ചികിത്സ നൽകുന്നത്. കൂടുതൽ വിവരങ്ങൾക്ക്: 8281250035

തിരുവനന്തപുരം നഗരത്തിലൂടെ ഒഴുകുന്ന പഴവങ്ങാടി തോടിൽ അനധികൃതമായി മാലിന്യങ്ങൾ നിക്ഷേപിക്കുന്നത് നിരോധിച്ചു കൊണ്ട് ജില്ലാ ദുരന്ത നിവാരണ അതോറിറ്റി ചെയർപേഴ്‌സൺ കൂടിയായ ജില്ലാ കളക്ടർ ജെറോമിക് ജോർജിന്റെ ഉത്തരവ്. മാലിന്യ നിക്ഷേപത്തെ തുടർന്ന് തോടിലെ ജലത്തിന്റെ ഒഴുക്ക് തടസപ്പെട്ട്, നഗരത്തിൽ വെള്ളക്കെട്ട് ഉണ്ടാകുന്ന സാഹചര്യം ഒഴിവാക്കുന്നതിന്റെ ഭാഗമായാണ് നടപടി.

പരമ്പരാഗത മത്സ്യതൊഴിലാളികളുടെ മത്സ്യബന്ധന ഉപകരണങ്ങൾക്കുള്ള ഇൻഷുറൻസ് പരിരക്ഷ പദ്ധതിയിലേക്ക് അപേക്ഷിക്കാം. മോട്ടോർ ഘടിപ്പിച്ച കടൽ മത്സ്യബന്ധനത്തിൽ ഏർപ്പെടുന്ന ജില്ലയിലെ പരമ്പരാഗത മത്സ്യബന്ധന യാനങ്ങളുടെ ഇൻഷുറൻസ് ആണ് പദ്ധതിയിൽ ഉൾപ്പെടുത്തിയിരിക്കുന്നത്. പദ്ധതിക്ക് 90% സർക്കാർ വിഹിതവും 10% ഗുണഭോക്തൃ വിഹിതവുമാണ്. പൂരിപ്പിച്ച അപേക്ഷകൾ ബന്ധപ്പെട്ട മത്സ്യഭവനുകളിൽ സമർപ്പിക്കണം. അപേക്ഷാ ഫോറവും മറ്റു വിവരങ്ങളും മത്സ്യഭവനുകളിൽ നിന്ന് ലഭിക്കും.  കൂടുതൽ വിവരങ്ങൾക്ക് 0471 2450773

പരമ്പരാഗത മത്സ്യതൊഴിലാളികൾക്ക് / ഗ്രൂപ്പുകൾക്ക് ഇൻസുലേറ്റഡ് ഫിഷ് ബോക്‌സ് നൽകുന്ന പദ്ധതിയിലേക്ക്  ജില്ലയിൽ മത്സ്യതൊഴിലാളി ക്ഷേമനിധി ബോർഡിൽ അംഗത്വമുള്ള പരമ്പരാഗത മത്സ്യതൊഴിലാളികളിൽ നിന്ന് അപേക്ഷകൾ ക്ഷണിച്ചു. 75% സർക്കാർ വിഹിതവും 25% ഗുണഭോക്തൃ വിഹിതവുമാണ്. പൂരിപ്പിച്ച അപേക്ഷകൾ ജൂൺ 30 വൈകിട്ട് അഞ്ചിന് മുൻപായി അതത് മത്സ്യഭവനുകളിൽ സമർപ്പിക്കണമെന്ന് തിരുവനന്തപുരം മേഖല ഫിഷറീസ് ഡെപ്യൂട്ടി ഡയറക്ടർ അറിയിച്ചു. അപേക്ഷാ ഫോറവും മറ്റു വിവരങ്ങളും മത്സ്യഭവനുകളിൽ നിന്നും ലഭിക്കും.  കൂടുതൽ വിവരങ്ങൾക്ക് 0471 2450773

തിരുവനന്തപുരം ജില്ലാ പ്രൊബേഷൻ ഓഫീസിലെ ഉപയോഗത്തിനായി ടാക്‌സി പെർമിറ്റുള്ളതും ഏഴ് വർഷത്തിലധികം പഴക്കമില്ലാത്തതുമായ ഒരു കാർ കരാറടിസ്ഥാനത്തിൽ വാടകയ്ക്ക് ലഭ്യമാക്കുന്നതിനായി വ്യക്തികളിൽ നിന്നും സ്ഥാപനങ്ങളിൽ നിന്നും ദർഘാസുകൾ ക്ഷണിച്ചു. 2025 മാർച്ച് 31 വരെയാണ് കാലാവധി. പ്രതിമാസം 1,500 കിലോമീറ്റർ വരെ 30,000 രൂപയും അധികരിച്ചുവരുന്ന ഓരോ കിലോമീറ്ററിനും സർക്കാർ നിശ്ചയിച്ച നിരക്കും ബാധകമായിരിക്കും. ദർഘാസ് സ്വീകരിക്കുന്ന അവസാന തിയതി ജൂലൈ ഏഴ് ഉച്ചയ്ക്ക് 12 വരെ. അന്നേദിവസം നാലിന് ദർഘാസ് തുറക്കും. കൂടുതൽ വിവരങ്ങൾക്ക് 0471 2342786 എന്ന നമ്പറിൽ ബന്ധപ്പെടണമെന്ന് പ്രൊബേഷൻ ഓഫീസർ അറിയിച്ചു.

പട്ടികജാതി വികസന വകുപ്പിന്റെ നിയന്ത്രണത്തിൽ പ്രവർത്തിക്കുന്ന വെളളായണി ശ്രീ അയ്യൻകാളി മെമ്മോറിയൽ ഗവൺമെന്റ് മോഡൽ റസിഡൻഷ്യൽ സ്‌പോർട്സ് സ്‌കൂളിൽ മെയിൽ വാർഡൻ, ആയ തസ്തികകളിലേക്ക് ദിവസവേതനാടിസ്ഥാനത്തിനുള്ള നിയമനത്തിനായി അഭിമുഖം നടത്തുന്നു.

പട്ടികജാതി വികസന വകുപ്പിന്റെ പൂച്ചെടിവിള പോസ്റ്റ് മെട്രിക് ഹോസ്റ്റൽ,  വെള്ളായണി ശ്രീ അയ്യൻകാളി മെമ്മോറിയൽ ഗവൺമെന്റ് മോഡൽ റെസിഡൻഷ്യൽ സ്‌പോർട്‌സ് സ്‌കൂൾ എന്നിവിടങ്ങളിൽ കുക്ക് തസ്തികയിലെ നിയമനത്തിനായി അഭിമുഖം നടത്തുന്നു. കരാറടിസ്ഥാനത്തിലുള്ള നിയമനത്തിന് പത്താം ക്ലാസ് വിജയം അല്ലെങ്കിൽ തത്തുല്യയോഗ്യത, ഗവൺമെന്റ് ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ നിന്നോ മറ്റ് ഗവൺമെന്റ് അംഗീകൃത സ്ഥാപനങ്ങളിൽ നിന്നോ ഫുഡ് പ്രൊഡക്ഷനിൽ സർട്ടിഫിക്കറ്റ് എന്നിവയാണ് യോഗ്യത.

ജില്ലയിൽ ഇന്നും (ജൂൺ 19) നാളെയും (ജൂൺ 20), 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാൽ, കേന്ദ്രകാലാവസ്ഥാവകുപ്പ് മഞ്ഞ അലർട്ട് മുന്നറിയിപ്പ് നൽകി.