കേരള ഷോപ്സ് ആന്റ് കോമേഴ്സ്യല്‍ എസ്റ്റാബ്ലിഷ്മെന്റ് തൊഴിലാളി ക്ഷേമനിധി പദ്ധതിയിലെ അംഗങ്ങളുടെ മക്കളില്‍ 2020-21 അധ്യയന വര്‍ഷം പ്ലസ് വണ്‍ മുതല്‍ ബിരുദം, പി.ജി കോഴ്സുകള്‍ (പ്രൊഫഷണല്‍ കോഴ്‌സുകള്‍ ഉള്‍പ്പെടെ)പോളിടെക്‌നിക്, ഐ.ടി.ഐ, ബി.എഡ്, ടി.ടി.സി കോഴ്‌സുകളില്‍  പഠിക്കുന്ന വിദ്യാര്‍ത്ഥികള്‍ക്ക് സ്‌കോളര്‍ഷിപ്പ് നല്‍കുന്നു. അപേക്ഷാ ഫോം peedika.kerala.gov.in എന്ന വെബ്സൈറ്റില്‍ ലഭിക്കും. അപേക്ഷ സ്വീകരിക്കേണ്ട അവസാന തീയതി സെപ്തംബര്‍ 30. ഫോണ്‍: 0483 2734409, 9633548156, 9496361934.
 

മേലാറ്റൂര്‍ ഗ്രാമപഞ്ചായത്തില്‍ കര്‍ഷക ദിനം ആചരിച്ചു. പഞ്ചായത്ത് ഓഫീസ് പരിസരത്ത് നടന്ന ചടങ്ങ് പഞ്ചായത്ത് പ്രസിഡന്റ് എം.കമലം ഉദ്ഘാടനം ചെയ്തു.  സുഭിക്ഷ കേരളം പദ്ധതിയുടെ ഭാഗമായി പച്ചക്കറി വിത്തുവിതരണ ഉദ്ഘാടനവും പഞ്ചായത്ത് പ്രസിഡന്റ് നിര്‍വഹിച്ചു. 2020-21 വാര്‍ഷിക പദ്ധതിയിലുള്‍പ്പെടുത്തിയാണ് പച്ചക്കറി വിത്തുവിതരണം നടത്തുന്നത്. പഞ്ചായത്ത് വഴി അപേക്ഷ നല്‍കിയ  ആയിരത്തോളം പേര്‍ക്കാണ് വിത്തുകള്‍ വിതരണം ചെയ്യുന്നത്. പയര്‍, വെണ്ട, ചെരങ്ങ, മത്തന്‍, കുമ്പളം, പീച്ചിക്ക തുടങ്ങിയ വിത്തുകളാണ് വിതരണത്തിനയുള്ളത്. മേലാറ്റൂര്‍ കൃഷി ഓഫീസില്‍ നിന്നാണ് വിതരണത്തിനായുള്ള വിത്തുകള്‍ എത്തിച്ചിരിക്കുന്നത്.

എടയൂര്‍ വില്ലേജിലുള്ള ചെറുകിട വ്യവസായ എസ്റ്റേറ്റില്‍ നിലവിലുള്ള രണ്ട് കെട്ടിടങ്ങളിലും അത് ഉള്‍പ്പടെയുള്ള ഭൂമിയിലും പാട്ട വ്യവസ്ഥയില്‍ ചെറുകിട വ്യവസായം ആരംഭിക്കുന്നതിന് താല്പര്യമുള്ള എസ്. സി, വനിതാ സംരംഭകരില്‍ നിന്നും പ്രത്യേകം അപേക്ഷ ക്ഷണിച്ചു. താത്പര്യമുള്ളവര്‍ നിശ്ചിത മാതൃകയിലുള്ള അപേക്ഷ 1000രൂപ നിരതദ്രവ്യവും പ്രൊജക്റ്റ് റിപ്പോര്‍ട്ടും സഹിതം ഓഗസ്റ്റ് 27 വൈകീട്ട് അഞ്ചിനകം കുറ്റിപ്പുറം ബ്ലോക്ക് പഞ്ചായത്ത് സെക്രട്ടറി മുന്‍പാകെ സമര്‍പ്പിക്കണം. അപേക്ഷ ഫോം tender.lsgkerala.gov.in വെബ്സൈറ്റില്‍ നിന്നും കുറ്റിപ്പുറം ബ്ലോക്ക് പഞ്ചായത്ത് ഓഫീസില്‍ നിന്നും  ലഭിക്കും. ഫോണ്‍: 0494: 2644310.

ജില്ലയുടെ ഭരണനിര്‍വഹണവും കോവിഡ് പ്രതിരോധവും കോട്ടയ്ക്കല്‍ ആര്യവൈദ്യശാലയുടെ കോവിഡ് കെയര്‍ ആശുപത്രിയിലിരുന്ന് കാര്യക്ഷമമായി ഏകോപിപ്പിക്കുകയാണ് കലക്ടര്‍ കെ. ഗോപാലകൃഷ്ണന്‍. പെരിന്തല്‍മണ്ണ സബ് കലക്ടര്‍ കെ.എസ് അഞ്ജു, അസി. കലക്ടര്‍ വിഷ്ണുരാജ് എന്നിവരും ഇതേ ആശുപത്രിയില്‍ ചികിത്സയിലുണ്ട്. കലക്ടര്‍ ഉള്‍പ്പെടെ മൂന്ന് പേര്‍ക്കും കാര്യമായ രോഗലക്ഷണങ്ങളില്ല. തങ്ങള്‍ സുരക്ഷിതരാണെന്നും ആശുപത്രിയില്‍ ഇരുന്നുകൊണ്ട് ഭരണനിര്‍വഹണം നടത്തുന്നുവെന്നും  കലക്ടര്‍ കെ. ഗോപാലകൃഷ്ണന്‍ പറഞ്ഞു.  

സമ്പര്‍ക്കത്തിലൂടെ 288 പേര്‍ക്ക് വൈറസ്ബാധ
രോഗബാധിതരായി ചികിത്സയില്‍ 2,306 പേര്‍
ഇതുവരെ രോഗബാധ സ്ഥിരീകരിച്ചത് 5,210 പേര്‍ക്ക്
3,003 പേര്‍ക്ക് കൂടി പ്രത്യേക നിരീക്ഷണം
ആകെ നിരീക്ഷണത്തിലുള്ളത് 36,233 പേര്‍