ജൂലായ്, ആഗസ്റ്റ് മാസങ്ങളിലെ സാമൂഹ്യ സുരക്ഷാ പെൻഷൻ വിതരണത്തിന് തുക അനുവദിച്ച് ഉത്തരവായി. ആയിരത്തി ഒരുനൂറ്റി എഴുപത് കോടി എഴുപത്തിയൊന്ന് ലക്ഷത്തി അൻപത്തിയാറായിരത്തി എണ്ണൂറ് രൂപ അനുവദിച്ചു. പെൻഷൻ തുക ഗുണഭോക്താക്കളുടെ ബാങ്ക് അക്കൗണ്ടിൽ നേരിട്ടും ഗുണഭോക്താക്കളുടെ വീട്ടിൽ പ്രാഥമിക സഹകരണ സംഘങ്ങൾ വഴി പണമായും വിതരണം ചെയ്യുന്നതിനുളള ക്രമീകരണങ്ങൾക്കായി പഞ്ചായത്ത് ഡയറക്ടറേറ്റിലെ ഡി.ബി.റ്റി. സെല്ലിനെ ചുമതലപ്പെടുത്തിയിട്ടുണ്ട്. 20 മുതൽ പെൻഷൻ വിതരണം നടത്തുമെന്നും ഉത്തരവിൽ പറയുന്നു.
പി.എൻ.എക്‌സ്. 2807/2020

ഓണം പ്രമാണിച്ച് ഫുൾടൈം, പാർട്ട് ടൈം കണ്ടിജന്റ് ജീവനക്കാർ, വർക്ക് എസ്റ്റാബ്ലിഷ്‌മെന്റ് സ്റ്റാഫ്, എല്ലാ വകുപ്പുകളിലെയും എസ്.എൽ.ആർ, എം.എൻ.ആർ ജീവനക്കാർ, എയ്ഡഡ് വിദ്യാലയങ്ങൾ, കോളേജുകൾ, പോളിടെക്‌നിക്കുകളിലെ അധ്യാപകർ ഉൾപ്പെടെയുളള സർക്കാർ ജീവനക്കാർക്ക് ആഗസ്റ്റിലെ ശമ്പളം മുൻകൂറായി വിതരണം ചെയ്യുന്നതിന് അനുമതി നൽകി സർക്കാർ ഉത്തരവായി. സർവ്വീസ് പെൻഷനേഴ്‌സ്, ഫാമിലി പെൻഷനേഴ്‌സ്, കെ.എഫ്.എഫ് പെൻഷനേഴ്‌സ് എന്നീ വിഭാഗക്കാർക്ക് സെപ്റ്റംബർ മാസത്തെ പെൻഷൻ ഈ മാസം 20 മുതൽ വിതരണം ചെയ്യുന്നതിനും ഉത്തരവായിട്ടുണ്ട്.
പി.എൻ.എക്‌സ്. 2806/2020

ജൽജീവൻ മിഷൻ പദ്ധതി പ്രകാരം പഞ്ചായത്തുകളിൽ നടപ്പാക്കുന്ന കുടിവെള്ള പദ്ധതിക്കുള്ള പഞ്ചായത്ത്, ഗുണഭോക്തൃ വിഹിതം ആവശ്യമെങ്കിൽ എംഎൽഎ ഫണ്ടിൽനിന്നും ലഭ്യമാക്കുന്നതിന് സർക്കാർ അനുമതി നൽകി. ഇത് സംബന്ധിച്ച്  ജി.ഒ.(സാധാ.)നമ്പർ 4584/2020/ധന ഉത്തരവ് ധനകാര്യവകുപ്പ് പുറപ്പെടുവിച്ചു. നടപ്പ് സാമ്പത്തികവർഷം 880 കോടി രൂപയാണ് ചെലവഴിക്കുന്നതിന് അനുമതി ലഭിച്ചിട്ടുള്ളത്. ഇതിൽ കേന്ദ്ര-സംസ്ഥാന സർക്കാർ വിഹിതങ്ങൾക്ക് പുറമേ 15 ശതമാനം ഫണ്ട് പഞ്ചായത്ത് വിഹിതമായും 10 ശതമാനം ഫണ്ട് ഗുണഭോക്തൃ വിഹിതമായും കണ്ടെത്തണമെന്നാണ് ജൽജീവൻ മിഷൻ മാർഗരേഖയിൽ നിർദ്ദേശിക്കുന്നത്.

* ഓൺലൈൻ ലോഞ്ചിംഗ് മുഖ്യമന്ത്രി നിർവഹിക്കും
കൺസ്യൂമർഫെഡിന്റെ ത്രിവേണി ആട്ട, മൈദ, റവ, ത്രിവേണി വെളിച്ചെണ്ണ, ത്രിവേണി ചായപ്പൊടി എന്നീ ബ്രാൻഡ് ഉല്പന്നങ്ങൾ ഇന്ന് (ആഗസ്റ്റ് 18) പുറത്തിറക്കും. ഉല്പന്നങ്ങളുടെ ഓൺലൈൻ ലോഞ്ചിംഗ്   വൈകിട്ട് നാലിന് മുഖ്യമന്ത്രി പിണറായി വിജയൻ നിർവഹിക്കും. സഹകരണവകുപ്പ് മന്ത്രി കടകംപള്ളി സുരേന്ദ്രൻ അധ്യക്ഷത വഹിക്കും.

സംസ്ഥാനത്തെ ഒരു അർദ്ധസർക്കാർ സ്ഥാപനത്തിൽ 19000-43600 ശമ്പള നിരക്കിൽ ഇലക്ട്രീഷ്യന്റെ രണ്ട് താൽക്കാലിക ഒഴിവ് നിലവിലുണ്ട്. ഓപ്പൺ, ഈഴവ എന്നീ വിഭാഗത്തിനായി സംവരണം ചെയ്തിരിക്കുന്നു. ഇലക്ട്രിക്കൽ എഞ്ചിനിയറിംഗ് ത്രിവത്സര ഡിപ്ലോമ അല്ലെങ്കിൽ അംഗീകൃത ഐ.റ്റി.ഐ നൽകുന്ന ഇലക്ട്രീഷ്യൻ യോഗ്യതയും വിജയകരമായി പൂർത്തിയാക്കിയ അപ്രന്റിസ് സർട്ടിഫിക്കറ്റും, ഫിലിം സ്റ്റുഡിയോയിൽ രണ്ട് വർഷത്തെ പ്രവൃത്തി പരിചയവും വേണം. വയസ്സ് 2019 ജനുവരി ഒന്നിന് 18-41 (നിയമാനുസൃത വയസ്സിളവ് ബാധകം). നിശ്ചിത യോഗ്യതയുളള ഉദ്യോഗാർത്ഥികൾ അസൽ സർട്ടിഫിക്കറ്റുകളുമായി സെപ്റ്റംബർ 14നകം ബന്ധപ്പെട്ട എംപ്ലോയ്‌മെന്റ് എക്‌സ്‌ചേഞ്ചുകളിൽ ഹാജരാകണം.

സംസ്ഥാനത്തെ തദ്ദേശസ്വയംഭരണ സ്ഥാപനങ്ങളിലേയ്ക്കുളള പൊതുതിരഞ്ഞെടുപ്പ് കോവിഡ് പ്രോട്ടോക്കോൾ പാലിച്ച് നടത്തുന്നതിന് തടസ്സമില്ലെന്ന് ആരോഗ്യവകുപ്പ് ഡയറക്ടർ അറിയിച്ചതായി സംസ്ഥാന തിരഞ്ഞെടുപ്പ് കമ്മീഷണർ വി.ഭാസ്‌കരൻ അറിയിച്ചു.
സംസ്ഥാനത്ത് കോവിഡ് വ്യാപനം നടക്കുന്ന സാഹചര്യത്തിൽ തദ്ദേശസ്ഥാപനങ്ങളിലെ തിരഞ്ഞെടുപ്പ് നടത്തിപ്പ് സംബന്ധിച്ച് ആരോഗ്യവകുപ്പിലെ വിദഗ്ധരുമായി കമ്മീഷൻ യോഗം ചേർന്നിരുന്നു.  തിരഞ്ഞെടുപ്പിന്റെ വിവിധ പ്രവർത്തനങ്ങൾ നടത്തുന്നതിനുളള കോവിഡ് പ്രോട്ടോക്കോൾ ആരോഗ്യവകുപ്പിൽ നിന്നും ലഭ്യമാക്കും.

മോട്ടോർ മേഖലയിൽ ജോലി ചെയ്യുന്ന തൊഴിലാളികൾക്ക് ആയിരം രൂപ വീതം സൗജന്യ ധനസഹായം നൽകും. കേരള മോട്ടോർ തൊഴിലാളി ക്ഷേമനിധി ബോർഡിലും 2004-ലെ കേരള ഓട്ടോമൊബൈൽ വർക്ക്‌ഷോപ്പ് തൊഴിലാളി ക്ഷേമനിധി ബോർഡിലും 1991 ഓട്ടോറിക്ഷ തൊഴിലാളി ക്ഷേമനിധി പദ്ധതിയിലും അംഗങ്ങളായ മുഴുവൻ തൊഴിലാളികൾക്കും ഈ ആനുകുല്യം ലഭിക്കും. കേരള മോട്ടോർ തൊഴിലാളി ക്ഷേമനിധി ബോർഡ് നേരത്തെ അനുവദിച്ച ആദ്യഘട്ട ധനസഹായത്തിന് പുറമേയാണിത്. ആദ്യഘട്ട ധനസഹായം ലഭിച്ചവർ വീണ്ടും അപേക്ഷ സമർപ്പിക്കേണ്ടതില്ല. അവരുടെ അക്കൗണ്ടിലേക്ക് തുക ക്രെഡിറ്റാകും.