ആലപ്പുഴ:കേരള ഖാദി ഗ്രാമ വ്യവസായ ബോർഡ് നടപ്പാക്കുന്ന എന്റെ ഗ്രാമം പ്രത്യേക തൊഴിൽദാന പദ്ധതി പ്രകാരം ബാങ്കിൽ നിന്ന് വായ്പയെടുത്ത് വ്യവസായം ആരംഭിക്കുന്നതിന് ആലപ്പുഴ ജില്ലാ ഖാദി ഗ്രാമ വ്യവസായ ഓഫീസ് അപേക്ഷ ക്ഷണിച്ചു.  അപേക്ഷിക്കാവുന്ന പ്രോജക്ടിന്റെ  പരമാവധി പദ്ധതി ചെലവ് അഞ്ച് ലക്ഷം രൂപയാണ്. വായ്പ എടുക്കന്നവർക്ക് 25 ശതമാനം മുതൽ 40 ശതമാനം വരെ മാർജിൻ മണി സബ്‌സിഡി ലഭിക്കും. കൂടുതൽ വിവരങ്ങൾ  ആലപ്പുഴ ജില്ലാ ഖാദി ഗ്രാമ വ്യവസായ ഓഫീസുമായി ബന്ധപ്പെടുക. ഫോൺ: 0477 2252341.

ആലപ്പുഴ:പച്ചക്കറി വിളകളിലെ കായീച്ച ആക്രമണം പ്രതിരോധിക്കുന്നതിന് സഹായകരമായ ക്യൂലൂർകെണികൾ മങ്കൊമ്പ് കീടനിരീക്ഷണകേന്ദ്രത്തിൽ ലഭിക്കും.ആവശ്യമുള്ള കർഷകർ 8921190446 എന്ന നമ്പറിൽ ബന്ധപ്പെടെണം.

ആലപ്പുഴ: മൃഗസംരക്ഷണ വകുപ്പിൽ പാര്‍ട്ട് ടൈം സ്വീപ്പര്‍ തസ്തികയില്‍ നിയമനത്തിനു ജൂലൈ 16നു രാവിലെ പത്തിന് ജില്ല മൃഗസംരക്ഷണ ഓഫീസിൽ നടത്താന്‍ നിശ്ചയിച്ച അഭിമുഖം കോവിഡ് 19 രോഗ വ്യാപന നിയന്ത്രണ പ്രവർത്തനങ്ങളുടെ പശ്ചാത്തലത്തില്‍ താല്‍കാലിമായി മാറ്റിവച്ചു. പുതുക്കിയ തിയതി പിന്നീട് അറിയിക്കുമെന്ന് ജില്ല മൃഗസംക്ഷണ ഓഫീസര്‍ അറിയിച്ചു. വിശദവിവരത്തിന് ഫോണ്‍: 0477 2252431.

ആലപ്പുഴ: പള്ളിപ്പുറം ഗ്രാമപഞ്ചായത്തിലെ കര്‍ഷക കൂട്ടായ്മയായ പൂര്‍ണശ്രീ എഫ്.ഐ.ജി അംഗങ്ങള്‍ ചേര്‍ന്ന് ആരംഭിച്ച പച്ചമുളക് കൃഷിയുടെ നടീല്‍ ഉദ്ഘാടനം ചേന്നം പള്ളിപ്പുറം ഗ്രാമപഞ്ചായത്ത് പ്രസിഡന്റ് പി.ആര്‍ ഹരിക്കുട്ടന്‍ നിര്‍വഹിച്ചു. സംസ്ഥാന കാര്‍ഷിക വികസന കര്‍ഷക ക്ഷേമ വകുപ്പിന്റെ ആത്മ പദ്ധതിയുമായി സഹകരിച്ചാണ് പൂര്‍ണശ്രീ എഫ് ഐ ജി യിലെ പതിനൊന്ന് അംഗങ്ങള്‍ ചേര്‍ന്ന് കൃഷി ചെയ്യുന്നത്. ആദ്യഘട്ടത്തില്‍ ഗ്രോബാഗുകളിലായി 300 പച്ചമുളക് തൈകളാണ് നട്ടത്.

ആലപ്പുഴ: തൊഴിലിടങ്ങളിൽ സ്ത്രീകൾക്കെതിരായ അതിക്രമങ്ങൾ തടയുന്നതിന്റെ ഭാഗമായി സംസ്ഥാനത്തെ സർക്കാർ/സർക്കാരിതര/ പൊതുമേഖല/സ്വകാര്യ മേഖല തുടങ്ങിയ തൊഴിലിടങ്ങളിൽ ബോധവൽക്കരണം നടത്തുന്നതിനു ജില്ല വനിത ശിശു വികസന ഓഫീസറുടെ കീഴിൽ  ഒരു വനിത സോഷ്യൽ വർക്കറെ കരാറടിസ്ഥാനത്തിൽ നിയമിക്കുന്നു.  വനിത ക്ഷേമ രംഗത്ത് പ്രവർത്തിക്കുന്ന സർക്കാരിതര സംഘടനകളിൽ നിന്നും താല്‍പര്യമുള്ളവരില്‍ നിന്നും അപേക്ഷകൾ ക്ഷണിച്ചു. താല്‍പര്യമുള്ളവര്‍  ജൂലൈ 15നകം താൽപര്യപത്രം നല്‍കണം. കൂടുതൽ  വിവരങ്ങൾക്ക് ജില്ല വനിത ശിശു വികസന ഓഫീസുമായി ബന്ധപ്പെടണം. ഫോൺ: 0477- 2960147.

ആലപ്പുഴ: സംസ്ഥാന സർക്കാരിന്റെ സുഭിക്ഷ കേരളം പദ്ധതി വഴി ഈ വർഷം നടപ്പാക്കുന്ന വിവിധ പദ്ധതികളിലേക്ക് അരൂക്കുറ്റി പഞ്ചായത്തിൽ ഗുണഭോക്താക്കളെ തെരഞ്ഞെടുക്കുന്നതിന് അപേക്ഷ ക്ഷണിച്ചു. തരിശുഭൂമിയിൽ നെൽകൃഷി, ഇടവിള കൃഷികൾ, കിഴങ്ങുവർഗ്ഗ കൃഷി, തരിശുഭൂമിയിൽ പച്ചക്കറി കൃഷി, വാഴകൃഷി, മുട്ടക്കോഴി വിതരണം, കറവ പശു വിതരണം, താറാവ് വളർത്തൽ തുടങ്ങിയ വ്യക്തിഗത പദ്ധതികളിലേക്കാണ് അപേക്ഷ ക്ഷണിച്ചത്. വാർഡ് മെമ്പർമാരുടെ പക്കൽനിന്ന് അപേക്ഷഫോമുകൾ വാങ്ങി പൂരിപ്പിച്ചു തിരിച്ചേൽപ്പിക്കണം. കോവിഡ് 19 പ്രോട്ടോക്കോൾ ഉള്ളതിനാലാണ് ഇത്തരത്തിൽ ക്രമീകരണം. അപേക്ഷ നൽകേണ്ട അവസാന തീയതി ജൂലൈ 15.