കോട്ടയം ജില്ലയില്‍ കാലവര്‍ഷ ദുരന്ത നിവാരണ പ്രവര്‍ത്തനങ്ങളുടെ ചുമതലയുള്ള  ഉദ്യോഗസ്ഥര്‍ക്കായി സംസ്ഥാന  ദുരന്ത നിവാരണ അതോറിറ്റിയുടെ (കെ.എസ്.ഡി.എം.എ)  ആഭിമുഖ്യത്തില്‍ ഓണ്‍ലൈന്‍ പരിശീലന പരിപാടി സംഘടിപ്പിച്ചു.

ജില്ലാ തലത്തിലും താലൂക്ക് തലത്തിലും രൂപീകരിച്ചിട്ടുള്ള ഇന്‍സിഡന്‍റ് റെസ്പോണ്‍സ് സിസ്റ്റ(ഐ.ആര്‍.എസ്)ത്തിലെ ഉദ്യോഗസ്ഥരുടെ ചുമതലകള്‍ സംബന്ധിച്ച്  നാഷണൽ ഇന്‍സ്റ്റിറ്റ്യൂട്ട് ഓഫ് ഡിസാസ്റ്റര്‍ മാനേജ്മെന്‍റിലെ അസോസിയേറ്റ് പ്രഫസര്‍ ശേഖര്‍ ചതുര്‍വ്വേദി ക്ലാസ് നയിച്ചു.

കോട്ടയം ജില്ലാ പഞ്ചായത്തില്‍ ഹരിതാഭം പച്ചക്കറി കൃഷി പദ്ധതിക്ക്  തുടക്കമായി.  വിഷ രഹിത പച്ചക്കറി ഉത്പാദനത്തിനായി കൃഷി വകുപ്പ് നടപ്പാക്കുന്ന സുഭിക്ഷ കേരളം പദ്ധതിയില്‍ ഉള്‍പ്പെടുത്തിയാണ് ജില്ലാ പഞ്ചായത്ത് അങ്കണത്തിലും പരിസരത്തും പച്ചക്കറി കൃഷി നടത്തുന്നത്. 

ജില്ലാ പഞ്ചായത്ത് പ്രസിഡന്‍റ് അഡ്വ. സെബാസ്റ്റ്യന്‍ കുളത്തുങ്കല്‍ പദ്ധതി ഉദ്ഘാടനം ചെയ്തു. 

സുഭിക്ഷ കേരളവുമായി ബന്ധപ്പെട്ട് ജില്ലയെ ഭക്ഷ്യ സ്വയംപര്യാപ്തതയിലേക്ക് നയിക്കുന്നതിന് നാലു കോടി രൂപയുടെ പദ്ധതികളാണ് ജില്ലാ പഞ്ചായത്ത് തയാറാക്കിയിരിക്കുന്നതെന്ന് പ്രസിഡന്‍റ് പറഞ്ഞു. 

ജില്ലയില്‍ ഓണ്‍ലൈന്‍ പഠനത്തിന് വീടുകളില്‍ സൗകര്യമില്ലാത്ത കുട്ടികള്‍ക്ക് സഹായഹസ്തവുമായി അക്ഷയ കേന്ദ്രങ്ങളും സജീവം. ജില്ലാ വിദ്യാഭ്യാസ ഓഫീസുമായും തദ്ദേശഭരണ സ്ഥാപനങ്ങളുമായും സഹകരിച്ചാണ് വിവിധ മേഖലകളിലെ അക്ഷയ കേന്ദ്രങ്ങളില്‍ പഠനത്തിന് ക്രമീകരണം ഏര്‍പ്പെടുത്തുന്നത്.

മരങ്ങാട്ടുപിള്ളി, കൂട്ടിക്കല്‍ ടൗണ്‍, കോരുത്തോട് അക്ഷയ കേന്ദ്രങ്ങളില്‍ ഓണ്‍ലൈന്‍ ക്ലാസ് തുടങ്ങിയിട്ടുണ്ട്. വയല, മുക്കാട്ടുപടി അക്ഷയ സംരംഭകര്‍ സ്കൂളിലും വായനശാലയിലുമായി പഠനത്തിനാവശ്യമായ ടി.വിയും കേബിള്‍ കണക്ഷനും സജ്ജീകരിച്ചു നല്‍കി. 

കോട്ടയം ജില്ലയില്‍ കോവിഡ് ബാധിച്ച 82കാരന്‍റെ പരിശോധനാഫലം നെഗറ്റീവായി. ഈ മാസം രണ്ടിന് രോഗം സ്ഥിരീകരിച്ച ഇടയിരിക്കപ്പുഴ സ്വദേശിയാണ് രോഗമുക്തനായത്. ദുബായില്‍നിന്ന് മെയ് 17ന് വന്ന് ഹോം ക്വാറന്‍റയിനില്‍ കഴിയുമ്പോഴാണ് ഇദ്ദേഹം പരിശോധനയ്ക്ക് വിധേയനായത്. 

ഇന്നലെ (ജൂണ്‍ 12) ലഭിച്ച 155 സാമ്പിള്‍ പരിശോധനാ ഫലങ്ങളില്‍ മൂന്നെണ്ണം പോസിറ്റീവാണ്. സൗദി അറേബ്യയില്‍നിന്നും മെയ് 23ന് ഹൈദരാബാദ് വഴി എത്തിയ പാലാ സ്വദേശി(49), ജൂണ്‍ രണ്ടിന് കുവൈറ്റില്‍നിന്നെത്തിയ കോരുത്തോട് സ്വദേശി(30),  ദോഹയില്‍നിന്നും ജൂണ്‍ അഞ്ചിന് എത്തിയ പാറത്തോട് സ്വദേശി(30) എന്നിവര്‍ക്കാണ് രോഗം സ്ഥിരീകരിച്ചത്.

ജൂണ്‍ 14ന് നടക്കുന്ന ലോക രക്തദാന ദിനാചരണത്തോടനുബന്ധിച്ചുള്ള സന്നദ്ധ രക്തദാന ക്യാമ്പുകള്‍ക്ക് കോട്ടയം ജില്ലയില്‍ തുടക്കം കുറിച്ചു. ജില്ലാതല ഉദ്ഘാടനം കളക്ടറേറ്റ് പരിസരത്ത് ഭക്ഷ്യ-പൊതുവിതരണ വകുപ്പ് മന്ത്രി പി. തിലോത്തമന്‍ നിര്‍വഹിച്ചു. 

ജില്ലാ കളക്ടര്‍ എം അഞ്ജന, അസിസ്റ്റന്‍റ് കളക്ടര്‍ ശിഖ സുരേന്ദ്രന്‍, ജില്ലാ മെഡിക്കല്‍ ഓഫീസര്‍ ഡോ.ജേക്കബ് വര്‍ഗീസ്, ജില്ലാ ടി.ബി ഓഫീസര്‍ ഡോ.ട്വങ്കിള്‍ പ്രഭാകരന്‍, ജില്ലാ മാസ് മീഡിയാ ഓഫീസര്‍ ഡോമി ജോണ്‍, പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം ഡോ.സ്വപ്ന സനല്‍ തുടങ്ങിയവര്‍ പങ്കെടുത്തു.

കുമളി ഗ്രാമപഞ്ചായത്തിലെ  14-ാം വാര്‍ഡില്‍ കോവിഡ് സെക്കൻഡറി കോൺടാക്ടിൻ്റെ പശ്ചാത്തലത്തിൽ കര്‍ശന ലോക്ക് ഡൌണ്‍ നിയന്ത്രണങ്ങള്‍ ഏർപ്പെടുത്തി  ജില്ലാ കളക്ടർ  ഉത്തരവു പുറപ്പെടുവിച്ചു.

രണ്ട് ദിവസത്തിനിടെ അഞ്ച് രാജ്യങ്ങളിൽ നിന്നായി 42 പ്രവാസികൾ ജില്ലയിലെത്തി. 29 പുരുഷന്മാരും 13 സ്ത്രീകളുമാണ് കൊച്ചി, കോഴിക്കോട് എയർപോർട്ടുകൾ വഴി നാട്ടിലെത്തിയത്. എല്ലാവരെയും ആരോഗ്യ പരിശോധനകൾക്ക് ശേഷം വീടുകളിലും ക്വാറൻ്റൈൻ സെൻ്ററിലും നിരീക്ഷണത്തിലാക്കി.

കോവിഡ് 19 മായി ബന്ധപ്പെട്ട് ജില്ലയില്‍ നിലവില്‍ 152 പേരാണ് ചികിത്സയിലുള്ളത്. കൂടാതെ, വിവിധ ആശുപത്രികളിലായി 56 പേര്‍ നിരീക്ഷണത്തിലുമുണ്ട്. ഇന്ന് (ജൂണ്‍ 14) ജില്ലയില്‍ 6 പേര്‍ക്കാണ് കോവിഡ് 19 സ്ഥിരീകരിച്ചത്. ഇന്ന് 27 പേരെ ആശുപത്രിയില്‍ പ്രവേശിപ്പിക്കുകയും ചെയ്തു.  

ഇതുവരെ 13621 സാമ്പിളുകള്‍ പരിശോധനയ്ക്കായി അയച്ചതില്‍ 12463 പരിശോധനാ ഫലങ്ങളാണ് ലഭ്യമായത്. 277 പേർക്കാണ് ഇതുവരെ  പരിശോധനാഫലം പോസിറ്റീവായത്. ഇന്ന് 288 പരിശോധനാ ഫലങ്ങളാണ് ലഭിച്ചത്. പുതുതായി 433 സാമ്പിളുകളും അയച്ചു. ഇനി 1158 സാമ്പിളുകളുടെ പരിശോധനാ ഫലം കൂടി ലഭിക്കാനുണ്ട്. 

കോവിഡ് 19 രോഗവ്യാപനം തടയുന്നതിനുള്ള സർക്കാർ നിർദ്ദേശങ്ങൾ പാലിക്കാത്തതിനെ തുടർന്ന് (ജൂൺ 14)  വൈകിട്ട് 6.30 വരെ ജില്ലയിൽ പോലീസ് നടത്തിയ പരിശോധനയിൽ 79  കേസുകൾ രജിസ്റ്റർ ചെയ്തതായി സ്പെഷൽ ബ്രാഞ്ച് ഡി.വൈ.എസ്.പി എം. കൃഷ്ണൻ അറിയിച്ചു. ഇത്രയും കേസുകളിലായി 115 പേരെ അറസ്റ്റ് ചെയ്തു. 57 വാഹനങ്ങൾ പിടിച്ചെടുത്തു.  ലോക് ഡൗൺ നിർദ്ദേശങ്ങൾ പാലിക്കാത്തതിനെ തുടർന്നാണ്  കേസ് രജിസ്റ്റർ ചെയ്തത്.

 മാസ്ക് ധരിക്കാത്ത 47 പേർക്കെതിരെ കേസ്