രോഗപ്രതിരോധം ലക്ഷ്യമിട്ട് തദ്ദേശസ്വയംഭരണ സ്ഥാപനങ്ങളുടെ പങ്കാളിത്തത്തോടെ ആരോഗ്യജാഗ്രത പദ്ധതി നടപ്പാക്കുമെന്ന് ആരോഗ്യവകുപ്പ് മന്ത്രി കെ.കെ ഷൈലജ ടീച്ചര്‍. ഒഴൂര്‍ പറപ്പാറപ്പുറത്തെ കുടുംബാരോഗ്യകേന്ദ്രത്തിനായി 2.29 കോടി രൂപ ചെലവില്‍ നിര്‍മിക്കുന്ന ഇരുനില കെട്ടിടത്തിന്റെ ശിലാസ്ഥാപനം നിര്‍വ്വഹഹിക്കുകയായിരുന്നു മന്ത്രി. 20 വീടുകള്‍ക്ക് ഒരു സ്‌ക്വാഡ് എന്ന രീതിയിലാകും പ്രവര്‍ത്തനം. രോഗം വരാതിരിക്കാന്‍ എല്ലാവരും ശ്രദ്ധിക്കണം. അതിനായി വ്യക്തി ശുചിത്വവും പരിസര ശുചിത്വവും ഉറപ്പാക്കണം.

പെരിന്തല്‍മണ്ണയില്‍ പൊതു-സ്വകാര്യ സ്ഥലങ്ങളില്‍ വെച്ച് മാനസികവും ശാരീരികവുമായ പീഡനങ്ങള്‍ക്കിരയാവുന്ന സ്ത്രീകള്‍ക്കും കുട്ടികള്‍ക്കും സംരക്ഷണമൊരുക്കി കൊണ്ട് സഖി - വണ്‍ സ്റ്റോപ്പ് സെന്ററിന്റെ പ്രവര്‍ത്തനം തുടങ്ങി. പെരിന്തല്‍മണ്ണ പട്ടാമ്പി റോഡിലെ  പി.ഡബ്ല്യു.ഡി കോമ്പൗണ്ടില്‍ ഒരുക്കിയ കേന്ദ്രം സംസ്ഥാന  ആരോഗ്യ-സാമൂഹ്യ നീതി വനിതാ ശിശു വികസന വകുപ്പ് മന്ത്രി കെ. കെ ശൈലജ   ഉദ്ഘാടനം ചെയ്തു.

ആതവനാട് ജില്ലാ പൗള്‍ട്രി ഫാമില്‍ പുതിയ ഹാച്ചറി പ്രവര്‍ത്തനം തുടങ്ങുന്നതോടെ ജില്ലയില്‍ കോഴിക്കുഞ്ഞ് ഉത്പാദനത്തില്‍ നടക്കാനിരിക്കുന്നത് വന്‍ കുതിച്ചു ചാട്ടം. നിലവില്‍ മലമ്പുഴയിലെ പൗള്‍ട്രി ഫാമില്‍ നിന്നും കൊണ്ടു വരുന്ന കുഞ്ഞുങ്ങളെ വളര്‍ത്തി ആവശ്യക്കാര്‍ക്കും തദ്ദേശ സ്ഥാപനങ്ങള്‍ക്കും വിതരണം ചെയ്യുകയായിരുന്നു രീതി. വര്‍ഷത്തില്‍ 40,000-ത്തോളം കോഴികളെ മാത്രമേ ഇപ്രകാരം വിതരണം ചെയ്യാന്‍ സാധിച്ചിരുന്നുള്ളൂ. ആതവനാട്ടെ ഫാമില്‍ പുതിയ ഹാച്ചറി പ്രവര്‍ത്തനം തുടങ്ങുന്നതോടെ    വര്‍ഷത്തില്‍ 7.2 ലക്ഷം കോഴിക്കുഞ്ഞുങ്ങളെ ഉത്പാദിപ്പിച്ച് വിതരണം ചെയ്യാന്‍ കഴിയും.

സര്‍ക്കാര്‍ സേവനങ്ങള്‍ വേഗത്തില്‍ ലഭ്യമാക്കാനായി ഭിന്നശേഷിക്കാര്‍ക്ക് പ്രത്യേക തിരിച്ചറിയല്‍ കാര്‍ഡ് കേന്ദ്ര സര്‍ക്കാര്‍ ലഭ്യമാക്കുമെന്ന് കേന്ദ്ര കേന്ദ്ര സാമൂഹിക നീതി ശാക്തീകരണ മന്ത്രി  കൃഷന്‍ പാല്‍ ഗുര്‍ജാര്‍. താനൂര്‍ ദേവധാര്‍ ഹയര്‍സെക്കന്‍ഡറി സ്‌കൂളില്‍ ഭിന്നശേഷിക്കാര്‍ക്കുള്ള സഹായ ഉപകരണ വിതരണ പരിപാടിയില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം.

ഭിന്നശേഷിക്കാരുടെ പുനരധിവാസത്തിന് സംസ്ഥാന സര്‍ക്കാര്‍ പ്രഥമ പരിഗണന നല്‍കി പദ്ധതികള്‍ നടപ്പാക്കി വരികയാണെന്ന് സാമൂഹികനീതി വകുപ്പ് മന്ത്രി കെ.കെ. ഷൈലജ ടീച്ചര്‍. താനൂര്‍ ദേവധാര്‍ ഹയര്‍സെക്കന്‍ഡറി സ്‌കൂളില്‍ ഭിന്നശേഷിക്കാര്‍ക്കുള്ള സഹായ ഉപകരണ വിതരണ പരിപാടി ഉദ്ഘാടനം ചെയ്യുകയായിരുന്നു മന്ത്രി. പുനരധിവാസ പ്രവര്‍ത്തനങ്ങള്‍ ഏകോപിപ്പിക്കാന്‍ എല്ലാ ജില്ലയിലും പ്രത്യേക സെന്ററുകള്‍ തുടങ്ങുമെന്നും ഇതിനായി സര്‍ക്കാര്‍ തുക നീക്കിവച്ചതായും മന്ത്രി വ്യക്തമാക്കി.

ലോകോത്തര നിലവാരത്തിലുള്ള ആയുര്‍വേദ ഇന്‍സ്റ്റിറ്റ്യൂട്ട് കേരളത്തില്‍ ആരംഭിക്കുമെന്നും മികച്ച കാന്‍സര്‍ ചികിത്സ സൗകര്യം എല്ലാ മെഡിക്കല്‍ കോളേജുകളിലും ഹൃദ്രോഗ ചികിത്സ സൗകര്യം ജില്ലാ ആശുപത്രികളിലടക്കം ഒരുക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. പൊന്നാനിയിലെ സ്ത്രീകളുടെയും കുട്ടികളുടെയും ആശുപത്രി ഉദ്ഘാടനം  ചെയ്തു സംസാരിക്കുകയായിരുന്നു മുഖ്യമന്ത്രി.