കോട്ടയം, പാലക്കാട്, കോഴിക്കോട്, കാസർകോട് ജില്ലാ പഞ്ചായത്തുകളിൽ നിലവിൽ ഒഴിവുള്ള ജില്ലാ പഞ്ചായത്ത് സെക്രട്ടറി തസ്തികയിൽ ഡെപ്യൂട്ടേഷൻ വ്യവസ്ഥയിൽ നിയമനത്തിന് ഗവൺമെന്റ് സെക്രട്ടേറിയറ്റിലെ (പൊതുഭരണം, നിയമം, ധനകാര്യം) വകുപ്പുകളിലെ അണ്ടർ സെക്രട്ടറി (ഹയർ ഗ്രേഡ്) തസ്തികയിലും അതിനു മുകളിലും ഉള്ളവരിൽ നിന്നും മറ്റു വികസന വകുപ്പുകളിലും 68700-110400 (റിവൈസ്ഡ്) എന്ന ശമ്പള സ്‌കെയിലിലും അതിനു മുകളിലും ഉള്ള ബിരുദധാരികളായ ഉദ്യോഗസ്ഥരിൽ നിന്നും അപേക്ഷ ക്ഷണിച്ചു.

സംസ്ഥാന കർഷക കടാശ്വാസ കമ്മീഷൻ ഇടുക്കി ജില്ലയിൽ 25നും 26നും മൂന്നാറിലെ സർക്കാർ അതിഥി മന്ദിരത്തിൽ നടത്താനിരുന്ന സിറ്റിംഗ് കൊറോണ ജാഗ്രത സംബന്ധിച്ച സർക്കാർ നിയന്ത്രണങ്ങൾ ഏർപ്പെടുത്തിയതിനാൽ മാറ്റിവച്ചു. പുതിയ തിയതി പിന്നീട് അറിയിക്കും.
പി.എൻ.എക്സ്.1067/2020

കേരള സഹകരണ ട്രൈബ്യൂണൽ 18ന് കണ്ണൂർ ജില്ലാ സഹകരണ ബാങ്ക് ഹാളിലും 19ന് കോഴിക്കോട് ജില്ലാ സഹകരണ ബാങ്ക് ഹാളിലും നടത്താനിരുന്ന സിറ്റിംഗ് റദ്ദാക്കി.
പി.എൻ.എക്സ്.1065/2020

സ്റ്റേജ് കാര്യേജ് ബസ്സുകളുടെ 2020 ജനുവരി ഒന്നിന് ആരംഭിച്ച ക്വാർട്ടറിലെ വാഹന നികുതി അടയ്ക്കുന്നതിനുള്ള സമയം ഏപ്രിൽ 15 വരെ ദീർഘിപ്പിക്കാൻ ഗതാഗത മന്ത്രി എ.കെ. ശശീന്ദ്രൻ ഉത്തരവിട്ടു. സംസ്ഥാനത്ത് കോവിഡ് 19 രോഗബാധ റിപ്പോർട്ട് ചെയ്തതിനെ തുടർന്ന് ബസ് യാത്രക്കാരുടെ എണ്ണത്തിലുണ്ടായ കുറവും വരുമാന നഷ്ടവും കണക്കിലെടുത്താണ് സമയം ദീർഘിപ്പിച്ചത്.
പി.എൻ.എക്സ്.1063/2020

തിരുവനന്തപുരത്തെ സ്റ്റേറ്റ് സ്‌പോർട്‌സ് കൗൺസിൽ ഓഫീസിൽ ഡെപ്യൂട്ടേഷൻ വ്യവസ്ഥയിൽ എൽ.ഡി.സി/  യു.ഡി.സി തസ്തികകളിൽ സമാന തസ്തികകളിൽ ജോലി ചെയ്യുന്നവരിൽ നിന്ന് അപേക്ഷ ക്ഷണിച്ചു. രണ്ടു വിഭാഗത്തിലും രണ്ട് വീതം ഒഴിവുകളുണ്ട്.
യു.ഡി.സി തസ്തികയിൽ കുറഞ്ഞത് രണ്ട് വർഷത്തെ പ്രവൃത്തിപരിചയവും എൽ.ഡി.സി. തസ്തികയിൽ കുറഞ്ഞത് അഞ്ച് വർഷത്തെ പ്രവൃത്തിപരിചയവും ആവശ്യമാണ്.
താത്പര്യമുള്ളവർ മേലധികാരികളുടെ സമ്മതപത്രവും കെ.എസ്.ആർ (ഭാഗം 1) ചട്ടം 144 പ്രകാരമുള്ള സ്റ്റേറ്റ്‌മെന്റും ഉൾപ്പെടെ അപേക്ഷ സമർപ്പിക്കണം.

തിരുവനന്തപുരം മെഡിക്കൽ കോളേജിൽ ജൂനിയർ മെഡിക്കൽ ഓഫീസർ (ഐ.സി.എം.ആർ റിസർച്ച് പ്രോജക്ട്) തസ്തികയിലേക്ക് കരാർ നിയമനം നടത്തുന്നു. എം.ബി.ബി.എസ് യോഗ്യത (എം.ഡിയും ഗവേഷണപരിചയമുള്ളവർക്ക് മുൻഗണന). പ്രതിമാസ ശമ്പളം 45000 രൂപ. ജനനതിയതി, വിലാസം, വിദ്യാഭ്യാസ യോഗ്യത, മുൻപരിചയം എന്നിവ തെളിയിക്കുന്ന അസൽ രേഖകളും അവയുടെ ഒരു സെറ്റ് സ്വയം സാക്ഷ്യപ്പെടുത്തിയ പകർപ്പും സഹിതം തിരുവനന്തപുരം മെഡിക്കൽ കോളേജ് പ്രിൻസിപ്പാളിന്റെ ഓഫീസിൽ 19ന് രാവിലെ 11ന് ഇന്റർവ്യൂവിന് ഹാജരാകണം. തിരഞ്ഞെടുക്കപ്പെടുന്നവർ സ്ഥാപനമേധാവിയുമായി ഒരു കരാർ ഒപ്പുവയ്ക്കണം.
പി.എൻ.എക്സ്.1061/2020

മുഖ്യമന്ത്രിയുടെ അദ്ധ്യക്ഷതയിൽ ഇന്ന് (17) ചേരാൻ നിശ്ചയിച്ചിരുന്ന സംസ്ഥാനതല വിജിലൻസ് & മോണിറ്ററിംഗ് കമ്മിറ്റി യോഗം മാറ്റിയതായി പട്ടികജാതി പട്ടികവർഗ്ഗ, പിന്നാക്ക ക്ഷേമ മന്ത്രിയുടെ ഓഫീസ് അറിയിച്ചു.
പി.എൻ.എക്സ്.1060/2020

സംസ്ഥാന ന്യൂനപക്ഷ കമ്മീഷൻ 19ന് കൊല്ലം കളക്ടറേറ്റ് കോൺഫറൻസ് ഹാളിൽ രാവിലെ 11ന് നടത്തുവാൻ തീരുമാനിച്ചിരുന്ന ജില്ലയിലെ സിറ്റിംഗ് കോവിഡ് 19 രോഗബാധ തടയുന്നതിനുള്ള സർക്കാർ നിർദ്ദേശപ്രകാരം മാറ്റിവച്ചു. പുതുക്കിയ തിയതി പിന്നീട് അറിയിക്കും.
പി.എൻ.എക്സ്.1059/2020