ഇളംദേശം ബ്ലോക്ക് പഞ്ചായത്തിന്റെ 2020-21 വാര്‍ഷിക പദ്ധതിക്ക് ജില്ലാ ആസൂത്രണ സമിതിയുടെ അംഗീകാരം ലഭിച്ചു.  ജില്ലാ ആസൂത്രണ സമിതിയുടെ പ്രഥമ യോഗത്തില്‍ 2020-21 വാര്‍ഷിക പദ്ധതിക്ക്  അംഗീകാരം നേടുന്ന ആദ്യത്തെ ബ്ലോക്ക് പഞ്ചായത്തായി ഇളംദേശം. വികസന ഫണ്ട് (ജനറല്‍) -3233500 രൂപ, പ്രത്യേക ഘടക പദ്ധതി -5353000 രൂപ, ട്രൈബല്‍ സബ് പ്ലാന്‍ -8802000 രൂപയടക്കം ആകെ 46490000 രൂപയുടെ 69 പദ്ധതികളും മെയിന്റനന്‍സ് ഫണ്ട് (റോഡിതരം)- 4918000 രൂപയുടെ 12 പദ്ധതികളും അടങ്ങുന്ന വാര്‍ഷിക പദ്ധതിയാണ് അംഗീകാരത്തിനായി സമര്‍പ്പിച്ചത്.

പൊതുവിദ്യാഭ്യാസ സംരക്ഷണ യജ്ഞത്തിന്റെ മേന്മ തുറന്നു കാട്ടി തളിപ്പറമ്പ മണ്ഡലം എജ്യുഫെസ്റ്റ്. ഒന്നു മുതല്‍ 12 വരെയുള്ള ക്ലാസുകള്‍ ഹൈടെക് ആകുമ്പോള്‍ അതിലൂടെ വിദ്യാര്‍ഥികള്‍ സ്വായത്തമാക്കിയ കഴിവുകള്‍ കൂടി ഉള്‍പ്പെടുന്നതായിരുന്നു പ്രദര്‍ശനത്തിലെ ഓരോ സ്റ്റാളും. ഇരിങ്ങല്‍ യു പി സ്‌കൂളിലെ ഒന്നാം ക്ലാസ് കുട്ടികളുടെ ഡിജിറ്റല്‍ വായന സ്റ്റാള്‍ ഏറെ ശ്രദ്ധേയമായി. എല്‍ സി ഡി പ്രൊജക്ടറിന്റെ സഹായത്തോടെ പാഠഭാഗത്തെ ഡിജിറ്റല്‍ രൂപത്തില്‍ അവതരിപ്പിക്കുകയായിരുന്നു ഈ സ്റ്റാളിലൂടെ. സ്റ്റാള്‍ കാണുവാനും അഭിനന്ദിക്കുവാനും മന്ത്രി കൂടി എത്തിയതോടെ  കുരുന്നുകള്‍ക്ക് ആവേശമായി.

കേരളത്തിന്റെ വിദ്യാഭ്യാസ രംഗത്തെ ലോകത്തിന് തന്നെ മാതൃകയാക്കുക എന്ന ലക്ഷ്യത്തോടെ സംസ്ഥാന സര്‍ക്കാര്‍ ആവിഷ്‌കരിക്കുന്ന ആധുനിക വിദ്യാഭ്യാസത്തിന്റെ വക്താക്കളും പ്രയോക്താക്കളുമായി അധ്യാപകര്‍ മാറണമെന്ന് വിദ്യാഭ്യാസ മന്ത്രി പ്രൊഫ. സി രവീന്ദ്രനാഥ്. തളിപ്പറമ്പ് വിദ്യാഭ്യാസ മണ്ഡലം എജ്യുഫെസ്റ്റ് ഉദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി.

ജില്ലാതല ഉദ്യോഗസ്ഥരും ജീവനക്കാരും ജില്ലാ കളക്ടറുടെ അനുമതിയില്ലാതെ അവധി എടുക്കരുത്. സംസ്ഥാനത്ത് കോവിഡ് 19 സ്ഥിരീകരിച്ചതിനാലും ജില്ലയിലടക്കം നിരവധി പേര്‍ നിരീക്ഷണത്തില്‍ കഴിയുന്ന സാഹചര്യത്തിലുമാണ് നിര്‍ദ്ദേശം. രോഗ വ്യാപനം തടയുന്നതിനും ബോധവല്‍ക്കരണത്തിനും അടിയന്തര സാഹചര്യങ്ങളില്‍ അവശ്യ സേവനങ്ങള്‍ താമസമില്ലാതെ ലഭ്യമാക്കുന്നതിനും സര്‍ക്കാര്‍ വകുപ്പുകളുടെയും ജീവനക്കാരുടെയും യോജിച്ചുള്ള ഊര്‍ജിത പ്രവര്‍ത്തനം ആവശ്യമാണെന്ന് ജില്ലാ കളക്ടര്‍ അറിയിച്ചു. അനുമതി ഇല്ലാതെ അവധി എടുക്കുന്നവര്‍ക്കെതിരെ ഡിസാസ്റ്റര്‍ മാനേജ്‌മെന്റ് ആക്ട് 34 (എം) വകുപ്പ് പ്രകാരം നടപടി സ്വീകരിക്കും.

സി.കെ.ശശീന്ദ്രന്‍ എം.എല്‍.എ. യുടെ ആസ്തി വികസന ഫണ്ടില്‍ ഉള്‍പ്പെടുത്തി മുട്ടില്‍ മലക്കാട് ഭജനമഠം-പുഴങ്കുനി റോഡ് നിര്‍മ്മാണത്തിന് പത്ത് ലക്ഷം രൂപയും തരിയോട് ചെക്കണ്ണിക്കുന്ന് പ്രദേശത്തെ വാട്ടര്‍ സപ്ലൈ പദ്ധതിക്ക് 12 ലക്ഷം രൂപയും അനുവദിച്ചു. ഒ.ആര്‍.കേളു എം.എല്‍.എ.യുടെ ആസ്ത വികസന ഫണ്ടില്‍ ഉള്‍പ്പെടുത്തി തിരുനെല്ലി അനന്തോത്ത് പുളിയംകണ്ടി ഹെല്‍ത്ത് സെന്റര്‍ റോഡ് നിര്‍മ്മാണത്തിന് 30 ലക്ഷം രൂപയും ഐ.സി. ബാലകൃഷ്ണന്‍ എം.എല്‍.എ.യുടെ ഫണ്ടില്‍ ഉള്‍പ്പെടുത്തി കണ്ണങ്കാട് മാളേരി മൂരണി റോഡ് ഫോര്‍മേഷന് 50 ലക്ഷം രൂപയും ബത്തേരി കെ.എസ്.ആര്‍.ടി.സി.

     വര്‍ഷങ്ങളായി ആഘോഷപൂര്‍വ്വം നടത്തിയിരുന്ന പൊന്‍മുടിക്കോട്ട പാര്‍ത്ഥസാരഥി ക്ഷേത്ര മഹോത്സവം കൊറോണ രോഗ പ്രതിരോധത്തിന്റെ ഭാഗമായി ചടങ്ങുകള്‍ മാത്രമായി ചുരുക്കാന്‍ തീരുമാനിച്ചു. മാര്‍ച്ച് 28,29,30,31, ഏപ്രില്‍ ഒന്ന് തിയ്യതികളിലാണ് ഉത്സവം നടത്താനിരുന്നത്. താലപ്പൊലി ഘോഷയാത്ര, ദീപ സമര്‍പ്പണം, വിവിധ കലാപരിപാടികള്‍ തുടങ്ങിയവ ഒഴിവാക്കും. ഒഴിച്ചു കൂടാനാവാത്ത ചടങ്ങുകള്‍ നിര്‍വ്വഹിക്കും. ഭരണ സമിതിയുടെ തീരുമാനത്തോട് ഭക്തജനങ്ങള്‍ സഹകരിക്കണമെന്ന് ക്ഷേത്ര ഭരണ സമിതി അഭ്യര്‍ത്ഥിച്ചു.

   കല്‍പ്പറ്റ നിയോജകമണ്ഡലത്തിലെ കൊറോണ പ്രതിരോധ പ്രവര്‍ത്തനങ്ങള്‍ വിലയിരുത്താന്‍  സി.കെ ശശീന്ദ്രന്‍ എം.എല്‍.എയുടെ അധ്യക്ഷതയില്‍ കളക്‌ട്രേറ്റില്‍ അവലോകന യോഗം ചേര്‍ന്നു. മുന്‍കരുതലിന്റെ ഭാഗമായി  മണ്ഡലത്തിലെ എല്ലാ വാര്‍ഡുകളിലും കുറഞ്ഞത് ഏഴുപേരെ സന്നദ്ധ പ്രവര്‍ത്തനങ്ങള്‍ക്ക് തയ്യാറാക്കി നിര്‍ത്താനും പഞ്ചായത്തുകളില്‍ ഐസോലേഷന്‍ വാര്‍ഡുകള്‍ കണ്ടെത്തുന്നതിനുളള നടപടികള്‍ സ്വീകരിക്കണമെന്നും എം.എല്‍.എ നിര്‍ദ്ദേശിച്ചു. ആദിവാസി വിഭാഗങ്ങള്‍ക്കിടയില്‍ പോഷകാഹാര കുറവ് പരിഹരിക്കാന്‍ കുടുംബശ്രീയുടെ കമ്മ്യൂണിറ്റി കിച്ചണ്‍ പ്രവര്‍ത്തനം കാര്യക്ഷമമാക്കണം.