മഹാത്മാഗാന്ധി ദേശീയ തൊഴിലുറപ്പ് പദ്ധതിയില്‍  ജില്ലയില്‍ പതിനഞ്ച് ലക്ഷം വൃക്ഷ തൈകള്‍ ഉത്പാദിപ്പിക്കും.     സര്‍ക്കാര്‍ ഉടമസ്ഥതയിലുള്ള സ്ഥലങ്ങളിലും ലഭ്യമായ സ്വകാര്യ സ്ഥലങ്ങളിലും ആവശ്യമായ നഴ്‌സറികള്‍ സ്ഥാപിച്ചാണ് ഇതിനു വേണ്ട തൈകള്‍ ഉല്‍പാദിപ്പിക്കുക. അന്യംനിന്നു പോകുന്ന നാട്ടുമാവിനങ്ങള്‍ക്ക് കൂടുതല്‍ പ്രാധാന്യം നല്‍കും. തയ്യാറാക്കിയ തൈകള്‍  ജൂണ്‍ മാസം പരിസ്ഥിതി ദിനത്തോടനുബന്ധിച്ച് പൊതുസ്ഥലങ്ങളിലും  ദുര്‍ബല വിഭാഗങ്ങളുടെ സ്വകാര്യഭൂമിയിലും നടും. 

ശ്രീകൃഷ്ണപുരം ഗവ.എഞ്ചിനിയറിങ് കോളെജില്‍ ക്ലര്‍ക്ക് കം അകൗണ്ടന്‍റ് തസ്തികയിലേയ്ക്ക് താത്കാലിക നിയമനം നടത്തും. ബി.കോം, റ്റാലി സര്‍ട്ടിഫിക്കറ്റ്, മിനിമം രണ്ടു വര്‍ഷത്തെ കംപ്യുട്ടറൈസ്ഡ് അക്കൗണ്ടിങ് മേഖലയിലെ പരിചയം, ഡോക്യമെന്‍റേഷന്‍, ഫയല്‍ കൈകാര്യം ചെയ്യല്‍ തുടങ്ങിയ  യോഗ്യതയുള്ളവര്‍ക്ക് അപേക്ഷിക്കാം. പ്രായം 2017 ഡിസംബര്‍ ഒന്നിന്  40 കവിയരുത്. താല്‍പര്യമുളളവര്‍ പ്രായം, യോഗ്യത, മുന്‍ പരിചയം തെളിയിക്കുന്ന സര്‍ട്ടിഫിക്കറ്റുകളുമായി ഡിസംബര്‍ 19-ന് രാവിലെ 10 ന് അഭിമുഖത്തിനെത്തണമെന്ന് പ്രിന്‍സിപ്പല്‍ അറിയിച്ചു. വിശദവിവരം ഴലരസെു.മര.ശി ല്‍ ലഭിക്കും. 

കേരള രാജ്യാന്തര ചലച്ചിത്രമേളയില്‍ മികച്ച ചിത്രത്തിനുള്ള സുവര്‍ണചകോരം ആന്‍ മേരി ജസീര്‍ സംവിധാനം ചെയ്ത പാലസ്തീനിയന്‍ ചിത്രം വാജിബിന് ലഭിച്ചു. മേളയിലെ മികച്ച നവാഗത സംവിധായകനുള്ള രജതചകോരം പുരസ്‌കാരത്തിന് മലയാളിയായ സഞ്ജു സുരേന്ദ്രന്‍ അര്‍ഹനായി. ചിത്രം ഏദന്‍. ഈ ചിത്രം മികച്ച മലയാള ചിത്രത്തിനുള്ള ഫിപ്രസി പുരസ്‌കാരവും സ്വന്തമാക്കി. മികച്ച സംവിധായകനുള്ള രജതചകോരം പുരസ്‌കാരത്തിന് 'മലില ദ ഫെയര്‍വെല്‍ ഫ്ളവര്‍' എന്ന തായ് ചിത്രം സംവിധാനം ചെയ്ത അനൂച ബൂന്യവതന അര്‍ഹയായി. ജോണി ഹെന്റിക്സ് സംവിധാനം ചെയ്ത കൊളംബിയന്‍ ചിത്രം കാന്‍ഡലേറിയ ജൂറിയുടെ പ്രത്യേക പരാമര്‍ശത്തിന് അര്‍ഹമായി.

ചലച്ചിത്രമേളയ്ക്ക് എല്ലാ സൗകര്യങ്ങളുമുള്ള ഫെസ്റ്റിവല്‍ കോംപ്ലക്‌സ് നിര്‍മാണം അടുത്ത ഏപ്രിലില്‍ ആരംഭിക്കുമെന്ന് സാംസ്‌കാരികമന്ത്രി എ.കെ. ബാലന്‍ അറിയിച്ചു. കേരള രാജ്യാന്തര ചലച്ചിത്രമേളയുടെ സമാപന ചടങ്ങില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.

മൂന്നുവര്‍ഷം കൊണ്ട് കോംപ്ലക്‌സ് നിര്‍മാണം പൂര്‍ത്തിയാക്കുന്ന വിധമാണ് നടപടികള്‍ പുരോഗമിക്കുന്നത്. 25 ാമത് ചലച്ചിത്രമേള പുതിയ കോംപ്ലക്‌സില്‍ നടത്താനുള്ള ആസൂത്രണവുമായാണ് സര്‍ക്കാര്‍ മുന്നോട്ടുപോകുന്നതെന്ന് അദ്ദേഹം പറഞ്ഞു.

ലോക സിനിമക്കാഴ്ചകളുടെ എട്ട് രാപ്പകലുകള്‍ക്കുശേഷം കേരള രാജ്യാന്തര ചലച്ചിത്രമേളയ്ക്ക് കൊടിയിറങ്ങി. നിശാഗന്ധിയില്‍ നടന്ന സമാപന ചടങ്ങുകളോടെയാണ് മേളയ്ക്ക് കൊടിയിറങ്ങിയത്. സമാപന സമ്മേളനം ധനമന്ത്രി ഡോ. ടി.എം. തോമസ് ഐസക് ഉദ്ഘാടനം ചെയ്തു. സാംസ്‌കാരിക രംഗത്തിന് പതിവില്‍ നിന്ന് വ്യത്യസ്തമായി കൂടുതല്‍ തുക സര്‍ക്കാര്‍ വകയിരുത്തിയിട്ടുണ്ടെന്ന് മന്ത്രി പറഞ്ഞു. 100 പുതിയ തീയറ്ററുകള്‍ സര്‍ക്കാരിന്റേതായി കേരളമെമ്പാടും ഉടന്‍ ഉയരുമ്പോള്‍ സമാന്തര സിനിമാ പ്രദര്‍ശനത്തിന് കൂടുതല്‍ അവസരമൊരുങ്ങുമെന്നും അദ്ദേഹം പറഞ്ഞു. ഡിജിറ്റല്‍കാലത്ത് സിനിമാ നിര്‍മാണം കൂടുതല്‍ ജനാധിപത്യപരമാകുകയാണ്.