ജില്ലയില്‍ കൊവിഡ്19 മാര്‍ഗനിര്‍ദ്ദേശ പ്രകാരം ക്വാറന്റീനില്‍ കഴിയുന്നവരെ നിരീക്ഷിക്കുന്നതിന് ജില്ലാ പോലീസ് മേധാവിയുടെ നിര്‍ദ്ദേശപ്രാകാരം സ്‌പെഷ്യല്‍  ഡ്രൈവ് നടത്തി. 569 പേര്‍ മാര്‍ഗനിര്‍ദ്ദേശങ്ങള്‍ പാലിക്കുന്നുണ്ടോയെന്നു നിരീക്ഷിച്ചു. സാമൂഹിക അകലം പാലിക്കാത്തതിനെതിരെ 81 പേര്‍ക്കെതിരെ  ഏഴു കേസുകളും പൊതു സ്ഥലങ്ങളില്‍ മാസ്‌ക് ധരിക്കാത്ത രണ്ടു പേര്‍ക്കെതിരെ 310 പെറ്റി കേസുകളും രജിസ്റ്റര്‍ ചെയ്തു. ക്വാറന്റീന്‍ നിര്‍ദ്ദേശം പാലിക്കാത്തവര്‍ക്കെതിരെയും പാസുകള്‍ ഇല്ലാതെ സംസ്ഥാന അതിര്‍ത്തി കടന്നുവരുന്നവര്‍ക്കെതിരെയും കര്‍ശന നടപടി സ്വീകരിക്കുമെന്നും ജില്ലാ പോലീസ് മേധാവി ആര്‍ കറുപ്പസ്വാമി അറിയിച്ചു.

2018ലെ പ്രളയത്തില്‍ നഷ്ടം സംഭവിച്ച വ്യാപാരി ക്ഷേമനിധി ബോഡില്‍ അംഗങ്ങളായ ചപ്പാത്തിലെ വ്യാപാരികള്‍ക്ക് ക്ഷേമനിധി ബോര്‍ഡിന്റെ ധനസഹായം ലഭിച്ചു.

ജില്ലാ ഇന്‍ഫര്‍മേഷന്‍ ഓഫീസിന്റെ ഔദ്യോഗിക ആവശ്യത്തിന് 75,000 കിലോമീറ്ററില്‍ താഴെ ഓടിയതും 2015നോ അതിന് ശേഷമോ രജിസ്റ്റര്‍ ചെയ്ത ടാക്‌സി പെര്‍മിറ്റുള്ള ബൊലോറോ ജീപ്പ്  ആവശ്യമുണ്ട്. ഒരു മാസം 2000 കിലോമീറ്റര്‍ ഓടുന്നതിന് 33,000 രൂപ നിരക്കില്‍ പ്രതിഫലം നല്‍കും. തുടര്‍ന്ന് വരുന്ന ഓരോ കിലോമീറ്ററിനും  15 രൂപ നിരക്കില്‍ വാടക നല്‍കും. താല്‍പ്പര്യമുള്ളവര്‍ ജൂലൈ രണ്ടിനകം ജില്ലാ ഇന്‍ഫര്‍മേഷന്‍ ഓഫീസര്‍, ജില്ലാ ഇന്‍ഫര്‍മേഷന്‍ ഓഫീസ്, സിവില്‍ സ്റ്റേഷന്‍, കുയിലിമല, പൈനാവ്, ഇടുക്കി എന്ന വിലാസത്തില്‍ മുദ്രവച്ച കവറില്‍ ക്വട്ടേഷന്‍ സമര്‍പ്പിക്കണം.

ജില്ലാ സൈനിക ക്ഷേമ ഓഫീസില്‍ നിന്നും സംസ്ഥാന സര്‍ക്കാരിന്റെ പ്രതിമാസ  സാമ്പത്തിക സഹായം  കിട്ടിക്കൊണ്ടിരിക്കുന്ന രണ്ടാം ലോകമഹായുദ്ധസേനാനികളും അവരുടെ വിധവകളും തുടര്‍ന്നും സാമ്പത്തിക സഹായം ലഭിക്കുന്നതിന് ഏപ്രില്‍ മാസത്തെ ലൈഫ് സര്‍ട്ടിഫിക്കറ്റ് ഇതുവരെ ഹാജരാക്കാത്ത ഗുണഭോക്താക്കള്‍ ജൂലൈ നാലിനകം ജില്ലൈ സൈനിക ക്ഷേമ ഓഫീസില്‍ ലഭ്യമാക്കണം. ഫോണ്‍ 04862 222904.

കോവിഡ് 19 പ്രതിരോധന പ്രവര്‍ത്തനങ്ങളുടെ ഭാഗമായി ഭാരതീയ ചികിത്സാ വകുപ്പിന്റെ അമൃതം പദ്ധതി മുഖേന, ജില്ലയിലെ സര്‍ക്കാര്‍ ആയുര്‍വ്വേദ സ്ഥാപനങ്ങളില്‍ പ്രവര്‍ത്തിക്കുന്ന ആയുര്‍രക്ഷാ ക്ലിനിക്കുകള്‍ ക്വാറന്റീനില്‍ കഴിയുന്ന ആളുകള്‍ക്ക് പ്രതിരോധ ഔഷധങ്ങള്‍ സൗജന്യമായി വിതരണം ചെയ്തു. വീടുകളിലും സ്ഥാപനങ്ങളിലുമായി നിരീക്ഷണത്തിലുണ്ടായിരുന്ന 1424 വ്യക്തികള്‍ ഇതുവരെ ഈ സൗകര്യം പ്രയോജനപ്പെടുത്തി.

സംസ്ഥാനത്തെ സര്‍ക്കാര്‍, എയ്ഡഡ്, അംഗീകൃത അണ്‍എയ്ഡഡ്, സി.ബി.എസ്.ഇ / ഐ.സി.എസ്.ഇ അഫിലിയേറ്റഡ് സ്‌കൂളുകളില്‍ 1 മുതല്‍ 10 വരെ ക്ലാസുകളില്‍ പഠിക്കുന്ന ഒ.ഇ.സി വിദ്യാര്‍ത്ഥികള്‍ക്ക്  പ്രീമെട്രിക് വിദ്യാഭ്യാസ ആനുകൂല്യത്തിന് അപേക്ഷ ക്ഷണിച്ചു. സ്‌കൂള്‍ അധികൃതര്‍ www.egrantz.kerala.gov.in എന്ന സ്‌കോളര്‍ഷിപ്പ് പോര്‍ട്ടലിലൂടെ ഓണ്‍ലൈനായി അര്‍ഹരായ വിദ്യാര്‍ത്ഥികളുടെ വിവരങ്ങള്‍ പിന്നാക്ക വിഭാഗ വികസന വകുപ്പിന് ജൂലൈ 31 ന് മുമ്പ് ലഭ്യമാക്കണം.

ഇടുക്കി ഗവ. മെഡിക്കല്‍ കോളേജില്‍ ജനറല്‍ മെഡിസിന്‍, റേഡിയോഡയഗ്നോസിസ്  ഡിപ്പാര്‍ട്ട്‌മെന്റിലേക്ക്  സീനിയര്‍ റസിഡന്റുമാരെയും മൈക്രോബയോളജി ഡിപ്പാര്‍ട്ട്‌മെന്റിലേക്ക്   സീനിയര്‍/ ജൂനിയര്‍ റസിഡന്റുമാരെയും കരാര്‍ അടിസ്ഥാനത്തില്‍ നിയമിക്കുന്നു. അപേക്ഷ ഓണ്‍ലൈനായി ജൂണ്‍ 30ന് വൈകിട്ട് അഞ്ച് വരെ സമര്‍പ്പിക്കാം.  ഇന്റര്‍വ്യൂ സമയവും തീയതിയും പിന്നീട് അറിയിക്കും. എം.ഡി പരീക്ഷ ഈ വര്‍ഷം എഴുതുന്നവര്‍ക്കും സീനിയര്‍ റസിഡന്റ് തസ്തികക്ക് അപേക്ഷിക്കാം.

ജൂണ്‍ 24ന് 14 പ്രവാസികള്‍ കൂടി ഇടുക്കിയിലേക്ക് മടങ്ങിയെത്തി. ആറ് രാജ്യങ്ങളില്‍ നിന്നായി 10 പുരുഷന്‍മാരും നാല് സ്ത്രീകളുമാണ് കൊച്ചി, തിരുവനന്തപുരം, കോഴിക്കോട് എയര്‍പോര്‍ട്ടുകള്‍ വഴി നാട്ടിലേക്ക് മടങ്ങിയെത്തിയത്. ആരോഗ്യ പരിശോധനകള്‍ക്ക് ശേഷം ഇതില്‍ ഏഴ് പേരെ വീടുകളിലും നാല് പേരെ പെയ്ഡ് ക്വാറന്റൈന്‍ സെന്ററിലും മൂന്ന് പേരെ സര്‍ക്കാര്‍ കോവിഡ് കെയര്‍ സെന്ററിലും നിരീക്ഷണത്തില്‍ പാര്‍പ്പിച്ചു. നാട്ടിലെത്തിയവരുടെ എണ്ണം താലൂക്ക് അടിസ്ഥാനത്തില്‍: തൊടുപുഴ - 5, ദേവികുളം - 1, ഇടുക്കി - 2, ഉടുമ്പന്‍ചോല - 2, പീരുമേട് - 3.