കുന്നംകുളം നഗരസഭയിലെ കുറുക്കൻപാറ ഗ്രീൻപാർക്കിൽ കഴിഞ്ഞ ആഴ്ചയിൽ പ്രവർത്തനമാരംഭിച്ച ചകിരി സംസ്‌കരണ യൂണിറ്റിൽനിന്ന് രണ്ടര ടൺ ചകിരിപ്പൊടി ജൈവവളസംസ്‌കരണത്തിന് കൊണ്ടുപോയി. പഴയന്നൂർ ഗ്രാമ പഞ്ചായത്തിലേക്ക് കൊണ്ടുപോയ ചകിരിപ്പൊടി പഞ്ചായത്തിലെ എയ്‌റോബിക് കമ്പോസ്റ്റിങ് ജൈവമാലിന്യസംസ്‌കരണ യൂണിറ്റിൽ മാലിന്യങ്ങൾ വളമാക്കി മാറ്റിയെടുക്കും.
ചകിരിപ്പൊടിയിൽ ബാക്ടീരിയ ഇനോക്കുലം ചേർത്താണ് ജൈവമാലിന്യം വളമാക്കി മാറ്റുക. കുടുംബശ്രീയ്ക്ക് കീഴിലുള്ള ഹരിത ആക്ടിവിറ്റി ഗ്രൂപ്പിന്റെ നേതൃത്വത്തിൽ ജൂൺ 17-നാണ് സംസ്‌കരണ യൂണിറ്റ് പ്രവർത്തനമാരംഭിച്ചത്.

കേരളത്തിന്റെ തനത് ഭക്ഷ്യസംസ്‌കാരത്തെ തിരികെ പിടിക്കാൻ 'പൂമംഗലം മട്ട' എന്ന പേരിൽ അരി വികസിപ്പിച്ചെടുത്ത് പൂമംഗലം ഗ്രാമപഞ്ചായത്ത്. പഞ്ചായത്തിന്റെയും സിസ്റ്റർ റോസ് ആന്റോയുടെ നേതൃത്വത്തിലുള്ള ഹരിതകർമ്മ സേനയുടെയും ശ്രമഫലമായി പൂമംഗലം എന്ന ഗ്രാമം ഇനിമുതൽ ഒരു അരിയുടെ പേരിലാകും അറിയപ്പെടുക. മട്ട അരിയാണെങ്കിലും നെല്ലിനും അരിക്കും ചോക്ലേറ്റിന്റെ നിറവും രുചിയും മണവുമാണ്. സ്വാദിനൊപ്പം നിരവധി ഔഷധ ഗുണങ്ങളും പൂമംഗലം മട്ടയുടെ പ്രത്യേകതയാണ്.

പാണഞ്ചേരി ഗ്രാമപഞ്ചായത്ത് ജനകീയാസൂത്രണ പദ്ധതിയിൽ ഉൾപ്പെടുത്തി നിർമ്മിച്ച വിള ആരോഗ്യ കേന്ദ്രത്തിന്റെയും പത്തായപുരയുടെയും ഉദ്ഘാടനം കൃഷി വകുപ്പ് മന്ത്രി അഡ്വ വി എസ് സുനിൽകുമാർ ഓൺലൈൻ വഴി നിർവ്വഹിച്ചു. കാർഷിക മേഖലയിൽ വളരെയധികം പദ്ധതികൾ ഏറ്റെടുത്ത് നടപ്പിലാക്കുന്ന ഗ്രാമപഞ്ചായത്തിൽ നടീൽ വസ്തുക്കളും മറ്റു കാർഷിക ഉല്പാദനോപാധികളും സൂക്ഷിക്കാൻ സൗകര്യം നിലവിലുണ്ടായിരുന്നില്ല. ഈ അവസരത്തിൽ ഗ്രാമപഞ്ചായത്ത് വാർഷിക പദ്ധതിയിൽ ഉൾപ്പെടുത്തി 15 ലക്ഷം രൂപ ചിലവഴിച്ച് പത്തായപ്പുരയും അതിനോടനുബന്ധിച്ച് വിള ആരോഗ്യ കേന്ദ്രവും നിർമ്മിക്കുകയായിരുന്നു.

ചൊവ്വന്നൂർ ഗ്രാമ പഞ്ചായത്ത് പുതിയ ഹോമിയോ ഡിസ്‌പെൻസറി കെട്ടിടത്തിന്റെ ഉദ്ഘാടനം തദ്ദേശ സ്വയം ഭരണ വകുപ്പ് മന്ത്രി എ സി മൊയ്തീൻ വെളളിയാഴ്ച (ജൂൺ 26) രാവിലെ 10 മണിക്ക് നിർവഹിക്കും. പഞ്ചായത്ത് പ്രസിഡന്റ് കെ കെ സതീശൻ ചടങ്ങിൽ അധ്യക്ഷത വഹിക്കും. ഡോ. പി കെ ബിജു എം പി മുഖ്യാതിഥിയാകും. എം പി പ്രാദേശിക വികസന ഫണ്ടിൽ നിന്നും അനുവദിച്ച 20 ലക്ഷം രൂപ ചിലവഴിച്ചാണ് ഡിസ്പെൻസറി കെട്ടിടത്തിന്റെ പണി പൂർത്തീകരിച്ചിട്ടുള്ളത്. രാവിലെ ഒൻപതു മുതൽ ഉച്ചക്ക് രണ്ട് വരെയാണ് പുതിയ ഡിസ്പെൻസറിയിൽ ഒ പി സൗകര്യം ഉണ്ടായിരിക്കുക

കോവിഡ് 19 സുരക്ഷാ മാനദണ്ഡങ്ങൾ പാലിച്ചാണ് തൃശൂർ കോർപ്പറേഷൻ പ്രവർത്തിക്കുന്നതെന്ന് മേയർ അജിത ജയരാജൻ വ്യക്തമാക്കി. കോവിഡ് പ്രതിരോധ പ്രവർത്തനം മാതൃകാപരമായി നടത്തുന്ന കോർപ്പറേഷൻ പ്രവർത്തനങ്ങളെ അപകീർത്തിപ്പെടുത്തുന്ന നീക്കങ്ങൾ അവസാനിപ്പിക്കണമെന്നും മേയർ പറഞ്ഞു.

കുഴല്‍മന്ദം ഗവ. മോഡല്‍ റസിഡന്‍ഷ്യല്‍ ഹയര്‍ സെക്കന്‍ഡറി സ്‌കൂള്‍ പത്താം ക്ലാസ് വിദ്യാര്‍ഥികള്‍ തയ്യാറാക്കിയ കൈയെഴുത്തു മാഗസിന്‍ 'നെല്ലിക്ക' മന്ത്രി എ.കെ. ബാലന്‍ ഓണ്‍ലൈനായി പ്രകാശനം ചെയ്തു. സീനിയര്‍ സൂപ്രണ്ട് വേലായുധന്‍ അധ്യക്ഷനായി. പ്രിന്‍സിപ്പല്‍ സുധീര, പി.ടി.എ. പ്രസിഡന്റ് ശാന്തകുമാരി, വാര്‍ഡ് മെമ്പര്‍ എം.എ. ഭാസ്‌കരന്‍, അധ്യാപകരായ രാധിക, രേഷ്മ, ബൈജു, നിഷാദ്, ബിജു, ദീപ, സൗമ്യ എന്നിവര്‍ സംസാരിച്ചു.

ഷൊര്‍ണൂര്‍ ടെക്‌നിക്കല്‍ ഹൈസ്‌കൂളില്‍ 'എന്റിച്ച് യുവര്‍ ഇംഗ്ലീഷ്' വിഷയം പഠിപ്പിക്കുന്നതിന് സ്ഥാപനത്തിലെ പി.ടി.എയുടെ കീഴില്‍ ഇംഗ്ലീഷ് അധ്യാപകനെ നിയമിക്കുന്നു. ഇംഗ്ലീഷ് ഐച്ഛിക വിഷയമായെടുത്ത് ബിരുദവും ബി.എഡുമാണ് യോഗ്യത. പ്രവൃത്തി പരിചയം അഭികാമ്യം. കമ്പ്യൂട്ടര്‍ പരിജ്ഞാനം അധിക യോഗ്യതയായി കണക്കാക്കും. താത്പര്യമുളളവര്‍ അസ്സല്‍ സര്‍ട്ടിഫിക്കറ്റുമായി ഇന്ന് (ജൂണ്‍ 26) ന് ഉച്ചയ്ക്ക് 12 ന് കൂടിക്കാഴ്ചയ്ക്ക് എത്തണമെന്ന് സൂപ്രണ്ട് അറിയിച്ചു. ഫോണ്‍ : 04662222197.

നൂറണി ഗവ. കൊമേഴ്‌സ്യല്‍ ഇന്‍സ്റ്റിറ്റ്യൂട്ടില്‍ അസിസ്റ്റന്റ് ഇന്‍സ്ട്രക്ടര്‍ ഒഴിവിലേക്ക് ദിവസവേതന നിയമനം നടത്തുന്നു. ബികോം (റഗുലര്‍), ഡിപ്ലോമ ഇന്‍ സെക്രട്ടറിയല്‍ പ്രാക്ടീസ് അല്ലെങ്കില്‍ ഡിപ്ലോമ ഇന്‍ ഷോര്‍ട്ട് ഹാന്‍ഡ് ആന്റ് ടൈപ്പ്‌റൈറ്റിങ്, കമ്പ്യൂട്ടര്‍ വേഡ് പ്രോസസിങ് എന്നിവയാണ് യോഗ്യത. താത്പര്യമുളളവര്‍ ജൂണ്‍ 29 ന് രാവിലെ 10 ന് അസ്സല്‍ സര്‍ട്ടിഫിക്കറ്റുകളുമായി ഓഫീസില്‍ കൂടികാഴ്ചയ്ക്ക് എത്തണമെന്ന് സൂപ്രണ്ട് അറിയിച്ചു. ഫോണ്‍: 0491-2532371, 9497356922.

കില-കിഫ്ബിയുടെ ധനസഹായത്തോടെ നടപ്പാക്കുന്ന പദ്ധതിയിലേക്ക് സിവില്‍, ഐ.ടി പ്രോജക്ട് എഞ്ചിനീയര്‍ ഒഴിവുകളിലേക്ക് അപേക്ഷിക്കാം. സിവില്‍ മൂന്ന് ഒഴിവും ഐ.ടി.യില്‍ 1 ഒഴിവാണുമുള്ളത്. ജൂലൈ 10 വരെ അപേക്ഷ സ്വീകരിക്കും. കൂടുതല്‍ വിവരങ്ങള്‍ www.kila.ac.in ല്‍ ലഭിക്കും.