ആലപ്പുഴ: സ്വാമി വിവേകാനന്ദൻ കേരളം സന്ദർശിച്ചതിന്റെ 125-ാം വാർഷികത്തിന്റെ ഭാഗമായി സംസ്ഥാന സർക്കാർ സംഘടിപ്പിക്കുന്ന വിവേകാനന്ദ സ്പർശം ജില്ലാതല ആഘോഷത്തോടനുബന്ധിച്ച് കോളജ് വിദ്യാർഥികൾക്കായി ഉപന്യാസ രചന, ക്വിസ് മത്സരങ്ങൾ സംഘടിപ്പിക്കുന്നു. ജില്ലാ ഭരണകൂടവും കേരള സംസ്ഥാന ഫിലിം ഡെവലപ്‌മെന്റ് കോർപറേഷനും ഇൻഫർമേഷൻ-പബ്ലിക് റിലേഷൻസ് വകുപ്പും സംയുക്തമായാണ് മത്സരം നടത്തുന്നത്. ഡിസംബർ 19ന് രാവിലെ 10ന് ആലപ്പുഴ ടൗൺ ഹാളിലാണ് മത്സരം. പ്രൊഫഷണൽ കോളജുകളിൽ പഠിക്കുന്നവർക്കടക്കം മത്സരത്തിൽ പങ്കെടുക്കാം. ക്വിസ് മത്സരത്തിൽ രണ്ടു പേരടങ്ങുന്ന ടീമിന് മത്സരിക്കാം.

        ഹരിതകേരള മിഷനുമായി ബന്ധപ്പെട്ട ജലസുരക്ഷ ഉപമിഷന്‍റെ സാങ്കേതിക സമിതി അംഗങ്ങള്‍ക്കുളള ദ്വിദിന പരിശീലനം ഡിസംബര്‍ 18, 19 തിയ്യതികളില്‍ ജില്ലാപഞ്ചായത്ത് ഹാളില്‍ നടക്കുമെന്ന് ഹരിതകേരളം മിഷന്‍ ജില്ലാകോര്‍ഡിനേറ്റര്‍ അറിയിച്ചു. പരിപാടിയുടെ ഉദ്ഘാടനം ഹരിതകേരള മിഷന്‍ ജില്ലാസമിതി ചെയര്‍പേഴ്സണ്‍ കൂടിയായ ജില്ലാ പഞ്ചായത്ത് പ്രസിഡന്‍റ് കെ. ശാന്തകുമാരി  ഡിസംബര്‍ 18 രാവിലെ 10 ന്  നിര്‍വ്വഹിക്കും. മലമ്പുഴ, പാലക്കാട് ബ്ലോക്ക് സാങ്കേതിക സമിതി അംഗങ്ങളാണ് പരിപാടിയില്‍ പങ്കെടുക്കുക.

    കുടുംബശ്രീ ത്രിതല സംഘടന സംവിധാനത്തിലേക്കുളള 2017 ലെ തെരഞ്ഞെടുപ്പുമായി ബന്ധപ്പെട്ട് എല്ലാ സി.ഡി.എസ്സുകളിലേക്കും നിയമിച്ചിരിക്കുന്ന വരണാധികാരി, ഉപ വരണാധികാരികള്‍ക്കുളള ഏകദിന പരിശീലനം  കെ.എസ്.ആര്‍.ടി സി ബസ് സ്റ്റാന്‍റിനു സമീപമുളള ടോപ്പ് ഇന്‍ ടൗണ്‍ ഗാര്‍ഡന്‍ വ്യൂ ഹാളില്‍  ഡിസംബര്‍ 18 ന് രാവിലെ 10 മുതല്‍ നടക്കും. എല്ലാ ഉദ്യോഗസ്ഥരും  പങ്കെടുക്കണമെന്ന് ജില്ലാ തെരഞ്ഞെടുപ്പ് ഉദ്യോഗസ്ഥനായ ഡെപ്യൂട്ടികലക്റ്റര്‍ (എല്‍.എ) അറിയിച്ചു.

    ഡിസംബര്‍ 18 ന് വൈകീട്ട് നാലിന് നടക്കാവ് റെയില്‍വെ മേല്‍പ്പാലം, മലമ്പുഴ ഉദ്യാനം, മലമ്പുഴ കുടിവെളള പദ്ധതി തുടങ്ങിയവയുമായി ബന്ധപ്പെട്ട് ഭരണപരിഷ്കരണ കമ്മീഷന്‍ ചെയര്‍മാനും സ്ഥലം എം.എല്‍.എ യുമായ വി.എസ്. അച്ചുതാനന്ദന്‍റെ അധ്യക്ഷതയില്‍ പാലക്കാട് ഗസ്റ്റ് ഹൗസില്‍ ഉദ്യോഗസ്ഥരുടെ അവലോകന യോഗം ചേരും. യോഗത്തില്‍ പങ്കെടുക്കാന്‍ ഉദ്യോഗസ്ഥര്‍ക്ക് നിര്‍ദ്ദേശം നല്‍കിയിട്ടുണ്ട്.

    ഭരണപരിഷ്ക്കരണ കമ്മീഷന്‍ ചെയര്‍മാനും സ്ഥലം എം.എല്‍.എ .യുമായ വി.എസ് അച്ചുതാനന്ദന്‍ ഡിസംബര്‍ 18, 19 തിയതികളില്‍ മലമ്പുഴയില്‍ വിവിധ പരിപാടികളില്‍ പങ്കെടുക്കും. 18 ന് രാവിലെ 10.30 ന് മുണ്ടൂര്‍ ഗ്രാമപഞ്ചായത്ത് ഓഫീസ് ഉദ്ഘാടനം, 11.30 ന് പുതുപ്പരിയാരം സര്‍വ്വീസ് സഹകരണ ബാങ്ക് മുട്ടിക്കുളങ്ങര ശാഖയുടെ തറക്കല്ലിടല്‍  എന്നിവ നിര്‍വ്വഹിക്കും.  
    ഡിസംബര്‍ 19 ന് രാവിലെ 10.30 ന് കൂട്ടുപാത ഗവ.പോളിടെക്നിക് കുളവും 11.30 ന്  പോളിടെക്നിക് കോളേജ് യൂനിയന്‍ ഉദ്ഘാടനവും  നിര്‍വ്വഹിക്കും. വൈകീട്ട് 3.30 ന് മലമ്പുഴ ഹൈസ്കൂളില്‍ പഠനോപകരണ വിതരണോദ്ഘാടനം നടത്തും.