വനിതാ ജീവനക്കാര്‍ക്ക് മിതമായ നിരക്കില്‍ സുരക്ഷിതവും സൗകര്യപ്രദവുമായ താമസ സൗകര്യമൊരുക്കിയുള്ള വര്‍ക്കിംഗ് വിമെന്‍സ് ഹോസ്റ്റല്‍ കട്ടപ്പനയില്‍ പ്രവര്‍ത്തനമാരംഭിക്കുന്നു. കേന്ദ്ര-സംസ്ഥാന ഫണ്ടുകള്‍ വിനിയോഗിച്ച് സംസ്ഥാന ഭവന നിര്‍മ്മാണ ബോര്‍ഡ് കട്ടപ്പനയില്‍ പബ്ലിക് ഹൗസിംഗ് സ്‌കീമില്‍ പണികഴിപ്പിച്ച വര്‍ക്കിംഗ് വിമെന്‍സ് ഹോസ്റ്റലിന്റെ ഉദ്ഘാടനം 22ന് രാവിലെ 10 മണിക്ക് റവന്യു, ഭവന നിര്‍മ്മാണ വകുപ്പ് മന്ത്രി ഇ.ചന്ദ്രശേഖരന്‍ നിര്‍വ്വഹിക്കും. വൈദ്യുതി വകുപ്പ് മന്ത്രി എം.എം.മണി അധ്യക്ഷത വഹിക്കും. അഡ്വ.ജോയ്‌സ് ജോര്‍ജ് എം.പി, റോഷി അഗസ്റ്റിന്‍ എം.എല്‍.എ എന്നിവര്‍ മുഖ്യാതിഥികളായിരിക്കും.

കുറ്റിപ്പുറം എംപ്ലോയ്‌മെന്റ എക്‌സ്‌ചേഞ്ചില്‍ രജിസ്‌ട്രേഷന്‍ പുതുക്കാന്‍ കഴിയാതിരുന്ന ഉദ്യോഗാര്‍ത്ഥികള്‍ക്ക്  ജനുവരി 30 വരെ രജിസ്‌ട്രേഷന്‍ പുതുക്കാനുള്ള സമയം നീട്ടിയതായി എംപ്ലോയ്‌മെന്റ് ഓഫീസര്‍ അറിയിച്ചു.   

ജില്ലയുടെ സമഗ്രവികസനം വിഭാവനം ചെയ്ത് ജില്ലാ ആസൂത്രണ സമിതി തയ്യാറാക്കിയ 'മലപ്പുറം ജില്ലാ പദ്ധതി'യുടെ പ്രകാശനം ജനുവരി 22 ന് നടക്കും. ഉച്ചയ്ക്ക് 12 ന് ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടക്കുന്ന ജില്ലാ ആസൂത്രണ സമിതി യോഗത്തില്‍ വെച്ചാണ് പ്രകാശനം നടക്കുക.

ജില്ലാ ആസൂത്രണ സമിതി യോഗം ജില്ലാപഞ്ചായത്ത് കോണ്‍ഫറന്‍സ് ഹാളില്‍ ജനുവരി 22 ന് ഉച്ചയ്ക്ക് 12ന് നടക്കും. ജില്ലാ പദ്ധതിയുടെ പ്രകാശനം നടക്കുന്നതിനാല്‍  ജില്ലാതല ഉദ്യോഗസ്ഥരും പദ്ധതി ഉപസമിതി കണ്‍വീനര്‍മാരും നിര്‍ബന്ധമായും യോഗത്തില്‍ പങ്കെടുക്കണം.           

ഡിസംബര്‍ മാസത്തില്‍  മസ്റ്റര്‍ ചെയ്യാത്ത സര്‍വീസ് പെന്‍ഷന്‍കാര്‍ ജനുവരി 20 നകം ജില്ലാ ട്രഷറിയില്‍ മസ്റ്റര്‍ ചെയ്യണം. ആരോഗ്യ ഇന്‍ഷുറന്‍സ് പദ്ധതിയായ മെഡിസെപ്പിനുള്ള അപേക്ഷ ഫോറം വാങ്ങാത്തവര്‍ ട്രഷറിയില്‍ നിന്ന്  വാങ്ങി പൂരിപ്പിച്ച് നല്‍കണം. 2018-19 സാമ്പത്തിക വര്‍ഷത്തെ ഇന്‍കം ടാക്‌സ് സ്റ്റേറ്റ്‌മെന്റ് ഫെബ്രുവരി 10 നകം അതത് ട്രഷറികളില്‍ സമര്‍പ്പിക്കണമെന്ന് ജില്ലാ ട്രഷറി ഓഫീസര്‍ അറിയിച്ചു.

പ്രാദേശിക ഭരണകൂടങ്ങളുടെ പദ്ധതി നടത്തിപ്പിന്റെ സമഗ്രതയെക്കുറിച്ച് കുടുംബശ്രീ അംഗങ്ങള്‍ക്ക് അറിവ് നല്‍കുന്നതിന്  ആവിഷ്‌കരിച്ച റസിഡന്‍ഷ്യല്‍ പരിശീലന പദ്ധതിക്ക് ജില്ലയില്‍ തുടക്കമായി. കുടുംബശ്രീ സി.ഡി.എസുകളിലെ വിവിധ പദ്ധതികള്‍ക്കായി നിയോഗിച്ച ഉപസമിതി കണ്‍വീനര്‍മാര്‍ക്കാണ് പരിശീലനം നല്‍കുന്നത്. നിലമ്പൂര്‍ കെ.എഫ്.ആര്‍.ഐ യില്‍ നടന്ന പരിശീന പരിപാടിയുടെ ജില്ലാ തല ഉദ്ഘാടനം പി.വി.അന്‍വര്‍ എം.എല്‍.എ നിര്‍വഹിച്ചു. കുടംബശ്രീ സംസ്ഥാന മിഷന്റെയും കിലയുടേയും സംയുക്താഭിമുഖ്യത്തില്‍ ആര്‍ട് എച്ച്.ആര്‍.ഡി ട്രെയ്നിങ് ഇന്‍സ്റ്റിറ്റ്യൂട്ടാണ് പരിശീലനം സംഘടിപ്പിക്കുന്നത്.

ജില്ലാ ഇന്‍ഫര്‍മേഷന്‍ ഓഫീസില്‍ അച്ചടി, ഓണ്‍ലൈന്‍ മാധ്യമങ്ങളിലൂടെയുള്ള സര്‍ക്കാരിന്റെ പ്രചാരണ പരിപാടികള്‍ക്കായുള്ള ആവിഷ്‌ക്കാരങ്ങള്‍ക്ക് ഡിസൈന്‍ വര്‍ക്കുകള്‍, മലയാളം, ഇംഗ്ലീഷ് ഭാഷകളില്‍ വിവരണങ്ങള്‍ എന്നിവ തയ്യാറാക്കുന്നതിന്  ഡിസൈനര്‍, കണ്ടന്റ് ഡെവലപ്പര്‍ എന്നിവരുടെ താത്കാലിക സേവനം ആവശ്യമുണ്ട്. ഈ മേഖലകളില്‍ അഞ്ച് വര്‍ഷത്തില്‍ കുറയാതെയുള്ള പ്രവൃത്തിപരിചയമുള്ളവര്‍ക്ക് അപേക്ഷിക്കാം. താത്പര്യമുള്ളവര്‍ വിശദമായ ബയോഡാറ്റ സഹിതമുള്ള അപേക്ഷ ജനുവരി 22നകം നേരിട്ടോ ജില്ലാ ഇന്‍ഫര്‍മേഷന്‍ ഓഫീസ്, സിവില്‍ സ്റ്റേഷന്‍, മലപ്പുറം എന്ന വിലാസത്തിലോ അയക്കണം. ഫോണ്‍. 0483- 2734387.  

അപകടങ്ങള്‍ തുടര്‍ച്ചയായി സംഭവിക്കുന്ന സാഹചര്യത്തില്‍ വട്ടപ്പാറ വളവില്‍ പൊലീസ് എയ്ഡ് പോസ്റ്റ് പ്രവര്‍ത്തനം ഫെബ്രുവരി നാലിന് തുടങ്ങുമെന്ന് ജില്ലാ കലക്ടര്‍ അമിത് മീണ അറിയിച്ചു. കലക്ടറുടെ അധ്യക്ഷതയില്‍ ചേര്‍ന്ന  ജില്ലാ റോഡ് സുരക്ഷാ അതോറിറ്റി യോഗത്തിലാണ് തീരുമാനം. സന്നദ്ധ സംഘടനകളുടെയും പൊലീസ്, മോട്ടോര്‍ വാഹന വകുപ്പിന്റെയും നേതൃത്വത്തിലാവും എയ്ഡ് പോസ്റ്റ് പ്രവര്‍ത്തിക്കുക. ഇതു വഴിയെത്തുന്ന വാഹനങ്ങളിലെ ഡ്രൈവര്‍മാര്‍ക്ക് ബോധവത്കരണവും മുന്നറിയിപ്പും എയ്ഡ് പോസ്റ്റ് കേന്ദ്രീകരിച്ച് നല്‍കാനും തീരുമാനിച്ചു.