ജില്ലാ വികസന സമിതി യോഗം  നാളെ(02.02.2019) രാവിലെ 11 ന് കളക്ടറേറ്റ് മിനി കോണ്‍ഫറന്‍സ് ഹാളില്‍ ചേരുമെന്ന് ജില്ലാ കളക്ടര്‍  ഡോ ഡി സജിത്ത് ബാബു അറിയിച്ചു.

 ജില്ലാശിശുക്ഷേമ സമിതിയുടെ അടിയന്തര എക്‌സിക്യൂട്ടീവ് കമ്മിറ്റി യോഗം നാളെ (2) ന് ഉച്ചയ്ക്ക് ശേഷം മൂന്നിന് ജില്ലാ കളക്ടര്‍ ഡോ സജിത്ത് ബാബുവിന്റെ അദ്ധ്യക്ഷതയില്‍  ചേമ്പറില്‍ ചേരും.
 

 ജില്ലാ പഞ്ചായത്തിന്റെ 2018-2019 വര്‍ഷത്തെ പദ്ധതികളില്‍ ഉള്‍പ്പെടുത്തിയ പട്ടികജാതി വിഭാഗത്തില്‍പ്പെട്ട അംഗീകൃത തെയ്യം കലാകാരന്‍മാര്‍ക്ക് ആടയാഭരണങ്ങള്‍ വാങ്ങുന്നതിന് അംഗീകൃത സംഘങ്ങളില്‍ നിന്ന് അപേക്ഷ ക്ഷണിച്ചു.

ജില്ലയിലെ പുഴകളില്‍ നിന്നും കൃഷി ആവശ്യത്തിന് മോട്ടോര്‍ ഉപയോഗിച്ച് വെളളം പമ്പ് ചെയ്യാന്‍ അനുമതി വാങ്ങണമെന്ന് ജലസേചന വിഭാഗം എക്‌സിക്യൂട്ടീവ് എഞ്ചിനീയര്‍ അറിയിച്ചു.  5 എച്ച് പിക്ക് മുകളിലുളള മോട്ടോറുകള്‍ക്കാണ് അനുമതി വേണ്ടത്.  അനുമതിയില്ലാതെ പ്രവര്‍ത്തിച്ചുകൊണ്ടിരിക്കുന്ന 5 എച്ച്പിക്ക് മുകളിലുളള എല്ലാ മോട്ടോറുകള്‍ക്കും അനുമതിക്കായി ഉടന്‍ അപേക്ഷ സമര്‍പ്പിക്കണം.  പുതിയ മോട്ടോര്‍ സ്ഥാപിക്കുന്നതിനും ജലസേചന വകുപ്പില്‍ നിന്നും അനുമതി വാങ്ങണം.

ജില്ലയിലെ ആരാധനാലയങ്ങളിലെ പ്രസാദത്തിനും അന്നദാനത്തിനും നേര്‍ച്ചയ്ക്കും ഭക്ഷ്യസുരക്ഷാ ലൈസന്‍സ് ഉറപ്പാക്കുന്നതുമായി ബന്ധപ്പെട്ട് ജില്ലയിലെ ആരാധനാലയ ഭാരവാഹികളുടെ യോഗം ജില്ലാകളക്ടര്‍ ഡോ ഡി സജിത്ത് ബാബുവിന്റെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ ഫെബ്രുവരി നാലിന്  വൈകീട്ട് മൂന്നിന് ചേരും.ഈ യോഗത്തില്‍ ജില്ലയിലെ മുഴുവന്‍ ആരാധനാലയ ഭാരവാഹികളും പങ്കെടുത്ത് ഭക്ഷ്യസുരക്ഷാ വകുപ്പുമായി ചേര്‍ന്ന് ലൈസന്‍സ്/രജിസ്‌ട്രേഷന്‍ എടുത്ത് ഭക്ഷ്യസുരക്ഷാ ഉറപ്പാക്കണമെന്ന് ജില്ലാ ഭക്ഷ്യസുരക്ഷ അസിസ്റ്റന്‍ഡ് കമ്മീഷ്ണര്‍ അറിയിച്ചു.

 2018 ജൂണ്‍- ജൂലൈ മാസങ്ങളില്‍ പുതിയ റേഷന്‍ കാര്‍ഡുകള്‍ക്കായി ഹോസ്ദുര്‍ഗ് താലൂക്ക് സപ്ലൈ ഓഫീസില്‍ നേരിട്ട് അപേക്ഷ നല്‍കിയ ടോക്കണ്‍ നമ്പര്‍ ഒന്നു മുതല്‍ 2500 വരെയുള്ളവര്‍ക്ക് ഫെബ്രുവരി രണ്ടിനും  2501 മുതല്‍ 3500 വരെയുള്ളവര്‍ക്ക് ഫെബ്രുവരി നാലിനും ഹോസ്ദുര്‍ഗ് സപ്ലൈഓഫീസില്‍ റേഷന്‍ കാര്‍ഡുകള്‍ വിതരണം ചെയ്യും.നിലവില്‍ പേരുള്‍പ്പെട്ട ഒറിജിനല്‍ റേഷന്‍കാര്‍ഡുകള്‍, ടോക്കണ്‍, കാര്‍ഡിന്റെ വില എന്നിവ സഹിതം അപേക്ഷകര്‍ നേരിട്ട് ഹാജരാകണം.  അന്നേ ദിവസം ഹാജരാകാത്ത ഈ നമ്പര്‍ പരിധിയിലുള്ള അപേക്ഷകര്‍ക്ക് ഫെബ്രുവരി 14 നുശേഷംമാത്രമേ ഓഫീസില്‍ നിന്നും കാര്‍ഡുകള്‍ വിതരണം ചെയ്യൂ.

 കയ്യൂര്‍ കുടുബാരോഗ്യ കേന്ദ്രത്തിന് പെട്രോനൈറ്റ് എല്‍ ആര്‍ ജി ലിമിറ്റഡ് ഓക്‌സിജന്‍ കോണ്‍സ്റ്റന്റിനേറ്റര്‍ അനുവദിച്ചു. കയ്യൂര്‍ ചീമേനി ഗ്രാമപഞ്ചായത്തിന്റെ നേതൃത്വത്തില്‍ കയ്യൂര്‍ കുടുംബാരോഗ്യ കേന്ദ്രത്തില്‍ പ്രവര്‍ത്തിച്ച്  വരുന്ന പാലീയേറ്റീവ് കെയര്‍ യൂണിറ്റിന് കൊച്ചിയില്‍ പ്രവര്‍ത്തിക്കുന്ന പ്രകൃതി വാതക ടെര്‍മിനലായ  പെട്രോനൈറ്റ് എല്‍ ആര്‍ ജി ലിമിറ്റഡ്  അവരുടെ സി ആര്‍ എസ് ഫണ്ടില്‍ നിന്നുമാണ് ഓകസിജന്‍ കോണ്‍സ്റ്റന്റിനേറ്റര്‍ അനുവദിച്ചത് . ഗെയില്‍ പ്രകൃതി വാതക പൈപ്പ് ലൈന്‍ പദ്ധതിയുടെ ഭാഗമായിട്ടാണ് ഇതിനു വേണ്ടിയുളള തുക അനുവദിച്ചത്. 

 ഊര്‍ജ്ജയാനം പദ്ധതിയിലൂടെ ഇന്ത്യയിലെ ആദ്യത്തെ ഫിലമെന്റ് രഹിത ബള്‍ബ് പഞ്ചായത്തായി മാറിയ പിലീക്കോടിന് കേരള ബജറ്റിലും പ്രത്യേക പരാമര്‍ശം. ജനകീയ കൂട്ടായ്മയിലൂടെയും നിരന്തര ബോധവത്കരണത്തിലൂടെയും കേരള എനര്‍ജി മാനേജ്‌മെന്റിന്റെ സഹകരണത്തോടെയായിരുന്നു പിലിക്കോടില്‍ ഊര്‍ജ്ജയാനം പദ്ധതി ആരംഭിച്ചത്.

ജില്ലാ കളക്ടര്‍ ഡോ.ഡി.സജിത് ബാബു താലൂക്ക് തലത്തില്‍ നടത്തുന്ന പരാതിപരിഹാര അദാലത്തുകളില്‍ ആദ്യത്തേത് ഫെബ്രുവരി നാലിന് കാസര്‍കോട് കളക്ടറേറ്റില്‍ നടക്കും. കാസര്‍കോട് താലൂക്ക് പരിധിയില്‍ നിന്ന് ജനുവരി 24 വരെ ലഭിച്ച പരാതികളാണ് കളക്ടറേറ്റില്‍ രാവിലെ 9.30 മുതല്‍ നടക്കുന്ന അദാലത്തില്‍ പരിഗണിക്കുന്നത്. 

ജില്ലാ പഞ്ചായത്തിനു മുന്നിലെ പാതിവഴിയില്‍ മുടങ്ങിയ ശില്‌പോദ്യാനത്തിന്റെ പ്രവൃര്‍ത്തി ഫെബ്രുവരി രണ്ടാം വാരത്തോടെ പുനരാരംഭിക്കും. 20 ലക്ഷം രൂപ ശില്‌പോദ്യാനം  പൂര്‍ത്തിയാക്കുന്നതിനായി മാറ്റിവച്ചിട്ടുണ്ട്. ശില്പിയായ കാനായി കുഞ്ഞിരാമന്‍ ജനുവരി അഞ്ചിന് ജില്ലാ പഞ്ചായത്തിലെത്തി  നിര്‍മ്മാണം പുനരാരംഭിക്കാമെന്ന് ധാരണയിലെത്തിയതായി ജില്ലാ പഞ്ചായത്ത് പ്രസിഡന്റ് എ ജി സി ബഷീര്‍ ജില്ലാ പഞ്ചായത്ത് യോഗത്തില്‍ അറിയിച്ചു. മൂന്നുമാസത്തിനകം നിര്‍മ്മാണം പൂര്‍ത്തിയാക്കുവാന്‍ കഴിയുമെന്ന് പ്രതീക്ഷിക്കുന്നു.