കടങ്ങോട് ഗ്രാമപഞ്ചായത്തിൽ കൊറോണയുമായി ബന്ധപ്പെട്ട് മുഖ്യമന്ത്രിയുടെ വീഡിയോ കോൺഫറൻസിനെ തുടർന്ന് അവലോകന യോഗം ചേർന്നു. കോവിഡ് 19 മായി ബന്ധപ്പെട്ട് നിലവിൽ 118 പേർ വീടുകളിൽ നിരീക്ഷണത്തിലുണ്ട്. മുമ്പുണ്ടായിരുന്ന 28 പേർ 14 ദിവസം പൂർത്തീകരിച്ചതിനാൽ പുറത്തിറങ്ങി. ഗ്രാമ പഞ്ചായത്ത് പ്രസിഡന്റ് രമണി രാജന്റെ അധ്യക്ഷതയിൽ ചേർന്ന യോഗത്തിൽ ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജലീൽ ആദൂർ, വിവിധ വാർഡ് മെമ്പർമാർ, മെഡിക്കൽ ഓഫീസർ ശോഭ, ഡോക്ടർമാർ, ഹെൽത്ത് ഇൻസ്പെക്ടർ ബാബു, പോലീസ് ഉദ്യോഗസ്ഥൻമാർ, വില്ലേജ് പ്രതിനിധികൾ, വിവിധ രാഷ്ട്രീയ സംഘടനാ പ്രതിനിധികൾ തുടങ്ങിയവർ സംബന്ധിച്ചു.

കോവിഡ് 19 പ്രതിരോധ പ്രവർത്തനങ്ങൾക്കായി മാസ്‌ക്ക് നിർമ്മിച്ച് വിയ്യൂർ സെൻട്രൽ ജയിൽ മാതൃക കാണിച്ചതിന് പുറമെ ഫ്രീഡം ഹാൻഡ് സാനിറ്റൈസറുമായി അതീവ സുരക്ഷാ ജയിലും രംഗത്ത്. സെൻട്രൽ ജയിലിലെ അന്തേവാസികൾ യുദ്ധകാലാടിസ്ഥാനത്തിൽ ദിനംപ്രതി ആയിരത്തോളം പുനരുപയോഗിക്കുന്ന മാസ്‌ക്കുകളാണ് നിർമ്മിച്ചു വിതരണം നടത്തുന്നത്. ഇതിന് പുറമെയാണ് അതീവ സുരക്ഷാ ജയിൽ അന്തേവാസികൾ ജയിൽ ഡി ജി പി ഋഷിരാജ് സിങിന്റെ പ്രത്യേക നിർദ്ദേശപ്രകാരം ഫ്രീഡം സാനിറ്റൈസർ നിർമ്മിച്ച് കുറഞ്ഞ വിലക്ക് ലഭ്യമാക്കി രംഗത്ത് വന്നിരിക്കുന്നത്.

കോവിഡ് 19 പ്രതിരോധ ബോധവൽക്കരണ പരിപാടികളുടെ ഭാഗമായി കുന്നംകുളം നഗരസഭാ പ്രദേശത്തെ ഇതര സംസ്ഥാന തൊഴിലാളി ക്യാമ്പുകൾ വ്യാപകമായി പരിശോധിച്ചു. നഗരസഭ സെക്രട്ടറി കെ.കെമനോജിന്റെ നേതൃത്വത്തിൽ ഹെൽത്ത് സൂപ്പർവൈസർ കെ. എസ്. ലക്ഷ്മണൻ, ഹെൽത്ത് ഇൻസ്പക്ടർമാരായ കെ.ജയകുമാർ, യു.കെ.സനൽകുമാർ, എൻ.കമലാക്ഷി, ജൂനിയർ ഹെൽത്ത് ഇൻസ്പെക്ടർ അൽത്താഫ് റഹ്മാൻ എന്നിവരും സബ് ഇൻസ്പെക്ടർ ആന്റണിയുടെ നേതൃത്വത്തിലുള്ള പോലീസ് സംഘവും പരിശോധനയുടെ ഭാഗമായി.

കോവിഡ് 19 പ്രതിരോധ പ്രവർത്തനങ്ങളുടെ ഭാഗമായി കുന്നംകുളം നഗരസഭ താലൂക്ക് ആശുപ്രതിയിൽ മേഖലാതല അവലോകന യോഗം ചേർന്നു. കുന്നംകളം, ആർത്താറ്റ്, പോർക്കുളം ഹെൽത്ത് സെന്ററുകളുടെ ഇതുവരെയുള്ള കോവിഡ് 19 പ്രതിരോധ പ്രവർത്തനങ്ങൾ വിലയിരുത്തി. ബോധവത്ക്കരണം കൂടുതൽ ശക്തിപ്പെടുത്താനും ഇതിനായി ലഘുലേഖകൾ വീടുകൾ തോറും വിതരണം ചെയ്യാനും ബന്ധപ്പെട്ടവർക്ക് നിർദ്ദേശം നൽകി.

കുത്താമ്പുള്ളി പ്രാഥമികാരോഗ്യ കേന്ദ്രവും തിരുവില്വാമല ഗ്രാമപഞ്ചായത്തും പ്രൈവറ്റ് ബസ് ഓണേഴ്സ് ഓർഗനൈസേഷനും മോട്ടോർ വാഹന വകുപ്പും സംയുക്തമായി തിരുവില്വാമല പ്രൈവറ്റ് ബസ് സ്റ്റാൻഡിൽ ബോധവൽക്കരണ പരിപാടി നടത്തി. കോവിഡ് 19 വ്യാപനം തടയുന്നതിന്റെ ഭാഗമായാണ് ബോധവൽക്കരണം നടത്തിയത്. ബസ് ജീവനക്കാരും ബസ് യാത്രക്കാരും പാലിക്കേണ്ട മുൻകരുതലുകൾ ഹെൽത്ത് ഇൻസ്പെക്ടർ അനു ഫയസ് വിശദീകരിച്ചു. നിർദ്ദേശങ്ങൾ അടങ്ങിയ സ്റ്റിക്കർ ബസിൽ പതിച്ചു. മോട്ടോർ വെഹിക്കിൾ ഇൻസ്പെക്ടർമാരായ അരുൺ സുധീഷ്, പ്രൈവറ്റ് ബസ് ഓണേഴ്സ് ഓർഗനൈസേഷൻ ഭാരവാഹികളായ രാജീവ,് സുനിൽ, റഹ്മാൻ എന്നിവരും സംസാരിച്ചു.

കോവിഡ് 19 രോഗവ്യാപന സാഹചര്യത്തിൽ അങ്കണവാടികൾക്കും വിദ്യാഭ്യാസ സ്ഥാപനങ്ങൾക്കും മാർച്ച് 31 വരെ സർക്കാർ അവധി നൽകി. കുട്ടികൾ അങ്കണവാടികളിൽ എത്തിയില്ലെങ്കിലും അവർക്ക് വേണ്ട പോഷകാഹാരങ്ങളും ഭക്ഷണ പദാർഥങ്ങളും വീടുകളിൽ എത്തിക്കണമെന്ന നിർദ്ദേശത്തെതുടർന്ന് വനിത ശിശു വികസന വകുപ്പിന്റെ നേതൃത്വത്തിലാണ് അങ്കണവാടിയിലെ കുട്ടികൾക്കുള്ള ഭക്ഷണം അവരുടെ വീടുകളിലേക്ക് എത്തിച്ചു നൽകിത്തുടങ്ങിയത്.അങ്കണവാടി ടീച്ചർമാരും ഹെൽപ്പർമാരും ഏറെ ആവേശത്തോടെയാണ് ഇത് നിർവ്വഹിച്ചുവരുന്നത്.