നെടുമ്പനയിലെ ഒരു കുടുംബത്തിലെ മൂന്നു പേര്‍ ഉള്‍പ്പടെ ജില്ലയില്‍ ഇന്നലെ(ജൂണ്‍ 18) 13 പേര്‍ക്ക് കോവിഡ് പോസിറ്റീവ് സ്ഥിരീകരിച്ചു. എല്ലാവരെയും പാരിപ്പള്ളി സര്‍ക്കാര്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. 10 പേര്‍ വിദേശത്ത് നിന്നും ഒരാള്‍ ചെന്നെയില്‍ നിന്നും എത്തിയവരാണ്. മയ്യനാട് സ്വദേശിനിക്ക്(25 വയസ്) ജൂണ്‍ എട്ടിന് രോഗം സ്ഥിരീകരിച്ച ഏരൂര്‍ സ്വദേശിയുടെ പ്രാഥമിക സമ്പര്‍ക്കത്തിലൂടെയാവാം രോഗം പകര്‍ന്നത് എന്നാണ് നിഗമനം.

എടത്തിരുത്തി ഗ്രാമ പഞ്ചായത്തിൽ ജനകീയ മത്സ്യകൃഷി ആരംഭിക്കുന്നു. 10 സെന്റിൽ താഴെ കുളമുള്ളവർക്കാണ് ഈ അവസരം. കൃഷി ആരംഭിക്കുന്നവർക്ക് മത്സ്യ കുഞ്ഞുങ്ങൾ സൗജന്യമായി നൽകും. താത്പര്യമുള്ളവർ ജൂൺ 20ന് മുമ്പ് അപേക്ഷ നൽകണം. അപേക്ഷയോടൊപ്പം ഭൂനികുതി രസീത്, ആധാർ കാർഡ് എന്നിവ നിർബന്ധമായും വെക്കണം. ഫോൺ: 0480 2877259.
 

ജില്ലാ വികസന സമിതി യോഗം ജൂൺ 27 രാവിലെ 11 ന് വീഡിയോ കോൺഫറൻസ് മുഖേന ചേരും. ഉദ്യോഗസ്ഥർക്ക് യോഗത്തിൽ പങ്കെടുക്കുന്നതിന് ജില്ലാ കേന്ദ്രത്തിലും താലൂക്ക് ഓഫീസുകളിലും സൗകര്യം ഒരുക്കിയിട്ടുണ്ട്.

മൺസൂൺ കനക്കുന്ന പശ്ചാത്തലത്തിൽ ജില്ലയിൽ 810 അഭയകേന്ദ്രങ്ങളൊരുക്കി ജില്ലാ ഭരണകൂടം. ഇവിടെ ഒന്നര ലക്ഷം പേരെ പാർപ്പിക്കും. വെളളപ്പൊക്ക പ്രതിരോധ സാധ്യതകൾ സംബന്ധിച്ച് ജില്ലാ ദുരന്തനിവാരണ അതോറിറ്റിയും ഇന്റർ ഏജൻസി ഗ്രൂപ്പുകളുമായി ജില്ലാ കളക്ടർ എസ് ഷാനവാസിന്റെ നേതൃത്വത്തിൽ നടന്ന അവലോകനയോഗത്തിലാണ് ഈ കണക്കുകൾ വ്യക്തമാക്കിയത്. 125 സ്ഥലങ്ങളിൽ കഴിഞ്ഞ രണ്ട് വർഷങ്ങളിൽ അപകടങ്ങൾ നടന്നിട്ടുണ്ട്. ഇതിൽ 77 പ്രദേശങ്ങളിൽ വീണ്ടും അപകടങ്ങൾ ഉണ്ടകാൻ സാധ്യതയുണ്ടെന്നുമാണ് കണ്ടെത്തൽ.

കൊടുങ്ങല്ലൂർ നഗരസഭ എൻ യു എം എല്ലിന്റെ ഭാഗമായി സ്വയം തൊഴിൽ പദ്ധതികൾക്ക് അപേക്ഷ ക്ഷണിച്ചു. നഗരസഭ പരിധിയിൽ താമസക്കാരായ റേഷൻ കാർഡിൽ വാർഷിക വരുമാനം ഒരു ലക്ഷം രൂപയിൽ താഴെയുള്ള ആർക്കും അപേക്ഷിക്കാം. കുടുംബശ്രീ, പി എം എ വൈ ഗുണഭോക്താക്കൾ, കോവിഡ് 19 മൂലം ബുദ്ധിമുട്ട് അനുഭവിക്കുന്നവർ, ജോലി നഷ്ടപ്പെട്ട് നാട്ടിലെത്തിയവർ എന്നിവർക്ക് മുൻഗണന. താല്പര്യം ഉള്ളവർ നഗരസഭ സി ഡി എസ് ഒന്നിൽ പ്രവർത്തിക്കുന്ന എൻ യു എൽ എം ഓഫീസുമായി ബന്ധപ്പെടുക.
 

ജൂൺ 21 അന്താരാഷ്ട്ര യോഗാ ദിനത്തിന്റെ ഭാഗമായി ഭാരതീയ ചികിത്സാ വകുപ്പിന്റെയും നാഷ്ണൽ ആയുഷ് മിഷന്റെയും നേതൃത്വത്തിൽ ഹൈസ്‌കൂൾ, ഹയർ സെക്കന്ററി വിദ്യാർത്ഥികൾക്കായി ഉപന്യാസ മത്സരം സംഘടിപ്പിക്കുന്നു. യോഗ ഒരു ജീവിതചര്യ എന്നതാണ് ഹൈസ്‌കൂൾ വിഭാഗത്തിന്റെ വിഷയം. ഹയർസെക്കന്ററി വിഭാഗം വിഷയം യോഗ ഒരു ചികിത്സാ ശാസ്ത്രം എന്നതാണ്. ഉപന്യാസങ്ങൾ 500 വാക്കിൽ കവിയാൻ പാടില്ല. ജൂൺ 20 ന് നാല് മണിയ്ക്ക് മുൻപായി idykerala@gmail.com എന്ന വിലാസത്തിൽ അയയ്ക്കണം. ഉപന്യാസത്തിൽ വിദ്യാർത്ഥിയുടെ പേര്, സ്‌കൂൾ, ക്ലാസ്, ജില്ല എന്നിവ വ്യക്തമായി എഴുതിയിരിക്കണം.

തദ്ദേശസ്വയംഭരണ സ്ഥാപനങ്ങളിലേയ്ക്കുള്ള തെരഞ്ഞെടുപ്പിന് മുന്നോടിയായി പ്രാഥമിക വോട്ടർപട്ടിക പ്രസിദ്ധീകരിച്ചു. ജൂൺ 17 ന് പ്രസിദ്ധീകരിച്ച വോട്ടർ പട്ടിക പ്രകാരം ജില്ലയിൽ 25,36,118 വോട്ടർമാരാണുള്ളത്. ഇതിൽ 11,97,536 പേർ പുരുഷന്മാരും 13,38,575 സ്ത്രീകളും 7 പേർ ഭിന്നലിംഗക്കാരുമാണ്.