പട്ടിക വര്‍ഗ വിദ്യാര്‍ഥികള്‍ക്കുള്ള പ്രഭാത ഭക്ഷണ വിതരണത്തിന് പായം പഞ്ചായത്തില്‍ തുടക്കമായി. ജില്ലാ പട്ടികവര്‍ഗ പ്രൊജക്ട് ഡയറക്ടര്‍ ജാക്വലിന്‍ ഷൈനി ഫെര്‍ണാണ്ടസ് ഉദ്ഘാടനം ചെയ്തു. തുടര്‍ച്ചയായ നാലാം വര്‍ഷമാണ് പഞ്ചായത്തില്‍ പദ്ധതി നടപ്പാക്കുന്നത്. 7.24 ലക്ഷം രൂപയാണ് ഈ വര്‍ഷം പദ്ധതിക്കായി നീക്കിവെച്ചിരിക്കുന്നത്. പഞ്ചായത്തിലെ 13 കോളനികളിലെ ഹൈസ്‌കൂള്‍തലം വരെയുള്ള വിദ്യാര്‍ഥികള്‍ക്കാണ് പദ്ധതിയുടെ ഭാഗമായി ഭക്ഷണം നല്‍കുന്നത്.  

ഓണത്തിന് ആവശ്യമായ പൂക്കള്‍ പ്രാദേശികമായി ലഭ്യമാക്കുക എന്ന ലക്ഷ്യത്തോടെ ജില്ലാ പഞ്ചായത്ത് നടപ്പാക്കുന്ന 'ഓണത്തിന് ഒരു കൊട്ട പൂവ്' പദ്ധതിക്ക് തില്ലങ്കേരി ഗ്രാമ പഞ്ചായത്തില്‍ തുടക്കമായി.  ഗ്രാമ പഞ്ചായത്ത് പ്രസിഡന്റ പി പി സുഭാഷ് ചെണ്ടുമല്ലി തൈ നട്ട് പൂകൃഷി ഉദ്ഘാടനം ചെയ്തു. പഞ്ചായത്തിലെ രണ്ട്് കേന്ദ്രങ്ങളിലായി  മൂന്ന് ഏക്കറോളം സ്ഥലത്താണ് ചെണ്ടുമല്ലി കൃഷിക്ക് തുടക്കം കുറിച്ചത്. പഞ്ചായത്തിലെ രണ്ട് പുരുഷ സ്വയം സഹായ സംഘങ്ങളുടെ നേതൃത്വത്തില്‍ തൊഴിലുറപ്പ് തൊഴിലാളികളുടെ സഹകരണത്തോടെയാണ്  പദ്ധതി നടപ്പാക്കുന്നത്.

ഒളിമ്പിക്‌സ് മെഡല്‍ ജേതാവും ഹോക്കി താരവുമായിരുന്ന ഒളിമ്പ്യന്‍ മാനുവല്‍ ഫ്രെഡറിക്കിനായി സംസ്ഥാന സര്‍ക്കാര്‍ നിര്‍മ്മിച്ചുനല്‍കുന്ന വീടിന്റെ താക്കോല്‍ദാനം ജൂണ്‍ 29 ന് വൈകിട്ട് അഞ്ച് മണിക്ക് കായിക വകുപ്പ് മന്ത്രി ഇ പി ജയരാജന്‍ കണ്ണൂരില്‍ നിര്‍വഹിക്കും. പയ്യാമ്പലത്തിനടുത്ത് പള്ളിയാംമൂലയിലാണ് കേരളത്തിന്റെ ഏക ഒളിമ്പിക് മേഡല്‍ ജേതാവിന് വീടൊരുങ്ങിയത്. 

കണ്ണൂര്‍ ജില്ലാ കലക്ടറായി ടി വി സുഭാഷ് ചുമതലയേറ്റു. എഡിഎം ഇ മുഹമ്മദ് യൂസുഫ്, ഇലക്ഷന്‍ ഡെപ്യൂട്ടി കലക്ടര്‍ എ കെ രമേന്ദ്രന്‍, ഹുസൂര്‍ ശിരസ്തദാര്‍ പി വി അശോകന്‍ എന്നിവരുടെ സാന്നിധ്യത്തില്‍ 9.45 ഓടെയാണ് അദ്ദേഹം ചുമതലയേറ്റത്. ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് ഡയറക്ടറായിരുന്നു. തൃശൂര്‍ സ്വദേശിയാണ്.

മണലൂർ ഗവ. ഐടിഐ പ്രവേശനത്തിന് അപേക്ഷ ക്ഷണിച്ചു. രണ്ട് വർഷ ദൈർഘ്യമുളള ഡ്രാഫ്റ്റ്‌സ്മാൻ സിവിൽ, മെക്കാനിക്ക് മോട്ടോർ വെഹിക്കിൾ എന്നീ കോഴ്‌സുകൾക്ക് www.itiadmissions.kerala.gov.in എന്ന വെബ്‌സൈറ്റിലൂടെ ഓൺലൈനായി അപേക്ഷിക്കണം. അപേക്ഷ സ്വീകരിക്കുന്ന അവസാന തീയതി ജൂലൈ 29. റാങ്ക് പട്ടിക, കൗൺസിലിങ് തീയതി എന്നിവ www.itimanaloor.kerala.gov.in എന്ന വെബ് സൈറ്റിലൂടെ അറിയാം. അപേക്ഷ സമർപ്പിക്കുമ്പോൾ മൊബൈൽ നമ്പർ, ഇ-മെയിൽ ഐഡി, ആധാർ കാർഡ് നമ്പർ, ബ്ലഡ് ഗ്രൂപ്പ് എന്നിവ നൽകണം. 

ജില്ലയിൽ വിദ്യാഭ്യാസ വകുപ്പിൽ പാർട്ട് ടൈം ജൂനിയർ ലാംഗ്വേജ് അറബിക് ടീച്ചർ (കാറ്റഗറി നമ്പർ: 210/18) തസ്തികയ്ക്ക് അപേക്ഷ സമർപ്പിച്ചവരിൽ യോഗ്യരായവരുടെ അഭിമുഖം ജൂൺ 26 ന് കോഴിക്കോട് മേഖലാ പിഎസ്‌സി ഓഫീസിൽ നടത്തും. ഉദ്യോഗാർത്ഥികൾക്ക് എസ്എംഎസ്, പ്രൊഫൈൽ മെസ്സേജ് എന്നിവ നൽകിയിട്ടുണ്ട്. ഉദ്യോഗാർത്ഥികൾ അഡ്മിഷൻ ടിക്കറ്റ് ഡൗൺലോഡ് ചെയ്ത് നിശ്ചിത സമയത്തും നിർദ്ദിഷ്ട സ്ഥലത്തും ഹാജരാകണമെന്ന് ജില്ലാ ഓഫീസർ അറിയിച്ചു.
 

തൃശൂർ ലാൻഡ് ട്രൈബ്യൂണൽ ആൻഡ് ഡെപ്യൂട്ടി കളക്ടർ (എൽ ആർ) ജൂൺ 25 ന് തൃശൂർ കളക്ടറേറ്റിൽ നടത്താൻ നിശ്ചയിച്ച എല്ലാ എസ്എം കേസുകളുടെ വിചാരണ ജൂലൈ 27 ലേക്ക് മാറ്റി.

ചാവക്കാട് ഐ.സി.ഡി.എസ്സിനു കീഴിലുള്ള ചാവക്കാട് മുനിസിപ്പാലിറ്റി, വടക്കേക്കാട് പഞ്ചായത്ത് എന്നിവിടങ്ങളിലെ അങ്കണവാടികളിലേക്ക് വർക്കർ/ ഹെൽപ്പർ സ്ഥിരം ഒഴിവിലേക്ക് അപേക്ഷ ക്ഷണിച്ചു. 18 നും 46 നും ഇടയിൽ പ്രായമുള്ള വനിതകളായിരിക്കണം അപേക്ഷകർ. പത്താം തരം പാസ്സായവർക്ക് വർക്കർ തസ്തികയിലേക്കും പത്താം തരം പാസ്സാകാത്ത വർക്ക് ഹെൽപ്പർ തസ്തികയിലേക്കും അപേക്ഷിക്കാം. അപേക്ഷ ജൂലൈ 12 വരെ ചാവക്കാട് ഐ.സി.ഡി.എസ്. ഓഫീസിൽ സ്വീകരിക്കും. ഫോൺ : 0487-2507707.