കൊറോണ രോഗ പ്രതിരോധത്തിന്റെ ഭാഗമായി ആയിരങ്ങള്‍ പങ്കെടുക്കുന്ന വയനാടിന്റെ ദേശീയ ഉത്സവമായ വള്ളിയൂര്‍ക്കാവ് ആറാട്ടുത്സവം ചടങ്ങുകള്‍ മാത്രമായി നിജപ്പെടുത്താന്‍ തീരുമാനിച്ച ക്ഷേത്ര ഭരണസമിതിക്കും ആഘോഷകമ്മിറ്റിക്കും  മുഖ്യമന്ത്രിയുടെ അഭിനന്ദനം. കൊറോണ രോഗ പ്രതിരോധത്തിന്റെ ഭാഗമായി സമുദായിക സംഘടനകളുമായി നടത്തിയ വിഡിയോ കോണ്‍ഫറന്‍സിലാണ് മുഖമന്ത്രി  ഭരണസമിതിയെ അഭിനന്ദിച്ചത്.

കൊറോണ രോഗ പ്രതിരോധത്തിന്റെ ഭാഗമായി ജില്ലയില്‍  52 പേര്‍ കൂടി നിരീക്ഷണത്തില്‍. ഇതോടെ 398 പേരാണ് വീടുകളില്‍ നിരീക്ഷണത്തില്‍ കഴിയുന്നത്. ബുധനാഴ്ച രണ്ട് സാമ്പിളുകള്‍ കൂടി പരിശോധനയ്ക്കയച്ചു. ഇതുവരെ അയച്ച 26 സാമ്പിളുകളില്‍ 13 പേരുടെ ഫലം നെഗറ്റീവ് ആണ്. 13 പേരുടെ ഫലം ലഭിക്കാനുണ്ട്.

    കൊറോണ വൈറസ് വ്യാപനത്തിനെതിരായ പോരാട്ടത്തില്‍ സര്‍ക്കാറിന്റെയും ജില്ലാ ഭരണകൂടത്തിന്റെയും തീരുമാനങ്ങള്‍ക്കും നിര്‍ദ്ദേശങ്ങള്‍ക്കുമൊപ്പം നില്‍ക്കുമെന്ന് ജില്ലയിലെ മത, സാമുദായിക സംഘടനകള്‍ ഉറപ്പു നല്‍കി. രോഗവ്യാപനം തടയുന്നതിനായുള്ള തുടര്‍നടപടികള്‍ വിശദീകരിക്കാന്‍ ജില്ലാ കളക്ടര്‍മാരുമായും മത,സാമുദായിക സംഘടന നേതാക്കളുമായും മുഖ്യമന്ത്രി വീഡിയോ കോണ്‍ഫറന്‍സ് വഴി നടത്തിയ യോഗത്തിന്റെ ശേഷമാണ് ജില്ലയിലെ സംഘടനാ നേതാക്കള്‍ ഇക്കാര്യം അറിയിച്ചത്. രോഗവ്യാപനം തടയുന്നതിന്  മത,സാമുദായിക സംഘടനകളുടെ കാര്യമായ ഇടപെടല്‍ ഉണ്ടാവണമെന്ന് മുഖ്യമന്ത്രി അവശ്യപ്പെട്ടിരുന്നു.

കൈവിടാതിരിക്കാന്‍ കൈ കഴുകുക എന്ന സന്ദേശം ജനങ്ങളില്‍ എത്തിക്കുന്നതിന്റെ ഭാഗമായി കുടുംബശ്രീ ജില്ലാ മിഷന്‍ സ്‌നേഹിത ജെന്‍ഡര്‍     സഹായകേന്ദ്രത്തിന്റെയും കാസര്‍കോട് മുന്‍സിപ്പാലിറ്റിയുടെയും  സംയുക്താ ഭിമുഖ്യത്തില്‍ കാസര്‍കോട് പുതിയ ബസ്റ്റാന്‍ഡില്‍ ഹാന്‍ഡ് വാഷിങ് കോര്‍ണര്‍ സ്ഥാപിച്ചു. ഹാന്‍ഡ് വാഷിങീ കോര്‍ണര്‍ മുനിസിപ്പാലിറ്റി ചെയര്‍പേഴ്‌സണ്‍ ബീഫാത്തിമ ഇബ്രാഹിമും ഡി എം സി ടി ടി സുരേന്ദ്രനും ചേര്‍ന്ന്  ഉദ്ഘാടനം ചെയ്തു.

ആരോഗ്യ പരിപാലന പദ്ധതികള്‍ക്കും വിദ്യാഭ്യാസ പ്രൊജക്ടുകള്‍ക്കും മുന്‍ഗണന നിശ്ചയിച്ച് നീലേശ്വരം നഗരസഭ വികസന സെമിനാര്‍ നടന്നു.  നഗരസഭാ പരിധിയിലെ അലോപ്പതി, ഹോമിയോ, ആയുര്‍വ്വേദ ആശുപത്രികളില്‍ പുതിയ ആരോഗ്യ ശുശ്രൂഷാ പ്രൊജക്ടുകള്‍ക്ക് ഒപ്പം ഫിസിയോതെറാപ്പി ചികിത്സ സംവിധാനം നഗരസഭാ താലൂക്ക് ആശുപത്രിയിലും നീലേശ്വരം ഹോമിയോ ആശുപത്രിയിലും വിപുലപ്പെടുത്തുന്നതിനും,   നീലേശ്വരം ഹോമിയോ ആശുപത്രിയില്‍ ഇപ്പോള്‍ പ്രവര്‍ത്തിച്ചുവരുന്ന സ്പീച്ച് തെറാപ്പിയുടെ സാധ്യത രോഗികള്‍ക്കെല്ലാവര്‍ക്കും കൂടുതല്‍ പ്രചാരം നല്‍കുന്നതിനുമുള്ള പദ്ധതികള്‍ക്കാണ് പരിഗണന നല്‍കിയിട്ടുള്ളത്.  

പിലിക്കോട് ഗ്രാമപഞ്ചായത്തിലെ തൊഴില്‍രഹിത വേതനം കൈപ്പറ്റുന്ന ഗുണഭോക്താക്കള്‍ ദേശസാല്‍കൃത ബാങ്ക് അക്കൗണ്ട് പാസ് ബുക്ക്, ആധാര്‍ കാര്‍ഡ്, റേഷന്‍ കാര്‍ഡ് എസ്.എസ്.എല്‍.സി ബുക്ക്, എംപ്ലോയ്‌മെന്റ് രജിസ്‌ട്രേഷന്‍ കാര്‍ഡ്, വരുമാന സര്‍ട്ടിഫിക്കറ്റ് എന്നിവ സഹിതം മാര്‍ച്ച് 23 നകം പഞ്ചായത്ത് ഓഫീസില്‍ ഹാജരാകണം..

കൊറോണ വ്യാപനത്തിന്റെ പശ്ചാത്തലത്തില്‍, നിയമസഭയുടെ സെന്റര്‍ ഫോര്‍ പാര്‍ലമെന്ററി സ്റ്റഡീസിന്റെയും  കേരള സ്റ്റേറ്റ് ഫോര്‍മര്‍ എം.എല്‍.എ ഫോറത്തിന്റെയും സംയുക്ത ആഭിമുഖ്യത്തില്‍ ഇന്ത്യന്‍ ഭരണഘടനയും ജനാധിപത്യവും' എന്ന വിഷയത്തില്‍  മാര്‍ച്ച് 20 ന് നിയമസഭാ സമുച്ചയത്തിലെ ബാങ്ക്വറ്റ് ഹാളില്‍ നടത്തുവാനിരുന്ന സെമിനാര്‍ മാറ്റി

കര്‍ണ്ണാടകയിലെ മൈസൂര്‍,ദാവണ്‍ഗരെ ജില്ലകളില്‍ പക്ഷിപ്പനി സ്ഥിരീകരിച്ച സാഹചര്യത്തില്‍ കാസര്‍കോട് ജില്ലയിലേക്ക് കര്‍ണ്ണാടകയില്‍  നിന്നും കോഴി,കോഴി ഉത്പ്പന്നങ്ങള്‍,കോഴിവളം എന്നിവ കൊണ്ടുവരുന്നത്  പൂര്‍ണ്ണമായും നിരോധിച്ചതായി ജില്ലാ കളക്ടര്‍  ഡോ.ഡി സജിത് ബാബു അറിയിച്ചു. ഇത് ഉറപ്പുവരുത്തുന്നതിനായി ചെക്ക് പോസ്റ്റുകള്‍ സജ്ജീകരിച്ചിട്ടുണ്ട്. ഇതിനായി പോലീസിന്റെ നേതൃത്വത്തിലുള്ള സ്‌ക്വാഡുകളും പ്രവര്‍ത്തിക്കും. കര്‍ണ്ണാടകയോട് അതിര്‍ത്തി പങ്കിടുന്ന ഗ്രാപഞ്ചായത്തുകള്‍ ജാഗ്രത പാലിക്കണമെന്ന്  കളക്ടര്‍ പറഞ്ഞു. 

ജില്ലയില്‍ കൊറോണ സ്ഥിരീകരിച്ച സാഹചര്യത്തില്‍ നിലവിലുള്ള നിയന്ത്രണങ്ങള്‍ തുടരാനും ആരോഗ്യവകുപ്പിന്റെയും പോലീസിന്റെയും സഹകരണത്തോടെ നിരീക്ഷണങ്ങളും പ്രതിരോധ പ്രവര്‍ത്തനങ്ങളും കൂടുതല്‍ ശക്തമാക്കാനും ജില്ലാ കളക്ടര്‍ ഡോ. ഡി. സജിത് ബാബുവിന്റെ അധ്യക്ഷതയില്‍ ചേര്‍ന്ന ഉന്നതതല യോഗം തീരുമാനിച്ചു. കൊറോണ വ്യാപനം തടയുന്നതിന് പഴുതടച്ചുള്ള ക്രമീകരണങ്ങള്‍ ഏര്‍പ്പെടുത്തും. രോഗം പകരാതിരിക്കാനുള്ള മുന്‍കരുതലുകള്‍ എല്ലാ മേഖലകളിലുള്ളവരും കര്‍ശനമായി പാലിക്കണം.