സംസ്ഥാന സര്‍ക്കാരിന്റെ വിശപ്പ് രഹിത പദ്ധതിക്ക് പിന്തുണ നല്‍കി അയപ്പന്‍കോവില്‍ പഞ്ചായത്തില്‍ ജനകീയ ഹോട്ടല്‍ തുടങ്ങി. പഞ്ചായത്തിന്റെയും കുടുംബശ്രീയുടെയും നേതൃത്വത്തില്‍ പരപ്പില്‍ ആരംഭിച്ച ഹോട്ടലിന്റെ ഉദ്ഘാടനം ഇ എസ് ബിജിമോള്‍ എംഎല്‍എ നിര്‍വ്വഹിച്ചു.  ഉച്ചയൂണ് 20 രൂപ നിരക്കിലും  ലഭ്യമാകും. 25 രൂപയ്ക്ക്  ചോറ് പാഴ്സലായും ലഭിക്കും. കുടുംബശ്രീ പ്രവര്‍ത്തകരാണ് പാചകക്കാര്‍. ചടങ്ങില്‍ അയ്യപ്പന്‍കോവില്‍ ഗ്രാമപഞ്ചായത്ത് പ്രസിഡന്റ് എ എല്‍ ബാബു അധ്യക്ഷത വഹിച്ചു. ഗ്രാമപഞ്ചായത്ത് വൈസ് പ്രസിഡന്റ് നിഷാമോള്‍ ബിനോജ്, കുടുംബശ്രീ ചെയര്‍പേഴ്സണ്‍ ബീനാ സിന്തോള്‍, ഗ്രാമപഞ്ചായത്തംഗങ്ങള്‍ തുടങ്ങിയവര്‍ പങ്കെടുത്തു.

കൊടുവള്ളി മണ്ഡലത്തിലെ താമരശ്ശേരി, കിഴക്കോത്ത്, നരിക്കുനി ഗ്രാമപഞ്ചായത്തുകളിലൂടെയും കൊടുവള്ളി നഗരസഭയിലൂടെയും കടന്നുപോകുന്ന മണ്ഡലത്തിലെ പ്രധാന റോഡുകളിലൊന്നായ പരപ്പന്‍പൊയില്‍-എളേറ്റില്‍-പുന്നശ്ശേരി കാരക്കുന്ന് റോഡ് പ്രവൃത്തി വിലയിരുത്താന്‍ എളേറ്റില്‍ വ്യാപാരഭവനില്‍ കാരാട്ട് റസാഖ് എംഎല്‍എ യുടെ നേതൃത്വത്തില്‍ ജനപ്രതിനിധികളുടെയും രാഷ്ട്രീയ പാര്‍ട്ടി പ്രതിനിധികകളുടെയും യോഗം ചേര്‍ന്നു. 

ഹൃദയാഘാതം മൂലം വിദേശത്തു മരിച്ച പ്രവാസി സാമൂഹ്യപ്രവര്‍ത്തകന്‍ കോഴിക്കോട് പേരാമ്പ്ര സ്വദേശി മുയിപ്പോത്ത് പടിഞ്ഞാറക്കര കുനിയില്‍ നിതിന്‍ ചന്ദ്രന്റെ വീട്  തൊഴില്‍ വകുപ്പ് മന്ത്രി ടി.പി രാമകൃഷ്ണന്‍ സന്ദര്‍ശിച്ചു. കുടുംബാംഗങ്ങളുമായി മന്ത്രി സംസാരിച്ചു. നിതിന്റെ ഭാര്യയായ ആതിരയെ മന്ത്രിയും ഭാര്യ എം.കെ നളിനിയും അവരുടെ വീട്ടില്‍ എത്തി ആശ്വസിപ്പിച്ചു. ചെറുവണ്ണൂര്‍ പഞ്ചായത്ത് പ്രസിഡന്റ് കെ.പി ബിജു കൂടെയുണ്ടായിരുന്നു.

ഓണ്‍ലൈന്‍ പഠനത്തിനായി മണ്ഡലത്തിലെ ഇരുന്നൂറോളം വരുന്ന അങ്കണവാടികളും മുഴുവന്‍ പൊതു വായനശാലകളും സാംസ്‌കാരിക നിലയങ്ങളും ഓണ്‍ലൈന്‍ ടെലിവിഷന്‍ പഠനകേന്ദ്രങ്ങളാക്കി മാറ്റുന്നതിന് ആസ്തി വികസന ഫണ്ടില്‍ നിന്നും ആവശ്യമായ തുക അനുവദിക്കുമെന്ന്  കാരാട്ട് റസാഖ് എംഎല്‍എ അറിയിച്ചു. മണ്ഡലത്തിലെ ഓണ്‍ലൈന്‍ വിദ്യാഭ്യാസത്തിന് അടിസ്ഥാനം സൗകര്യം വര്‍ധിപ്പിക്കുന്നത് സംബന്ധിച്ച് താമരശ്ശേരി റസ്റ്റ്ഹൗസില്‍ ചേര്‍ന്ന മണ്ഡലത്തിലെ തദ്ദേശ സ്വയംഭരണ സ്ഥാപനങ്ങളിലെ അധ്യക്ഷന്‍മാരുടെയും വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍മാരുടെയും ഉദ്യോഗസ്ഥന്മാരുടെയും യോഗത്തിലാണ് എംഎല്‍എ ഇക്കാര്യം അറിയിച്ചത്.

കോരപ്പുഴ പാലം, പാവങ്ങാട് റോഡ് നിര്‍മ്മാണ പ്രവൃത്തികള്‍ ഗതാഗത വകുപ്പ് മന്ത്രി എ.കെ ശശീന്ദ്രന്‍ സന്ദര്‍ശിച്ചു. 26 കോടി ചെലവില്‍ നിര്‍മ്മിക്കുന്ന കോരപ്പുഴ പാലവും പാവങ്ങാട് മുതല്‍ കോരപ്പുഴ പാലം വരെ എട്ട് കോടി 36 ലക്ഷത്തിന്റെ വിവിധ നിര്‍മാണ പ്രവൃത്തികള്‍ നടക്കുന്ന റോഡിന്റെ നിലവിലെ പ്രവൃത്തികളുമാണ്
മന്ത്രി സന്ദര്‍ശിച്ചത്. 

അനര്‍ഹമായി എ. എ. വൈ (മഞ്ഞ), പി.എച്ച്.എച്ച് (പിങ്ക്) റേഷന്‍കാര്‍ഡുകള്‍ കൈവശം വെച്ചിരിക്കുന്ന കാര്‍ഡുടമകള്‍ക്ക് ഈ കാര്‍ഡുകള്‍ മുന്‍ഗണനേതര വിഭാഗത്തിലേക്ക് മാറ്റുന്നതിന് അവസരങ്ങള്‍ നല്‍കിയിരുന്നുവെങ്കിലും ഇപ്പോഴും നിരവധി ആളുകള്‍ മുന്‍ഗണനാ വിഭാഗം കാര്‍ഡുകള്‍ ഉപയോഗിച്ച് അനര്‍ഹമായി റേഷന്‍ ഉള്‍പ്പെടെയുള്ള ആനുകൂല്യങ്ങള്‍ കൈപ്പറ്റുന്നതായി ശ്രദ്ധയില്‍പെട്ടതായും ഇത്തരം കാര്‍ഡുടമകളെ കണ്ടെത്തുന്നതിനും ഇങ്ങനെ ഉണ്ടാകുന്ന ഒഴിവുകളിലേക്ക് അര്‍ഹരായകാര്‍ഡുടമകളെ ഉള്‍പ്പെടുത്തുന്നതിനും നടപടികള്‍ ആരംഭിച്ചതായി ജില്ലാ സപ്ലൈ ഓഫീസര്‍ അറിയിച്ചു.

കോഴിക്കോട് സിവില്‍ സ്റ്റേഷന്‍ പിഡബ്ല്യുഡി ബ്രിഡ്ജസ് ഡിവിഷനിലെ എക്‌സിക്യൂട്ടീവ് എഞ്ചിനീയറുടെ ഓഫീസ് ആവശ്യത്തിന് ഉപയോഗിക്കുന്നതിനായി  കരാര്‍ അടിസ്ഥാനത്തില്‍ എ / സി  5 സീറ്റര്‍ കാര്‍ വാടകയ്ക്ക് നല്‍കുന്നതിനായി  ക്വട്ടേഷന്‍  ക്ഷണിച്ചു.  അവസാന തീയതി ജൂണ്‍ 25 ന് നാല് മണി വരെ.