മുഖ്യമന്ത്രിയുടെ ദുരിതാശ്വാസ നിധിയിലേക്ക് കൊല്ലം ആര്‍ എം എസ് എന്‍ എഫ് പി ഇ യുടെ നേതൃത്വത്തില്‍ സമാഹരിച്ച 57,071 രൂപയുടെ ചെക്ക് ബ്രാഞ്ച് യൂണിയന്‍ സെക്രട്ടറി എസ് സജുമോന്‍ ജില്ലാ കലക്ടര്‍ ബി അബ്ദുല്‍ നാസറിന് കൈമാറി. ജെ നൈസാം, പി എസ് രാജീവന്‍ നായര്‍ എന്നിവര്‍ സന്നിഹിതരായി.
(പി.ആര്‍.കെ നമ്പര്‍ 1710/2020)

ഭക്ഷ്യോല്പാദനത്തില്‍ സ്വയംപര്യാപ്തത കൈവരിക്കുന്നതിനായി സംസ്ഥാന സര്‍ക്കാര്‍ ആവിഷ്‌കരിച്ചിട്ടുള്ള സുഭിക്ഷകേരളം പദ്ധതി നടപ്പിലാക്കുന്നതിനായി കൊല്ലം കോര്‍പ്പറേഷന്‍ ഉള്‍പ്പെടെ 17 തദ്ദേശഭരണ സ്ഥാപനങ്ങള്‍ സമര്‍പ്പിച്ച പ്രോജക്ടുകള്‍ക്ക് ജില്ലാ ആസൂത്രണ സമിതി അംഗീകാരം നല്‍കി.  ഇതോടെ ജില്ലയിലെ 85 തദ്ദേശഭരണ സ്ഥാപനങ്ങളും സുഭിക്ഷകേരളം പദ്ധതി പ്രോജക്ടുകള്‍ക്ക് അംഗീകാരം നേടി.  ജില്ലയിലെ തദ്ദേശഭരണ സ്ഥാപനങ്ങള്‍ 148 കോടി രൂപയുടെ മൊത്തം അടങ്കല്‍ വരുന്ന തുകയ്ക്കുള്ള പ്രോജക്ടുകള്‍ 2020-21 വര്‍ഷത്തെ ഉല്പാദന മേഖലയില്‍ ഏറ്റെടുത്തിട്ടുണ്ട്.  

നിയമസഭ ഇലക്ഷനുമായി ബന്ധപ്പെട്ട് ജില്ലയിലെ 46 പോളിംഗ് സ്റ്റേഷനുകള്‍ പുനക്രമീകരിക്കും. നിലവിലെ കെട്ടിടങ്ങളില്‍ നിന്നും സൗകര്യങ്ങള്‍ കൂടിയ കെട്ടിടങ്ങളിലേക്കാണ് മാറ്റി സ്ഥാപിക്കുന്നത്.  പോളിംഗ് സ്റ്റേഷനുകളുടെ പുനക്രമീകരണം സംബന്ധിച്ച് ജില്ലാ കലക്ടര്‍ ബി അബ്ദുല്‍ നാസറിന്റെ അധ്യക്ഷതയില്‍  ചേര്‍ന്ന യോഗത്തിലാണ് തീരുമാനം.
പോളിംഗ് സ്റ്റേഷനുകളുടെ  മാറ്റം സംബന്ധിച്ച് പരാതികളുണ്ടെങ്കില്‍ ജൂണ്‍ 27 നകം സമര്‍പ്പിക്കാം. ജില്ലയിലെ 1,948 പോളിംഗ് സ്റ്റേഷനുകളില്‍ 46 പോളിംഗ് സ്റ്റേഷനുകള്‍ വേറെ കെട്ടിടത്തിലേക്ക് മാറ്റും. വോട്ടര്‍മാരുടെ  സൗകര്യങ്ങള്‍ കൂടി  കണക്കിലെടുത്താണ് പുനക്രമീകരണം.

നടപ്പാതകള്‍ കൈയ്യേറി ഇരുചക്ര വാഹനങ്ങള്‍ പാര്‍ക്ക് ചെയ്യുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് ജില്ലാ കലക്ടര്‍ ബി അബ്ദുല്‍ നാസര്‍. കലക്ടറുടെ അധ്യക്ഷതയില്‍ ചേര്‍ന്ന ജില്ലാ റോഡ് സുരക്ഷാ കൗണ്‍സില്‍ അവലോകന യോഗത്തിലാണ് നിര്‍ദേശം.
ആശ്രാമം പരിസരത്ത് അപകടകരമായ അവസ്ഥയില്‍ നില്‍ക്കുന്ന 28 ഓളം മരങ്ങള്‍ മുറിക്കുന്നതിന് കോര്‍പ്പറേഷന്‍ നടപടികള്‍ സ്വീകരിക്കണം. ഗ്രേ ഏരിയകള്‍ കണ്ടുപിടിച്ച് ട്രാഫിക് ലൈറ്റുകള്‍ സ്ഥാപിക്കുന്നതിന് പി ഡബ്ല്യു ഡി എന്‍ എച്ച് വിഭാഗത്തിനു നിര്‍ദേശം നല്‍കി.

സംസ്ഥാന സര്‍ക്കാരിന്റെ വിശപ്പുരഹിത കേരളം പദ്ധതിയുടെ ഭാഗമായി ചിറക്കര ഗ്രാമപഞ്ചായത്തും കുടുംബശ്രീ മിഷനും സംയുക്തമായി പാരിപ്പള്ളി-പരവൂര്‍ റോഡില്‍ പ്ലാവിന്‍മൂട് പെട്രോള്‍ പമ്പിന് സമീപം  ആരംഭിച്ച ജനകീയ ഹോട്ടല്‍ വഴി ന്യായവിലയില്‍ ഉച്ചഭക്ഷണം ലഭ്യമാകും. ജി എസ് ജയലാല്‍ എം എല്‍ എ ഉദ്ഘാടനം നിര്‍വ്വഹിച്ച ചടങ്ങില്‍ ചിറക്കര പഞ്ചായത്ത് പ്രസിഡന്റ്—ടി ആര്‍ ദീപു അധ്യക്ഷനായി. 20 രൂപ നിരക്കില്‍ രുചികരമായ ഉച്ചഭക്ഷണം നല്‍കുന്ന ഹോട്ടലിന്റെ ചുമതല ഭൂമിക കുടുംബശ്രീ യുണിറ്റിനാണ്.

ലോക മയക്കുമരുന്ന് ദിനമായ ജൂണ്‍ 26 ന് തൊഴില്‍ വകുപ്പിന് കീഴില്‍ ചവറയില്‍ പ്രവര്‍ത്തിക്കുന്ന ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഇന്‍ഫ്രാ സ്ട്രക്ചര്‍ ആന്റ് കണ്‍സ്ട്രക്ഷനില്‍ സെന്റര്‍ ഫോര്‍ നാര്‍ക്കോട്ടിക്സ് ആന്റ് സൈക്കോട്രോപിക് സബ്സ്റ്റന്‍സ്  വിഭാഗം പ്രവര്‍ത്തനം ആരംഭിക്കുന്നു.

ഒരു കുടുംബത്തിലെ അമ്മയും മകനും ഉള്‍പ്പടെ 18 പേര്‍ക്ക് ഇന്നലെ(ജൂണ്‍ 24) കോവിഡ് സ്ഥിരീകരിച്ചു. 17 പേര്‍ വിദേശത്ത് നിന്ന് എത്തിയവരാണ്. എട്ടുപേര്‍ കുവൈറ്റില്‍ നിന്നും നാലുപേര്‍ സൗദിയില്‍ നിന്നും ഒരാള്‍ ദുബായില്‍ നിന്നും രണ്ടുപേര്‍ അബുദാബിയില്‍ നിന്നും രണ്ടുപേര്‍ താജിക്കിസ്ഥാനില്‍ നിന്നും എത്തിയവരാണ്. ഒരാള്‍ കുവൈറ്റില്‍ നിന്നും എത്തിയ വ്യക്തിയുടെ അമ്മയാണ്.

 സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ കോഴിക്കോട് ജില്ലയിലെ നാദാപുരത്ത്  ആരംഭിക്കുന്ന ഉപജില്ലാ  ഓഫീസിന്റെ ഉദ്ഘാടനം പിന്നോക്ക പട്ടികജാതി പട്ടികവര്‍ഗ്ഗ ക്ഷേമ വകുപ്പ് മന്ത്രി എ.കെ. ബാലന്‍ ജൂണ്‍ 27 ന് വൈകീട്ട് നാല് മണിയ്ക്ക് നിര്‍വ്വഹിക്കും.  ഇ.കെ.വിജയന്‍ എം.എല്‍.എ അദ്ധ്യക്ഷത വഹിക്കും. 
 

കുട്ടികളിലെ വളർച്ച - പഠന - പെരുമാറ്റ പ്രശ്‌നങ്ങൾ പരിഹരിക്കുന്നതിന് കോഴിക്കോട് ജില്ലാ പഞ്ചായത്ത് നടപ്പാക്കുന്ന 'സ്പന്ദനം'   പദ്ധതിയിൽ  ആശുപത്രി കെട്ടിടം ഉൽഘാടനം ചെയ്തു. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി ഉൽഘാടനം നിർവ്വഹിച്ചു. പുറക്കാട്ടിരി പാലോറമലയിൽ പ്രവർത്തിക്കുന്ന എ.സി.ഷണ്മുഖദാസ് മെമ്മോറിയൽ ചൈൽഡ് ആൻഡ് അഡോളസെന്റ് കെയർ സെന്ററിലാണ് ആശുപത്രി കെട്ടിടം നിർമ്മിച്ചത്.   വൈസ് പ്രസിഡന്റ് റീന മുണ്ടേങ്ങാട്‌ അധ്യക്ഷത വഹിച്ചു. സ്ഥാപനത്തിലെ സീനിയർ ഗ്രേഡ് നഴ്‌സ് ശ്യാംജി സി സംഭാവന ചെയ്ത സ്മാർട് ടിവിയുടെ പ്രവർത്തനോദ്‌ഘാടനവും റീന മുണ്ടേങ്ങാട്‌ നിർവഹിച്ചു.