ആലപ്പുഴ: തൊഴിലിടങ്ങളിൽ സ്ത്രീകൾക്കെതിരായ അതിക്രമങ്ങൾ തടയുന്നതിന്റെ ഭാഗമായി സംസ്ഥാനത്തെ സർക്കാർ/സർക്കാരിതര/ പൊതുമേഖല/സ്വകാര്യ മേഖല തുടങ്ങിയ തൊഴിലിടങ്ങളിൽ ബോധവൽക്കരണം നടത്തുന്നതിനു ജില്ല വനിത ശിശു വികസന ഓഫീസറുടെ കീഴിൽ  ഒരു വനിത സോഷ്യൽ വർക്കറെ കരാറടിസ്ഥാനത്തിൽ നിയമിക്കുന്നു.  വനിത ക്ഷേമ രംഗത്ത് പ്രവർത്തിക്കുന്ന സർക്കാരിതര സംഘടനകളിൽ നിന്നും താല്‍പര്യമുള്ളവരില്‍ നിന്നും അപേക്ഷകൾ ക്ഷണിച്ചു. താല്‍പര്യമുള്ളവര്‍  ജൂലൈ 15നകം താൽപര്യപത്രം നല്‍കണം. കൂടുതൽ  വിവരങ്ങൾക്ക് ജില്ല വനിത ശിശു വികസന ഓഫീസുമായി ബന്ധപ്പെടണം. ഫോൺ: 0477- 2960147.

ആലപ്പുഴ: സംസ്ഥാന സർക്കാരിന്റെ സുഭിക്ഷ കേരളം പദ്ധതി വഴി ഈ വർഷം നടപ്പാക്കുന്ന വിവിധ പദ്ധതികളിലേക്ക് അരൂക്കുറ്റി പഞ്ചായത്തിൽ ഗുണഭോക്താക്കളെ തെരഞ്ഞെടുക്കുന്നതിന് അപേക്ഷ ക്ഷണിച്ചു. തരിശുഭൂമിയിൽ നെൽകൃഷി, ഇടവിള കൃഷികൾ, കിഴങ്ങുവർഗ്ഗ കൃഷി, തരിശുഭൂമിയിൽ പച്ചക്കറി കൃഷി, വാഴകൃഷി, മുട്ടക്കോഴി വിതരണം, കറവ പശു വിതരണം, താറാവ് വളർത്തൽ തുടങ്ങിയ വ്യക്തിഗത പദ്ധതികളിലേക്കാണ് അപേക്ഷ ക്ഷണിച്ചത്. വാർഡ് മെമ്പർമാരുടെ പക്കൽനിന്ന് അപേക്ഷഫോമുകൾ വാങ്ങി പൂരിപ്പിച്ചു തിരിച്ചേൽപ്പിക്കണം. കോവിഡ് 19 പ്രോട്ടോക്കോൾ ഉള്ളതിനാലാണ് ഇത്തരത്തിൽ ക്രമീകരണം. അപേക്ഷ നൽകേണ്ട അവസാന തീയതി ജൂലൈ 15.

ആലപ്പുഴ: കോവിഡ് 19 ലോക്ക് ഡൗണിനെത്തുടർന്ന് സംസ്ഥാനത്ത് ഓൺലൈൻ ക്ലാസുകൾ നടക്കുന്ന സാഹചര്യത്തിൽ പഠന സൗകര്യമില്ലാത്ത വിദ്യാർത്ഥികൾക്ക് സഹായവുമായി വിവോ കേരള. ജില്ലയിലെ നിർധന കുടുംബങ്ങളിലെ കുട്ടികൾക്ക് പഠന സൗകര്യം ഒരുക്കുന്നതിനായി പത്ത് സ്മാർട്ട് ഫോണുകൾ വിവോ കേരള ടീം, ജില്ല കളക്ടർ എ. അലക്സാണ്ടറിന് കൈമാറി. വിവോ കേരള ഡിസ്ട്രിബ്യൂഷൻ  മാനേജർ സുമേഷ് പണിക്കർ, ആലപ്പുഴ ബ്രാഞ്ച് മാനേജർമാരായ എസ്.റ്റി അരുൺ, ബാലു ബാബു എന്നിവർ ചേർന്നാണ് ഫോണുകൾ കൈമാറിയത്.

ആലപ്പുഴ: ജില്ലയിലെ കോവിഡ് കെയർ സെന്ററുകളിലെ ക്ളീനിംഗിനായി ജില്ല ശുചിത്വ മിഷൻ താൽക്കാലിക അടിസ്ഥാനത്തിൽ 60 വയസിൽ താഴെയുള്ളവരെ തിരഞ്ഞെടുക്കുന്നു. താൽപര്യമുള്ളവർ ജില്ല ശുചിത്വമിഷൻ ഓഫീസുമായി ബന്ധപ്പെടണമെന്ന് ജില്ല കോ-ഓർഡിനേറ്റർ അറിയിച്ചു. ഫോൺ: 0477 2253020, 9048187546.

ആലപ്പുഴ: ഹരിപ്പാട് താലൂക്ക് ആശുപത്രിയിൽ ഡയാലിസിസ് യൂണിറ്റിന്റെ പ്രവർത്തനം ആരംഭിച്ചു. ഡയാലിസിസിനായി പേര് രജിസ്റ്റർ ചെയ്തവർ നിലവിലെ ചികിൽസ രേഖകളുമായി ആശുപത്രിയിലെ മെഡിസിൻ ഒ.പി. വിഭാഗത്തിൽ രാവിലെ എത്തണം. രജിസ്റ്റർ ചെയ്യാത്തവർ അപേക്ഷയും, ചികിൽസ രേഖകളുമായി ആശുപത്രി സൂപ്രണ്ടിനെ ബന്ധപ്പെടണം.

വെണ്മണി ഗ്രാമ പഞ്ചായത്തിലെ എട്ടാം വാർഡിൽ കോവി ഡ് സ്ഥിരീകരിച്ച വ്യക്തിയുടെ രോഗ ഉറവിടം കണ്ടെത്താനായിട്ടില്ലെന്നും ഈ വ്യക്തിക്ക് കരുവാറ്റ ഗ്രാമ പഞ്ചായത്തിലെ നാലാം വാർഡിൽ ഒട്ടനവധി പേരുമായി സമ്പർക്കം ഉണ്ടായിട്ടുണ്ടെന്നും ജില്ലാ മെഡിക്കൽ ഓഫീസർ റിപ്പോർട്ട് ചെയ്തിരുന്നു. രോഗവ്യാപനം തടയാൻ ആയിട്ടാണ് വെണ്മണി ഗ്രാമ പഞ്ചായത്തിലെ എട്ടാം വാർഡ്, കരുവാറ്റ ഗ്രാമ പഞ്ചായത്തിലെ നാലാം വാർഡ് എന്നിവ കണ്ടൈൻമെൻറ് സോൺ ആയി പ്രഖ്യാപിച്ച് ജില്ലാ കളക്ടർ ഉത്തരവിട്ടത്

സമ്പര്‍ക്കം മൂലമുളള കോവിഡ് കേസുകള്‍ ജില്ലയിലും റിപ്പോര്‍ട്ട് ചെയ്യുന്ന സാഹചര്യത്തില്‍ രോഗവ്യാപനം തടയാൻ  അതീവ ജാഗ്രത പുലര്‍ത്തേണ്ടതാണെന്ന് ജില്ലാ കലക്ടർ അറിയിച്ചു. ലോക്ഡൗണ്‍ ഇളവുകള്‍ പലപ്പോഴും ദുരുപയോഗം ചെയ്യുന്നത് ശ്രദ്ധയിൽപ്പെട്ടിട്ടുണ്ട്. സര്‍ക്കാര്‍ നിര്‍ദ്ദേശങ്ങള്‍ കര്‍ശനമായി പാലിച്ചില്ലെങ്കില്‍ രൂക്ഷമായ പ്രത്യാഘാതങ്ങളാണ് നമ്മെ കാത്തിരിക്കുന്നത്. 

ജില്ലയിലെ തീരപ്രദേശങ്ങളിൽ പൊതുജനങ്ങൾ അതീവ ജാഗ്രത പാലിക്കണമെന്ന് എന്ന് ജില്ലാ കളക്ടർ എ അലക്സാണ്ടർ അറിയിച്ചു. അനാവശ്യ ഗൃഹസന്ദർശന ങ്ങളും സുഹൃത്സംഗമങ്ങളും കർശനമായും ഒഴിവാക്കേണ്ടതാണ്. അവശ്യ കാര്യങ്ങൾക്ക് മാത്രമേ പുറത്തിറങ്ങാവൂ.