സര്‍ക്കാര്‍ ജീവനക്കാരുടെ പൊതുസ്ഥലംമാറ്റവും നിയമനവും സംബന്ധിച്ച മാനദണ്ഡത്തില്‍ ഭേദഗതിവരുത്തി സര്‍ക്കാര്‍ ഉത്തരവിറക്കി.  ജില്ല സംബന്ധിച്ച് പരിധിയില്ലാതെ ഓപ്ഷന്‍ നല്‍കാമെന്നും സ്വന്തം ജില്ലയെന്നത് സര്‍വീസില്‍ പ്രവേശിക്കുന്ന സമയത്ത് നല്‍കുന്ന സ്ഥിരമേല്‍വിലാസപ്രകാരമുള്ള ജില്ലയായിരിക്കുമെന്നും ഭേദഗതി വരുത്തിയിട്ടുണ്ട്.  സര്‍വീസില്‍ പ്രവേശിച്ച ശേഷം ഹോം സ്റ്റേഷന്‍ ഒരു തവണ മാത്രമേ മാറ്റാന്‍ സാധിക്കുകയുള്ളൂ എന്നും ഉത്തരവില്‍ വ്യക്തമാക്കി.  

പി.എന്‍.എക്‌സ്.1470/18

തൈക്കാട് സ്ത്രീകളുടേയും കുട്ടികളുടേയും ആശുപത്രിയുടെ 50 വര്‍ഷത്തെ വികസനം മുന്നില്‍ക്കണ്ട് മാസ്റ്റര്‍ പ്ലാന്‍ തയ്യാറാക്കാന്‍ താല്‍പ്പര്യമുള്ള സര്‍ക്കാര്‍, സര്‍ക്കാരിതര ഏജന്‍സികളില്‍ നിന്നും അപേക്ഷകള്‍ ക്ഷണിച്ചു.  ഏപ്രില്‍ 30ന് മുമ്പ് ആശുപത്രി സൂപ്രണ്ടിന് അപേക്ഷ നല്‍കണം.  

പി.എന്‍.എക്‌സ്.1467/18

കേരള നിയമസഭയുടെ പാര്‍ലമെന്ററി പഠന പരിശീലന കേന്ദ്രം കേരളത്തിലെ സര്‍ക്കാര്‍/എയ്ഡഡ് മേഖലയിലെ ഒന്‍പതാം ക്ലാസ് മുതല്‍ പന്ത്രണ്ടാം ക്ലാസ് വരെയുളള വിദ്യാര്‍ത്ഥികള്‍ക്കായി തിരുവനന്തപുരത്ത് സംഘടിപ്പിക്കുന്ന ഉപന്യാസ രചനാ മത്സരത്തിനുളള അപേക്ഷകള്‍ ഏപ്രില്‍ 30 വരെ സ്വീകരിക്കും.  വിശദ വിവരങ്ങള്‍, നിബന്ധന, അപേക്ഷ ഫോറം എന്നിവ നിയമസഭയുടെ ഔദ്യോഗിക വെബ്‌സൈറ്റായ www.niyamsabha.org യില്‍ ലഭിക്കും.  മെയ് എട്ടിന് രാവിലെ 11.30 മുതല്‍ ഉച്ചയ്ക്ക് 1.30 വരെയാണ് മത്സരം.

പി.എന്‍.എക്‌സ്.1466/18

കേരള സ്റ്റേറ്റ് സിവില്‍ സര്‍വീസ് അക്കാഡമിയുടെ തിരുവനന്തപുരം കേന്ദ്രത്തിലും ഉപകേന്ദ്രങ്ങളിലും വിവിധ വിഷയങ്ങളില്‍ ക്ലാസെടുക്കുന്നതിന് പരിചയ സമ്പന്നരായ അദ്ധ്യാപകരെ നിയമിക്കുന്നു.  ഭാഷ, കണക്ക്, ശാസ്ത്രം, ജിയോഗ്രഫി, ഹിസ്റ്ററി, ഇക്കണോമിക്‌സ്, പൊളിറ്റിക്‌സ്, നിയമം, ജേര്‍ണലിസം, വ്യക്തിത്വവികസനം തുടങ്ങിയ വിഷയങ്ങളില്‍ ക്ലാസുകള്‍ എടുക്കുന്നതിന് ബന്ധപ്പെട്ട വിഷയങ്ങളില്‍ ബിരുദാനന്തര ബിരുദവും അദ്ധ്യാപന വൃത്തിയില്‍ കുറഞ്ഞത് അഞ്ചുവര്‍ഷത്തെ പ്രവൃത്തി പരിചയമുളളവര്‍ക്കും  അപേക്ഷിക്കാം.  വിരമിച്ച അദ്ധ്യാപകരെയും പരിഗണിക്കും.  മണിക്കൂര്‍ അടിസ്ഥാനത്തിലായിരിക്കും വേതനം.

കൊച്ചി: മൂവാറ്റുപുഴ അഡീഷണല്‍ ഐ.സി.ഡി.എസ് ഓഫീസിലെ 2018-19 വര്‍ഷം വാഹനം കരാര്‍ അടിസ്ഥാനത്തില്‍ ലഭിക്കുന്നതിന് ടെന്‍ഡര്‍ ക്ഷണിച്ചു. ടെന്‍ഡര്‍ മെയ് എട്ടു വരെ നല്‍കാം. കൂടുതല്‍ വിവരങ്ങള്‍ക്ക് ഫോണ്‍ 0485-2260128.  

വരാപ്പുഴ: 2017-18 സാമ്പത്തിക വര്‍ഷത്തില്‍ വസ്തുനികുതി പിരിവില്‍ എറണാകുളം ജില്ലയില്‍ മികച്ച നേട്ടം കൈവരിച്ച ഗ്രാമ പഞ്ചായത്തുകളെ അനുമോദിച്ചു. ഗ്രാമ പഞ്ചായത്ത് അസോസിയേഷന്‍ പ്രസിഡന്റ് അഡ്വ. കെ. തുളസിഭായിയുടെ അദ്ധ്യക്ഷതയില്‍ വരാപ്പുഴ ചെട്ടിഭാഗം ക്രിസ്തുനഗര്‍ പാരീഷ് ഹാളില്‍ ചേര്‍ന്ന യോഗം പഞ്ചായത്ത് ഡയറക്ടര്‍ പി. മേരിക്കുട്ടി ഉദ്ഘാടനം ചെയ്തു. ജില്ലയുടെ ഈ നേട്ടം എല്ലാ  ഉദ്യോഗസ്ഥരുടേയും ജീവനക്കാരുടേയും കൂട്ടായ പ്രവര്‍ത്തനത്തിന്റെ ഫലമാണെന്നും ഇത് തുടര്‍ന്നു കൊണ്ടു പോകണമെന്നും പി മേരിക്കുട്ടി പറഞ്ഞു. 

കൊച്ചി: സംസ്ഥാന സര്‍ക്കാരിന്റെ ലൈഫ് പദ്ധതിയുടെ ഒന്നാം ഘട്ട പ്രവര്‍ത്തനത്തില്‍ ജില്ല മികച്ച നേട്ടം കൊയ്തു. 82% വീടുകളും പൂര്‍ത്തീകരിച്ചാണ് ജില്ല ഒന്നാമതെത്തിയത്. സംസ്ഥാനത്ത് ശരാശരി 43% വീടുകളാണ് പൂര്‍ത്തിയായത്.  ജില്ലയില്‍ ആകെ പൂര്‍ത്തീകരിക്കാനുണ്ടായിരുന്ന 1081 വീടുകളില്‍ 882 വീടുകളും പൂര്‍ത്തീകരിച്ചു. ബാക്കിയുള്ള 199 വീടുകള്‍ ഏപ്രില്‍ 30നകം തന്നെ പൂര്‍ത്തീകരിക്കുമെന്ന് ലൈഫ് പദ്ധതി ജില്ലാ കര്‍മ്മസമിതി അദ്ധ്യക്ഷന്‍ കൂടിയായ ജില്ലാ കളക്ടര്‍ മുഹമ്മദ് വൈ. സഫിറുള്ള അറിയിച്ചു. 

പറവൂര്‍: തദ്ദേശ സ്വയംഭരണ വകുപ്പ്, ആരോഗ്യ വകുപ്പ്,  ഹരിതകേരളം, കുടുംബശ്രീ, സാക്ഷരതാ മിഷന്‍, ശുചിത്വ മിഷന്‍ എന്നിവയുടെ നേതൃത്വത്തില്‍ മഴക്കാല പൂര്‍വ്വ രോഗങ്ങള്‍ പ്രതിരോധിക്കുന്നതിനും ശുചിത്വ അവബോധം സൃഷ്ടിക്കുന്നതിനുമായി നടപ്പാക്കുന്ന ജാഗ്രതോത്സവത്തിന്റെ ഭാഗമായി പറവൂര്‍ ബ്ലോക്ക് പഞ്ചായത്തിലെ വിദ്യാര്‍ത്ഥികള്‍ക്ക് വേണ്ടിയുള്ള പരിശീലന ക്ലാസ് പ്രസിഡന്റ് അഡ്വ. യേശുദാസ് പറപ്പിള്ളി ഉദ്ഘാടനം ചെയ്തു. പറവൂര്‍ ബ്ലോക്ക് പഞ്ചായത്ത് വൈസ് പ്രസിഡന്റ് രമ ശിവശങ്കരന്റെ അദ്ധ്യക്ഷതയിലാണ് പരിശീലന പരിപാടി നടന്നത്.