ഈ സാമ്പത്തിക വര്‍ഷത്തിലെ രണ്ടാം പാദത്തില്‍ ജില്ലയിലെ ബാങ്കുകള്‍ 5519 കോടി രൂപ വിതരണം ചെയ്തതായി ജില്ലാതല ബാങ്കില്‍ അവലോകന യോഗത്തില്‍ റിപ്പോര്‍ട്ട് ചെയ്തു. കാര്‍ഷിക മേഖലയ്ക്ക് 2307 കോടി രൂപയും വ്യാവസായികാവശ്യത്തിന് 386 കോടി രൂപയും മറ്റു മുന്‍ഗണനാ വിഭാഗങ്ങള്‍ക്ക് 898 കോടി രൂപയും മുന്‍ഗണനാവിഭാഗത്തില്‍ പെടാത്തവര്‍ക്ക് 1928 കോടി രൂപയും വായ്പയായി വിതരണം ചെയ്തു. ഹോട്ടല്‍ മലബാര്‍ പാലസില്‍ ചേര്‍ന്ന അവലോകന യോഗം പുരുഷന്‍ കടലുണ്ടി എം.എല്‍.എ ഉദ്ഘാടനം ചെയ്തു. 

    തദ്ദേശഭരണ സ്ഥാപനങ്ങളുടെ 2017-18 വാര്‍ഷിക പദ്ധതി ഭേദഗതികള്‍ക്ക് അംഗീകാരം നല്‍കുന്നതിനായി ജില്ലാ ആസൂത്രണ സമിതി യോഗം ഡിസംബര്‍ 23 ന് ഉച്ചക്ക്  12 മണിക്ക് ജില്ലാ പഞ്ചായത്ത് കൗണ്‍സില്‍ ഹാളില്‍ ചേരും.

സര്‍ക്കാര്‍ ഏജന്‍സികളുടെ സഹായത്തോടെ കുടുംബശ്രീ മുഖേന കൂടുതല്‍ സ്ത്രീകളെ തൊഴില്‍ മുഖത്ത് എത്തിക്കുന്നതിന് തീരദേശം ഉള്‍പ്പടെയുള്ള പ്രദേശങ്ങളിലെ സ്ത്രീകള്‍ക്കായി കോഴിക്കോട്  റൂറല്‍ സെല്‍ഫ് എംപ്ലോയ് മെന്റ് ട്രെയിനിംഗ് ഇന്‍സ്റ്റിറ്റ്യൂട്ടിന്റെ സഹായത്തോടെ പ്രത്യേക അവബോധന ക്ലാസ് സംഘടിപ്പിച്ചു. 

വടകര ജില്ലാ ആശുപത്രിയിലേക്ക് ഫൈബര്‍ ഒപ്റ്റിക്ക് ബ്രോന്‍ങ്കോസ്‌ക്കോപ് വാങ്ങുന്നതിനുളള ഇ-ടെണ്ടര്‍ ക്ഷണിച്ചു. (2017_DHS_176530_1). ടെണ്ടര്‍ സമര്‍പ്പിക്കാനുള്ള അവസാന തീയ്യതി ഡിസംബര്‍ 30 ന് നാല് മണി. കൂടുതല്‍ വിവരങ്ങള്‍ക്ക് www.etendrs.kerala.gov.in
 

ചോറോട് വില്ലേജിലെ ശ്രീ.വൈക്കിലശ്ശേരി പരദേവതാ  ക്ഷേത്രം, ചേന്ദമംഗലം ക്ഷേത്രം, തിരുവളളൂര്‍ വില്ലേജിലെ ശ്രീ. തിരുവളളൂര്‍ ശിവക്ഷേത്രം, ഓര്‍ക്കാട്ടേരി വില്ലേജിലെ ശ്രീ. കാര്‍ത്തികപ്പളളി ദുര്‍ഗ്ഗാ ക്ഷേത്രം,  എന്നീ ക്ഷേത്രങ്ങളിലെ പാരമ്പര്യേതര ട്രസ്റ്റിമാരുടെ ഒഴിവിലേക്ക് നിയമിക്കപ്പെടുന്നതിന് ഹിന്ദുമത വിശ്വാസികളായ ക്ഷേത്ര പരിസരവാസികളില്‍ നിന്നും അപേക്ഷ ക്ഷണിച്ചു. പൂരിപ്പിച്ച അപേക്ഷകള്‍  ഡിസംബര്‍ 28 ന്  വൈകുന്നേരം അഞ്ച് മണിക്ക് മുമ്പായി തലശ്ശേരി അസി. കമ്മീഷണറുടെ ഓഫീസില്‍ ലഭിച്ചിരിക്കണം. അപേക്ഷാഫോറം ഓഫീസില്‍ നിന്ന് സൗജന്യമായി ലഭിക്കുമെന്ന് അസി.കമ്മീഷണര്‍ അറിയിച്ചു.

        കേരള സര്‍ക്കാര്‍ ന്യൂനപക്ഷവകുപ്പിന്റെ കീഴില്‍ കോഴിക്കോട് പുതിയറയില്‍ പ്രവര്‍ത്തിക്കുന്ന സി.സി.എം.വൈ യില്‍ ന്യൂനപക്ഷദിനാചരണയോഗം കോഴിക്കോട് സിവില്‍ സര്‍വ്വീസ് അക്കാദമി പ്രിന്‍സിപ്പല്‍ കെ. സലീം നിര്‍വ്വഹിച്ചു. പ്രിന്‍സിപ്പല്‍ പ്രൊഫ. എം അബ്ദുറഹിമാന്‍ അധ്യക്ഷത വഹിച്ചു. മദ്രസ്സാദ്ധ്യാപകക്ഷേമനിധി മാനേജര്‍ അബ്ദുല്‍ ഹമീദ്, പൂര്‍വ്വ വിദ്യാര്‍ത്ഥികളായ ഡാനിഷ്, ഫിറോസ്, വിവിധ കോഴ്‌സുകളെ പ്രതിനിധീകരിച്ചു കൊണ്ട് സനൂജ, നിഹാല കാത്തൂന്‍, ആഷിഖ് അലി, മുഹമ്മദ് ഇഫ്തിഖാര്‍ എന്നിവര്‍ സംസാരിച്ചു. കുട്ടികളുടെ ഗാനാലാപനവും അരങ്ങേറി. നസീറ വെള്ളങ്ങോട്ട് സ്വാഗതവും അബ്ദുല്‍ വാരിസ് നന്ദിയും പറഞ്ഞു.
 

        സംയോജിത ശിശു വികസന സേവന പദ്ധതിയുടെ ചെറുണ്ണൂരിലെ (ഫറോക്ക്) കോഴിക്കോട് അര്‍ബന്‍ 4 കാര്യാലയത്തിന് കരാര്‍ അടിസ്ഥാനത്തില്‍ പ്രതിമാസം 20,000 രൂപ നിരക്കില്‍ വാടകക്ക്, കാര്‍ നല്‍കുന്നതിന് താല്‍പര്യമുളളവരില്‍ നിന്ന് ക്വട്ടേഷന്‍ ക്ഷണിച്ചു. ക്വട്ടേഷന്‍ സ്വീകരിക്കുന്ന അവസാന തീയതി ഡിസംബര്‍ 26 ഉച്ചക്ക് രണ്ട് മണി. ഫോണ്‍ : 0495-2481145.