സുഭിക്ഷ കേരളം പദ്ധതിയുടെ ഭാഗമായി ജില്ലയിലെ  മൃഗസംരക്ഷണ മേഖലയുടെ സമഗ്രവികസനത്തിനായി   60.84 കോടി രൂപയുടെ പദ്ധതികള്‍ നടപ്പാക്കും. ജില്ലയിലെ 68 ഗ്രാമപഞ്ചായത്തുകളിലും 11 ബ്ലോക്ക് പഞ്ചായത്തുകളിലും  നാല് മുനിസിപ്പാലിറ്റികളിലും കൊല്ലം കോര്‍പറേഷന്‍ എന്നിവിടങ്ങളിലുമായി 596 പദ്ധതികളാണ് നടപ്പാക്കുന്നത്.
മുട്ടയുത്പാദനം, മാംസോത്പാദനം എന്നിവയില്‍ സ്വയംപര്യാപ്തത ലക്ഷ്യമിട്ട് 53 ഗ്രാമപഞ്ചായത്തുകളിലും കൊല്ലം കോര്‍പറേഷനിലുമായി മുട്ടക്കോഴി വളര്‍ത്തലിനുളള പദ്ധതി യാഥാര്‍ഥ്യമാകും.  അറുപതിനായിരം ഗുണഭോക്താക്കള്‍ക്ക് ഇതുവഴി ആനുകൂല്യം ലഭ്യമാകും.

കേരളത്തിലെ പ്രാദേശിക മാധ്യമപ്രവർത്തകർക്ക് ഇനി മുതൽ കേരള സംസ്ഥാന അസംഘടിതതൊഴിലാളി സാമൂഹ്യ സുരക്ഷാപദ്ധതിയിൽ അംഗങ്ങളാവാം. കേരളത്തിലെ പത്ര-ദൃശ്യ-ഡിജിറ്റൽ മാധ്യമരംഗത്ത് പ്രവർത്തിക്കുന്നവർ, പത്രഏജന്റുമാർ, വിതരണക്കാർ, മറ്റ് ക്ഷേമനിധികളിൽ അംഗങ്ങളല്ലാത്ത തൊഴിലാളികൾ എന്നിവർക്കാണ് കേരള അസംഘടിത തൊഴിലാളി സാമൂഹ്യസുരക്ഷാ ബോർഡ് മുഖാന്തിരം ക്ഷേമനിധിയിൽ ചേരാൻ കഴിയുക.

ലോക്ക് ഡൗൺ മൂലം തൊഴിൽ നഷ്ടപ്പെട്ട ആഭരണതൊഴിലാളി ക്ഷേമനിധി ബോർഡിലെ അംഗങ്ങൾക്കു സർക്കാർ പ്രഖ്യാപിച്ച 1000 രൂപ ധനസഹായം നാളിതുവരെ ലഭിക്കാത്തവർ www.boardswelfareassistance.ic.kerala.gov.in എന്ന വെബ്‌സൈറ്റ് മുഖേന നേരിട്ടോ അക്ഷയകേന്ദ്രം വഴിയോ അപേക്ഷിക്കണം. അപേക്ഷയോടൊപ്പം ആധാർ, ക്ഷേമനിധി ഐഡി കാർഡ്, ക്ഷേമനിധി പാസ്ബുക്ക്, ബാങ്ക് പാസ്ബുക്ക് എന്നിവ സ്‌കാൻ ചെയ്ത് അപ്‌ലോഡ് ചെയ്യണമെന്ന് ജില്ലാ എക്‌സിക്യൂട്ടീവ് ഓഫീസർ അറിയിച്ചു. ഫോൺ: 0487 2426219.
 

കാണം/വെറുമ്പാട്ടം, അവകാശഭൂമിക്ക് ജന്മം അനുവദിച്ച് ക്രയസർട്ടിഫിക്കറ്റ് നൽകുന്നതുമായി ബന്ധപ്പെട്ട് തൃശൂർ ലാൻഡ് ട്രൈബ്യൂണൽ ആൻഡ് ഡെപ്യൂട്ടി കളക്ടർ (എൽആർ) ജൂൺ 15 മുതൽ 30 വരെ കളക്ടറേറ്റിൽ നടത്തുവാൻ നിശ്ചയിച്ച എല്ലാ എസ്എം കേസുകളുടെ വിചാരണ മാറ്റി. പുതുക്കിയ തീയതി പിന്നീടറിയിക്കും. ഫോൺ: 0487 2433492, 24333489.

കൊടുങ്ങല്ലൂർ നഗരസഭയിൽ സുഭിക്ഷ കേരളം പദ്ധതിയ്ക്ക് ഒന്നേകാൽ കോടിയുടെ അംഗീകാരം നൽകിയതായി നഗരസഭ ചെയർമാൻ കെ ആർ ജൈത്രൻ. 1 കോടി 31 ലക്ഷം രൂപയുടെ വിവിധ കാർഷിക പദ്ധതികൾക്കാണ് ജില്ലാ ആസൂത്രണ സമിതി അംഗീകാരം നൽകിയത്.
തരിശ് ഭൂമിയിൽ കൃഷി ചെയ്യുന്നതിന് 11,60,000 രൂപ, പച്ചക്കറി ഗ്രോബാഗ് വിതരണത്തിന് 10 ലക്ഷം, തെങ്ങുകൃഷി വികസനത്തിന് 15,12,500,, സമഗ്ര നെൽകൃഷിക്ക് 4, 90,000, ഫലവൃക്ഷങ്ങൾ, സുഗന്ധവിളകൾ എന്നിവയുടെ നടീൽ വസ്തുക്കൾ വിതരണത്തിന് നാല് ലക്ഷം. കൂടാതെ മുഴുവൻ കിണറുകളും റീ-ചാർജ് ചെയ്യുന്നതുൾപ്പെടെ കാർഷിക മേഖലയിൽ മാത്രം 53 ലക്ഷത്തോളം രൂപയ്ക്കുള്ള പദ്ധതികൾക്കാണ് അംഗീകാരം ലഭിച്ചത്.