പാലക്കാട് ഹോമിയോ ജില്ലാ മെഡിക്കല്‍ ഓഫീസിന്റെ സദ്ഗമയ പദ്ധതിയില്‍ സ്പെഷ്യല്‍ എഡ്യൂക്കേഷന്‍ ടീച്ചര്‍ തസ്തികയില്‍ ഒഴിവ്. ബി.എഡ് സ്പെഷ്യല്‍ എഡ്യൂക്കേഷനിലാണ് യോഗ്യത. താത്പര്യമുളളവര്‍ യോഗ്യത സര്‍ട്ടിഫിക്കറ്റുകള്‍, തിരിച്ചറിയല്‍/ ആധാര്‍ കാര്‍ഡ് പകര്‍പ്പുകളുമായി ജൂണ്‍ 24 ന് രാവിലെ 10.30 ന് കല്‍പ്പാത്തി ചാത്തപ്പുരത്തുളള ഹോമിയോ ജില്ലാ മെഡക്കല്‍ ഓഫീസില്‍ നടക്കുന്ന കൂടിക്കാഴ്ചയ്ക്ക് എത്തണമെന്ന് ജില്ലാ മെഡിക്കല്‍ ഓഫീസര്‍ (ഹോമിയോ) അറിയിച്ചു. ഫോണ്‍ : 0491-2576355.

അന്താരാഷ്ട്ര യോഗാ ദിനത്തോടനുബന്ധിച്ച് ഭാരതീയ ചികിത്സാ വകുപ്പിന്റേയും നാഷണല്‍ ആയുഷ് മിഷന്റേയും സംയുക്താഭിമുഖ്യത്തില്‍ ജില്ലയിലെ വിദ്യാര്‍ത്ഥികള്‍ക്കുവേണ്ടി ഉപന്യാസ മത്സരം സംഘടിപ്പിക്കുന്നു. ഹൈസ്‌കൂള്‍ വിഭാഗത്തിന് 'യോഗ ഒരു ജീവിതചര്യ' എന്ന വിഷയത്തിലും ഹയര്‍ സെക്കണ്ടറി വിഭാഗത്തിന്    'യോഗ ഒരു ചികിത്സാ ശാസ്ത്രം' എന്ന വിഷയത്തിലുമാണ് മത്സരം സംഘടിപ്പിക്കുന്നത്. ഉപന്യാസങ്ങള്‍ idykerala2020@gmail.com  എന്ന വിലാസത്തില്‍ ജൂണ്‍ 18 ന്  വൈകീട്ട് 6 നകം അയക്കണം.

സംസ്ഥാനത്തെ ഒന്ന് മുതല്‍ 12 വരെ ക്ലാസുകളില്‍ പഠിക്കുന്ന തമിഴ് മീഡിയം വിദ്യാര്‍ഥികള്‍ക്കായി ഫസ്റ്റ് ബെല്‍ ക്ലാസുകള്‍ ആരംഭിച്ചു. മുഖ്യമന്ത്രി പിണറായി വിജയന്‍ കന്നഡ, തമിഴ് മീഡിയം ക്ലാസുകളുടെ ഉദ്ഘാടനം തിരുവനന്തപുരത്ത് നിര്‍വഹിച്ചു. ജില്ലയില്‍ ഡയറ്റിന്റെ മേല്‍നോട്ടത്തിലും എസ്.എസ്.കെ.യുടെയും ഇടുക്കി കൈറ്റിന്റെയും സഹകരണത്തോടെ 'കൈറ്റ്' പാലക്കാടാണ് പ്രവര്‍ത്തനങ്ങള്‍ നടത്തുന്നത്.

ജില്ലയില്‍ ഒന്നാം ക്ലാസ്സ് മുതല്‍ പ്ലസ്ടു വരെയുള്ള എല്ലാ വിദ്യാര്‍ഥികള്‍ക്കും ഓണ്‍ലൈന്‍ പഠന സൗകര്യമൊരുക്കിയതായി ജില്ലാ വിദ്യാഭ്യാസ ഉപഡയറക്ടര്‍ അറിയിച്ചു. ജില്ലാ വിദ്യാഭ്യാസ വകുപ്പിന്റെയും സമഗ്ര ശിക്ഷാ കേരളയുടെയും ആഭിമുഖ്യത്തില്‍ നടത്തിയ സര്‍വ്വെ പ്രകാരം 3,32,394 വിദ്യാര്‍ഥികളില്‍ (പ്ലസ് വണ്‍ ഒഴികെ)11,167 വിദ്യാര്‍ഥികള്‍ക്ക്  ഓണ്‍ലൈന്‍ പഠനസൗകര്യം ലഭ്യമായിരുന്നില്ല. ഇതുവരെയുള്ള കണക്കുകള്‍ പ്രകാരം ഓണ്‍ലൈന്‍ പഠന സൗകര്യം ലഭ്യമല്ലാത്ത വിദ്യാര്‍ഥികള്‍ക്കായി 713 പൊതുകേന്ദ്രങ്ങളില്‍ ഓരോ ടെലിവിഷന്‍ വീതം സ്ഥാപിച്ചിട്ടുണ്ട്.

മോസ്‌കോ, ഈജിപ്റ്റ്, അബുദാബി, കുവൈറ്റ്, ഷാര്‍ജ, ദുബായ് എന്നിവിടങ്ങളില്‍ നിന്നും നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ ഇന്നലെ (ജൂണ്‍ 16) ജില്ലയിലെത്തിയത് പാലക്കാട് 98 പാലക്കാട് സ്വദേശികള്‍. ഇവരില്‍ 15 പേര്‍ ഇന്‍സ്റ്റിറ്റിയൂഷനല്‍ ക്വാറന്റൈനില്‍ പ്രവേശിച്ചു. 83 പേര്‍ വീടുകളില്‍ നിരീക്ഷണത്തിലാണ്.

മോസ്‌കോയില്‍ നിന്നും എത്തിയ 5 പേരില്‍ ഒരാള്‍ ഇന്‍സ്റ്റിറ്റിയൂഷനല്‍ ക്വാറന്റൈനില്‍ പ്രവേശിച്ചു. നാല് വീട്ടില്‍ നിരീക്ഷണത്തിലാണ്.

ഈജിപ്തില്‍ നിന്നുമെത്തിയ 20 പേര്‍ വീടുകളില്‍ നിരീക്ഷണത്തിലാണ്.

       കോവിഡ് പ്രതിരോധത്തിന്റെ ഭാഗമായി  240 പേര്‍ കൂടി നിരീക്ഷണത്തിലായതോടെ ജില്ലയില്‍ നിരീക്ഷണത്തില്‍ കഴിയുന്നത് ആകെ 3620 പേര്‍. ഇതില്‍ 29 പേര്‍ ജില്ലാ ആശുപത്രിയിലും 1524 പേര്‍ വിവിധ കോവിഡ് കെയര്‍ സെന്ററുകളിലുമാണുളളത്. അതേസമയം ബുധനാഴ്ച 41 പേര്‍ കൂടി നിരീക്ഷണകാലം പൂര്‍ത്തിയാക്കി.

സര്‍ക്കാര്‍ കൈറ്റ് വിക്‌റ്റേഴ്‌സ് ചാനലിലൂടെ നല്‍കുന്ന ഓണ്‍ലൈന്‍ ക്ലാസുകള്‍ മണ്ഡലത്തിലെ മുഴുവന്‍ വിദ്യാര്‍ത്ഥികള്‍ക്കും ലഭ്യമാക്കുക എന്ന ലക്ഷ്യത്തോടെ ആരംഭിച്ച ഇപാഠശാല പദ്ധതിക്കായി കണ്ടെത്തിയ 267 പൊതു പഠന കേന്ദ്രങ്ങളിലും ജനപ്രതിനിധികളുടെയും ഉദ്യോഗസ്ഥരുടെയും നേതൃത്വത്തില്‍ സാമൂഹ്യ സന്ദര്‍ശനം നടത്തുമെന്ന് സി.കെ ശശീന്ദ്രന്‍ എം.എല്‍.എ അറിയിച്ചു.  ത്രിതല പഞ്ചായത്ത് പ്രസിഡണ്ടുമാര്‍, മെമ്പര്‍മാര്‍, പൊതുപ്രവര്‍ത്തകര്‍, ഉദ്യോഗസ്ഥര്‍ എന്നിവര്‍ സാമൂഹ്യ സന്ദര്‍ശനത്തില്‍ പങ്കാളികളാകും.