വിദേശരാജ്യങ്ങളില്‍ നിന്നും ഇതര സംസ്ഥാനങ്ങളില്‍ നിന്നും എത്തിയവരില്‍ പുതുതായി കോവിഡ് പോസിറ്റീവ് കേസുകള്‍ റിപ്പോര്‍ട്ട് ചെയ്തതിന്റെ അടിസ്ഥാനത്തില്‍ ജില്ലയിലെ മൂന്നു തദ്ദേശ സ്ഥാപനങ്ങളിലെ ഓരോ വാര്‍ഡുകള്‍ കൂടി കണ്ടെയിന്‍മെന്റ് സോണായി പ്രഖ്യാപിച്ച് ജില്ലാ കലക്ടര്‍ ഉത്തരവായി. കടന്നപ്പള്ളി പാണപ്പുഴ- 10, കാങ്കോല്‍ ആലപ്പടമ്പ- 6, മട്ടന്നൂര്‍- 7 എന്നീ വാര്‍ഡുകളാണിവ.

കാലവര്‍ഷം ആരംഭിച്ചതോടെ ജില്ലയിലെ ചില പഞ്ചായത്തുകളില്‍ ഡെങ്കിപ്പനി കൂടുതലായി റിപ്പോര്‍ട്ട് ചെയ്ത സാഹചര്യത്തില്‍ പൊതുജനങ്ങള്‍ ജാഗ്രത പാലിക്കണമെന്നും രോഗപ്പകര്‍ച്ച തടയാനുളള പ്രതിരോധ നടപടികള്‍ കൈക്കൊള്ളണമെന്നും ജില്ലാ മെഡിക്കല്‍ ഓഫീസര്‍ ഡോ. കെ നാരായണ നായ്ക് അറിയിച്ചു.

ജില്ലയില്‍ ഏഴു പേര്‍ക്ക് ഇന്നലെ (ജൂണ്‍ 16) കോവിഡ് ബാധ സ്ഥിരീകരിച്ചതായി ജില്ലാ കലക്ടര്‍ ടി വി സുഭാഷ് അറിയിച്ചു. വിദേശത്തു നിന്നെത്തിയ അഞ്ചുപേര്‍ക്കും ഡല്‍ഹിയില്‍  നിന്നെത്തിയ ഒരാള്‍ക്കുമാണ് പുതുതായി വൈറസ് ബാധ സ്ഥിരീകരിച്ചത്. ഒരാള്‍ക്ക് സമ്പര്‍ക്കം മൂലമാണ് രോഗബാധ.

അസി.ഇന്‍ഷൂറന്‍സ് മെഡിക്കല്‍ ഓഫീസര്‍; ഇന്റര്‍വ്യൂ 30 ന്
ജില്ലയിലെ ഇ എസ് ഐ ആശുപത്രി/ഡിസ്‌പെന്‍സറിയിലേക്ക് അസിസ്റ്റന്റ് ഇന്‍ഷൂറന്‍സ് മെഡിക്കല്‍ ഓഫീസര്‍ തസ്തികയിലേക്ക് താല്‍ക്കാലിക നിയമനം നടത്തുന്നു.    താല്‍പര്യമുള്ള ഡോക്ടര്‍മാര്‍ ജനന തീയതി, വിദ്യാഭ്യാസ യോഗ്യത, ടി സി എം സി രജിസ്‌ട്രേഷന്‍, പ്രവൃത്തി പരിചയ സര്‍ട്ടിഫിക്കറ്റ്, സമുദായ സര്‍ട്ടിഫിക്കറ്റ് എന്നിവയുടെ അസ്സലും പകര്‍പ്പും സഹിതം ജൂണ്‍ 30 ന് രാവിലെ 11 മുതല്‍ ഒരു മണി വരെ തോട്ടട ഇ എസ് ഐ ആശുപത്രിയില്‍ നടക്കുന്ന കൂടിക്കാഴ്ചക്ക് ഹാജരാകണം.  ഫോണ്‍: 0495 2322339.

ക്വാറന്റൈനില്‍ കഴിയുന്നവര്‍ക്ക് പ്രതിരോധ മരുന്നുമായി ആയുര്‍വേദ വിഭാഗത്തിന്റെ അമൃതം പദ്ധതി. തദ്ദേശ സ്വയംഭരണ വകുപ്പുമായി യോജിച്ചാണ് പദ്ധതി നടപ്പാക്കുന്നത്. ആയുര്‍വേദ ആശുപത്രികള്‍, ഡിസ്‌പെന്‍സറികള്‍, ആയുര്‍വേദ കോളേജുകള്‍ എന്നിവ കേന്ദ്രീകരിച്ച് മരുന്നുകള്‍ ക്വാറന്റൈനില്‍ ഉള്ളവരുടെ വീടുകളില്‍ എത്തിച്ച് നല്‍കും. തദ്ദേശ സ്വയംഭരണ സ്ഥാപന തലത്തില്‍ രൂപീകരിച്ച ടാസ്‌ക് ഫോഴ്‌സുകള്‍ക്കാണ് ഇതിന്റെ ഏകോപന ചുമതല. ജനപ്രതിനിധികള്‍, എച്ച്എംസി അംഗം, കുടുംബശ്രീ- ആശ- അങ്കണവാടി പ്രതിനിധികള്‍ പ്രദേശത്തെ ആയുര്‍വ്വേദ ഡോക്ടര്‍മാര്‍, വിദ്യാര്‍ഥികള്‍ എന്നിവരടങ്ങിയതാണ് ടാസ്‌ക് ഫോഴ്‌സുകള്‍.

കോവിഡ് 19 വ്യാപനം തടയുന്നതിനുള്ള പ്രവര്‍ത്തനങ്ങളുടെ ഭാഗമായി വാണിജ്യ- വാണിജ്യേതര സ്ഥാപനങ്ങള്‍ ആരോഗ്യ മാര്‍ഗ്ഗനിര്‍ദേശങ്ങള്‍ പാലിപിമെന്ന് ജില്ലാ മെഡിക്കല്‍ ഓഫീസര്‍ വ്യക്തമാക്കി.

ജില്ലയുടെ വിവിധ ഭാഗങ്ങളില്‍ ഡെങ്കിപ്പനി റിപ്പോര്‍ട്ട് ചെയ്യപ്പെട്ട സാഹചര്യത്തില്‍ തദ്ദേശ സ്ഥാപനങ്ങളില്‍ പ്രതിരോധ പ്രവര്‍ത്തനങ്ങള്‍ ഊര്‍ജ്ജിതമാക്കാന്‍ ജില്ലാ കലക്ടറുടെ അധ്യക്ഷതയില്‍ ചേര്‍ന്ന യോഗം ബന്ധപ്പെട്ടവര്‍ക്ക് നിര്‍ദ്ദേശം നല്‍കി. കൊതുകുകള്‍ പെരുകുന്നത് തടയുന്നതിന് ഉറവിട നശീകരണം നടത്തണം. ഇതിന്റെ തുടക്കമെന്ന നിലയില്‍ ജൂണ്‍ 19ന് സിവില്‍ സ്റ്റേഷനും പരിസരവും അതാത് ഓഫീസ് മേലധികാരികളുടെ നേതൃത്വത്തില്‍ ജീവനക്കാര്‍ ചേര്‍ന്ന് വൃത്തിയാക്കാനും യോഗത്തില്‍ തീരുമാനമായി.

ജില്ലയില്‍ 10 പേര്‍ക്ക് ഇന്നലെ (ജൂണ്‍ 15) കോവിഡ് ബാധ സ്ഥിരീകരിച്ചതായി ജില്ലാ കലക്ടര്‍ അറിയിച്ചു. ഇവരില്‍ നാലുപേര്‍ വിദേശരാജ്യങ്ങളില്‍ നിന്നും ആറ് പേര്‍ മുംബൈയില്‍ നിന്നും എത്തിയവരാണ്.

വിചാരണ മാറ്റി
ജൂണ്‍ 16, 24 തീയതികളില്‍ കലക്ടറേറ്റില്‍ വിചാരണക്ക് വെച്ച കണ്ണൂര്‍ താലൂക്കിലെ ദേവസ്വം പട്ടയകേസുകളുടെ വിചാരണ യഥാക്രമം ആഗസ്ത് 19, 26 തീയതികളില്‍ രാവിലെ 11 മണിക്ക് നടക്കുമെന്ന് എല്‍ ആര്‍ ഡെപ്യൂട്ടി കലക്ടര്‍ അറിയിച്ചു.

സമയപരിധി നീട്ടി
കേരള ഓട്ടോമൊബൈല്‍ വര്‍ക്ക്‌ഷോപ്പ് തൊഴിലാളില ക്ഷേമനിധി പദ്ധതിയില്‍ അംഗങ്ങളായ അംശദായം അടക്കുവാന്‍ വീഴ്ച വരുത്തിയ അംഗങ്ങളുടെ കുടിശ്ശിക പിഴപലിശയും ചേര്‍ത്ത് അടച്ച് അംഗത്വം പുനസ്ഥാപിക്കുന്നതിനുള്ള സമയം സപ്തംബര്‍ 30 വരെ നീട്ടിയതായി ജില്ലാ എക്‌സിക്യുട്ടീവ് ഓഫീസര്‍ അറിയിച്ചു.  ഫോണ്‍: 0497 2705197.

ഓണ്‍ലൈന്‍ പഠന സൗകര്യം ഇല്ലാത്ത കണ്ണൂര്‍ മണ്ഡലത്തിലെ വിദ്യാര്‍ഥികള്‍ക്ക് മന്ത്രി രാമചന്ദ്രന്‍ കടന്നപ്പള്ളി ടി.വി ചാലഞ്ചിലൂടെ ശേഖരിച്ച 64 ടെലിവിഷന്‍ സെററുകള്‍ വിതരണം ചെയ്തു. കണ്ണൂര്‍ മണ്ഡലത്തിലെ ഓണ്‍ലൈന്‍ പഠന സൗകര്യമില്ലാത്ത 64 പേര്‍ക്കാണ് പഠനവീട് ഒരുക്കുവാന്‍ ടെലിവിഷന്‍ സെറ്റുകള്‍ വിതരണം ചെയ്തത്. സ്‌കൂള്‍ അധികൃതര്‍ നല്‍കിയ റിപ്പോര്‍ട്ട്  പ്രകാരമാണ് അര്‍ഹരെ കണ്ടെത്തിയത്.  കോവിഡ് പശ്ചാത്തലത്തില്‍ ആരുടെയും പഠനം തടസ്സപ്പെടുകയില്ലെന്ന് ചടങ്ങ് ഉദ്ഘാടനം ചെയ്തുകൊണ്ട് മന്ത്രി പറഞ്ഞു. ഇനി പഠനത്തിന്റെ കാലമാണ്.