പരീക്ഷ നടക്കുന്ന സമയമായതിനാൽ ജില്ലയിലെ സ്‌കൂളുകളിലും കോളജുകളിലും പരീക്ഷാർഥികൾക്ക് കൈകൾ കഴുകി അണുവിമുക്തമാക്കുന്നതിനുള്ള സൗകര്യം ഏർപ്പെടുത്താൻ ബന്ധപ്പെട്ടവർക്ക് ജില്ലാ കളക്ടർ നിർദേശം നൽകി. കോവിഡ് 19 രോഗലക്ഷണങ്ങൾ പ്രകടിപ്പിക്കുന്ന വിദ്യാർഥികൾക്ക് പ്രാഥമിക ആരോഗ്യ കേന്ദ്രങ്ങൾ മുഖേന പരിശോധന നടത്തുന്നതിനും അവർക്ക് പരീക്ഷ എഴുതാൻ പ്രത്യേക ഹാൾ സജ്ജീകരിക്കുന്നതിനും നടപടി സ്വീകരിക്കണം. പരീക്ഷാർഥികൾക്ക് ഒരു തരത്തിലുള്ള ബുദ്ധിമുട്ടും ഉണ്ടാവാതെ പ്രത്യേകം സൂക്ഷിക്കണമെന്നും നിർദേശിച്ചു.

ടച്ച് സ്‌ക്രീനുകളുടെ ഉപയോഗം കോവിഡ് 19 രോഗവ്യാപനത്തിന് കാരണമാവാനിടയുള്ളതിനാൽ എ.ടി.എമ്മുകളിൽ പ്രവേശിക്കുന്നതിന് മുമ്പും ശേഷവും ഉപഭോക്താക്കളുടെ കൈകൾ വൃത്തിയാക്കി അണുവിമുക്തമാക്കുന്നതിനും ഉപയോഗശേഷം എ.ടി.എമ്മുകൾ അണുവിമുക്തമാക്കുന്നതിനും വേണ്ട സജ്ജീകരണം എല്ലാ എ.ടി.എമ്മുകളിലും ഏർപ്പെടുത്താൻ ജില്ലാ ലീഡ് ബാങ്ക് മാനേജർക്ക് ജില്ലാ കളക്ടർ നിർദേശം നൽകി.
 

തിരുവില്വാമല പഞ്ചായത്തിൽ കോവിഡ് 19 വൈറസിന്റെ വ്യാപനം തടയുന്നതിനും മുൻകരുതൽ എടുക്കുന്നതിന്റെയും ഭാഗമായി കോർ കമ്മിറ്റി രൂപീകരിച്ചു. യു ആർ പ്രദീപ് എംഎൽഎ ആറുപേർ അടങ്ങിയ കോർ കമ്മിറ്റിയിൽ പഞ്ചായത്ത് പ്രസിഡന്റ് എം ആർ മണി, മെഡിക്കൽ ഓഫീസർ നിഷ ശശികുമാർ, പഴയന്നൂർ പോലീസ് പി ആർ ഒ നസീർ, ജൂനിയർ ഹെൽത്ത് ഇൻസ്‌പെക്ടർ അനുഫയാസ്, തിരുവില്വാമല പഞ്ചായത്ത് സെക്രട്ടറി ആൽഫ്രഡ് സോജൻ എന്നിവരാണ് അംഗങ്ങൾ.
കോർകമ്മിറ്റിയിൽ നിർദ്ദേശിച്ച കാര്യങ്ങൾ:
ഐസൊലേഷനിൽ സഹകരിക്കാത്തവരുടെ വിവരങ്ങൾ പൊലീസിന് കൈമാറുക.

ബസുകളിലെ ഹാൻഡിൽ ബാറുകൾ, സീറ്റുകൾ എന്നിവയിലെ സ്പർശം നിമിത്തം കോവിഡ് 19 രോഗവ്യാപനത്തിന് സാധ്യതയുള്ളതിനാൽ പ്രതിരോധ നടപടികളുടെ ഭാഗമായി ബസ് ജീവനക്കാരുടെയും യാത്രക്കാരുടെയും കൈകൾ വൃത്തിയാക്കി അണുവിമുക്തമാക്കുന്നതിന് ബസുകളിൽ സാനിറ്റൈസർ ലഭ്യമാക്കുന്നതിന് നടപടി സ്വീകരിക്കണമെന്ന് ജില്ലാ ബസ് ഓപറേറ്റഴ്സ് അസോസിയേഷൻ ഭാരവാഹികൾക്ക് ജില്ലാ കളക്ടർ നിർദേശം നൽകി.

കോവിഡ് 19 രോഗബാധയുടെ പശ്ചാത്തലത്തിൽ തൃശൂർ റെയിൽവേ സ്റ്റേഷനിലും കോവിഡ് 19 വൈറസ് പ്രതിരോധ പ്രവർത്തനങ്ങൾ ഊർജിതമാക്കി. തെർമൽ ഡിറ്റക്റ്റർ ഉപയോഗിച്ച് താപനില അളന്നാണ് യാത്രക്കാരെ അയക്കുന്നത്. വൈറസ് പടരുന്നത് തടയാൻ ജില്ലാ ഭരണകൂടവും ആരോഗ്യവകുപ്പും ഒന്നിച്ചാണ് പ്രതിരോധ പ്രവർത്തനങ്ങൾക്ക് നേതൃത്വം നൽകുന്നത്. റെയിൽവെ സ്റ്റേഷൻ കേന്ദ്രീകരിച്ചുള്ള പരിശോധനയുടെ ഭാഗമായി ട്രെയിനിൽ കയറി യാത്രക്കാർക്ക് ബോധവത്കരണം നൽകുന്നുണ്ട്. അതിനായി പ്രത്യേക സംഘത്തെ ആരോഗ്യ വകുപ്പ് നിയോഗിച്ചു.

കോവിഡ് 19 രോഗപ്രതിരോധ പ്രവർത്തനങ്ങളുടെ ഭാഗമായി അതത് തദ്ദേശസ്വയംഭരണസ്ഥാപനങ്ങളിൽ വാർഡ് തലത്തിൽ സാനിറ്ററി / ശുചിത്വ ബോധവൽക്കരണത്തിനായി പ്രത്യേക കമ്മിറ്റി രൂപീകരിക്കാൻ ജില്ലാ കളക്ടർ എസ് ഷാനവാസ് നിർദ്ദേശിച്ചു. കോവിഡ് 19 രോഗത്തെ സംബന്ധിച്ചും രോഗപ്രതിരോധ പ്രവർത്തനങ്ങളെ സംബന്ധിച്ചും രോഗലക്ഷണമുളളവർ പാലിക്കേണ്ട കാര്യങ്ങളെ സംബന്ധിച്ചും അനാവശ്യ ഭീതികൾ ഒഴിവാക്കേണ്ടതിലേക്കായും പൊതുജനങ്ങളെ ബോധവൽക്കരിക്കുന്നതിനു വേണ്ട ലഘുലേഖകൾ വിതരണം ചെയ്യണം.

ആലപ്പുഴ: 'ബ്രേക്ക് ദ ചെയിന്‍' ക്യാമ്പയിന്റെ ഭാഗമായി ജില്ല അതിര്‍ത്തിയായ അരൂരില്‍ വാഹനയാത്രക്കാര്‍ക്ക് ബോധവത്ക്കരണം നല്‍കി. അരൂര്‍ കുടുംബാരോഗ്യ കേന്ദ്രവും പോലീസും സംയുക്തമായാണ് വാഹനങ്ങളില്‍ സഞ്ചരിക്കുന്നവരെ പരിശോധിച്ച് ആവശ്യമായ ബോധവത്ക്കരണം നല്‍കിയത്. യാത്രക്കാരുടെ ശരീര ഊഷ്മാവ് രേഖപ്പെടുത്തുകയും കോവിഡ് 19ന്റെ വ്യാപനത്തിനെതിരെ പാലിക്കേണ്ട മുന്‍കരുതലുകള്‍, വ്യക്തിശുചിത്വം എന്നിവ സംബന്ധിച്ച് ബോധവത്ക്കരണം നല്‍കുകയും ചെയ്തു. കൃത്യമായി കൈകള്‍ വൃത്തിയാക്കുന്ന രീതി, സാനിറ്റൈസര്‍ ഉപയോഗിക്കുന്ന വിധം എന്നിവയെക്കുറിച്ചുള്ള വിവരങ്ങളും ആരോഗ്യ പ്രവര്‍ത്തകര്‍ പങ്കുവെച്ചു.