കോവിഡ് 19 വ്യാപനവുമായി ബന്ധപ്പെട്ട് ജില്ലയില്‍ നിലവില്‍ 368 പേര്‍ നിരീക്ഷണത്തില്‍. ഇതില്‍ 362 പേര്‍ വീടുകളിലും ആറു പേര്‍ ആശുപത്രികളും നിരീക്ഷണത്തിലാണ്.  അഞ്ചുപേര്‍ കാഞ്ഞങ്ങാട് ജില്ലാ ആശുപത്രിയിലും  ഒരാള്‍ കാസര്‍കോട് ജനറല്‍ ആശുപത്രിയിലുമാണ് നിരീക്ഷണത്തിലുള്ളത്.  ഇന്ന് ( മാര്‍ച്ച് 17) ആകെ 24 പേരുടെ സാമ്പിള്‍ ആണ് പരിശോധനക്കയച്ചിട്ടുള്ളത്. രോഗി ചികിത്സ തേടിയ സ്വകാര്യ ആശുപത്രിയിലെ  സ്ഥിതിഗതികള്‍ യോഗം വിലയിരുത്തി. രോഗിയുമായി അടുത്തിടപഴകിയവരെ സിസിടിവി യുടെ സഹായത്തോടെ കണ്ടെത്തിയിട്ടുണ്ട്.

ഫിഷറീസ്, സിവില്‍ സപ്ലൈസ്, മത്സ്യഫെഡ് വകുപ്പുകള്‍ ചേര്‍ന്ന്  സംയുക്തമായി ഏപ്രില്‍ 19 ന് ജില്ലയിലെ 13 സെന്ററുകളില്‍ എഞ്ചിനുകളുടെയും യാനങ്ങളുടെയും സംയുക്ത പരിശോധന നടത്തും. ഇതിനുള്ള അപേക്ഷ ആവശ്യമായ രേഖകളുടെ പകര്‍പ്പുകള്‍ സഹിതം മാര്‍ച്ച് 25 നകം മത്സ്യഭവന്‍ ഓഫീസുകളില്‍ സമര്‍പ്പിക്കണം. നിലവില്‍ അപേക്ഷ സമര്‍പ്പിച്ചവര്‍  ഫിഷറീസ് ഡെപ്യൂട്ടി ഡയരക്ടര്‍ ഓഫീസില്‍ നിന്നും ലൈസന്‍സ് ലഭ്യമാക്കി അതിന്റെ പകര്‍പ്പ് മത്സ്യഭവന്‍ ഓഫീസുകളില്‍ മാര്‍ച്ച് 25 നകം നല്‍കണം.

എംപ്‌ളോയ്‌മെന്റ് എക്‌സ്‌ചേഞ്ച് മുഖേന ഭിന്നശേഷിക്കാരായ ഉദേ്യാഗാര്‍ത്ഥികള്‍ക്കായി നടപ്പിലാക്കി വരുന്ന കൈവല്യ സ്വയം തൊഴില്‍ പുനരധിവാസ പദ്ധതിയുടെ ജില്ലയിലെ ഉദേ്യാഗാര്‍ത്ഥികളുടെ അപേക്ഷ പരിഗണിക്കുന്നതിനായി  മാര്‍ച്ച് 18, 19 തീയതികളില്‍ നടത്താനിരുന്ന ജില്ലാതല സമിതിയുടെ കൂടിക്കാഴ്ച മാറ്റി വെച്ചു.   പുതുക്കിയ തീയ്യതി പിന്നീട് അറിയിക്കുമെന്ന് ജില്ലാ എംപ്‌ളോയ്‌മെന്റ് ഓഫീസര്‍ അറിയിച്ചു

തേനീച്ച കര്‍ഷകരുടെ പ്രശ്‌നങ്ങള്‍ പഠിക്കുന്നതിന് ഹോര്‍ട്ടികോപ്പിന്റെ നേൃത്വത്തില്‍ വിവരശേഖരണം നടത്തും. വിവരശേഖരണത്തിന് ആവശ്യമായ ഫോറം കൃഷിഭവനുകള്‍, ഹോര്‍ട്ടികോര്‍പ്പിന്റെ ജില്ലാ സംഭരണ വിതരണകേന്ദ്രങ്ങള്‍, ബീ ബ്രീഡിങ് യൂണിറ്റുകള്‍ എന്നിവിടങ്ങളില്‍ നിന്ന് ലഭിക്കും. കൃഷി ഓഫീസര്‍ സാക്ഷ്യപ്പെടുത്തിയ ഫോം ഏപ്രില്‍ 30 നകം റീജിയണല്‍ മാനേജര്‍ ഹോര്‍ട്ടികോര്‍പ്പ്, തേനീച്ച വളര്‍ത്തല്‍  കേന്ദ്രം, കല്ലിന്മേല്‍ പി.ഒ, മാവേലിക്കര-690509 എന്ന വിലാസത്തില്‍ അയക്കണം. ഫോണ്‍ 0479 2356695.

വിവിധ മേഖലകളില്‍  കുടുംബശ്രീയിലൂടെ വേറിട്ട പ്രവൃത്തികള്‍  നടത്തി ശ്രദ്ധേയമാവുകയാണ്  പള്ളിക്കരയിലെ വീട്ടമ്മമാര്‍. അമൃതം പൊടി- റാഗി ബിസ്‌ക്കറ്റ്, നാപ്കിന്‍, ജേഴ്സി, കശുവണ്ടി മിഠായി, തുണി സഞ്ചി, പച്ചക്കറി കൃഷി, നെല്‍കൃഷി, ബേക്കറി ഉത്പന്ന തുടങ്ങിയവയുടെ നിര്‍മ്മാണത്തിലൂടെയും  ഹരിത കര്‍മ്മ സേനയിലൂടെ മാലിന്യ നിര്‍മ്മാര്‍ജ്ജന രംഗത്തും വേറിട്ട പ്രവര്‍ത്തനത്തിലൂടെയുമൊക്കെ   വികസനത്തിലേക്ക് അതിവേഗം കുതിക്കുകയാണ് ഇവിടുത്തെ സ്ത്രീകള്‍. ജീവിതം കരുപ്പിടിപ്പിക്കാന്‍ ഓരോ മേഖലകളും വെട്ടിപ്പിടിക്കുന്ന വനിതാ രത്നങ്ങളെ പരിചയപ്പെടാം.

* കൂടുതൽ പരിശോധനാസൗകര്യം ഏർപ്പെടുത്തും
സംസ്ഥാനത്ത് കോവിഡ്-19 രോഗം പുതുതായി ആർക്കും സ്ഥിരീകരിച്ചിട്ടില്ലെന്ന് മുഖ്യമന്ത്രി പിണറായി വിജയൻ അറിയിച്ചു. സംസ്ഥാനത്ത് ഇപ്പോൾ 18,011 പേരാണ് രോഗവുമായി ബന്ധപ്പെട്ട് നിരീക്ഷണത്തിലുള്ളത്. 17,743 പേർ വീടുകളിലും 268 പേർ ആശുപത്രിയിലുമാണ് നിരീക്ഷണത്തിലുള്ളത്. ഇന്ന് 65 പേരെ പുതുതായി ആശുപത്രിയിൽ പ്രവേശിപ്പിച്ചു. 4,353 പേരെ രോഗമില്ലെന്ന് കണ്ട് നിരീക്ഷണത്തിൽനിന്ന് ഒഴിവാക്കി. 2,467 സാമ്പിളുകൾ പരിശോധനയ്ക്ക് അയച്ചതിൽ 1,807 ഫലം നെഗറ്റീവാണ്.

കോവിഡ്-19 സാമ്പത്തിക മേഖലയിലുണ്ടാക്കിയ കടുത്ത ആഘാതം കണക്കിലെടുത്ത് ബാങ്ക് വായ്പ എടുത്തവർക്ക് പരമാവധി സഹായവും ഇളവുകളും നൽകുമെന്ന് മുഖ്യമന്ത്രി വിളിച്ച യോഗത്തിൽ സംസ്ഥാനതല ബാങ്കേഴ്സ് സമിതി (എസ്.എൽ.ബി.സി) പ്രതിനിധികൾ ഉറപ്പു നൽകി.
വായ്പയെടുത്ത സ്ഥാപനങ്ങൾക്കും വ്യക്തികൾക്കും തിരിച്ചടവിനുള്ള കാലാവധി ദീർഘിപ്പിക്കുക, റിസർവ് ബാങ്കിന്റെ നിർദേശം അനുസരിച്ച് വായ്പകൾ പുനഃക്രമീകരിക്കുക, പലിശയിൽ അനുഭാവപൂർവമായ ഇളവുകൾ നൽകുക, പുതിയ വായ്പകൾക്ക് കൂടുതൽ ഇളവുകൾ അനുവദിക്കുക തുടങ്ങിയ നിർദേശങ്ങളാണ് ബാങ്ക് പ്രതിനിധികളുടെ യോഗത്തിൽ മുഖ്യമന്ത്രി മുന്നോട്ടുവെച്ചത്.

കോവിഡ്-19 വ്യാപനം തടയുന്നതിന് സംസ്ഥാന സർക്കാർ നടത്തുന്ന പ്രവർത്തനങ്ങളെ സഹായിക്കാനും ഉപദേശം നൽകാനും വിദഗ്ധ സമിതി രൂപീകരിക്കുമെന്ന് മുഖ്യമന്ത്രി പിണറായി വിജയൻ പറഞ്ഞു. കോവിഡ്19 പ്രതിരോധം സംബന്ധിച്ച് ഡോക്ടർമാരുമായും ശാസ്ത്രജ്ഞൻമാരുമായും ആശയവിനിയമം നടത്തുകയായിരുന്നു മുഖ്യമന്ത്രി.
പൊതുജനങ്ങൾക്കും ആരോഗ്യപ്രവർത്തകർക്കും വിവരങ്ങൾ കൈമാറാനും അവരെ ബോധവൽക്കരിക്കുന്നതിനും ഇൻററാക്ടീവ് വെബ് പോർട്ടൽ തുടങ്ങുമെന്ന് മുഖ്യമന്ത്രി അറിയിച്ചു.

ഗുലാത്തി ഇൻസ്റ്റിറ്റ്യൂട്ട് ഓഫ് ഫിനാൻസ് ആൻഡ് ടാക്‌സേഷനിൽ ജൂനിയർ അക്കൗണ്ടന്റ് തസ്തികയിൽ കരാർ നിയമനത്തിന് അപേക്ഷ ക്ഷണിച്ചു.  പ്രതിമാസ വേതനം 20,500 രൂപ.  ഏപ്രിൽ പത്ത് വരെ അപേക്ഷിക്കാം.  വിശദവിവരങ്ങൾക്ക്: www.gift.res.in.      ഫോൺ: 0471-2595960, 8078886555.
പി.എൻ.എക്സ്.1098/2020