കേരള ജല അതോറിറ്റി, വാട്ടർ വർക്സ് സബ് ഡിവിഷൻ എന്നിവിടങ്ങളിലേക്ക് തൃശൂർ ഓഫീസിൽ എംപ്ലോയ്മെന്റ് എക്സ്ചേഞ്ച് മുഖേന നടത്താനിരുന്ന അഭിമുഖം മാറ്റിവെച്ചു. സംസ്ഥാനത്ത് കോവിഡ് 19 വൈറസ് ഭീതിയുടെ സാഹചര്യത്തിലാണ് തീരുമാനം. വാച്ച്മാൻ തസ്തികയിലേക്ക് മാർച്ച് 23, 24, 25 തീയതികളിൽ നടത്താനിരുന്ന അഭിമുഖം ഏപ്രിൽ 20, 21, 22 എതീയതികളിലേക്കാണ് മാറ്റി വെച്ചതെന്ന് അസിസ്റ്റന്റ് എക്സിക്യൂട്ടീവ് എൻജിനീയർ അറിയിച്ചു.

കയ്പമംഗലം ജനമൈത്രി പോലീസിന്റെ നേതൃത്വത്തിൽ സ്ഥാപനങ്ങളും പൊതുസ്ഥലങ്ങളും കേന്ദ്രീകരിച്ച് ബോധവത്കരണ പരിപാടിയും നോട്ടീസ് വിതരണവും നടത്തി. കോവിഡ് 19 പടരുന്ന സാഹചര്യത്തിൽ പെരിഞ്ഞനം സി എച്ച് സിയുടെ സഹകരണത്തോടെ പെരിഞ്ഞനം, മൂന്നുപീടിക, ചെന്ത്രാപ്പിന്നി, എടത്തിരുത്തി എന്നിവിടങ്ങളിലായാണ് ബോധവത്കരണം നടത്തിയത്. ജനങ്ങളിലെ ഭീതി അകറ്റുന്നതിനും മുൻകരുതൽ എടുക്കുന്നതിനുമുള്ള നിർദ്ദേശങ്ങൾ അടങ്ങിയ ലഘുലേഖകളാണ് വിതരണം ചെയ്തത്. ബോധവത്കരണ പരിപാടിയിൽ വ്യാപാരികൾ, ഓട്ടോ ഡ്രൈവേഴ്സ്, പോർട്ടർമാർ, അധ്യാപകർ തുടങ്ങി നാട്ടിലെ വിവിധ മേഖലയിലുള്ളവർ പങ്കെടുത്തു.

എരുമപ്പെട്ടി പഞ്ചായത്തിൽ കോവിഡ് 19 തടയുന്നതുമായി ബന്ധപ്പെട്ട് വാർഡ് തല ബോധവൽക്കരണം നടത്തി. വാർഡ് തലത്തിൽ ബോധവത്കരണം നടത്തിയതിൽ വാർഡ് മെമ്പർമാരും ആശാവർക്കർമാരും പഞ്ചായത്ത് പ്രതിനിധികളും പങ്കെടുത്തു. ഹെൽത്ത് ഇൻസ്‌പെക്ടർ സുധി കോവിഡ് 19 തടയുന്നതിനെക്കുറിച്ചും മുൻകരുതലുകൾ നടപടികളെക്കുറിച്ചും സംസാരിച്ചു.
 

തൃശൂരിലെ തീരദേശ കേന്ദ്രങ്ങളിൽ മാർച്ച് 15ന് നടത്താനിരുന്ന ഒ.ബി.എം എഞ്ചിനുകളുടെ പരിശോധന മാറ്റിവെച്ചു. സിവിൽ സപ്ലൈസ് വകുപ്പും മത്സ്യഫെഡും സംയുക്തമായി നടത്താനിരുന്ന പരിശോധനയാണിത്. ഏപ്രിൽ 19 ഞായറാഴ്ചയിലേക്കാണ് മാറ്റി വെച്ചത്.
മാർച്ച് 25 വൈകീട്ട് 5 മണി വരെ അപേക്ഷ സമർപ്പിക്കാനുള്ള സമയം നീട്ടിയിട്ടുണ്ട്. 12 വർഷം വരെ കാലപ്പഴക്കമുള്ള എഞ്ചിനുകളാണ് പരിശോധനയ്ക്ക് വിധേയമാക്കുന്നത്.
 

വിമുക്തഭടന്മാരുടേയും അവരുടെ ഭാര്യമാരുടേയും / വിധവകളുടേയും സ്ഥിര താമസത്തിനുപയോഗിക്കുന്ന വാസഗൃഹങ്ങൾക്ക് 2020-2021 വർഷത്തേക്ക് കെട്ടിടനികുതി ഇളവ് ലഭിക്കുന്നതിന് ബന്ധപ്പെട്ട രേഖകളുടെ പകർപ്പ് സഹിതം മതിലകം പഞ്ചായത്ത് സെക്രട്ടറി മുൻപാകെ മാർച്ച് 31 നകം സത്യവാങ്മൂലം ഹാജരാക്കണം. ഡിസ്ചാർജ് സർട്ടിഫിക്കറ്റിന്റെ അസൽ പകർപ്പ് കൊണ്ടുവരേണ്ടതാണ്.

സംസ്ഥാനത്ത് കോവിഡ് 19 ബാധയുളള സാഹചര്യത്തിൽ തൃശ്ശൂർ ജില്ലയിൽ ജില്ലാഭരണകൂടവും ഐ.എ.ജി. യും (ഇന്റർ ഏജൻസി കോർഡിനേഷൻ ഗ്രൂപ്പ് ) സംയുക്ത പ്രതിരോധ പ്രവർത്തനങ്ങളിലേയക്ക് നയിക്കും. വൈറസ് ബാധയെത്തുടർന്ന് ഐസോലേറ്റഡ് ആയവർക്കും ഹോം ക്വറന്റൈനിലുള്ളവർക്കും ആവശ്യാനുസരണം സേവനങ്ങൾ ലഭ്യമാക്കുകയും മറ്റുള്ളവരെ രോഗ പ്രതിരോധ പ്രവർത്തനങ്ങളെക്കുറിച്ച് ബോധവത്കരിക്കുകയുമാണ് സംയുക്ത പ്രവർത്തനത്തിന്റെ ലക്ഷ്യം.

പീച്ചിയിൽ നിർമ്മാണത്തിലിരിക്കുന്ന 20 എംഎൽഡി ട്രീറ്റ്മെന്റ് പ്ലാന്റ് നിർമ്മാണ പുരോഗതി കോർപ്പറേഷൻ മേയർ അജിത ജയരാജൻ വിലയിരുത്തി. 17 കോടി രൂപ ചിലവഴിച്ചാണ് ഈ പ്ലാന്റ് നിർമ്മാണം നടന്നുകൊണ്ടിരിക്കുന്നത്. തൃശൂർ കോർപ്പറേഷനിൽ പഴയ മുനിസിപ്പൽ പ്രദേശത്തെ ജലവിതരണത്തിന്റെ ഭാഗമായി ചിലസമയങ്ങളിൽ ചെളി വെള്ളം വരുന്നത് സാധാരണയാണ്. ഈ ചെളിവെള്ളം ശുദ്ധീകരിച്ച ശുദ്ധജലം വിതരണം ചെയ്യുന്നതിനുള്ള പ്ലാന്റാണ് നിർമ്മിച്ചു കൊണ്ടിരിക്കുന്നത്.

മൂകാംബിക ഹോംസ് ആൻഡ് അപ്പാർട്ട്മെന്റ് പ്രൈവറ്റ് ലിമിറ്റഡ് എന്ന സ്വകാര്യ സ്ഥാപനത്തിന്റെ പിടിച്ചെടുത്ത ഭൂമി കേരള റവന്യൂ റിക്കവറി ആക്ട് പ്രകാരം ലേലം ചെയ്യും. ഏപ്രിൽ 28 ന് 11 മണിക്ക് തൃശൂർ വില്ലേജ് ഓഫീസിൽ വെച്ച് ലേലം നടക്കുമെന്ന് റവന്യൂ റിക്കവറി തഹസിൽദാർ അറിയിച്ചു.

റവന്യൂ റിക്കവറി ജപ്തി ചെയ്ത ടെമ്പോ ട്രാവലർ ഫ്യുവൽ-ഡീസൽ മോഡൽ-2016 വാഹനം പരസ്യമായി ലേലം ചെയ്യുന്നു. ഏപ്രിൽ ആറിന് രാവിലെ 11 മണിക്ക് കുന്നംകുളം താലൂക്ക് ഓഫീസിലാണ് ലേലം നടത്തുന്നത്. കൂടുതൽ വിവരങ്ങൾ കുന്നംകുളം താലൂക്ക് ഓഫീസിലും പഴഞ്ഞി വില്ലേജ് ഓഫീസിലും ലഭ്യമാണ്.