തിരുവല്ല എംജിഎംഎച്ച്എസ് കേന്ദ്രമായി കെ-ടെറ്റ് ഫെബ്രുവരി 2020 പരീക്ഷയെഴുതി വിജയിച്ചവരുടെ യോഗ്യതാ സര്‍ട്ടിഫിക്കറ്റുകളുടെയും അനുബന്ധ രേഖകളുടെയും പരിശോധന 22 മുതല്‍ 26 വരെ തിരുവല്ല ജില്ലാ വിദ്യാഭ്യാസ ഓഫീസില്‍ നടക്കും. രജിസ്റ്റര്‍ നമ്പര്‍ 517417 മുതല്‍ 617666 വരെ 22നും 617667-617811 വരെ 23നും 617813-725081 വരെ 24നും 725086-725233 വരെ 25നും 725234-807869 വരെ 26നുമാണ് പരിശോധന. പരീക്ഷാര്‍ഥികള്‍ കോവിഡ് 19മായി ബന്ധപ്പെട്ട സര്‍ക്കാര്‍ നിര്‍ദേശങ്ങള്‍ കര്‍ശനമായി പാലിക്കണമെന്ന് ജില്ലാ വിദ്യാഭ്യാസ ഓഫീസര്‍ അറിയിച്ചു. 

               (പിഎന്‍പി 2618/20)

ഇലന്തൂര്‍ ഗ്രാമപഞ്ചായത്തില്‍ നിന്നും 50 വയസ് കഴിഞ്ഞ അവിവാഹിത പെന്‍ഷന്‍, വിധവാ പെന്‍ഷന്‍ എന്നിവ വാങ്ങുന്ന 60 വയസില്‍ താഴെയുള്ളവരില്‍ വിവാഹിത അല്ലെങ്കില്‍ പുനര്‍വിവാഹിത അല്ലെന്ന് തെളിയിക്കുന്ന സാക്ഷ്യപത്രം ഹാജരാക്കാത്തവര്‍ ഈ മാസം 25ന് മുമ്പ് ആധാര്‍ കാര്‍ഡിന്റെ പകര്‍പ്പ് സഹിതം സാക്ഷ്യപത്രം ഹാജരാക്കണമെന്ന് സെക്രട്ടറി അറിയിച്ചു.                   (പിഎന്‍പി 2619/20)

കേരള ആട്ടോമൊബൈല്‍ വര്‍ക്ക്‌ഷോപ്പ് തൊഴിലാളി ക്ഷേമപദ്ധതിയില്‍ അംഗത്വമെടുക്കുന്നതിനും മുടങ്ങിയ അംശദായം ഒടുക്കുന്നതിനും സെപ്തംബര്‍ വരെ സമയം അനുവദിച്ചതായി ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു.                     (പിഎന്‍പി 2620/20)

കേരള ഖാദി ഗ്രാമവ്യവസായ ബോര്‍ഡ് നിര്‍മിച്ച പുനരുപയോഗിക്കാവുന്ന ഖാദി കോട്ടന്‍ മാസ്‌ക്കുകള്‍ ജില്ലാ ഭരണകൂടത്തിന് കൈമാറി. കേരള ഖാദി ഗ്രാമവ്യവസായ ബോര്‍ഡ് ജില്ലാ പ്രോജക്റ്റ് ഓഫീസര്‍ ഷാജി ജേക്കബില്‍ നിന്നും ജില്ലാ കളക്ടര്‍ പി.ബി. നൂഹ് മാസ്‌ക്കുകള്‍ ഏറ്റുവാങ്ങി. ജൂനിയര്‍ സൂപ്രണ്ട്് കെ.ജി. വേണുഗോപാല്‍, സീനിയര്‍ കോ-ഓപ്പറേറ്റീവ് ഇന്‍പെക്ടര്‍ ടി.എസ്. പ്രദീപ്കുമാര്‍ എന്നിവര്‍ പങ്കെടുത്തു. മാസ്‌ക്കുകള്‍ മിതമായ വിലയ്ക്ക് പത്തനംതിട്ട, അടൂര്‍, ഇലന്തൂര്‍ എന്നിവിടങ്ങളിലെ ഖാദി ഗ്രാമസൗഭാഗ്യ ഷോറൂമുകളില്‍ ലഭ്യമാണ്.                                   (പിഎന്‍പി 2621/20)

സംസ്ഥാന സര്‍ക്കാരിന്റെ വിശപ്പ് രഹിത പദ്ധതിക്ക് പിന്തുണ നല്‍കി അയപ്പന്‍കോവില്‍ പഞ്ചായത്തില്‍ ജനകീയ ഹോട്ടല്‍ തുടങ്ങി. പഞ്ചായത്തിന്റെയും കുടുംബശ്രീയുടെയും നേതൃത്വത്തില്‍ പരപ്പില്‍ ആരംഭിച്ച ഹോട്ടലിന്റെ ഉദ്ഘാടനം ഇ എസ് ബിജിമോള്‍ എംഎല്‍എ നിര്‍വ്വഹിച്ചു.  ഉച്ചയൂണ് 20 രൂപ നിരക്കിലും  ലഭ്യമാകും. 25 രൂപയ്ക്ക്  ചോറ് പാഴ്സലായും ലഭിക്കും. കുടുംബശ്രീ പ്രവര്‍ത്തകരാണ് പാചകക്കാര്‍. ചടങ്ങില്‍ അയ്യപ്പന്‍കോവില്‍ ഗ്രാമപഞ്ചായത്ത് പ്രസിഡന്റ് എ എല്‍ ബാബു അധ്യക്ഷത വഹിച്ചു. ഗ്രാമപഞ്ചായത്ത് വൈസ് പ്രസിഡന്റ് നിഷാമോള്‍ ബിനോജ്, കുടുംബശ്രീ ചെയര്‍പേഴ്സണ്‍ ബീനാ സിന്തോള്‍, ഗ്രാമപഞ്ചായത്തംഗങ്ങള്‍ തുടങ്ങിയവര്‍ പങ്കെടുത്തു.

കൊടുവള്ളി മണ്ഡലത്തിലെ താമരശ്ശേരി, കിഴക്കോത്ത്, നരിക്കുനി ഗ്രാമപഞ്ചായത്തുകളിലൂടെയും കൊടുവള്ളി നഗരസഭയിലൂടെയും കടന്നുപോകുന്ന മണ്ഡലത്തിലെ പ്രധാന റോഡുകളിലൊന്നായ പരപ്പന്‍പൊയില്‍-എളേറ്റില്‍-പുന്നശ്ശേരി കാരക്കുന്ന് റോഡ് പ്രവൃത്തി വിലയിരുത്താന്‍ എളേറ്റില്‍ വ്യാപാരഭവനില്‍ കാരാട്ട് റസാഖ് എംഎല്‍എ യുടെ നേതൃത്വത്തില്‍ ജനപ്രതിനിധികളുടെയും രാഷ്ട്രീയ പാര്‍ട്ടി പ്രതിനിധികകളുടെയും യോഗം ചേര്‍ന്നു. 

ഹൃദയാഘാതം മൂലം വിദേശത്തു മരിച്ച പ്രവാസി സാമൂഹ്യപ്രവര്‍ത്തകന്‍ കോഴിക്കോട് പേരാമ്പ്ര സ്വദേശി മുയിപ്പോത്ത് പടിഞ്ഞാറക്കര കുനിയില്‍ നിതിന്‍ ചന്ദ്രന്റെ വീട്  തൊഴില്‍ വകുപ്പ് മന്ത്രി ടി.പി രാമകൃഷ്ണന്‍ സന്ദര്‍ശിച്ചു. കുടുംബാംഗങ്ങളുമായി മന്ത്രി സംസാരിച്ചു. നിതിന്റെ ഭാര്യയായ ആതിരയെ മന്ത്രിയും ഭാര്യ എം.കെ നളിനിയും അവരുടെ വീട്ടില്‍ എത്തി ആശ്വസിപ്പിച്ചു. ചെറുവണ്ണൂര്‍ പഞ്ചായത്ത് പ്രസിഡന്റ് കെ.പി ബിജു കൂടെയുണ്ടായിരുന്നു.

ഓണ്‍ലൈന്‍ പഠനത്തിനായി മണ്ഡലത്തിലെ ഇരുന്നൂറോളം വരുന്ന അങ്കണവാടികളും മുഴുവന്‍ പൊതു വായനശാലകളും സാംസ്‌കാരിക നിലയങ്ങളും ഓണ്‍ലൈന്‍ ടെലിവിഷന്‍ പഠനകേന്ദ്രങ്ങളാക്കി മാറ്റുന്നതിന് ആസ്തി വികസന ഫണ്ടില്‍ നിന്നും ആവശ്യമായ തുക അനുവദിക്കുമെന്ന്  കാരാട്ട് റസാഖ് എംഎല്‍എ അറിയിച്ചു. മണ്ഡലത്തിലെ ഓണ്‍ലൈന്‍ വിദ്യാഭ്യാസത്തിന് അടിസ്ഥാനം സൗകര്യം വര്‍ധിപ്പിക്കുന്നത് സംബന്ധിച്ച് താമരശ്ശേരി റസ്റ്റ്ഹൗസില്‍ ചേര്‍ന്ന മണ്ഡലത്തിലെ തദ്ദേശ സ്വയംഭരണ സ്ഥാപനങ്ങളിലെ അധ്യക്ഷന്‍മാരുടെയും വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍മാരുടെയും ഉദ്യോഗസ്ഥന്മാരുടെയും യോഗത്തിലാണ് എംഎല്‍എ ഇക്കാര്യം അറിയിച്ചത്.