കോവിഡ് 19 പ്രതിരോധപ്രവര്‍ത്തനത്തില്‍ ജില്ലയില്‍ ജാഗ്രത തുടര്‍ന്നേ മതിയാകുവെന്ന് വീണാ ജോര്‍ജ് എംഎല്‍എ പറഞ്ഞു.  കൃത്യമായ ഇടപെടലുകളാണ് സര്‍ക്കാരിന്റെ ഭാഗത്തുനിന്നുണ്ടാകുന്നത്. ഇറ്റലിയില്‍ നിന്നെത്തിയ കുടുംബത്തേയും അവരുമായി ബന്ധപ്പെട്ടവരുടേയും റൂട്ട് മാപ്പാണ് നമ്മുടെ കൈവശമുള്ളത്. മറ്റു ജില്ലകളിലും കോവിഡ് 19 സ്ഥിരീകരിച്ച സാഹചര്യത്തില്‍ മറ്റു രാജ്യങ്ങളില്‍ നിന്നെത്തിയവരേയും പരിശോധിക്കേണ്ടതുണ്ട്. വിദേശ രാജ്യങ്ങളില്‍ നിന്ന് ഇന്ത്യയിലേക്കെത്തുന്നവര്‍ നിര്‍ബന്ധമായും ഐസലേഷന്  വിധേയരാവണം. താഴേതട്ടിലേക്ക് ആശാ പ്രവര്‍ത്തകര്‍ വഴി ബോധവത്കരണം നടത്തണം. ആറന്മുള മണ്ഡലത്തില്‍ പ്രൈവറ്റ് ബസുകള്‍ ഓടുന്നില്ല.

--
കൊറോണ വൈറസ് പ്രതിരോധ മുന്‍കരുതലിന്‍റെ ഭാഗമായി വീടുകളില്‍ പൊതുസമ്പര്‍ക്കം ഒഴിവാക്കി കഴിയുന്നവര്‍ക്ക് വിരസതയകറ്റാന്‍ പുസ്തകങ്ങളും.

ഡി.സി. ബുക്സിന്‍റെ സഹകരണത്തോടെ ജില്ലാ ഭരണകൂടമാണ് പുസ്തകങ്ങള്‍ വിതരണം ചെയ്യുന്നത്.  മലയാളത്തിലെ മികച്ച നോവലുകളും കഥകളും പ്രചോദനാത്മക രചനകളും ഉള്‍പ്പെടെയുള്ളവ ഹോം ക്വാറന്‍റയിനില്‍ കഴിയുന്നവരുടെ വീടുകളില്‍ എത്തിച്ചുതുടങ്ങി.

നിരീക്ഷണത്തിലുള്ളവരുടെ ആരോഗ്യ നില വിലയിരുത്താനും ബോധവത്കരണ ലഘുലേഖകള്‍ നല്‍കാനുമായി ഭവന സന്ദര്‍ശനം നടത്തുന്ന ആരോഗ്യ വകുപ്പ് ജീവനക്കാരാണ് വിതരണം നടത്തുന്നത്.
 

ഇന്നലെ രാത്രി ചെങ്ങളം സ്വദേശി മരിച്ചതുമായി ബന്ധപ്പെട്ട് അഭ്യൂഹങ്ങള്‍ പ്രചരിപ്പിക്കുന്നവര്‍ക്കെതിരെ നടപടി സ്വീകരിക്കുമെന്ന് ജില്ലാ കളക്ടര്‍ അറിയിച്ചു.
 
കൊറോണ വൈറസ് ബാധ സ്ഥിരീകരിച്ച് കോട്ടയം മെഡിക്കല്‍ കോളേജ് ആശുപത്രിയില്‍ കഴിയുന്നയാളുമായി നേരിട്ട് സമ്പര്‍ക്കം പുലര്‍ത്തിയ(പ്രൈമറി കോണ്‍ടാക്ട്) യുവാവിന്‍റെ പിതാവാണ് മരിച്ചത്. അതുകൊണ്ടുതന്നെ മകനും  സെക്കന്‍ഡറി കോണ്‍ടാക്ട്സ് പട്ടികയില്‍ ഉള്‍പ്പെട്ട ഇദ്ദേഹവും ഹോം ക്വാറന്‍റയിനില്‍ കഴിയുകയായിരുന്നു.  ഇരുവരിലും വൈറസ് ബാധയുടെ യാതൊരു ലക്ഷണവും  കണ്ടെത്തിയിട്ടില്ല.  

ജില്ലയില്‍ കോവിഡ് 19 വൈറസ് നിയന്ത്രണത്തില്‍ ആരോഗ്യവകുപ്പിന് ശക്തിപകരാന്‍ പഴുതടച്ച പ്രവര്‍ത്തനങ്ങള്‍ ചെയ്യേണ്ടത് പഞ്ചായത്തുകളാണെന്ന് ചിറ്റയം ഗോപകുമാര്‍ എം.എല്‍.എ പറഞ്ഞു. വാര്‍ഡ് അടിസ്ഥാനത്തില്‍ കുടുംബശ്രീ അംഗങ്ങള്‍, സി.ഡി.എസ് അംഗങ്ങള്‍ എന്നിവ വരടങ്ങിയ സംഘങ്ങള്‍ പ്രവര്‍ത്തിക്കണം. 

കോവിഡ് 19 വൈറസ് നിയന്ത്രണത്തില്‍ ജില്ലാ ഭരണകൂടവും, ആരോഗ്യ വകുപ്പും ജനപ്രതിനിധികളും നടത്തുന്ന പ്രവര്‍ത്തനം അഭിനന്ദനാര്‍ഹമാണെന്ന് രാജു എബ്രഹാം എം.എല്‍.എ പറഞ്ഞു. എട്ട്, ഒന്‍പത്, ക്ലാസുകളിലെ കുട്ടികളുടെ പരീക്ഷ 21ന് ശേഷം നടത്താനും, എം.ജി.യൂണിവേഴ്‌സിറ്റി പരീക്ഷകള്‍ പതിനാറ് മുതല്‍ ഇരുപത് വരെ എങ്കിലും മാറ്റി വയ്ക്കുവാന്‍ സര്‍ക്കാര്‍ ഇടപെടലുണ്ടാവണമെന്നും എം.എല്‍.എ പറഞ്ഞു.

കോവിഡ് 19 വൈറസ് നിയന്ത്രണത്തിന്റെ ഭാഗമായി വളരെ സ്ഥുത്യര്‍ഹമായ പ്രവര്‍ത്തനമാണ് ജില്ലയില്‍ നടക്കുന്നതെന്ന് മാത്യു ടി. തോമസ് എം.എല്‍.എ പറഞ്ഞു. ചൈന, ദക്ഷിണകൊറിയ, ഇറ്റലി, ഇറാന്‍, സ്പെയിന്‍, ജര്‍മനി, ഡെന്‍മാര്‍ക്ക്, സ്വിറ്റ്സര്‍ലാന്റ്, ഫ്രാന്‍സ്, യു.എസ്.എ എന്നീ 10  രാജ്യങ്ങളില്‍ നിന്നെത്തുന്ന ആളുകളെ നിരീക്ഷിക്കാനും അവര്‍ 28 ദിവസം വീടുകളില്‍ കഴിയുന്നുവെന്ന് ഉറപ്പുവരുത്തണമെങ്കിലും  പ്രാദേശിക ഇടപെടല്‍ അത്യാവശ്യമാണ്. അതിന് വാര്‍ഡ്തലം മുതലുള്ള ജനപ്രതിനിധികള്‍ മുന്നിട്ടിറങ്ങണമെന്നും എം.എല്‍.എ പറഞ്ഞു. വീടുകളില്‍ നിരീക്ഷണത്തിലുള്ള ചിലര്‍ അതിന് വിമുഖത കാണിക്കുന്നതായി ശ്രദ്ധയില്‍പ്പെട്ടിട്ടുണ്ട്.

കോവിഡ് 19 വൈറസ് നിയന്ത്രണത്തിന്റെ ഭാഗമായി സമൂഹത്തിലെ എല്ലാതലത്തിലുമുള്ളവര്‍ നടത്തിയ പ്രവര്‍ത്തനം മാതൃകാപരമാണെന്ന് ആന്റോ ആന്റണി എം.പി പറഞ്ഞു. ജില്ലയിലെ ജനപ്രതിനിധികള്‍ക്കായി പ്രമാടം ഇന്‍ഡോര്‍ സ്റ്റേഡിയത്തില്‍ നടത്തിയ  കോവിഡ് 19 പ്രത്യേക യോഗത്തില്‍ സംസാരിക്കുകയായിരുന്നു എം.പി. 

കോവിഡ് 19 വൈറസ് നിയന്ത്രണത്തിന്റെ ഭാഗമായി ജില്ലയില്‍ നിയോജക മണ്ഡലാടിസ്ഥാനത്തില്‍ നാളെ(16) രാവിലെയും പഞ്ചായത്ത് തലത്തില്‍ നാളെ(16) ഉച്ചകഴിഞ്ഞും പ്രത്യേക യോഗങ്ങള്‍ ചേരണമെന്ന് മന്ത്രി കെ.രാജു നിര്‍ദേശിച്ചു. ജില്ലയിലെ അഞ്ചു നിയോജക മണ്ഡലങ്ങളിലും അതാത് എംഎല്‍എമാരുടെ അധ്യക്ഷതയിലാണ് യോഗം ചേരുന്നത്. പഞ്ചായത്തുകളില്‍ പ്രസിഡന്റുമാരുടെ അധ്യക്ഷതയിലും യോഗം ചേരും. 

കോവിഡ് 19 മുന്‍കരുതല്‍ പ്രവര്‍ത്തനങ്ങള്‍ ഏകോപിപ്പിക്കുന്നതിന്റെ ഭാഗമായി  മത സംഘടനകളുടേയും ഉത്സവ കമ്മറ്റികളുടേയും ആരാധനാലയ പ്രതിനിധികളുടേയും യോഗം തിങ്കളാഴ്ച രാവിലെ 10ന് നടക്കും. കൂടുതല്‍ പേരുടെ സമ്പര്‍ക്കം ഒഴിവാക്കാന്‍ ജില്ലാ കലക്ടര്‍ ജാഫര്‍ മലികിന്റെ നേതൃത്വത്തില്‍ വീഡിയോ കോണ്‍ഫറന്‍സാണ് നടക്കുക.