മീനങ്ങാടി ഗവ.പോളിടെക്‌നിക് കോളേജിലെ വിവിധ ഡിപ്പാര്‍ട്ട്‌മെന്റുകളിലെ ഒഴിവുകളിലേക്ക് ഗസ്റ്റ് അധ്യാപകരെ നിയമിക്കുന്നു. ഇതുമായി ബന്ധപ്പെട്ട വിശദ വിവരങ്ങള്‍ പോളിടെക്‌നിക് വെബ് സൈറ്റില്‍ www.gptcmdi.ac.in ലഭിക്കും.

മേപ്പാടി പഞ്ചായത്തിലെ കോട്ടവയല്‍ മാനിവയല്‍ പ്രദേശങ്ങളിലെ വെള്ളപ്പൊക്കത്തിന് പരിഹാരമായി മേപ്പാടി ഗ്രാമപഞ്ചായത്തിന്റെ ആഭിമുഖ്യത്തില്‍ ചെമ്പോത്തറ മുതല്‍ കോട്ടവയല്‍ വരെയുള്ള ഭാഗത്തു കൂടി ഒഴുക്കുന്ന പുഴയിലെ തടസ്സങ്ങള്‍ നീക്കി പുഴ വൃത്തിയാക്കി. പുഴയിലെ കാട് വെട്ടല്‍ കുടുംബശ്രീ പ്രവര്‍ത്തകര്‍ തൊഴിലുറപ്പ്  പദ്ധതിയില്‍ ഉള്‍പ്പെടുത്തി ചെയ്തു തീര്‍ത്തു. പുഴയില്‍ അടിഞ്ഞു കൂടിയ മണ്ണ്, എക്കല്‍, ചെറുമരങ്ങള്‍, എന്നിവ യന്ത്ര സഹായത്തോടെ എടുത്തുമാറ്റി പുഴയുടെ സ്വാഭാവിക ഒഴുക്ക് പുന സൃഷ്ട്ടിച്ചു. 4 കിലോമീറ്റര്‍ നീളത്തിലാണ് ഈ പുഴ ഒഴുകുന്നത്. പഞ്ചായത്ത് പ്രസിഡന്റ് കെ.കെ സഹദ് ഉദ്ഘാടനം ചെയ്തു.

തരിയോട് ഗ്രാമപഞ്ചായത്തിലെ ലൈഫ് ഭവന നിര്‍മ്മാണം മൂന്നാംഘട്ട ഗുണഭോക്തൃ പട്ടികയിലുള്‍പ്പെട്ടവരുടെ അര്‍ഹതാ പരിശോധന ജൂണ്‍ 11, 12, 13 തിയതികളില്‍ ഗ്രാമപഞ്ചായത്ത് ഓഫീസില്‍ നടക്കും. അര്‍ഹതയുള്ള ഗുണഭോക്താക്കള്‍ രേഖകള്‍ സഹിതം ഹാജരാകണം. സ്വന്തമായി ഭൂമിയുള്ളവരും രേഖകള്‍ ഹാജരാക്കണം. അര്‍ഹതാ ഗുണഭോക്തൃപട്ടിക ഗ്രാമപഞ്ചായത്ത് ഓഫീസിലും, കാവുംമന്ദം, തരിയോട് വില്ലേജ് ഓഫീസുകളിലും, ട്രൈബല്‍ എക്സ്റ്റന്‍ഷന്‍ ഓഫീസിലും, വില്ലേജ് എക്സ്റ്റന്‍ഷന്‍  ഓഫീസിലും പ്രസിദ്ധീകരിച്ചിട്ടുണ്ട്.

ക്ഷീര വികസന വകുപ്പിന്റെ 2020-21 വാര്‍ഷിക പദ്ധതിയിലെ മില്‍ക്ക് ഷെഡ് വികസന പദ്ധതിയില്‍ ഉള്‍പ്പെടുത്തി അന്യസംസ്ഥാനങ്ങളില്‍ നിന്നും കിടാരി/പശുക്കളെ വാങ്ങി ചെറുകിട ഇടത്തരം ഡയറി ഫാമുകള്‍ തുടങ്ങുന്നതിനും, കറവയന്ത്രം, അവശ്യാധിഷ്ഠിത ധനസഹായം, കാലിത്തൊഴുത്ത് നിര്‍മ്മാണം എന്നീ പദ്ധതികള്‍ക്കും ധനസഹായം നല്‍കുന്നു. താല്‍പര്യമുള്ളവര്‍ നിശ്ചിത മാതൃകയിലുള്ള അപേക്ഷ സുല്‍ത്താന്‍ ബത്തേരി (04936 222905), കല്‍പറ്റ (04936 206770), മാനന്തവാടി (04935 204093), പനമരം (04935 220002) ക്ഷീര വികസന സേവന യൂണിറ്റ് ഓഫീസുകളില്‍  ജൂണ്‍ 23 ന് വൈകിട്ട് 5 നകം നല്‍കണം.

കാലവര്‍ഷവുമായി ബന്ധപ്പെട്ട് പ്രതിരോധ പ്രവര്‍ത്തനങ്ങളുടെ ഏകോപനത്തിനായി  തദ്ദേശസ്വയംഭരണ സ്ഥാപനങ്ങളില്‍ 24 മണിക്കൂര്‍ പ്രവര്‍ത്തിക്കുന്ന കണ്‍ട്രോള്‍ റൂം ആരംഭിക്കും. സന്നദ്ധ സംഘടനകളെയും സന്നദ്ധ സേവകരെയും സജ്ജമാക്കി നിര്‍ത്തുന്നതിനു തദ്ദേശസ്വയംഭരണങ്ങള്‍ക്ക് ജില്ലാഭരണകുടം നിര്‍ദേശം നല്‍കി. ദുരന്ത നിവാരണ പ്രവര്‍ത്തനങ്ങളില്‍ പങ്കാളികളാവുന്ന സ്ഥാപനങ്ങള്‍ സുസജ്ജമായിരിക്കാന്‍ ജാഗ്രതയുണ്ടാവണം. പെട്രാള്‍ പമ്പുകളില്‍ ഇന്ധന ലഭ്യത ഉറപ്പുവരുത്തണം.

    ട്രോളിങ് നിരോധനം ഏര്‍പ്പെടുത്തുന്നതിന് മുന്നോടിയായി ജില്ലയില്‍ നടപ്പിലാക്കേണ്ട ക്രമീകരണങ്ങള്‍ മന്ത്രി ജെ മേഴ്‌സിക്കുട്ടിയമ്മയുടെ അധ്യക്ഷതയില്‍ കലക്‌ട്രേറ്റില്‍ കൂടിയ യോഗം അവലോകനം ചെയ്തു. ഹാര്‍ബറില്‍ അനാവശ്യമായി കാണപ്പെടുന്ന കൂടാരങ്ങള്‍ മാറ്റണമെന്നും പഴകിയ മത്സ്യബന്ധന വലകള്‍ അടിയന്തരമായി നീക്കംചെയ്യണമെന്നും മന്ത്രി നിര്‍ദേശിച്ചു. നിലവില്‍ ഉപയോഗിക്കുന്ന വലകള്‍ സൂക്ഷിക്കുന്നതിന് ലോക്കര്‍ റൂമുകള്‍ തുറന്നു കൊടുക്കണം. അഗ്നി സുരക്ഷാ സേനയുടെ സഹായത്തോടെ ഹാര്‍ബര്‍ അണുമുക്തമാക്കണം. ലാന്‍ഡിങ് സെന്ററുകളില്‍ ഫിഷറീസിന്റെ മേല്‍നോട്ടത്തില്‍ നിയന്ത്രണങ്ങള്‍ ഏര്‍പ്പെടുത്തണം.