സ്റ്റേറ്റ് സെൻട്രൽ ലൈബ്രറിയിൽ ഇനി ഒരു അറിയിപ്പ് ഉണ്ടാകുന്നത് വരെ പുസ്തകങ്ങൾ ഇഷ്യു ചെയ്യുന്നതല്ലെന്ന് ലൈബ്രറിയൻ അറിയിച്ചു. ലൈബ്രറിയുടെ പ്രവർത്തനം സമയം രാവിലെ പത്ത് മുതൽ വൈകിട്ട് അഞ്ചുവരെ ആയിരിക്കും. പുസ്തകങ്ങളുടെ പിഴസംഖ്യ ഈടാക്കുന്നത് താത്ക്കാലികമായി നിർത്തിവെച്ചു. ലൈബ്രറി അംഗങ്ങൾ പുസ്തകങ്ങൾ തിരികെ നൽകുന്നതിന് കൂട്ടമായി ലൈബ്രറിയിൽ വരുന്നത് ഒഴിവാക്കണം. കൂടുതൽ വിവരങ്ങൾക്ക് വേണ്ടി ഡ്യൂട്ടി ലൈബ്രേറിയൻമാരെ ബന്ധപ്പെടുക. ഫോൺ: 9446511208, 9446520430.
പി.എൻ.എക്സ്. 2085/2020

കുന്നംകുളം നിയോജക മണ്ഡലത്തിലെ മരത്തംകോട്, കരിയന്നൂർ, വേലൂർ കെ.എസ്.ഇ.ബി സബ് സെന്ററുകൾ മാറ്റാനുള്ള നീക്കം കെഎസ്ഇബി ഉപേക്ഷിച്ചു. മന്ത്രി എ സി മൊയ്തീൻ വൈദ്യുതി വകുപ്പ് മന്ത്രിക്ക് നൽകിയ കത്തിന്റെ അടിസ്ഥാനത്തിലാണ് നടപടി. കടങ്ങോട്, എരുമപ്പെട്ടി, വേലൂർ ഗ്രാമപഞ്ചായത്തുകളിലെയും വടക്കാഞ്ചേരി മുൻസിപ്പാലിറ്റിയിലെ മുണ്ടത്തിക്കോട് ഭാഗത്തെ 5 ഡിവിഷനുകളിലെയും പതിനായിരത്തിലധികം ഉപഭോക്താക്കൾക്ക് പ്രയോജനപ്പെടുന്ന ഈ സബ് സെൻററുകൾ വടക്കാഞ്ചേരി, കുന്നംകുളം, സെക്ഷനുകളുമായി യോജിപ്പിക്കാനായിരുന്നു തീരുമാനം. പ്രദേശവാസികൾക്ക് ഏറെ ബുദ്ധിമുട്ടുണ്ടാക്കുന്ന തീരുമാനമാണ് മന്ത്രിയുടെ ഇടപെടലിലൂടെ തിരുത്തിയത്.

ചരക്ക്സേവന നികുതി വകുപ്പിലെ ഡെപ്യൂട്ടി കമ്മീഷ്ണറുടെ (ഇന്റലിജൻസ്) കാര്യാലയത്തിൽ താൽക്കാലികാടിസ്ഥാനത്തിൽ ഡ്രൈവർമാരുടെ പാനൽ രൂപീകരിക്കുന്നു. ദിവസവേതന അടിസ്ഥാനത്തിൽ ജോലി ചെയ്യാൻ താല്പര്യമുള്ള ഡ്രൈവർമാർ ജൂൺ 16ന് യോഗ്യതാ സർട്ടിഫിക്കറ്റുകളും എഴുതി തയ്യാറാക്കിയ അപേക്ഷയുമായി തൃശൂർ പൂത്തോളുള്ള ഡെപ്യൂട്ടി കമ്മീഷ്ണർ (ഇന്റലിജൻസ്) കാര്യാലയത്തിൽ കൂടികാഴ്ചയ്ക്ക് എത്തിച്ചേരേണ്ടതാണ്. സർക്കാർ മാനദണ്ഡങ്ങൾ അനുസരിച്ചാണ് നിയമനം. ഡ്രൈവിംഗ് ലൈസൻസ്, ആധാർ കാർഡ്, പ്രവൃത്തി പരിചയ രേഖകൾ എന്നിവയുടെ ഒറിജിനലും സ്വയം സാക്ഷ്യപ്പെടുത്തിയ പകർപ്പും സഹിതം ഇന്റർവ്യൂവിന് എത്തേണ്ടതാണ്. ഫോൺ: 0487 2380695.

ഓൺലൈൻ സംവിധാനം ഇല്ലാത്ത വിദ്യാർത്ഥികളുടെ കണക്ക് അധ്യാപകർ കൃതമായി തയ്യാറാക്കണമെന്ന് ജില്ലാ കളക്ടർ എസ് ഷാനവാസ് അറിയിച്ചു. ഓൺലൈൻ പഠനസൗകര്യങ്ങൾ മുഴുവൻ വിദ്യാർത്ഥികൾക്കും ലഭ്യമാക്കുന്നതിന് നടത്തുന്ന പ്രവർത്തനങ്ങളുടെ പുരോഗതി ജില്ലാതല യോഗം വിലയിരുത്തി. ജില്ലയിൽ 3503 എസ് എസ് എൽ സി വിദ്യാർത്ഥികൾക്കും 408 ഹയർസെക്കന്ററി വിദ്യാർത്ഥികൾക്കുമാണ് ഇനി ഓൺലൈൻ സംവിധനം ഒരുക്കേണ്ടത്.

പാളത്തിൽ പെട്ടെന്നുണ്ടായ അറ്റകുറ്റ പണികൾ കാരണം ബുധനാഴ്ച്ച (ജൂൺ 10) പാലുവായ് ലെവൽ ക്രോസ് ഗേറ്റ് നമ്പർ 11 അടച്ചിടും. പൂങ്കുന്നം-ഗുരുവായൂർ ലൈൻ ട്രെയിൻ പോകുന്ന റൂട്ടാണിത്. രാവിലെ എട്ട് മണി മുതൽ വൈകീട്ട് ആറ് വരെ ലെവൽ ക്രോസ് ഗേറ്റ് വഴി ഗതാഗതം അനുവദിക്കുന്നതല്ലെന്ന് ദക്ഷിണ റയിൽവേ അധികൃതർ അറിയിച്ചു. പകരം നാളത്തെ ഒരു ദിവസം വാഹനങ്ങൾ കരുവാൻപടി ലെവൽ ക്രോസ് ഗേറ്റ് നമ്പർ 12 വഴി തിരിച്ചു വിടും.

പഴയ ബുക്ക്- പേപ്പർ ഫോമിലുള്ള ഡ്രൈവിംഗ് ലൈസൻസുകൾ കാർഡ് രൂപത്തിലാക്കാൻ ഇനി ഉടമകൾ തിരക്ക് കൂട്ടേണ്ടതില്ല. കോവിഡ് 19 പശ്ചാത്തലത്തിൽ അപേക്ഷകൾ സ്വീകരിക്കുന്ന അവസാന തീയതി മോട്ടോർ വാഹന വകുപ്പ് നിശ്ചയിച്ചിട്ടില്ല. ജൂൺ രണ്ടാം വാരം വരെയാണ് ഡ്രൈവിംഗ് ലൈസൻസുകൾ കാർഡ് രൂപത്തിലാക്കാൻ തീയതി നിശ്ചയിച്ചിരുന്നത്. എന്നാൽ ഓഫീസുകളിൽ തിരക്ക് അനുഭവപ്പെടുന്നതിനാൽ തീയതി നീട്ടി നൽകാൻ മോട്ടോർവാഹനവകുപ്പ് തീരുമാനിക്കുകയായിരുന്നു. ഡ്രൈവിംഗ് ലൈസൻസിന്റെ പുതിയ സോഫ്റ്റ്‌വെയറായ സാരഥിയിലേക്ക് ഡാറ്റാ പോർട്ടിംഗ് നടന്നു കഴിഞ്ഞാലും പഴയ ബുക്ക് -പേപ്പർ ഫോമുകളിലുള്ള ലൈസൻസുകൾ കാർഡ് ഫോമിലാക്കുന്നതിന് തടസ്സങ്ങളും ഉണ്ടാകില്ല.

സുഭിക്ഷ കേരളം പദ്ധതിയുടെ ഭാഗമായി പുതുക്കാട് മണ്ഡലത്തിൽ നടപ്പിലാക്കുന്ന ജൈവ വൈവിധ്യ ഉദ്യാനം കേരളത്തിന് മാതൃകയെന്ന് മുഖ്യമന്ത്രി പിണറായി വിജയൻ. സുസ്ഥിര വികസനം മുന്നിൽക്കണ്ട് നടപ്പിലാക്കുന്ന ഇത്തരം നല്ല ആശയങ്ങളിലൂന്നിയുള്ള പദ്ധതികളാണ് നാടിന് ആവശ്യമെന്നും മുഖ്യമന്ത്രി പറഞ്ഞു. ജൈവ വൈവിധ്യ ഉദ്യാനത്തിന്റെ ഉദ്ഘാടനം തത്സമയം ഓൺലൈനിലൂടെ നിർവ്വഹിച്ച് സംസാരിക്കുകയായിരുന്നു അദ്ദേഹം.