കേന്ദ്ര തൊഴില്‍ മന്ത്രാലയത്തിന്റെ കീഴില്‍ തിരുവനന്തപുരത്ത് തൈക്കാട് പ്രവര്‍ത്തിക്കുന്ന ദേശീയ തൊഴില്‍ സേവന കേന്ദ്രം പഞ്ചാബിലെ സ്വകാര്യ അന്തര്‍ദേശീയ സ്‌കൂളില്‍ പ്രീപ്രൈമറി (വനിതകള്‍ക്ക് മാത്രം), പ്രൈമറി ടീച്ചര്‍മാരെ ജോലിക്ക് തെരഞ്ഞെടുക്കാന്‍ ഏപ്രില്‍ അഞ്ചിന് രാവിലെ 11 മണിക്ക് തൈക്കാട് ഓഫീസില്‍ ഇന്റര്‍വ്യൂ നടത്തും.  ഇരുപതിനായിരം രൂപ മാസശമ്പളവും സൗജന്യ താമസ സൗകര്യവും ഭക്ഷണവും ലഭ്യമാണ്.  ബിരുദമോ/ബിരുദാനന്തര ബിരുദമോ റ്റി.റ്റി.സി/എന്‍.റ്റി.റ്റി/ബി.എഡ്/എംഎഡ് ഉളള ഉദ്യോഗാര്‍ത്ഥികള്‍ക്ക് ഇന്റര്‍വ്യൂവിന് ഹാജരാകാം.  ഫോണ്‍: 0471 2332113, 8304009409
പി.എന്‍.എക്‌സ്.1236/18

     ആലപ്പുഴ ഇന്‍ഡസ്ട്രിയല്‍ ട്രൈബ്യൂണല്‍ എം.ബി. പ്രജിത്ത്, ഏപ്രില്‍ അഞ്ച്, ആറ്, 12, 13, 19, 20, 26, 27 തീയതികളില്‍ എറണാകുളം ലേബര്‍ കോടതിയില്‍ സിറ്റിംഗ് നടത്തും.  മൂവാറ്റുപുഴ കച്ചേരിത്താഴം കോര്‍ട്ട് കോംപ്ലക്‌സിലുളള ഓള്‍ഡ് ഫാമിലി കോര്‍ട്ട് ഹാളിലും 24ന് പത്തനംതിട്ട ജില്ലാ മീഡിയേഷന്‍ സെന്ററിലും, മറ്റ് പ്രവൃത്തി ദിവസങ്ങളില്‍ ആസ്ഥാനത്തും തൊഴില്‍ തര്‍ക്ക കേസുകളും എംപ്ലോയീസ് ഇന്‍ഷ്വറന്‍സ് കേസുകളും, എംപ്ലോയീസ് കോമ്പന്‍സേഷന്‍ കേസുകളും വിചാരണ ചെയ്യും.
പി.എന്‍.എക്‌സ്.1235/18

    തിരുവനന്തപുരം കൈമനത്തുള്ള സാങ്കേതിക പരീക്ഷാ കണ്‍ട്രോളറുടെ കാര്യാലയത്തില്‍ ഡിപ്ലോമ അപ്രന്റീസ് ട്രയിനികളെ തെരഞ്ഞെടുക്കുന്നതിന് ഏപ്രില്‍ ആറിന് ഇന്റര്‍വ്യൂ നടത്തും.  കമ്പ്യൂട്ടര്‍ എഞ്ചിനീയറിംഗ്, ഇലക്‌ട്രോണിക്‌സ്, കൊമേഴ്‌സ്യല്‍ പ്രാക്ടീസ്, കമ്പ്യൂട്ടര്‍ ഹാര്‍ഡ്‌വെയര്‍, ഇന്‍സ്ട്രുമെന്റ് ടെക്‌നോളജി എന്നിവയില്‍ ഏതെങ്കിലും ഡിപ്ലോമയുള്ളവര്‍ അസ്സല്‍ രേഖകള്‍ സഹിതം 11 മണിയ്ക്ക് ജോയിന്റ് കണ്‍ട്രോളര്‍ മുമ്പോകെ കൂടിക്കാഴ്ചയ്ക്കായി ഹാജരാകണം. സ്റ്റൈപ്പന്റ് 3542/- രൂപ പ്രതിമാസം.
പി.എന്‍.എക്‌സ്.1234/18
 

    വെളളൂരിലെ ഹിന്ദുസ്ഥാന്‍ ന്യൂസ്പ്രിന്റ് ലിമിറ്റഡ് പൊതുമേഖലയില്‍ തന്നെ നിലനിര്‍ത്തണമെന്ന് ആവശ്യപ്പെട്ട് കേന്ദ്രത്തില്‍ സമ്മര്‍ദ്ദം ചെലുത്താന്‍ മുഖ്യമന്ത്രി പിണറായി വിജയന്റെ അധ്യക്ഷതയില്‍ ചേര്‍ന്ന സര്‍വ്വകക്ഷി യോഗം തീരുമാനിച്ചു. കമ്പനി സ്വകാര്യവല്‍ക്കരിക്കുന്നതിനെതിരെ നിയമ നടപടിയെടുക്കുന്നതിനുളള സാധ്യത സര്‍ക്കാര്‍ പരിശോധിക്കും. ഫാക്ടറി സംസ്ഥാന സര്‍ക്കാര്‍ ഏറ്റെടുക്കുന്നതിനുളള സാധ്യതയെക്കുറിച്ച് വിശദമായ പഠനം നടത്താമെന്നും മുഖ്യമന്ത്രി പറഞ്ഞു.

    ഓഖി ദുരന്തത്തില്‍ മരിച്ചവരുടെ കുടുംബങ്ങള്‍ക്ക് അഞ്ചുലക്ഷം രൂപ വീതം ധനസഹായം നല്‍കാന്‍ വിഴിഞ്ഞം അന്താരാഷ്ട്ര തുറമുഖത്തിന്റെ കരാര്‍ എടുത്ത അദാനി പോര്‍ട്‌സ് ആന്റ് സ്‌പെഷ്യല്‍ ഇക്കണോമിക് സോണ്‍ തീരുമാനിച്ചു. കമ്പനി സി.ഇ.ഒ കരണ്‍ അദാനി ചൊവ്വാഴ്ച മുഖ്യമന്ത്രി പിണറായി വിജയനുമായി നടത്തിയ ചര്‍ച്ചയിലാണ് ഈ തീരുമാനം. മരിച്ചവരുടെ കുടുംബങ്ങള്‍ക്ക് കേന്ദ്രസര്‍ക്കാരിന്റെ രണ്ടു ലക്ഷം രൂപ ഉള്‍പ്പെടെ 22 ലക്ഷം രൂപ സംസ്ഥാന സര്‍ക്കാര്‍ സഹായമായി അനുവദിച്ചിട്ടുണ്ട്. ഈ തുകയ്ക്ക് പുറമെയാണ് തുറമുഖ കമ്പനിയുടെ സഹായം.
പി.എന്‍.എക്‌സ്.1244/18

   സാമൂഹ്യനീതി, മതനിരപേക്ഷത, ജനാധിപത്യം എന്നീ മൂല്യങ്ങളില്‍ ഉറച്ചുനിന്ന് ഭരണം മുന്നോട്ടുകൊണ്ടുപോകുന്ന മുഖ്യമന്ത്രി പിണറായി വിജയന് തമിഴ്‌നാട്ടിലെ ദലിത്-പിന്നാക്ക സംഘടനകളുടെ അഭിനന്ദനം.
    ആദി തമിളര്‍ കക്ഷി, അണ്‍ടച്ചബിലിറ്റി ഇറാഡിക്കേഷന്‍ ഫ്രണ്ട്, സമൂഹനീതി കക്ഷി എന്നീ സംഘടനകളുടെ നേതാക്കള്‍ ചൊവ്വാഴ്ച മുഖ്യമന്ത്രി പിണറായി വിജയനെ സന്ദര്‍ശിച്ച് അനുമോദനമറിയിച്ചു. ആദി തമിളര്‍ കക്ഷി മുഖ്യമന്ത്രിക്ക് സോഷ്യല്‍ ജസ്റ്റിസ് ഫൈറ്റര്‍ അവാര്‍ഡും സമ്മാനിച്ചു.

    കേരള തീരദേശ പരിപാലന അതോറിറ്റി പി.എം.വൈ, ലൈഫ് മിഷന്‍, ഐ.എ.വൈ തുടങ്ങിയ സര്‍ക്കാര്‍ ഭവന പദ്ധതികള്‍ക്കുള്ള വായ്പാ ധനസഹായം ബന്ധപ്പെട്ട തദ്ദേശ സ്വയംഭരണ സ്ഥാപനങ്ങള്‍ മുഖേന അര്‍ഹരായവര്‍ക്ക് അനുവദിക്കുമെന്ന് മെമ്പര്‍ സെക്രട്ടറി അറിയിച്ചു.
പി.എന്‍.എക്‌സ്.1233/18

    അസാപ് പ്രോഗ്രാം എക്‌സിക്യൂട്ടീവ് പോസ്റ്റിലേക്ക് ഇന്റേണ്‍ഷിപ്പ് അടിസ്ഥാനത്തില്‍ അപേക്ഷ ക്ഷണിച്ചു. 2016 നു ശേഷം  60 ശതമാനം മാര്‍ക്കോടെ എം.ബി.എ പൂര്‍ത്തിയാക്കിയവര്‍ക്കും അവസാന വര്‍ഷ സെമസ്റ്റര്‍ പരീക്ഷാഫലം കാത്തിരിക്കുന്നവര്‍ക്കും അപേക്ഷിക്കാം. ഉദ്യോഗാര്‍ത്ഥികള്‍ രണ്ടു ബയോഡേറ്റയും യോഗ്യത തെളിയിക്കുന്ന സര്‍ട്ടിഫിക്കറ്റുകളുമായി ഏപ്രില്‍ 11 രാവിലെ 10 മണിക്ക് തൈക്കാട് ഗവ: മോഡല്‍ ബോയ്‌സ് ഹയര്‍ സെക്കന്‍ഡറി സ്‌കൂളില്‍ അഭിമുഖത്തിനു ഹാജരാകണം.  ഫോണ്‍ : 9497258980.
പി.എന്‍.എക്‌സ്.1232/18