പുതിയ അധ്യയന വർഷം ആരംഭിക്കുന്നതിന് മുന്നോടിയായി സുൽത്താൻ ബത്തേരി താലൂക്കിലെ സ്കൂൾ സ്കൂൾ വാഹനങ്ങളുടെ ഫിറ്റ്നസ് പരിശോധന മെയ് 20ന് സെന്റ് മേരീസ് കോളേജ് ഗ്രൗണ്ടിൽ നടക്കുമെന്ന് സുൽത്താൻ ബത്തേരി ജോയിന്റ് ആർ.ടി. ഒ അറിയിച്ചു. ബസ് ജീവനക്കാർക്കായുള്ള ബോധവൽക്കരണ ക്ലാസ് മെയ് 19 ഉച്ചയ്ക്ക് രണ്ടിന് ചീരാൽ റോഡിലെ ശ്രേയസ് ഓഡിറ്റോറിയത്തിൽ നടക്കും.
 

പട്ടികവർഗ വകുപ്പിന് കീഴിൽ പ്രവർത്തിക്കുന്ന കണിയാമ്പറ്റയിൽ പ്രവർത്തിക്കുന്ന കൽപ്പറ്റ മോഡൽ റസിഡൻഷ്യൽ സ്കൂളിന് ഇത്തവണത്തെ എസ്.എസ്.എൽ.സി പരീക്ഷയിൽ നൂറ് ശതമാനം വിജയം. സ്കൂളിലെ പി.എസ് ആര്യ എല്ലാ വിഷയങ്ങളിലും എ പ്ലസ് നേടി. മറ്റൊരു വിദ്യാർത്ഥിനിക്ക് 9 വിഷയങ്ങളിൽ എ പ്ലസും 12 പേർക്ക് അഞ്ച് വിഷയങ്ങളിലധികം എ പ്ലസും നേടാനായി.

കേരളത്തിൽ ഒറ്റപ്പെട്ടയിടങ്ങളിൽ ഇന്ന് (15/05/2026)  മുതൽ 19/05/2026 വരെ  ഇടിമിന്നലോടു കൂടിയ മഴയ്ക്കും മണിക്കൂറിൽ 40-50 km വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

എസ്.എസ്.എൽ.സി പരീക്ഷയിൽ വിജയത്തിന്റെ നൂറുമേനി തിളക്കവുമായി സുൽത്താൻ ബത്തേരി നഗരസഭയിലെ വിദ്യാലയങ്ങൾ. പരീക്ഷയെഴുതിയ 823 വിദ്യാർത്ഥികളും ഉപരിപഠനത്തിന് അർഹത നേടിയതോടെ നഗരസഭയിലെ മുഴുവൻ സ്കൂളുകളും 100 ശതമാനം വിജയം കരസ്ഥമാക്കി മികച്ച നേട്ടം കൈവരിച്ചു. വിജയികളിൽ 113 പേർ പട്ടികവർഗ്ഗ വിഭാഗത്തിൽ നിന്നുള്ള വിദ്യാർത്ഥികളാണെന്നത് ഈ വിജയത്തിന്റെ തിളക്കം കൂട്ടുന്നു. ആകെ വിജയിച്ചവരിൽ 68 പേർ എല്ലാ വിഷയങ്ങൾക്കും എ പ്ലസ് നേടി. വിദ്യാർത്ഥികളുടെ മികച്ച വിജയത്തിനായി നഗരസഭയും വിദ്യാഭ്യാസ വകുപ്പും ഏകോപിപ്പിച്ചു നടത്തിയ ചിട്ടയായ പ്രവർത്തനങ്ങൾ വിജയം കണ്ട സന്തോഷത്തിലാണ് അധ്യാപകരും രക്ഷിതാക്കളും.

ജില്ലയിൽ പത്താംതരം പഠനം പൂർത്തീകരിച്ച മുഴുവൻ വിദ്യാർത്ഥികൾക്കും ഹയർ സെക്കൻഡറി, വൊക്കേഷണൽ ഹയർ സെക്കൻഡറി ഏകജാലക പ്രവേശനം ഉറപ്പുവരുത്തുകയെന്ന ലക്ഷ്യത്തോടെ മിഷൻ +1 പദ്ധതിക്ക് തുടക്കമായി. വിദ്യാർത്ഥികൾക്ക് പ്ലസ് വൺ, വി.എച്ച്.എസ്.ഇ പ്രവേശനത്തിനുള്ള ഓൺലൈൻ രജിസ്ട്രേഷന് പിന്തുണ നൽകുന്നതിനൊപ്പം പട്ടികവർഗ്ഗ വിദ്യാർത്ഥികളുടെ സമ്പൂർണ്ണ പ്രവേശനം പ്രത്യേകമായി ഉറപ്പ് വരുത്തുകയെന്ന ലക്ഷ്യം കൂടി മുൻനിർത്തിയാണ് മിഷൻ +1 പദ്ധതി പ്രവർത്തിക്കുന്നത്.