ജില്ലയില്‍  ഫയര്‍ ആന്റ് റെസ്‌ക്യൂ സര്‍വീസില്‍ പുരുഷ/വനിതാ ഹോംഗാര്‍ഡുകളുടെ നിയമനത്തിനായി അപേക്ഷിക്കാം. എസ്.എസ്.എല്‍.സി/തത്തുല്യ പരീക്ഷ പാസായവരും നല്ല ശാരീരികക്ഷമതയുള്ളവരുമായിരിക്കണം. എസ്.എസ്.എല്‍.സി പാസായവരുടെ അഭാവത്തില്‍ ഏഴാം സ്റ്റാന്‍ഡേര്‍ഡ് പാസായവരെയും പരിഗണിക്കും.

  ജില്ലാ ശുചിത്വമിഷന്റെ ആഭിമുഖ്യത്തില്‍ മാലിന്യസംസ്‌കരണത്തിന് പുതുവഴി കണ്ടെത്തുന്നതിന്റെ ഭാഗമായി മാലിന്യത്തില്‍നിന്നും കലാസൃഷ്ടികള്‍ തീര്‍ക്കും. ജില്ലാതല മത്സരം ജനുവരി 13ന്   രാവിലെ ഒമ്പത് മുതല്‍ കോര്‍പ്പറേഷന്‍ ടൗണ്‍ ഹാള്‍ അനക്‌സ് ബില്‍ഡിംഗില്‍ നടത്തും. വിദ്യാര്‍ഥികള്‍ക്കും പൊതുജനങ്ങള്‍ക്കും പങ്കെടുക്കാം.

ക്ഷീരവികസന വകുപ്പ് സംഘടിപ്പിക്കുന്ന സംസ്ഥാന ക്ഷീരസംഗമം-പടവ്  2026  ജനുവരി 18 മുതല്‍ 21 വരെ ആശ്രാമം മൈതാനത്ത് സംഘടിപ്പിക്കും. ഇതിനോടനുബന്ധിച്ച്  ജനുവരി 13 ന് രാവിലെ  ആറിന് കൊല്ലം ബീച്ചില്‍ നിന്നും ചിന്നക്കട സര്‍ക്കാര്‍ റസ്റ്റ് ഹൗസ്‌വരെ മിനി മാരത്തണ്‍ സംഘടിപ്പിക്കും.  മൃഗസംരക്ഷണ-ക്ഷീരവികസന വകുപ്പ് മന്ത്രി   ജെ. ചിഞ്ചുറാണി  ബീച്ചില്‍ ഫ്‌ളാഗ് ഓഫ് ചെയ്യും.  
 

ജില്ലയില്‍ സ്‌കൂള്‍-കോളജ് വിദ്യാര്‍ഥികള്‍ക്കായുള്ള മുഖ്യമന്ത്രിയുടെ മെഗാ ക്വിസ് മത്സരത്തിന് തുടക്കമായി. നവകേരളസൃഷ്ടിയും കേരളത്തിന്റെവളര്‍ച്ചയും അടിസ്ഥാനമാക്കിയാണ്  മത്സരം. എട്ടു മുതല്‍ 12 വരെയുള്ള ക്ലാസുകളിലെ വിദ്യാര്‍ഥികള്‍ക്കും   സര്‍വകലാശാല - കോളേജ് വിദ്യാര്‍ഥികള്‍ക്കുമായി പ്രാഥമികതല വ്യക്തിഗത മത്സരമാണ് നടത്തിയത്. കോളജ് തലത്തില്‍ ആയിരത്തോളം വിദ്യാര്‍ഥികള്‍ പങ്കെടുത്തു. ജില്ലാ തലത്തില്‍ ടീം രൂപീകരിച്ചാണ് മത്സരം.

  കുണ്ടറ താലൂക്ക് ആശുപത്രിയുടെ പുതിയ കെട്ടിടം  ജനുവരി 19 ന് രാവിലെ 11 ന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. പരിപാടിയുടെ സംഘാടകസമിതി രൂപീകരണ യോഗം താലൂക്ക് ആശുപത്രി അങ്കണത്തില്‍ ചിറ്റുമല ബ്ലോക്ക് പഞ്ചായത്ത് പ്രസിഡന്റ് ബി ബൈജുവിന്റെ അധ്യക്ഷതയില്‍  ചേര്‍ന്നു.

സംസ്ഥാന യുവജനക്ഷമ ബോർഡ് ആലപ്പുഴ ജില്ലാ യുവജനകേന്ദ്രത്തിന്റെ ആഭിമുഖ്യത്തിൽ സ്വാമി വിവേകാനന്ദന്റെ ജന്മദിനത്തോടനുബന്ധിച്ച് ദേശീയ യുവജന ദിനാചരണം സംഘടിപ്പിച്ചു. ഹരിപ്പാട് സബർമതി സ്പെഷ്യൽ സ്കൂളിൽ നടന്ന ചടങ്ങ് യുവജന ക്ഷേമബോർഡ് അംഗം എസ് ദീപു ഉദ്ഘാടനം ചെയ്തു. സ്പീച്ച് തെറാപ്പിസ്റ്റ് പാർവതി എ നായർ വിദ്യാർഥികൾക്ക് മോട്ടിവേഷൻ പരിശീലനം നൽകി.  പരിപാടിയുടെ ഭാഗമായി സ്കൂൾ കുട്ടികൾക്ക് വിവിധ മത്സരങ്ങളും കലാപരിപാടികളും സംഘടിപ്പിച്ചു. 

2026-27 അധ്യയനവര്‍ഷത്തെ എം.ബി.എ പ്രവേശന പരീക്ഷയായ കെ-മാറ്റ് ഒന്നാം ഘട്ട പ്രവേശന പരീക്ഷയുടെ സൗജന്യ ഓണ്‍ലൈന്‍ പരീക്ഷ പരിശീലനം സഹകരണ വകുപ്പിന് കീഴിലുള്ള ഗവണ്‍മെന്റ് എം.ബി.എ കോളേജായ ഐ.എം.ടി പുന്നപ്രയില്‍ നടത്തപ്പെടുന്നു. താൽപര്യമുള്ള  അവസാന വര്‍ഷ ബിരുദ വിദ്യാര്‍ഥികള്‍ക്കും ബിരുദം നേടിയവര്‍ക്കും പരിശീലനത്തില്‍ പങ്കെടുക്കാം. വിവരങ്ങള്‍ക്കും രജിസ്‌ട്രേഷനും 0477-2267602, 9188067601, 9946488075, 9747272045 എന്നീ നമ്പറുകളില്‍ ബന്ധപെടുക.

നോര്‍ക്കറൂട്ട്‌സ് പ്രവാസി  സംരംഭകര്‍ക്കായി സൗജന്യ സംരംഭകത്വ ശില്പശാല 'നോര്‍ക്ക പ്രവാസി ബിസിനസ് കണക്ട്' സംഘടിപ്പിക്കുന്നു.  പ്രവാസജീവിതം അവസാനിപ്പിച്ച് നാട്ടില്‍ തിരിച്ചെത്തിയവര്‍ക്കും, പുതിയതായി സംരംഭങ്ങള്‍ ആരംഭിക്കാന്‍ ആഗ്രഹിക്കുന്ന പ്രവാസികള്‍ക്കുമായി നോര്‍ക്കറൂട്ട്‌സിന്റെ കീഴില്‍ പ്രവര്‍ത്തിക്കുന്ന നോര്‍ക്ക ബിസിനസ്സ് ഫെസിലിറ്റേഷന്‍ സെന്റര്‍ (എന്‍.ബി.എഫ്.സി) ആലപ്പുഴ, പത്തനംതിട്ട, കോട്ടയം ജില്ലകളിലുള്ളവര്‍ക്കായി ജനുവരിയില്‍ ചെങ്ങന്നൂരിലാണ്   സംരംഭകത്വ ശില്പശാല സംഘടിപ്പിക്കുന്നത് .

അര്‍ത്തുങ്കല്‍ സെന്റ് ആന്‍ഡ്രൂസ് ബസലിക്കയിലെ 2026 വര്‍ഷത്തെ തിരുനാള്‍ ദിനമായ ജനുവരി 20ന് ചൊവ്വാഴ്ച ആലപ്പുഴ ജില്ലയിലെ ചേര്‍ത്തല, അമ്പലപ്പുഴ താലൂക്കുകളിലെ എല്ലാ സംസ്ഥാന സര്‍ക്കാര്‍ ഓഫിസുകള്‍ക്കും, വിദ്യാഭ്യാസ സ്ഥാപനങ്ങള്‍ക്കും പ്രാദേശിക അവധി അനുവദിച്ച് ജില്ലാ കളക്ടര്‍  ഉത്തരവായി. പൊതു പരീക്ഷകള്‍ മുന്‍ നിശ്ചയ പ്രകാരം നടത്തുന്നതിന് ഈ ഉത്തരവ് ബാധകമല്ലാത്തതാണ്.

*ജനുവരി 15നകം പരിശീലനം നൽകും

ജില്ലയിലെ പത്താം ക്ലാസ്സിലെ മുഴുവൻ വിദ്യാർത്ഥികൾക്കും കേരള ഇൻഫ്രാസ്ട്രക്ചർ ആൻഡ് ടെക്നോളജി ഫോർ എഡ്യൂക്കേഷൻ (കൈറ്റ്) ജനുവരി 15 നകം  റോബോട്ടിക്സ് പരിശീലനം നൽകും . പത്താം ക്ലാസ്സിലെ പുതുക്കിയ ഐ.ടി പാഠപുസ്തകത്തിൽ ഉൾപ്പെടുത്തിയ റോബോട്ടിക്സ് പാഠഭാഗങ്ങൾ പ്രായോഗികമായി പഠിക്കാനും ഈ വർഷത്തെ എസ്എസ്എൽസി പരീക്ഷയ്ക്ക് തയ്യാറെടുക്കാനും  കുട്ടികൾക്ക് അധിക പിന്തുണ എന്ന നിലയിലാണ് ലിറ്റിൽ കൈറ്റ്സ്‌ ഐടി ക്ലബുകളുടെ  നേതൃത്വത്തിൽ പരിശീലനം നൽകുന്നത്.