പ്രമാടം ഗ്രാമപഞ്ചായത്തിലെ വാര്‍ഡ് എട്ട്, അയിരൂര്‍ ഗ്രാമപഞ്ചായത്തിലെ വാര്‍ഡ് 15 (കിഴക്ക് തോട്ടാവള്ളിപ്പടി മുതല്‍ പടിഞ്ഞാറ് തോട്ടപ്പുഴശേരി അതിര്‍ത്തി വരെയും, തെക്ക് പമ്പാ നദി മുതല്‍ വടക്ക് കനാല്‍ വരെയുമുള്ള ഭാഗം), കലഞ്ഞൂര്‍ ഗ്രാമപഞ്ചായത്തിലെ വാര്‍ഡ് 13 (കഞ്ചോട് ജംഗ്ഷന്‍ ഭാഗം) എന്നീ സ്ഥലങ്ങളില്‍ ഒക്ടോബര്‍ മൂന്നു മുതല്‍ ഏഴു ദിവസത്തേക്ക്് കണ്ടെയ്ന്‍മെന്റ് സോണ്‍ നിയന്ത്രണം ഏര്‍പ്പെടുത്തി.

പത്തനംതിട്ട ഓമല്ലൂര്‍ ആറ്റരികം വാര്‍ഡിലെ കുമ്പിക്കല്‍ ഏലാ, കിഴക്കേ മുണ്ടകന്‍ പാടശേഖരങ്ങള്‍ വീണ്ടും നെല്‍കൃഷിയിലേക്ക്. സുഭിക്ഷ കേരളം പദ്ധതിയുടെ ഭാഗമായി ഓമല്ലൂര്‍ പഞ്ചായത്തിന്റെ സഹായത്തോടെ 10 ഹെക്ടറും സംസ്ഥാന കൃഷി വകുപ്പിന്റെ സഹായത്തോടെ 15 ഹെക്ടറും ഉള്‍പ്പെടെ മൊത്തം 25 ഹെക്ടര്‍( 62 ഏക്കര്‍ )ആണ് കൃഷിക്ക് ഒരുങ്ങുന്നത്.  വിത്തിടീല്‍ ഉദ്ഘാടനം  വീണാ ജോര്‍ജ് എംഎല്‍എ നിര്‍വഹിച്ചു. കഴിഞ്ഞ 15 വര്‍ഷമായി തരിശുകിടക്കുന്ന പാടശേഖരങ്ങളാണ് ആണ് ഇവ.

മുന്‍ രാഷ്ട്രപതി ഡോ. കെ.ആര്‍. നാരായണന്റെ പേരില്‍ നിര്‍മിക്കുന്ന പാലയ്ക്കല്‍ത്തകിടി സെന്റ് മേരീസ് ഗവണ്‍മെന്റ് ഹൈസ്‌കൂളിലെ പുതിയ കെട്ടിടത്തിന്റെ ശിലാസ്ഥാപനം മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിച്ചു.
പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി കിഫ്ബി ഫണ്ടില്‍ നിന്നും അനുവദിച്ച മൂന്നു കോടി രൂപ ഉപയോഗിച്ചാണ് പുതിയ കെട്ടിടം നിര്‍മിക്കുന്നത്. ശിലാഫലകത്തിന്റെ അനാച്ഛാദനം മാത്യു ടി. തോമസ് എംഎല്‍എ നിര്‍വഹിച്ചു.

ആഞ്ഞിലിത്താനം ജി.എല്‍.പി. സ്‌കൂളിന്റെ പുതിയ കെട്ടിടത്തിന്റെ ശിലാസ്ഥാപനം മുഖ്യമന്ത്രി പിണറായി വിജയന്‍ വീഡിയോ കോണ്‍ഫറന്‍സിലൂടെ നിര്‍വഹിച്ചു. പ്ലാന്‍ ഫണ്ടില്‍ നിന്ന് 1.73 കോടി രൂപ വിനിയോഗിച്ച് ആഞ്ഞിലിത്താനം ജി.എല്‍.പി.എസില്‍ പി.ഡബ്ല്യൂ.ഡിയാണ് സ്‌കൂള്‍ കെട്ടിടം നിര്‍മിക്കുന്നത്.  പൊതുമരാമത്ത് വകുപ്പ് രൂപകല്‍പ്പന ചെയ്ത കെട്ടിടം മൂന്നുനിലകള്‍ക്കായുള്ള അടിത്തറയോടു കൂടിയാണ് നിര്‍മിക്കുക.

ആറന്മുളയെ എഡ്യുക്കേഷന്‍ സോണ്‍ ആക്കി മാറ്റുമെന്ന് വീണാ ജോര്‍ജ് എംഎല്‍ എ പറഞ്ഞു. ആറന്മുള എന്‍ജിനീയറിംഗ് കോളജിലെ പുതിയ അഡ്മിനിസ്‌ട്രേറ്റീവ് ആന്‍ഡ് അക്കാദമിക് ബ്ലോക്കിന്റെ ഉദ്ഘാടന ചടങ്ങില്‍ ശിലാഫലകത്തിന്റെ അനാച്ഛാദനം നിര്‍വഹിച്ച് സംസാരിക്കുകയായിരുന്നു എംഎല്‍എ.

സംസ്ഥാന സര്‍ക്കാര്‍ അധികാരത്തില്‍ വന്നതിനു ശേഷം പൊതുവിദ്യാഭ്യാസ രംഗത്ത് മികച്ച പ്രവര്‍ത്തനങ്ങളാണ് നടക്കുന്നതെന്ന് ചിറ്റയം ഗോപകുമാര്‍ എംഎല്‍എ പറഞ്ഞു. തോട്ടക്കോണം ഗവ. ഹയര്‍ സെക്കന്‍ഡറി സ്‌കൂളില്‍ കിഫ്ബി ഫണ്ട് ഉപയോഗിച്ച് നിര്‍മിക്കുന്ന ബഹുനില കെട്ടിടത്തിന്റെ ശിലാസ്ഥാപന ചടങ്ങില്‍ ഓണ്‍ലൈന്‍ മുഖേന സംസാരിക്കുകയായിരുന്നു എംഎല്‍എ.

സംസ്ഥാന സര്‍ക്കാരിന്റെ നൂറുദിന കര്‍മ പദ്ധതിയുടെ ഭാഗമായി തോട്ടക്കോണം ഗവ. ഹയര്‍ സെക്കന്‍ഡറി സ്‌കൂളില്‍ കിഫ്ബി ഫണ്ട് ഉപയോഗിച്ച് നിര്‍മിക്കുന്ന ബഹുനില കെട്ടിടത്തിന്റെ ശിലാസ്ഥാപനം മുഖ്യമന്ത്രി പിണറായി വിജയന്‍ ഓണ്‍ലൈന്‍ മുഖേന  നിര്‍വഹിച്ചു. പൊതു വിദ്യാഭ്യാസ സംരക്ഷണ യജ്ഞത്തിന്റെ കീഴില്‍ മൂന്നു കോടി രൂപ വിനിയോഗിച്ചാണ് കെട്ടിടം നിര്‍മിക്കുന്നത്.
പൊതുവിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് അധ്യക്ഷത വഹിച്ചു. നിയമസഭാ സ്പീക്കര്‍ പി. ശ്രീരാമകൃഷ്ണന്‍, റവന്യു മന്ത്രി ഇ. ചന്ദ്രശേഖരന്‍, വ്യവസായ മന്ത്രി ഇ. പി. ജയരാജന്‍, ധനമന്ത്രി ഡോ. ടി. എം. തോമസ് ഐസക്ക് എന്നിവര്‍ സംസാരിച്ചു.